Indi Kamo Magkabalaka

Ginadugang ko ang akon pamatuod sa mga mensahe ni Pangulong Russell M. Nelson kag Elder Quentin L. Cook wala lang dugay parte sa pagsantoanay kag pag-isa sang Konseho sang Unang Pangulohan kag Korum sang Dose ka Apostoles. Kahibalo ako nga ini nga mga pahayag amo ang pagbuot sang Ginuo kag magabugay kag magapabaskog ini sa mga indibidwal, mga pamilya, kag sa Ang Simbahan ni Jesucristo sang mga Santos sa Ulihing mga Adlaw sa mga henerasyon nga magaabot.

Pila na ka tuig ang nagligad, isa sa mga bata ko kag ang iya bana nagpamangkot sa amon ni Sister Rasband. Ini importante kaayo, makaimpluwensya-sang-kabuhi nga pamangkot: “Wala sing peligro kag maalamon bala nga magbun-ag sang mga bata sa sini nga malain kag haladlokan nga kalibutan nga ginapuy-an naton?”

Karon, importante ina nga pamangkot nga paminsaron sang isa ka nanay kag tatay upod ang mahal nila nga mga bata nga kasado na. Mabatian namon ang kahadlok sa ila tingug kag mabatyagan ang kahadlok sa ila tagipusoon. Piho ang sabat namon sa ila, “Huo, ok gid na,” samtang nagsaysay kami sang importante nga mga prinsipyo sang ebanghelyo kag sang amon mga nabatyagan kag naagyan sa kabuhi.

Indi na bag-o sa aton ang kahadlok. Ang mga disipulo ni Jesucristo, nga yara sa Dagat sang Galilea, nahadlok sa “unos kag ang mga balod” sa kadudulman sang gab-i.¹ Bilang Iya mga disipulo subong, kita man may kahadlok. Hadlok ang mga single adult sa pagpangako sang kasal. Hadlok ang hubin nga mga mag-asawa, parehas sa akon mga anak, nga magbun-ag sang mga bata sa padayon nga nagalain nga kalibutan. Damo kahadlok ang misyonero, ilabi na ang pagpalapit sa mga indi nila kilala. Hadlok ang mga balo nga mag-isahanon. Hadlok ang mga tinedyer nga indi sila pagbatonon; hadlok ang mga bata sa ila una nga adlaw sang pag-eskwela; hadlok ang mga estudyante sa kolehiyo sa resulta sang eksaminasyon. Hadlok kita nga malaglag, masikway, kag mapaslawan, kag hadlok man kita sa wala naton nabal-an. Hadlok kita sa mga bagyo, linog, kag kalayo nga nagapangguba sang duta kag kabuhi naton. Hadlok kita nga basi indi kita pagpilion, pero sa pihak, hadlok man kita nga pilion. Hadlok kita nga may kulang kita; hadlok kita nga ang Ginuo wala sang mga bugay para sa aton. Hadlok kita sa pagbag-o, kag ang aton kahadlok pwede maglala sa kakugmat. Wala ko bala gin-igo ang kada isa sa aton diri?

Halin pa sang una nga panahon, ang kahadlok naglimita sang panan-aw sa kabuhi sang mga anak sang Dios. Namian gid ako sang sugilanon parte kay Eliseo sa 2 Mga Hari. Ang hari sang Siria nagpadala sang kasoldadohan nga “nag-abot sa kagab-ihon, kag ginlikupan ang banwa.”² Naghandum sila nga bihagon kag patyon ang propeta nga si Eliseo. Mabasa naton:

“Sang nagbangon sing aga pa ang alagad sang tawo sang Dios kag naggwa, yari karon, ang kasoldadohan nga may mga kabayo kag mga kangga naglikup sa banwa. Kag ang iya alagad nagsiling sa iya, Abaw, agalon ko! ano bala ang himuon ta?”³

Kahadlok yadto ang nagahambal.

“Kag [si Eliseo] nagsabat, Dili ka magkahadlok: kay ang mga nagaupod sa aton madamo pa sa mga nagaupod sa ila.”⁴

Pero wala sia mag-untat dira.

“Nagpangamuyo si Eliseo, kag nagsiling, Ginuo, ginaampo ko sa imo, buksi ang iya mga mata agud nga makakita sia. Gani ginbuksan sang Ginuo ang mga mata sang pamatan-on nga lalaki, kag nakakita sia; kag yari karon, ang bukid hil-ob sang mga kabayo kag sang mga kangga nga kalayo sa palibut ni Eliseo.”⁵

Wala ukon may yara man ginapadala sa aton nga mga kangga ukon karwahe nga kalayo agud dulaon ang mga kahadlok naton kag daugon ang aton mga demonyo, pero klaro ang leksyon. Ara sa aton ang Ginuo, ginadumdum niya kita kag ginabugayan niya kita sa mga pamaagi nga Sia lang ang makahimo. Ang pangamuyo makahatag sang kusug kag rebelasyon nga kinahanglan naton agud isentro ang aton mga hunahuna kay Jesucristo kag sa Iya pagbayad-sala. Kahibalo ang Ginuo nga kon kis-a nahadlok kita. Naagyan ko ina, kag naagyan man ninyo, amo ina ang rason nga puno ang balaan nga mga kasulatan sang laygay sang Ginuo:

“Magkalipay kamo, kag indi magkahadlok.”⁶

“Magtulok sa akon sa tagsa ka panghunahuna; indi magduhaduha, indi magkahadlok.”⁷

“Indi magkahadlok, diutay nga panong.”⁸ Namian ako sang kalolo sang tinaga nga “diutay nga panong.” Ayhan diutay lang kita sa sining Simbahan sa pagkabig sang kalibutan sa impluwensya, pero kon buksan naton ang aton espiritual nga mata, “ang mga nagaupod sa aton madamo pa sa mga nagaupod sa ila.”⁹ Ang mapinalanggaon naton nga Manugpahalab nga si Jesucristo, nagpadayon, “Tugoti ang duta kag impiyerno nga magtingob batok sa inyo, kay kon natukod kamo sa akon bato indi sila magdaug.”¹⁰

Paano ayhan dulaon ang kahadlok? Para sa batan-on nga alagad, nagtupad sia kay Eliseo nga isa ka propeta sang Dios. May yara kita sang amo man nga promisa. Kon magpamati kita kay Pangulong Russell M. Nelson, kon patihon naton ang laygay niya, nagatupad kita sa propeta sang Dios. Dumduma ninyo ang ginhambal ni Joseph Smith: “Kag karon, pagkatapos sing madamo nga testimonya nga ginhatag parte sa iya, ini ang testimonya nga pinakaulihi sa tanan nga ginahatag namon parte sa iya: Nga buhi sia!”¹¹ Buhi si Jesucristo. Ang aton pagpalangga sa Iya kag sa Iya ebanghelyo makapadula sang kahadlok.

Ang handum naton nga “dalayon nga maangkon ang iya Espiritu”¹² sa pag-upod sa aton mapadula sang kahadlok para sa mas dayon nga panan-aw parte sa aton kabuhi sa duta. Nagpaandam si Pangulong Nelson nga, “Sa mga adlaw nga magaabot, indi kita mabuhi sing espirituhanon kon wala ang paggiya, pagtuytuy, pagpaumpaw kag dalayon nga impluwensiya sang Balaan nga Espiritu.”¹³

Ang Ginuo nagsiling parte sa mga pagsilot nga magalikop sang duta kag magapatig-a sang mga tagipusuon sang madamo nga tawo: “Ang akon mga disipulo magatindog sa balaan nga mga lugar, kag indi maisdog.”¹⁴

Kag dayon ini nga balaan nga laygay: “Indi magkabalaka kay kon ining tanan nga butang matabo mahibaloan ninyo nga ang mga promisa nga ginhimo sa inyo matuman.”¹⁵

Magtindog kamo sa balaan nga mga lugar—indi kamo magkabalaka—kag matuman ang mga promisa. Tan-awon naton ini isa-isa parte sa mga kahadlok naton.

Una, magtindog sa balaan nga mga lugar. Kon magtindog kita sa balaan nga mga lugar—aton matarong nga mga puluy-an, aton gindedikar nga mga kapilya, ang ginkonsagrar nga mga templo—mabatyagan naton ang presensya sang Espiritu sang Ginuo. Masalapoan naton ang mga sabat sa mga pamangkot nga nagatublag sa aton ukon ang kalinong nga mapahigad ini. Amo ina ang paghulag sang Espiritu. Ining balaan nga mga lugar sa ginharian sang Dios sa duta nagapangayo sang aton pagtahod, pagrespeto sa iban, aton pinakamaayo sa pagpangabuhi sang ebanghelyo, kag aton mga paglaum nga dulaon ang aton mga kahadlok kag tinguhaan ang nagapang-ayo nga gahum ni Jesucristo paagi sa Iya Pagbayad-sala.

Wala lugar ang kahadlok sa sining balaan nga mga lugar sang Dios ukon sa tagipusuon sang Iya mga anak. Nga-a man? Kay tungod sa pagpalangga. Palangga kita sang Dios—pirme—kag palangga naton Sia. Ang pagpalangga naton sa Dios nagaupang sa tanan naton nga kahadlok, kag bugana ang pagpalangga Niya sa balaan nga mga lugar. Hunahunaa ninyo ini. Kon alang-alang kita sa mga pangako naton sa Ginuo, kon magpalayo kita sa Iya dalan pakadto sa kabuhi nga wala’y katapusan, kon ginaduha-duhaan naton ang aton pulos sa Iya diosnon nga plano, kon ginapasugtan naton ang kahadlok nga mag-abiabi sa iya mga upod—kapaslawan, kaakig, kaugot, kasaklaw—magabiya ang Espiritu sa aton, kag wala na ang Ginuo sa aton. Kon naagyan mo ina, kahibalo ka nga indi maayo ang ina nga sitwasyon. Apang kon magtindog kita sa balaan nga mga lugar, mabatyagan naton ang pagpalangga sang Dios, kag “ang himpit nga gugma nagatabog sang tanan nga kahadlok.”¹⁶

Ang sunod nga promisa amo ang “Indi magkabalaka.”¹⁷ Bisan ano pa kalain kag kagamo sang kalibutan, sa aton adlaw-adlaw nga katampad kay Jesuristo ginapromisa sa aton “ang paghidaet sang Dios, nga nagalabaw sa tanan nga paghangop.”¹⁸ Kag sa pagkari ni Cristo nga may tanan nga gahum kag himaya, matapos na ang kalainan, pagrebelde, kag inhustisya.

Sang una, si Apostoles Pablo nagpropesiya parte sa aton panahon, nga nagasiling sa batan-on nga si Timoteo:

“Apang hangpa ini, nga sa katapusan nga mga adlaw magaabot ang makahalanguyos nga mga tion.

“Kay ang mga tawo magamahigugmaon sang kauglingon, mahigugmaon sang kwarta, bugalon, palabilabihon, mapasipalahon, malalison sa mga ginikanan, di-mapinasalamaton, di-balaan. …

“... mahigugmaon sa kinasadya sa baylo sang sa Dios.”¹⁹

Dumdumon ninyo nga “ang mga nagaupod sa aton” sa duha ka bahin sang belo, ang mga nagapalangga sa Ginuo sa bug-os nila nga tagipusuon, ikasarang, hunahuna, kag kusog, “madamo pa sa mga nagaupod sa ila.”²⁰ Kon magsalig kita sa Ginuo kag sa Iya pamaagi, kon nagahimo kita sang Iya buluhaton, indi kita magkahadlok sang mga huyog sang kalibutan ukon magkabalaka bangod sa ila. Nagapangabay ako sa inyo nga ipahigad ninyo ang kalibutanon nga mga impluwensiya kag mga presyur kag mangita kamo sang espiritual nga kahiwatan sa inyo adlaw-adlaw nga pangabuhi. Palanggaon ninyo ang mga butang nga palangga sang Ginuo—pati ang Iya mga kasugoan, Iya balaan nga mga balay, aton sagrado nga mga kasugtanan sa Iya, ang sakramento kada Adlaw nga inugpahuway, aton komunikasyon paagi sa pagpangamuyo—kag indi kamo magkabalaka.

Ang ulihi nga punto: magsalig sa Ginuo kag sa Iya mga promisa. Kahibalo ako nga matuman ang tanan nga Iya ginpromisa. Ari ako sa atubang ninyo tungod nabal-an ko ini.

Ang Ginuo nagpahayag: “Kay sila nga maalam kag nagbaton sang kamatuoran, kag naghimo sang Balaan nga Espiritu nga ila giya, kag wala napatalang—sa pagkamatuod ginasiling ko sa inyo, indi sila pagasikwayon kag idap-ong sa kalayo kundi malampuwasan nila ang adlaw sang pagkari sang Ginuo.”²¹

Amo ini ang rason nga indi kita dapat magkabalaka sa kagamo sang aton panahon, sa mga yara sa dako kag malapad nga bilding, ukon sa mga nagayaguta sa sinsero nga pagtinguha kag maukod nga pag-alagad kay Ginuong Jesucristo. Ang pagkapositibo, kaisog, bisan pa himpit nga paghigugma halin sa tagipusuon nga wala nabug-atan sang mga kabalaka ukon kagamo. Si Pangulong Nelson, nga “positibo parte sa palaabuton,” nagpadumdum sa aton nga, “Agud nga mahantop naton ang di-maisip nga mga tingug kag mga pilosopiya sang katawhan nga nagakontra sa kamatuoran, kinahanglan mabal-an naton kon paano magbaton sang rebelasyon.”²²

Agud magbaton sang personal nga rebelasyon, kinahanglan naton nga unahon ang pagpangabuhi sang ebanghelyo kag magpaisog sang katampad kag espirituwalidad sa aton kaugalingon kag sa iban.

Si Spencer W. Kimball ang isa sang mga propeta sang bata pa ako. Sining nagligad nga pila ka tuig, halin sang gintawag ako nga mangin Apostoles, nakabatyag ako sang paghidaet sa iya una nga mensahe sa pangkabilogan nga komperensya sang Oktubre 1943. Nahalawhaw sia sang iya palangakoan; naagyan ko man ina. Hambal ni Elder Kimball: “Grabe ang akon pagpaminsar kag pagpangamuyo, kag pagpuasa kag pagpangamuyo. Lain-lain ang nagsulod sa paminsaron ko—may mga tingug nga nagasiling: ‘Indi ka kasarang sang obra. Indi ka takos. Wala ka sang abilidad’—pero sa ulihi pirme nagaabot ang positibo nga hunahuna: ‘Kinahanglan mo himuon ang obra nga gintakay sa imo—sarangon mo kag mangin takos kag kaangay-angay.’ Kag nagpadayon sia.”²³

Nalipay ako sa sinsero nga testimonya sining Apostoles nga nangin ika-12 nga Pangulo sining gamhanan nga Simbahan. Nabaton niya nga kinahanglan niya dulaon ang iya kahadlok agud “mahimo ang buluhaton nga gintakay sa iya” kag kinahanglan niya man nga magsandig sa Ginuo para sa kusog nga “makasarang, mangin takos kag kaangay-angay.” Kita amo man. Magapadayon ang mga pagtilaw, pero atubangon naton ini paagi sa Espiritu sang Ginuo. “Indi kita magkabalaka” kay kon mag-apin kita sa Ginuo kag ipangabuhi ang Iya mga prinsipyo kag Iya wala’y katapusan nga plano, nagatindog kita sa balaan nga lugar.

Kag karon, ano gani natabo sa akon bata kag umagad nga may seryoso kag mausisaon, may kahadlok nga pamangkot sing pila na ka tuig nga nagligad? Ginpaminsar gid nila ang amon paghinambalanay sang amo sadto nga gab-i; nagpangamuyo sila kag nagpuasa, kag nakasalapo sang sabat. Nagasinadya na sila kag kami pa gid, bilang lolo kag lola, kay nabugayan sila sang pito ka matahom nga mga kabataan, kag nagapadayon sila sa pagtuo kag pagpalangga.

Litrato

Pito sang mga apo nila ni Elder kag Sister Rasband

Magpakabakod kamo, mga kauturan. Huo, nagakabuhi kita sa mabudlay nga panahon, pero kon maglakat kita sa banas sang kasugtanan, indi kita dapat mahadlok. Ginabendisyonan ko kamo nga samtang ginahimo ninyo ini, indi kamo magkabalaka tungod sa panahon naton ukon sa mga pagtilaw nga nagaabot sa inyo. Ginabendisyonan ko kamo nga pilion nga magtindog sa balaan nga mga lugar kag indi maisdog. Ginabendisyonan ko kamo nga magpati kamo sa mga promisa ni Jesucristo, nga buhi Sia, kag nga nagabantay Sia sa aton, kag nagaulikid kag nagapangapin sa aton. Sa ngalan sang aton Ginuo kag Manluluwas nga si Jesucristo, amen.