Mga Kababayin-an kag Pagtuon sang Ebanghelyo sa Puluy-an

Pinalangga kong mga sister, manami ang makipagkita sa inyo. Isa ini ka makakulunyag nga tion sa Ang Simbahan ni Jesucristo sang mga Santos sa Ulihing mga Adlaw. Ang Ginuo nagabubu sang kaalam parte sa Iya Simbahan suno sa Iya ginpromisa nga Iya himuon.

Nadumduman bala ninyo nga nagpamangkot sia kon tubtob san-o nga ang mga nagalukot nga mga tubig magapabilin nga mahigko? Ano nga gahum ang magapugong sa mga kalangitan? Imposible para sa isa ka mortal nga tawo mag-untay sang iya maluya nga butkon agud ang pag-ilig sang tubig sa subang Missouri palisuon sa pihak nga direksyon, nga daw sa inang masarangan sang isa ka tawo nga punggan ang Makakagahum sa pagbubu sang kaalam gikan sa langit pakadto sa utak sang mga santos sa ulihing mga adlaw.¹

Kabahin sa karon nga pagpaambit sang Ginuo sang kaalam nagaangot sa pagpasanyog sang Iya pagbubu sang wala’y katapusan nga kaalam kag paghigugma sa Iya katawhan. Iya gin-athag nga ang mga anak nga babayi sang Amay nga Langitnon magadala sang mayor nga papel sa sina nga milagroso nga pagsanyog. Isa ka ebidensya sang milagro amo ang Iya paggiya sang Iya buhi nga propeta agud makapakita sang mas daku nga pagpaklaro sa pagpanulin sang ebanghelyo sa puluy-an kag sa sulod sang panimalay.

Mahimo kamo magpamangkot, “Paano ina nagahimo sa matinuohon nga mga sister nga isa ka mayor nga pwersa sa pagbulig sa Ginuo sa pagbubu sang kaalam sa Iya mga Santos?” Ang Ginuo naghatag sang sabat sa “Ang Panimalay: Isa ka Proklamasyon sa Kalibutan.” Nahibal-an mo ang mga tinaga, apang mahimo nga makit-an mo ang isa ka bag-o nga kahulugan kag mahibal-an nga nakita na ngadaan sang Ginuo ining mga makakulunyag nga mga pagbag-o, nga nagakalatabo subong. Sa proklamasyon, Iya ginhatagan sang obligasyon ang mga sister nga amo ang magin puno nga mga manugtudlo sang ebanghelyo sa ila panimlay sa sini nga mga tinaga: “Ang mga iloy amo ang pinakamayor nga responsable para sa pagsagod sang ila mga kabataan.”² Ini nagaupod sang pagbatiti sa kamatuoran sang ebanghelyo kag kaalam.

Ang proklamasyon nagapadayon: “Ang mga amay kag mga iloy obligado sa pagbuligay bilang magkatupong nga magkatuwang.”³ Magkatupong sila nga magkatuwang, magkatupong sa ila ikasarang para sa espiritwal nga pagtubo kag sa pag-angkon sang kaalam, kag gani nagaisa sila kon nagabuligay sila sa isa kag isa. Magkatupong sila sa ila diosnon nga kadangatan nga pareho nga mapahitaas. Sa pagkamatuod, ang mga lalake kag mga babayi indi mapahitaas nga wala ang isa kag isa.

Ngaa, man, nga ang anak nga babayi sang Dios sa nagaisa kag magkatupong nga kaangtanan nagabaton sang pinakamayor nga responsibilidad sa pagsagod sang pinakaimportante nga ihibalo sang kamatuoran nga naghalin sa langit nga ginakinahanglan mabaton sang tanan? Suno sa akon nahibal-an, amo ina ang pamaagi sang Ginuo sumugod sang ang mga pamilya gintuga sa sining kalibutan.

Halimbawa, si Eba amo yadtong nakabaton sang ihibalo nga kinahanglanon ni Adan ang magkaon sang prutas sang puno sang kaalam para sa ila agud matipigan ang tanan nga kasuguan sang Dios kag magporma sang panimalay. Wala ako nakahibalo kon ngaa nag-abot yadto una kay Eba, apang si Adan kag si Eba nangin himpit sa pag-isa sang ang kaalam ginbubu kay Adan.

Ang isa pa ka halimbawa nga ang Ginuo nagagamit sang pagsagod nga mga dulot sang mga babayi amo ang Iya pamaagi sa pagpabakod sa mga anak ni Helaman. Nangin emosyunal ako sang akon nabasahan ang sugilanon sa balaan nga mga kasulatan kag nadumduman ang malulu nga mga pulong sang akon kaugalingon nga iloy sang magbiya ako sa amon puluy-an para sa serbisyo-militar.

Ginsulat ni Helaman:

Gintudluan sila sang ila mga iloy, nga kon indi sila magduhaduha, pagaluwason sila sang Dios.

“Kag ginsaysay nila sa akon ang mga pulong sang ila mga iloy, nga nagasiling: Wala kami nagaduhaduha nga nahibal-an ini sang amon mga iloy.”⁴.

Bisan nga wala ako nakahibalo sang tanan nga rason sang Ginuo sa paghatag sang mayor nga responsibilidad sa pagsagod sang panimalay sa matinouhon nga mga sister, nagapati ako tungod ina sang inyo kapasidad nga maghigugma. Nagakinahanglan sang daku nga paghigugma ang mabatyagan ang mga panginahanglan sang iban labaw sangsa imo kaugalingon. Amo ina ang putli nga gugma ni Cristo para sa tawo nga inyo ginabatiti. Ina nga balatyagon sang kaluoy nagahalin sa sinang nagpili nga mangin manugbatiti nga nagakabagay para sa Pagpasag-uli ni Jesucristo. Ang moto sang Relief Society, nga among ginapakahalimbawa sang akon kaugalingon nga iloy nag-inspirar sa akon: “Ang Pulti nga Pagmahal Wala Nagakapaslawan.”

Bilang mga anak nga babayi sang Dios, may yara kamo sing kinaandan kag daku nga kapasidad nga mabatyagan ang mga panginahanglan sang iban nga tawo kag maghigugma. Ina, sa baylo, nagahimo sa inyo nga mas mangin sensitibo sa mga paghutik sang Espiritu. Ang Espiritu niyan magagiya kon ano ang inyo hunahunaon, ano ang inyo ihambal, kag ano ang inyo himuon sa pagbatiti sa mga tawo gani ang Ginuo magabubu sa inyo sang ihibalo, kamatuoran, kag kaisog para sa ila.

Kamong mga sister nga nagapamati sa sining pamulongpulong ang tagsa sa inyo yara sa isa ka pinasahi nga punto sa inyo panglakaton sa kabuhi. May bataon nga mga babayi nga yara sa pang-kabilugan nga sesyon sang kababayin-an sa una nga tion. May mga young women nga nagahanda nga mangin manugbatiti sa sahi nga luyag sang Dios nga sila mangin. May mga bag-ong kasal nga wala pa sing kabataan, ang iban bataon nga mga iloy nga may isa ka anak o masobra pa. May mga iloy sang mga tin-idyer kag ang iban may mga kabataan sa patag sang misyon. May mga iloy nga may kabataan nga nangin mahuyang sa pagtuo kag malayo sa puluy-an. May nagapuyo nga nagaisahanon nga wala sing mainunungon nga kaupod. Ang iban mga lola.

Apang, ano man ang inyo personal nga kahimtangan, kamo kabahin—isa ka importante nga bahin—sang panimalay sang Dios kag sang inyo kaugalingon nga panimalay, sa ulihi man, sa sini nga kalibutan, ukon sa kalilbutan sang mga espiritu. Ang inyo responsibilidad gikan sa Dios amo ang magbatiti sang mas madamo nga miyembro sang Iya kag sang inyo panimalay sa inyo masarangan nga may pagtuo kag paghigugma kay Ginuong Jesucristo.

Ang inyo kumon nga hangkat amo ang mahibal-an kon sin-o ang batition, paano kag kon san-o. Kinahanglan ninyo ang bulig sang Ginuo. Iya nahibal-an ang tagipusuon sang iban, kag Iya nahibal-an kon san-o sila nakahanda sa pagbaton sang inyo pagbatiti. Ang inyo pangamuyo sang pagtuo mangin importante sa inyo kadalag-an. Makasalig kamo nga makabaton sang Iya pag-gabay.

Iya ginhatag ining pagpaaisog, nga kon mangamuyo kita sa Amay sa Iya ngalan, nga may pagtuo nga kita makabaton, aton maangkon ang Espiritu nga Balaan, nga nagapakita sang tanan nga butang nga malahalon.⁵

Dugang pa sa pangamuyo, ang seryuso nga pagtuon sa balaan nga mga kasulatan mangin kabahin sa inyo nagatubo nga gahum sa pagbatiti. Yari ang promisa, ang Ginuo nagsiling: “Indi anay pagpamensaron kon ano ang imo ihambal. Padayon nga binagbinaga sa imo hunahuna ang mga pulong sang kabuhi, kay ihatag ina sa imo sa tion nga ginakinahanglan gid nimo.”⁶

Gani maghatag sang dugang nga tion sa pagpangamuyo, pagbinagbinag, kag sa pagpaino-ino sa espiritwal nga mga butang. Makaangkon kamo sing ihibalo sa kamatuoran nga ginbubu sa inyo kag magtubo sa inyo ikasarang sa pagbatiti sang iban sa inyo panimalay.

May mga tion nga magaabot nga inyo mabatyagan nga mahinay ang inyo pag-uswag sa pagtuon sing mas maayo nga pagbatiti. Nagakinahanglan ini sing pagtuo agud mabatas. Ang Manluluwas naghatag sa inyo sining pagpaisog:

Indi kita dapat magpaluya sa paghimo sing maayo, kay tungod nagapasad kita sang pundasyon sang isa ka daku nga buluhaton. Inang daku nga bagay naghalin sa sinang bagay nga magamay.

Ang Ginuo, paagi kay Propetang Joseph Smith, nagsiling nga iya ginapangayo ang tagipusuon kag handa nga pamensaron kag ang handa kag matinumanon magakaon sang kabuganaan sang duta sang Sion sa sining ulihing mga adlaw.⁷

Ang inyo pagtambong sa sini nga gab-i ebidensya nga handa kamo nga batunon ang pangagda sang Ginuo nga batition ang iban. Matuod ina bisan para sa pinakabata nga yari diri sini nga gab-i. Sarang ninyo mahibal-an kon sin-o ang batition sa inyo panimalay. Kon mangamuyo kamo nga may sinsero nga katuyuan, isa ka ngalan ukon isa ka nawong ang imo mahunahunaan. Kon magpangamuyo kamo agud mahibal-an kon ano ang himuon ukon ano ang ihambal, inyo mabatyagan ang sabat. Sa inyo tagsa ka pagpangamuyo, ang inyo gahum sa pagbatiti magatubo. Magahanda kamo para sa adlaw nga kamo magbatiti sang inyo kaugalingon nga kabataan.

Ang mga iloy sang mga tin-edyer mahimo magpangamuyo agud mahibal-an kon paano batition ang anak nga lalaki ukon babayi nga daw wala naga-ugyon sa pagbatiti. Mahimo kamo magpangamuyo agud mahibal-an kon ayhan sin-o nga espirituhanon nga impluwensya ang kinahanglanon sang imo anak kag batonon niya ining paggiya. Ang Dios nagapamati kag nagasabat kasubong sinang tinagipusuon nga mga pangamuyo sang nagakabalaka nga mga iloy, kag nagapadala Sia sing bulig.

Subong man, isa ka lola diri sini nga gab-i mahimo masakitan tungod sang presyur kag kabudlayan sa iya mga kabataan kag mga kaapohan. Sarang ikaw makaangkon sang kaisog kag direkssyon gikan sa mga inagihan sang mga panimalay sa balaan nga mga kasulatan.

Gikan sa panahon nanday Adan kag Eba, pakadto sa kay Tatay Israel, kag sa tagsa ka panimalay sa Libro ni Mormon, pat-od nga may yara gid isa ka leksyon kon ano ang himuon sa mga kasulub-on sang mga wala nagapalati nga mga kabataan: indi mag-untat sa paghigugma.

May yara kita sing nagapaisog nga halimbawa sang Manluluwas sang Iya ginabatiti ang mga rebelde nga espiritu nga mga anak sang Amay nga Langitnon. Bisan pa nga sila kag kita nagatuga sang kasakit, ang kamot sang Manluluwas sa gihapon nakauntay.⁸ Sia naghambal sa 3Nefi sa Iya espiruhanon nga mga kauturan, nga Iya gintinguhaan nga batition pero napaslawan: “O kamong katawhan … sang panimalay sang Israel, daw ano kasunson ko kamo nga ginapanipon subong sang isa ka munga nga nagapanipon sang iya mga piso sa idalom sang iya mga pakpak, kag ginsagod kamo.”⁹

Sa mga sister sa tagsa ka panahon sang pagpanglakaton sa kabuhi, sa tagsa ka sitwasyon sa panimalay, kag sa pagkinalainlain sang tagsa ka kultura, ang Manluluwas amo ang inyo perpekto nga ehemplo kon paano kamo magadala sang importante nga bahin sa Iya plano nga hatagan sang mas daku nga pagtutok and pagtuon sang ebanghelyo sa puluy-an kag panimalay.

Madala ninyo ang yara sa sulod ninyo nga balatyagon sang kaluoy sa mga pagbag-o sa mga hilikuton kag pagginawi sa inyo panimalay. Ina magadala sing dako nga espirituhanon nga pagtubo. Kon nagapangamuyo kamo nga magkaupod kag para sa inyo panimalay, inyo mabatyagan ang inyo kag ang iya sang Manluluwas nga paghigugma para sa ila. Ina magmangin labaw kag mas mangin labaw pa gid nimo nga espirituhanon nga dulot samtang imo ginapangita ini. Mabatyagan ini sang mga miyembro sang inyo panimalay kon kamo nagapangamuyo nga may mas daku nga pagtuo.

Kon ang panimalay nagatipon sa pagbasa sang balaan nga mga kasulatan, sing matunog, mahimo nga nabasahan nyo na ang mga ini kag nagpangamuyo parte sa ila agud mahanda ang inyo kaugalingon. Mahimo nga makit-an ninyo ang mga tinion nga magpangamuyo sa Espiritu agud maathagan ang inyo hunahuna. Nian, kon imo na tion sa pagbasa, ang mga miyembro sang panimalay makabatyag sang imo paghigugma sa Dios kag sa Iya pulong. Pagabatition Niya sila kag paagi sa iya Espiritu.

Ang kaangay nga pagbubu mahimo nga magaabot sa anuman nga mga pagtililipon sang panimalay kon imo ini pangamuyuan kag planuhan. Mahimo nga magkinahanglan ini sang pagpaninguha, apang ini magadala sang mga milagro. Akon nadumduman ang isa ka leksyon nga gintudlo sang akon iloy sang gamay pa ako. Akon pa sa gihapon madumduman sing maayo ang dekolor nga mapa nga iya ginhimo parte sa mga pagbiyahe sang Apostoles nga si Pablo. Natingala ako kon paano sia nakakita sing panahon agud himuon ato. Kag bisan sa karon, ginabugayan ako sang iya paghigugma para sa sina nga matinuohon nga apotoles.

Ang tagsa sa inyo makakita sang mga pamaagi sa pagbubu sang kamatuoran sa inyo mga panimalay sa ginpanumbalik nga Simbahan sang Ginuo. Ang tagsa sa inyo magpangamuyo, magtuon, kag magbinagbinag agud mahibal-an kon ano ang inyo mangin pinasahi nga kontribusyon. Apang ini akon nahibal-an, ang tagsa sa inyo, pareho nga nakagota kaupod ang lalaki nga mga anak sang Dios, mangin mayor nga bahin sang milagro sa pagtuon kag pagkabuhi sa ebanghelyo nga magapadasig sa pagpanipon sang Israel kag magahanda sang panimalay sang Dios para sa mahimayaon nga pagbalik ni Jesucristo. Sa sagrado nga ngalan ni Jesucristo, amen.