Isa kay Cristo
Akon pinalangga nga mga kaupod sa buluhaton sang Ginuo, nagapati ako may mahimo kita nga mas maayo kag dapat maghimo sing mas maayo sa pag-abi-abi sa bag-o nga mga abyan sa Simbahan.
Maayong hapon, akon pinalangga nga mga kauturan. Sa amon hambal sa Brasiliano Portuges, “Boa tarde!” Bulahan ako nga nagtililipon kita sa sining manami nga pangkabilogan nga komperensya sang Ang Simbahan ni Jesucristo sang mga Santos sa Ulihing mga Adlaw sa idalom sang direksyon sang aton pinalangga nga propeta nga si Panglong Russell M. Nelson. Nagadayaw ako sa dako nga oportunidad nga may ara kita sa pagpamati sa tingug sang Ginuo paagi sa Iya mga alagad sa kalibutan sa sining ulihing mga adlaw nga ginakabuhian naton.
Ang akon pungsod nga Brasil may madamo gid nga natural nga mga manggad. Isa sa ila ang sikat nga Subang Amasona, isa sa pinakadako kag pinakalaba nga mga suba sa kalibutan. Ginaporma ini sang duha ka lain nga suba, ang Solimões kag Negro. Makatilingala nga nagailig ang mga ini sing pila ka milya antes matingob ang mga suba kay lain gid ang ila mga tuburan, mga kadasigon, mga temperatura kag mga kemikal sini. Pagkatapos sang pila ka milya, nagatingob ang mga suba sa isa lang ka suba nga lain sa mga bahin sini. Pagkatapos nga magtingob ining mga bahin, ang Subang Amasona mangin tuman ka kusog sa bagay nga kon makalab-ot na ini sa Dagat Atlantiko, ginapaatras sini ang tubig sang dagat sa bagay nga bisan sa pila ka milya sang dagat preska sa gihapon ang tubig.
Sa anggid nga pamaagi nga ang mga Subang Solimões kag Negro nagatingob agud mangin ang dako nga Subang Amasona, ang mga anak sang Dios nagatingob sa ginpanumbalik nga Simbahan ni Jesucristo gikan sa lain-lain nga sosyedad, mga tradisyon, kag mga kultura, sa paghimo sining manami nga komunidad sang mga Santos kay Cristo. Sa ulihi, samtang nagapaisog kita, nagasuporta, kag nagapalangga sa isa kag isa, magatingob kita agud mangin isa ka dako nga puwersa sang kaayo sa kalibutan. Bilang mga sumulunod ni Jesucristo nga nagailig bilang isa sa sining suba sang kaayohan, makahatag kita sang “preska nga tubig” sang ebanghelyo sa uhaw nga kalibutan.
Gin-inspirar sang Ginuo ang Iya mga propeta nga tudloan kita kon paano kita makasuporta kag magpalangga sa isa kag isa agud mangin isa kita sa pagtuo kag katuyoan sa pagsunod kay Jesucristo. Si Pablo, ang Apostoles sang Bag-ong Katipan, nagtudlo nga ang mga “ginbautisohan kay Cristo nagsuklob kay Cristo … : kay kamo tanan isa kay Cristo Jesus.”1
Kon magpromisa kita sa bunyag nga magsunod sa Manluluwas, nagasaksi kita sa atubang sang Amay nga handa kita sa pagdala sang ngalan ni Cristo sa aton kaugalingon.2 Samtang nagatinguha kita nga mag-angkon sang Iya diosnon nga mga kinaugali sa aton mga kabuhi, mangin lain kita sangsa sang una, paagi sa Pagbayad-sala ni Cristo nga Ginuo, kag ang pagpalangga naton para sa tanan nga tawo natural nga magdako.3 May ara kita sang sinsero nga kabalaka sa kaayohan kag kalipayan sang tanan. Ang panulok naton sa isa kag isa daw mag-ulolutod, mga anak sang Dios nga may diosnon nga ginhalinan, mga kinaugali, kag potensyal. Luyag naton nga mag-atipan sa isa kag isa kag magpas-an sang mga kabudlayan sang isa kag isa.4
Ini ang gugma nga ginsaysay ni Pablo.5 Si Mormon, isa ka propeta sang Libro ni Mormon, nagsaysay sini bilang “ang putli nga gugma ni Cristo,”6 nga amo ang labing maayo, labing dungganon, kag labing mabakod nga klase sang pagpalangga. Ang propeta naton subong, si Pangulong Russell M. Nelson, sini lang nagsaysay nga ang pagpahayag sang sining putli nga gugma ni Cristo amo ang pagpangalagad, nga amo ang mas nakasentro kag mas balaan nga pamaagi sa pagpalangga kag pag-atipan sa iban nga mga tawo pareho sa ginhimo sang Manluluwas.7
Hunahunaon naton ining prinsipyo sang pagpalangga kag pag-atipan, pareho sang ginhimo sang Manluluwas, sa konteksto sang pagpaisog, pagbulig, kag pagsuporta sa bag-o nga mga nahaylo kag sa mga nagasugod sa pagpakita sang interes sa pagsimba sa aton Simbahan.
Kon ining bag-o nga mga abyan magbiya sang kalibutan kag magbaton sang ebanghelyo ni Jesucristo, nga nagabuylog sa Iya Simbahan, sila mangin Iya mga disipulo, nga matawo liwat paagi sa Iya.8 Bayaan nila ang kalibutan nga nakilala nila sing maayo kag pilion nga magsunod kay Jesucristo nga may bug-os nga katuyoan sang tagipusuon, nga nagaupod sa bag-o nga “suba” pareho snga dako nga Subang Amason —isa ka suba nga mabaskog ang puwersa sang kaayo kag pagkamatarong nga nagailig padulong sa presensya sang Dios. Ang Apostoles nga si Pedro nagasaysay sini bilang “pinili nga kaliwatan, harianon nga pagkasacerdote, balaan nga pungsod, katawhan nga iya sang Dios.”9 Samtang nagatingob ining bag-o nga mga abyan sa sining bag-o kag di-kilala nga suba, siguro mabatyagan nila nga daw nagtalang sila sa una. Marealisar sining bag-o nga mga abyan nga ginatingob sila sa suba nga may pinasahi nga mga tuburan, mga temperatura, kag mga kemikal—isa ka suba nga may kaugalingon nga mga tradisyon, kultura, kag bokabularyo. Ayhan daw mahalawhaw sila sa sining bag-o nga kabuhi kay Cristo. Pinsara sing kadali kon ano ayhan ang mabatyagan nila kon mabatian nila sa una nga tion ang mga tinaga nga “FHE,” “BYC,” “Domingo nga inugpuasa,” “bunyag para sa mga minatay,” “triple combination,” kag iban pa.
Hapos lang makita kon ngaa mabatyagan nila nga daw wala sila naisip sa aton Simbahan. Sa amo nga mga situwasyon, siguro magpamangkot sila sa ila kaugalingon, “May lugar bala ako diri? Bagay bala ako sa Ang Simbahan ni Jesucristo sang mga Santos sa Ulihing mga Adlaw? Kinahanglan bala ako sang Simbahan? Makakita bala ako sang bag-o nga mga abyan nga handa sa pagbulig kag pagsuporta sa akon?”
Akon pinalangga nga mga abyan, sa amo nga mga tinion, kita nga yara sa lain-lain nga mga kahimtangan sa dugay nga pagpanglakaton sang pagkadisipulo dapat magdab-ot sa aton bag-o nga mga abyan, magbaton sa ila kon diin sila, kag magbulig, magpalangga, kag maglakip sa ila sa aton mga kabuhi. Tanan sining bag-o nga mga abyan bilidhon nga mga anak sang Dios.10 Indi gid pwede nga bisan isa sa ila madula, kay pareho sa Subang Amasona nga nagasalig sa gagmay nga mga suba nga nagapadako sa sini, kinahanglan sila naton pareho nga kinahanglan nila kita agud mangin dako nga puwersa sang kaayo sa kalibutan.
Ang aton bag-o nga mga abyan nagadala sang mga talento halin sa Dios, kakunyag, kag kaayo sa sulod nila. Ang ila kapagsik para sa ebanghelyo pwede magpanglaton, nga makabulig sa aton nga mapabag-o ang aton kaugalingon nga mga testimonya. Nagadala man sila sang bag-o nga mga panan-aw sa aton pagkahangop sang kabuhi kag sang ebanghelyo.
Dugay na kita natudloan kon paano kita makabulig sa aton bag-o nga mga abyan nga mabatyagan nga ginaabi-abi kag ginapalangga sila sa ginpanumbalik nga Simbahan ni Jesucristo. Tatlo ka butang ang kinahanglan nila agud magpadayon sila nga mangin mabakod kag matinumanon sa ila mga kabuhi:
Una, kinahanglan nila sang mga utod sa Simbahan nga interesado sing sinsero sa ila, matuod kag tampad nga mga abyan nga masaligan nila pirme, nga maglakat sa ila tupad, kag magsabat sang ila mga pamangkot. Bilang mga miyembro, dapat kita pirme mangin matalupangdon kag magpangita sang bag-o nga mga guya sa pagtimbong sa mga kahiwatan kag miting sang Simbahan, nga wala labot sang mga responsibilidad, mga buluhaton, ukon mga kabalakhan nga may ara kita. Pwede kita maghimo sang simple nga mga butang agud buligan ining bag-o nga mga abyan nga mabatyagan nga ginabaton kag ginaabi-abi sa Simbahan, subong sang pagkamusta, pagyuhum sing sinsero sa ila, pagpungko upod sa ila sa pagkanta kag pagsimba, pagpakilala sa ila sa iban nga mga miyembro, kag iban pa. Samtang ginabuksan naton ang aton mga tagipusuon sa aton bag-o nga mga abyan sa pila sining mga paagi, nagaakto kita sa espiritu sang pagpangalagad. Kon magpangalagad kita sa ila pareho sa ginhimo sang Manluluwas, indi nila mabatyagan nga sila daw “mga estranghero sa sulod sang aton mga pwertahan.” Mabatyagan nila nga daw bagay sila kag makakita sang bag-o nga mga abyan, kag ang pinaka-importante, mabatyagan nila ang pagpalangga sang Manluluwas paagi sa aton tunay nga pagpalangga.
Ika-duha, kinahanglan sang bag-o nga mga abyan sang responsibilidad – isa ka oportunidad para mag-alagad sa iban. Ang pagpangalagad isa sa dako nga mga kaalam sang Ang Simbahan ni Jesucristo sang mga Santos sa Ulihing mga Adlaw. Paagi sa sining proseso ang aton pagtuo mangin mas mabakod. Ang kada bag-o nga abyan dapat may ara sina nga oportunidad. Samtang ang bishop kag ward council may direkta nga katungdanan nga maghatag sang mga responsibilidad pagkatapos sang ila bunyag, pwede kita bilang mga miyembro nga maghagad sa aton bag-o nga mga abyan sa pagbulig sa aton nga mag-alagad sa iban ukon paagi sa mga proyekto sa pag-alagad.
Ika-tatlo, ang bag-o nga mga abyan dapat “mabatiti sang maayo nga pulong sang Dios.”11 Pwede kita magbulig sa ila nga magpalangga kag mangin pamilyar sa balaan nga mga kasulatan samtang nagabasa kita kag nagahinambalanay sang mga panudlo upod sa ila, nga nagahatag sang konteksto sa mga sugilanon kag nagapaathag sang mabudlay nga mga pulong. Makatudlo man kita sa ila kon paano magbaton sang personal nga paggiya paagi sa regular nga pagtuon sang balaan nga mga kasulatan. Dugang pa, pwede kita magdangop sa aton bag-o nga mga abyan sa ila kaugalingon nga mga puluy-an kag hagaron sila sa aton mga puluy-an sa tinion nga luwas sa regular nga mga miting kag mga kahiwatan sa Simbahan, nga nagabulig sa ila nga mag-isa sa dako nga suba sang komunidad sang mga Santos.
Sa pagkahangop sang mga pagbag-o kag mga hangkat nga ginaagihan sang aton bag-o nga mga abyan sa pagmangin mga miyembro sang pamilya sang Dios, bilang aton mga utod, pwede kita magpaambit kon paano kita nagdaug sa amo man nga mga hangkat sa aton mga kabuhi. Magabulig ini sa ila nga mabal-an nga wala sila nagaisahanon kag ang Dios magapakamaayo sa ila samtang nagapakita sila sang pagtuo sa Iya mga promisa.12
Kon magtingob na ang mga Subang Solimões kag Negro, ang Subang Amasona nagadako kag nagabaskog. Kaangay sini, kon kita kag ang aton bag-o nga mga abyan matuod-tuod nga mangin isa, ang ginpanumbalik nga Simbahan ni Jesucristo mangin mas mabakod kag mas malig-on. Ang akon palangga nga si Rosana kag ako tuman ka mapinasalamaton sa tanan nga nagbulig sa amon sa pag-upod sa sining bag-ong suba pila na ka tuig ang nagligad, sang ginbaton namon ang ebanghelyo ni Jesucristo sa amon pungsod sang Brasil. Sa mga tinuig, ining manami nga katawhan matuod-tuod nga nagpangalagad sa amon kag nagbulig sa amon sa pagpadayon padulong sa pagkamatarong. Nagapasalamat gid kami sa ila.
Ang mga propeta sa Amerika nakahibalo gid kon paano ipabilin nga tampad ang bag-o nga mga abyan sa sining bag-o nga suba sang kaayo padulong sa kabuhi nga wala’y katapusan. Halimbawa, sa pagkakita sang aton panahon kag nakahibalo nga magaatubang kita sa pareho nga mga hangkat,13 naglakip si Moroni sing pila sining importante nga mga tikang sa iya mga kasulatan sa Libro ni Mormon:
“Kag pagkatapos nga nabaton sila sa bunyag, kag maliso kag matinluan paagi sa gahum sang Balaan nga Espiritu, gin-isip sila sa tunga sang katawhan sang simbahan ni Cristo; kag ang ila mga ngalan ginpanguha, agud madumduman sila kag mabatiti sang maayo nga pulong sang Dios, sa pagtipig sa ila sa husto nga dalan, sa pagtipig sa ila nga dalayon nga nagaaligmat sa pangamuyo, nga nagasandig lamang sa mga merito ni Cristo, nga amo ang pangulo kag manughimpit sang ila pagtuo.
“Kag ang simbahan masunson nga nagtililipon sing tingob, sa pagpuasa kag pagpangamuyo, kag sa paghinambalanay ang isa sa isa nahanungod sa kaayuhan sang ila mga kalag.”14
Akon pinalangga nga mga kaupod sa buluhaton sang Ginuo, nagapati ako may mahimo kita nga mas maayo kag dapat maghimo sing mas maayo sa pag-abi-abi sa bag-o nga mga abyan sa Simbahan. Ginaagda ko kamo sa pagbinagbinag kon ano ang pwede naton himuon agud maghakos, magbaton, kag magbulig pa gid sa ila, sumugod sining Domingo. Maghalong nga ang inyo mga responsibilidad sa Simbahan indi magsablag sa pag-abi-abi sa bag-o nga mga abyan sa mga miting kag kahiwatan sang Simbahan. Sa bagay, bilidhon ining mga kalag sa mga mata sang Dios kag mas importante sangsa mga programa kag mga kahiwatan. Kon mag-alagad kita sa aton bag-o nga mga abyan nga may tagipusuon nga napuno sang putli nga gugma pareho sa ginhimo sang Manluluwas, ginapromisa ko sa inyo, sa Iya ngalan, nga buligan Niya kita sa mga pagpangabudlay naton. Kon magbuhat kita bilang matinumanon nga mga alagad, pareho sa ginhimo sang Manluluwas, ang aton bag-o nga mga abyan magabaton sang bulig nga kinahanglan nila agud magpadayon nga mangin mabakod, dedikado, kag matinumanon tubtob sa katapusan. Magaupod sila sa aton samtang nagabakod kita nga katawhan sang Dios kag magabulig sa aton sa pagdala sang preska nga tubig sa kalibutan nga nagakinahanglan sing tuman sang mga bugay sang ebanghelyo ni Jesucristo. Ining mga anak sang Dios magabatyag nga “indi na kamo mga dumuluong kag mga dumalayon, kundi mga masigkabanwahanon kamo kaupod sang mga balaan.”15 Ginapromisa ko sa inyo nga makilala nila ang presensya sang aton Manluluwas nga si Jesucristo sa Iya kaugalingon nga Simbahan. Magapadayon sila sa pag-upod sa aton nga daw isa ka suba sa tuburan sang tanan nga kaayo tubtob nga mabaton sila sa bukas nga mga butkon sang aton Ginuong Jesucristo, kag mabatian nila ang Amay nga nagasiling, “Inyo maangkon ang kabuhi nga wala’y katapusan.”16
Ginaagda ko kamo sa pagpangayo sang bulig sang Ginuo sa pagpalangga sang iban pareho sang Iya pagpalangga sa inyo. Magsunod kita tanan sa laygay nga ginhatag ni Mormon: “Gani, pinalangga kong mga kauturan, magpangamuyo sa Amay sa bug-os nga ikasarang sang tagipusuon, agud mapuno kamo sa sining gugma, nga iya ginhatag sa tanan nga matuod nga mga sumolunod sang iya Anak nga si Jesucristo.”17 Sa sining mga kamatuoran, nagasaksi ako kag ginahimo ko ini sa ngalan ni Jesucristo, amen.