Ang Magmangin Huwaran nga mga Santos sa Ulihing mga Adlaw

Nangin isa ini ka makainspirar kag makasaysayan nga komperensya. Nagatulok kita sa palaabuton nga may kapagsik! Ginapaisog kita nga himuon ang mas maayo kag mangin mas maayo. Ang matahum nga mga mensahe nga ginhambal sa sining pulpito sang aton Pangkabilogan nga mga Awtoridad kag Pangkabilogan nga mga Opisyales kag ang musika nangin makatalandog! Ginapangabay ko kamo nga tun-an ining mga mensahe, sumugod sining semana.¹ Ginapahayag sang mga ini ang panghunahuna kag pagbuot sang Ginuo para sa Iya katawhan, sa karon nga panahon.

Ang bag-o nga nasentro sa puluy-an, suportado sang Simbahan nga gintingob nga kurikulum may potensyal sa pagpa-gwa sang gahum sang mga pamilya, samtang ang tagsa ka pamilya matutom kag mahinalungon nga nagatuman agud himuon ang ila puluy-an nga isa ka santuaryo sang pagtuo. Ginapromisa ko nga samtang matutom ninyo nga ginapanami ang inyo puluy-an agud mangin sentro sang pagtuon sang ebanghelyo, sa kadugayan ang inyo mga Adlaw nga Inugpahuway matuod nga mangin makalilipay. Ang inyo kabataan malangkag sa pagtuon kag sa pagpangabuhi sang mga pinanudlo sang Manluluwas, kag ang impluwensya sang kaaway sa inyo kabuhi kag sa inyo puluy-an magabuhin. Ang mga pagbag-o sa inyo pamilya mangin talalupangdon kag dalayon.

Sa sining komperensya aton ginpabakod ang aton pangako nga himuon ang kinahanglanon nga pagpaninguha agud tahuron ang Ginuong Jesucristo tagsa ka tion nga magtumod kita sa Iya Simbahan. Ginapangako ko sa inyo nga ang aton matutom nga atensyon sa paggamit sang husto nga ngalan sang Simbahan sang Manluluwas kag sa mga miyembro sini magadala sing mas dako nga pagtuo kag pagtigayon sang mas dako nga espirituhanon nga gahum para sa mga miyembro sang Iya Simbahan.

Karon masaylo kita sa topiko sang mga templo. Nakahibalo kita nga ang aton oras sa templo importante kaayo sa aton kaluwasan kag pagkahitaas kag sa iya sang aton mga panimalay.

Pagkatapos nga mabaton naton ang aton kaugalingon nga mga ordinansa sa templo kag maghimo sang sagrado nga mga kasugtanan upod sa Dios, ang kada isa sa aton nagakinahanglan sang nagapadayon nga espirituhanon nga pagpabakod kag pagpanudlo nga posible lamang sa balay sang Ginuo. Kag ang aton mga katigulangan nagakinahanglan sa aton nga magtindog bilang mga tiglawas nila.

Pamensara ang dako nga kaluoy kag pagkamakatarungan sang Dios, nga, antes pa gintuga ang kalibutan, nagpatigayon sang paagi nga mahatag ang mga bugay sang templo sa mga napatay nga wala sing ihibalo parte sa ebanghelyo. Ining sagrado nga mga seremonya sa templo dumaan na. Para sa akon inang pagka-antigo makakulunyag kag isa pa ka ebidensya nga matuod ang mga ini.²

Pinalangga kong kauturan, ang pagpang-atake sang kaaway madasig nga nagadako, sa kabaskugon kag sa kadamuon.³ Ang aton kakinahanglan nga magkadto sa templo sing regular mas nagdako pa gid karon. Nagapangabay ako sa inyo nga rebyuhon ninyo sing mainampuon kon paano ninyo ginausar ang inyo oras. Maghatag sing tiyempo sa inyo palaabuton kag sa palaabuton sang inyo pamilya. Kon may templo nga indi tama kalayo sa inyo, ginapangabay ko kamo nga magpangita sing paagi nga maghimo sing regular nga iskedyul upod sa Ginuo—nga magsulod sa Iya balaan nga puluy-an—dayon tumanon inang iskedyul sing may katampad kag kalipay. Ginapromisa ko sa inyo nga ihatag sang Ginuo ang mga milagro nga nahibal-an Niya nga kinahanglan ninyo samtang nagasakripisyo kamo sa pag-alagad kag pagsimba sa Iya mga templo.

Sa karon may ara kita sing 159 ka nadedikar na nga mga templo. Ang husto nga pag-atipan kag pagmentinar sinang mga templo importante kaayo para sa aton. Sa pagligad sang panahon, ang mga templo indi malikawan nga nagakinahanglan sing pagpalig-on kag pagpatahum. Bangud sina, ginahimo na karon ang mga plano para kay-uhon kag patahumon ang Templo sang Salt Lake kag iban pa nga tiyempo-pa-sang-mga-pionero nga mga templo. Ang mga detalye sining mga proyekto igapaambit samtang ginahimo ang mga ini.

Sini nga adlaw malipayon kami nga magaanunsyo sang plano nga magpatindog sing 12 ka dugang nga mga templo. Inang mga templo pagatukuron sa masunod nga mga lugar: Mendoza, Argentina; Salvador, Brazil; Yuba City, California; Phnom Penh, Cambodia; Praia, Cape Verde; Yigo, Guam; Puebla, Mexico; Auckland, New Zealand; Lagos, Nigeria; Davao, Pilipinas; San Juan, Puerto Rico; kag Washington County, Utah.

Ang pagtukod kag pagmentinar sang mga templo mahimo nga indi makapabag-o sang inyo kabuhi, pero ang paggamit sang inyo tiyempo sa templo makapabag-o gid sang inyo kabuhi. Sa mga madugay na nga wala makabalik sa templo, ginapaisog ko kamo nga maghanda kag magbalik dayon suno sa masarangan. Dayon ginahagad ko kamo nga magsimba sa templo kag magpangamuyo agud mabatyagan sing hugot ang wala tupong nga pagpalangga sang Manluluwas sa inyo, agud nga ang tagsa sa inyo makaangkon sang inyo kaugalingon nga testimonya nga Sia ang nagapanguna sining sagrado kag wala katapusan nga buluhaton.⁴

Mga kauturan, nagapasalamat ako sa inyo pagtuo kag nagasakdag nga mga pagpaninguha. Ginabilin ko ang akon pagpalangga kag bendisyon sa inyo, nga kabay magpaayaw kamo sa pulong sang Ginuo kag gamiton ang Iya nga pinanudlo sa inyo personal nga mga kabuhi. Ginapasalig ko sa inyo nga ang rebelasyon nagapadayon sa Simbahan kag magapadayon tubtob nga “ang mga katuyuan sang Dios matuman, kag ang Dakong Jehova magasiling nga ang buluhaton natapos na.”⁵

Ginabendisyunan ko kamo sang mas dako nga pagtuo sa Iya kag sa Iya balaan nga buluhaton, sang pagtuo kag pasensya agud madala ang inyo personal nga mga hangkat sa kabuhi. Ginabendisyunan ko kamo nga mangin huwaran nga mga Santos sa Ulihing mga Adlaw. Ginabendisyunan ko kamo kag ginapahayag ang akon testimonya nga ang Dios buhi! Si Jesus ang Cristo! Iya ini Simbahan. Iya kita katawhan, sa ngalan ni Jesucristo, amen.