Tipunon Sing Isa ang Tanan kay Cristo
Ang gahum sang ebanghelyo sang Manluluwas nga makabag-o kag makabugay sa aton nagahalin sa pag-intyendi kag pag-aplikar sang relasyon sang sang mga doktrina, mga pagsulundan, kag mga panggawi sini.
Ang kalat amo ang isa ka importante gid nga galamiton nga pamilyar sa aton tanan. Ginahimo ang mga kalat sang mga kwerdas sang tela, mga tanom, alambre, ukon iban pa nga mga materiyales nga ginatabid-tabid ukon ginalubid-lubid sing isa-isa. Interesasante ini, nga ang ordinaryo lang nga mga matiriyales pwede i-tabid-tabid sa isa kag ini mangin tam-an kabakod. Gani, ang pagsugponanay kag pagtabidanay sang ordinaryo nga mga matiriyales makahimo sang makatilingala nga galamiton.
Parehas nga nagahalin ang kabakod sang isa ka kalat sa madamo nga mga bilog-bilog sang kwerdas nga ginlubid-lubid, sa amo man nagahatag ang ebanghelyo ni Jesucristo sang pinakadako nga panan-awon sang kamatuoran kag nagahatag sang pinakamalahalon nga mga bugay samtang ginapamatian naton ang laygay ni Pablo nga “tipunon sing isa ang tanan kay Cristo, alangay nga ara sa langit, kag nga ara sa duta; bisan sa Iya.”1 Importante gid nga nakasentro ini nga labing importante nga pagtipon sang kamatuoran sa Ginuong Jesucristo tungod Siya ang “dalan, ang kamatuoran, kag ang kabuhi.”2
Nagapangamuyo ako nga pasanagan ang tagsa-tagsa sa aton sang Balaan nga Espiritu samtang ginahunahuna naton kon paano ini nga prinsipyo sang pagtipon sing isa ang tanan kay Cristo maaplikar sa mapuslanon nga mga paagi sa pagtuon kag pagpangabuhi sang Iya ginpanumbalik nga ebanghelyo sa inadlaw-adlaw naton nga mga kabuhi.
Isa ka Panahon sang Madamo nga Pagpahayag
Nagapangabuhi na kita sa isa ka makatilingala nga panahon sang madamo nga pagpahayag sa ginpanumbalik nga Simbahan ni Jesucristo. Ang mabantug nga mga pagbag-o nga ginlawag sini nga adlaw may isa lang ka pangkabilogan nga katuyuan: nga pabakuron ang pagtuo sa Amay sa Langit kag sa Iya plano kag sa Iya Anak si Jesucristo kag sa Iya Pagbayad-sala. Indi lang ginpalip-ot ang schedule sang mga miting sang pagsimba. Kundi, subong may mas madako kita nga mga oportunidad kag mga responsibilidad bilang mga indibidwal kag mga pamilya sa paggamit sang aton oras agud mas mangin isa ka kinalipay ang Adlaw sang Inugpahuway sa balay kag sa simbahan.
Sang nagligad nga Abril, indi lang ginbag-o ang organisasyon sang pagtukod sang mga korum sang priesthood. Kundi, nahatag ang kaimportansya kag kabakod sa isa ka mas mataas kag mas balaan nga paagi sang pagpang-alagad sa aton mga kauturan.
Parehas gid nga ang mga ginlubid-lubid nga mga kwerdas sang isa ka kalat nagatuga sang gamhanan kag mabakod nga galamiton, may relasyon ining tanan nga mga binuhatan kag sakop ini tanan isa ka nagahiliusa nga pagpaninguha nga tadlungon sing mas maayo ang pokus, mga materiyales, kag olobrahon sang ginpanumbalik nga Simbahan sang Manluluwas sa iya pinaka-una nga misyon: nga magbulig sa Dios sa iya nga olobrahon sa pagpahanabo sang kaluwasan kag eksaltasyon sang Iya mga kabataan. Palihog lang indi magpokus sa lodyistkal nga mga bahin sang ginlawag. Indi naton pwede pasugtan ang lodyistikal nga mga detalye nga magpangibabaw sa mas mataas nga espirituhanon nga mga rason sang sini nga mga pagbag-o nga ginahimo subong.
Ang handum naton amo nga mag-uswag ang pagtuo sa plano sang Amay kag sa misyon sang pagtubos sang Manluluwas sa kalibutan kag nga ipahamtang ang wala’y katapusan nga kasugtanan sang Dios.3 Ang mga katuyuan naton amo lang ang pagpahanabo sang dalayon nga pagkahaylo sa Ginuo kag ang pagpalangga sing mas malubos kag ang pagserbisyo sing mas maepektibo sa aton mga kauturan.
Ang Pagbahin-bahin kag Pagpaisa-isa
Kon kaisa bilang mga miyembro sang Simbahan, ginabahin-bahin, ginapaisa-isa, kag ginaaplikar naton ang ebanghelyo sa aton mga kabuhi paagi sa paghimo sang laba nga mga listahan sang indibidwal nga mga topiko nga tun-an naton kag mga buluhaton nga tigayunon. Pero sa amo sini nga paagi, basi makulangan ang aton pag-intyendi kag panan-awon. Kinahanglan nga maghalong kita tungod ang pagpokus parehas sa mga Pariseo makapatiplang sa aton sa pagpalapit naton sa Ginuo.
Ang katuyuan kag pagpaputli, ang kalipay kag kasadya, kag ang dalayon nga pagkahaylo kag kaluwasan nga nagaabot tungod sa “pagtugyan sang [aton] mga tagipusuon sa Dios”4 kag “[pagbaton] sang Iya larawan sa [aton] mga nawong”5 indi maangkon paagi lang sa paghikot sing basta-basta sang tanan nga espirituhanon nga mga butang nga dapat naton himuon. Kundi, ang gahum sang ebanghelyo sang Manluluwas nga makabag-o kag makabugay sa aton nagahalin sa pag-intyendi kag pag-aplikar sang relasyon mga doktrina, mga pagsulundan, kag mga panggawi sini. Samtang lang nga ginatipon naton sing isa ang tanan kay Cristo, nga may mabakod nga pagpokus sa Iya, makabuliganay ang mga kamatuoran sang ebangheylo sa paghatag sa aton sang ikasarang nga pwede kita mangin ang tawo nga gusto sang Dios para sa aton6 kag nga makapadayon kita sing matutom hasta sa katapusan.7
Ang Pagtuon kag Pagtabid-tabid sang mga Kamatuoran sang Ebanghelyo
Ang ebanghelyo ni Jesucristo amo ang isa ka matahum nga tapestry sang kamatuoran nga “naka-frame sing tama”8 kag ginhabol. Samtang nagatuon kita kag nagatabid-tabid sang ginpahayag nga mga kamatuoran sang ebanghelyo, ginabugayan kita nga magbaton sang malahalon nga pagpanan-aw kag mas dako nga espirituhanon nga ikasarang paagi sa mga mata nga makakita sang impluwensya sang Ginuo sa aton mga kabuhi kag paagi sa mga dulunggan nga makabati sang Iya tingug.9 Kag ang prinsipyo sang pagtipon sing isa—bisan sa Iya—makabulig sa aton sa pagbag-o sang kinaandan nga mga listahan sang mga hilikuton sa isa ka nagkahiusa, masinakupon, kag kumpleto nga kabilogan. Tuguti ako nga magpakita sang isa ka pang-doktrina kag isa ka pang-simbahan nga halimbawa sang ginatudlo ko.
Halimbawa 1. Ang ika-apat nga artikulo sang pagtuo amo ang isa sa pinakamaayo nga mga halimbawa sang pagtipon sing isa ang tanan kay Cristo: “Nagapati kami nga ang una nga mga pagsulundan kag mga ordinansa sang ebanghelyo amo ang: Una, Pagtuo sa Ginuong Jesucristo; ika-duha, Paghinulson; ika-tatlo, Bunyag paagi sa pagtugmaw para sa kapatawaran sang mga sala; ika-apat, Pagtakdong sang mga kamot para sa dulot sang Balaan nga Espiritu.”10
Ang matuod-tuod nga pagtuo nakasentro sa Ginuong Jesucristo—sa Iya bilang ang diosnon kag Bugtong nga Anak sang Amay kag sa Iya kag sa misyon sang pagtubos nga natuman Niya. “Kay ginsabat niya ang mga katuyuan sang layi kag gin-angkon ang tanan yadtong may pagtuo sa iya; kag sila nga may pagtuo sa iya magakapyot sa tagsa ka maayo nga butang; gani ginaapinan niya ang kawsa sang mga anak sang tawo. ”11 Ang pagtuo kay Cristo amo ang pagsalig kag pagsandig sa Iya bilang aton Manluluwas, sa Iya ngalan, kag sa Iya mga promisa.
Ang una kag natural nga bunga sang pagsalig sa Manluluwas amo ang paghinulsol kag pagtalikod sa kalainan. Samtang nagatuo kita sa Ginuo, natural lang nga magliso, magpalapit, kag magsandig kita sa Iya. Gani, ang paghinulson amo ang pagsalig sa kag pagsandig sa Manunubos nga maghimo para sa aton sang indi naton mahimo para sa aton mga kaugalingon. Ang kada isa sa aton kinahanglan nga “[magsandig] sing bug-os sa mga merito niya nga gamhanan sa pagluwas”12 tungod “paagi [lang] sa mga merito, kag kaluoy, kag grasya sang Balaan nga Mesias”13 pwede kita mangin bag-o nga mga tinuga kay Cristo14 kag sa ulihi makabalik kag magpangabuhi sa presensya sang Dios.
Kinahanglan sa ordinansa sang bunyag paagi sa pagtugmaw para sa kapatawaran sang mga sala nga magsalig kita sa Iya, magsandig sa Iya, kag magsunod sa Iya. Ginpahibalo ni Nefi, “Nahibal-an ko nga kon inyo sundon ang Anak, sa bug-os nga katuyuan sang tagipusuon, nga nagabuhat nga pagkasalimpapaw kag wala’y paglambong sa atubang sang Dios, kundi nga may matuod-tuod nga tinutuyo, nga nagahinulsol sang inyo mga sala, nga nagasaksi sa Amay nga sugot kao sa pagdala sa inyo kaugalingon sang ngalan ni Cristo, paagi sa bunyag—huo, paagi sa pagsunod sang inyo Ginuo kag sang inyo Manluluwas palusong sa tubig, suno sa iya pulong, yari karon, nian magabaton kamo sang Balaan nga Espiritu; huo, nian magaabot ang bunyag sang kalayo kag sang Balaan nga Espiritu.”15
Ang ordinansa sang pagtakdong sang mga kamot para sa regalo sang Balaan nga Espiritu kinahanglan nga magsalig kita sa Iya, magsandig sa Iya, magsunod sa Iya, kag magpadayon paagi sa Iya upod sa bulig sang Iya Balaan nga Espiritu. Parehas nga ginpahayag ni Nefi, “Kag karon … nahibal-an ko paagi sa sini nga luwas kon ang isa ka tawo magapadayon tubtob sa katapusan, sa pagsunod sang halimbawa sang Anak sang buhi nga Dios, indi sia maluwas.”16
Ang ika-apat nga artikulo sang pagtuo indi lang nagatudlo sang palatukdanon nga mga prinsipyo kag mga ordinansa sang ginpanumalik nga ebanghelyo. Kundi, ini nga mga pahibalo sang mga pagpati nagatipon sing isa ang tanan kay Cristo: pagsalig sa Iya, pagsandig sa Iya, pagsunod sa Iya, kag pagpadayon upod sa Iya—bisan sa Iya.
Halimbawa 2. Gusto ko subong nga i-eksplikar kon paano ang tanan nga mga programa kag mga hilikuton sang Simbahan gintipon sing isa kay Cristo. May madamo pa nga mga halimbawa nga pwede ipakita; gamiton ko ang pila na lang nga pinili.
Sang 1978, Nagtudlo si Presidente Spencer W. Kimball sa mga miyembro sang Simbahan nga dapat patindugon kag pabakuron ang Sion sa bilog nga kalibutan. Naglaygay siya sa mga santos nga magpabilin sila sa ila kaugalingon nga mga pungsod kag magtukod sang mabakod nga mga stakes paagi sa pagtipon sang pamilya sang Dios kag pagtudlo sa ila sang mga panggawi sang Ginuo. Nagtudlo pa sia nga may madamo pa ka mga templo nga igapatindog kag mga ginpromesa nga bugay para sa mga santos bisan diin sila nagaistar sa kalibutan.17
Sa pagpadamo sang mga stakes, nangin mas importante nga ang mga balay sang mga miyembro “mangin [mga lugar] nga sa diin manamian ang mga miyembro sang pamilya nga magdayon, kon sa diin [pwede] nila pa-uswagon ang ila mga kabuhi kag makita ang pagpalangganay, pagsuportahanay, pagpasalamat, kag pagpakalipay.”18 Tungod sini, sang 1980, ginpalip-ot ang panimbahon sa tatlo lang ka oras agud nga “padakuon liwat ang kaimportansya sang kaugalingon kag kapamilya nga responsibilidad sa pagtuon, pagpangabuhi, kag pagtudlo sang ebanghelyo.”19 Ini nga kaimportansya sa pamilya kag sa balay ginpamatud-an liwat sa “Ang Panimalay: Isa ka Proklamasyon sa Kalibutan” nga ginpagwa ni Presidente Gordon B. Hinckley sang 1995.20
Sang Abril 1998, ginlawag ni Presidente Hinckley sang pagpatindog sang madamo pa nga mas magagmay nga mga templo, agud mapaabot ang sagrado nga mga ordinansa sang Balay sang Ginuo sing mas lapit sa Latter-day Saint nga mga indibidwal kag mga pamilya sa bilog nga kalibutan.21 Kag ini nga mas maayo nga mga oportunidad para sa espirituhanon nga pag-uswag kag paglambo gindugangan sang mga pag-uswag sa umalagi nga self-reliance paagi sa pagpagwa sang Perpetual Education Fund sang 2001.22
Sa pagpangolohan ni Presidente Thomas S. Monson, liwat-liwat siya naglaygay sa mga santos nga mag-upod sa pagluwas sa mga iban kag ginpadako niya ang kaimportansya sang pag-atipan sa mga imol kag sa mga nagakinahanglan bilang isa sa diosnon nga responsibilidad nga ginhatag sang Dios sa Simbahan. Dugang pa sa kaimportansya sang pisikal nga pagpanghanda, ginpagwa ang Self-Reliance nga programa sang 2012.
Sa nagligad nga pila ka tuig, ginpadako kag ginpabakod ang ginakinahanglan gid nga mga prinsipyo parte sa paghimo sang Adlaw sang Inugpahuway nga isa ka kalipayan sa balay kag sa Simbahan,23 agud mangin handa kita para sa pagbag-o sa skedyul sang panimbahon nga ginlawag sa sini nga sesyon sang pangkabilogan nga komperensya.
Kag sang anum ka bulan, ang mga korum sang Melchizedek nga Pristhud ginpabakod kag ginpahusay sing epektibo upod sa mga auxiliary agud matigayon ang mas mataas kag mas balaan nga paagi sang pag-alagad.
Nagapati ako nga ang pagsulundan kag panahon sini nga mga binuhatan sa nagligad nga mga dekada makabulig sa aton nga makakita sang isa lang ka naghiliusa kag pangkabilogan nga olobrahon kag indi lang sang isa ka sulundan sang indibidwal kag nagaisahanon nga mga pagpaninguha. “Ginpahayag sang Dios sang isa ka sulundan sang espirituhanon nga pag-uswag para sa mga indibidwal kag mga pamilya paagi sa mga ordinansa, pagtudlo, mga programa, kag mga aktibidad nga nakasentro sa balay nga ginasuportahan sang Simbahan. May ara mga organisasyon sa Simbahan agud mabugayan ang mga indibidwal kag ang mga pamilya, kag indi lang para sa kapuslanan sang Simbahan.”24
Nagapangamuyo ako nga makilal-an naton ang olobrahon sang Ginuo bilang isa ka dalagko kag pangkalibutan nga olobrahon nga sa dalayon mas mangin sentro ini sa balay, nga ginasuportahan sang Simbahan. Kabalo ako kag nagapamatuod ako nga ginapahayag sang Ginuo kag “magapahayag pa sang madamo nga dalagko kag importante nga mga butang nahanungod sa ginharian sang Dios.”25
Promisa kag Pagpamatuod
Ginsugdan ko ang akon mensahe paagi sa pagpakita sang kabakod nga nagahalin sa paglubid-lubid ukon pagtabid-tabid sang mga kwerdas sa isa ka kalat. Sa amo man nga paagi, nagapromisa ako nga mas dako ang panan-awon, katuyuan, kag gahum nga makita naton sa aton pagtuon kag pagpangabuhi sang ginpanumbalik nga ebanghelyo ni Jesucristo samtang nagatinguha kita nga tiuponon sing isa ang tanan kay Cristo—bisan sa Iya.
Ang tanan nga mga oportunidad kag mga bugay nga importante para sa aton wa’ay katapusan nga benepisyo nagahalin, mahimo kag may katuyuan tungod sa, kag nagapadayon paagi sa Ginuong Jesucristo. Parehas sa ginpamatuod ni Alma: “Wala na sing iban pa nga paagi ukon pahito nga sa sini ang tawo mahimo nga maluwas, lamang sa kalalangan kag paagi kay Cristo. Yari karon, sia ang kabuhi kag ang kapawa sang kalibutan.”26
Ginapahayag ko sing may kalipay ang akon nga panaksihon sang pagkadiosnon kag buhi nga rialidad sang Wa’ay Katapusan nga Amay kag sa Iya Pinalangga nga Anak, si Jesucristo. Sa aton Manluluwas, makita naton ang kalipay. Kag sa Iya makita naton ang kasiguraduhan sang “paghidaet sa sini nga kalibutan, kag kabuhi nga wala’y katapusan sa kabuhi nga magaabot.”27 Amo ini ang ginapamatud-an ko, sa sagrado nga ngalan sang Ginuong Jesucristo, amen.