Ang Aton Dabok sang Pagtuo

Pinalangga nga mga kauturan, indi bala nga makatilingala nga makabaton kita sang dalayon nga pagpahayag halin sa langit paagi kay Pangulong Russell M. Nelson kag sa aton mga lider sa Simbahan nga nagahagad sa aton nga magpangabuhi sa bag-o kag mas balaan nga mga paagi,¹ sa balay kag sa simbahan, sa bug-os naton nga tagipusuon, panghunahuna, kag kusog?

Nagkaara bala kamo sing oportunidad nga maghimo sang isa ka butang nga sa diin nabatyagan ninyo nga indi kamo handa ukon indi kamo takos pero ginbugayan kamo tungod samg inyo pagpaninguha?

Ako may ara. Ari ang isa ka halimbawa.

Madamo nga tinuig nga nagligad, Si Elder Richard G. Scott, isa ka miyembro sang Korum sang Dose ka Apostoles, mainabyanon nga nangagda, “Gerrit, gusto mo magpinta sang watercolor upod sa akon?”

Ginhambal ni Elder Scott nga ang pagpinta nagabulig sa iya nga mangin matalupangdon kag maideyahon. Nasulat niya: “Magtinguha nga mangin maideyahon, bisan kon tamatama lang ang mga resulta. … Ang pagkamaideyahon makahimo sang pamatasan sang pagpasalamat para sa kabuhi kag para sa mga ginbugay sang Dios sa imo. … Kon magpili ka sing maayo, indi kinahanglan nga maubos ang imo oras sa sini.”²

Ginlaragway ni Pangulong Henry B. Eyring nga ang iya aktibidades sa arte nagahalin sa “isa ka balatyagon sang pagpalangga,” lakip ang “pagpalangga sang isa ka Tagtuga nagapaabot sa Iya mga kabataan nga mangin pareho sa Iya—nga magtuga kag magpasad.”³ Ang mga arte nga gintuga ni Pangulong Eyring nagahatag sang “pinasahi nga espirituhanon nga panan-awon sa testimonya kag sa pagtuo.”⁴

Ang arte ni Pangulong Boyd K. Packer nagapakita sang pinakasimple nga mensahe sang ebanghelyo: “Ang Dios amo ang Tagtuga sang kalangitan kag sang duta kag sang tanan nga ari dire, ang tanan nga duna nagapamatuod sa sina nga diosnon nga ginmando nga pagtuga, kag nga may perpekto nga balanse sa duta, siyensya, kag sa ebanghelyo ni Jesucristo.”⁵

Si Alma nagapamatuod,: “Ang tanan nga mga butang nagapatimaan nga may Dios.”⁶ Ang aton mga kabataan sa Primary nagakanta, “Kon mabatian ko ang kanta sang pispis, ukon kon tulokon kong langit nga asul gid kaayo, … Nalipay ako nga dire ako nagakabuhi sa sining matahum nga kalibutan nga gintuga sang Amay nga Langitnon para sa akon.”⁷ Ang tagsulat nga si Victor Hugo nagasaulog sang kaangtanan sang mga tinuga kag mga butang; sa kadak-an sang kalibutan, humalin sa adlaw kag sa sapat-sapat. … Ang tanan nga mga pispis nga makalupad may bahin sang Dios sa sulod nila. … Parehas ang isa ka panganod sa kahawaan sa bungsod sang mga bituon.”⁸

Kag sa sina, balikan naton ang pangagda ni Elder Scott.

“Elder Scott,” nagsabat ako, “Gusto ko nga magmangin mas matalupangdon kag mas maideyahon. Nalangkag ako sa paghunahuna nga nagapinta ang Langitnon nga Amay sang nagabalud nga mga panganod kag sang tanan nga kolor sang kalangitan kag katubigan. Galing,”—dire may malawig nga paglinong—“Elder Scott,” hambal ko, “Indi ako sagad sa pagpinta sang watercolor. Nagakabalaka ako nga basi matak-an ka sa pagtudlo sa akon.”

Nagyuhum lang si Elder Scott kag nag-schedule sang pagkitaay namon. Sa gintalana nga adlaw, ginhanda niya ang papel, pinta, kag mga brutsa. Nagdrowing siya sang pila ka hitsura kag ginbuligan niya ako nga pintahan ang papel.

Gingamit namon bilang sulundan ang iya matahum nga pininta nga ginatawag Dabok sang Kalayo sa Pagtunod sang Adlaw. Samtang nagapinta kami, nag-istoryahanay kami parte sa pagtuo—nga kon tulukon naton ang kasanag kag kainit sang kalayo, ginatalikdan naton ang kadulum kag pagkawala’y kaseguruhan—nga kon kis-a malawig, mamingaw nga mga gab-i, ang kalayo sang aton pagtuo sarang maghatag sang paglaum kag kaseguradohan sa aton. Kag mag-abot gid ang banag-banag. Ang aton kalayo sang pagtuo—ang aton mga handumanan, mga experiyensya, kag palanublion sang pagtuo sa kaayuhan sang Dios kag sa iya kaluoy sa aton mga kabuhi—nakabapakod sa aton sa bug-os nga kagab-ihon.

Ini ang testimonya ko—para sa ila nga nagapangita, nagatugot nga matabo, kag nagapangabudlay para sa sini—ang banag-banag sang pagtuo, sa panalagsa sa amat-amat, mag-abot ukon magbalik. Ang kasanag magaabot kon ginahandum kag ginapangita naton ini, kon mapasensyoso kita kag masinulundon sa mga kasuguan sang Dios, kon handa kita nga magbaton sang grasya sang Dios, pagpaayo, kag mga kasugtanan.

Sang nagsugod kami sa pagpinta, nagpaisug is Elder Scott, “Gerrit, bisan sa isa lang ka leksyon makapinta ka sang gusto mo taguon kag dumdumon.” Husto si Elder Scott. Ginapakamhal ko ang pinita sang kalayo sang pagtuo nga ginpinta ko kabulig si Elder Scott. Limitado pa kag nagpabilin nga amo gihapon ang abilidad ko sa arte, pero ang handumanan sang kalayo sang pagtuo makapaisug sa aton sa lima ka paagi.

Una, ang aton dabok sang pagtuo makabulig sa aton nga makakita sang kalipay sa maayo nga mga hilikuton.

May kalipay sa paghunahuna, pagtuon, kag pagbuhat sang mapuslanon nga bag-ong mga hilikuton. Matuod ini labi na gid samtang ginapabakod naton ang aton pagtuo kag pagsalig sa aton Amay nga Langitnon kag sa Iya Anak, nga si Jesucristo. Indi kita maluwas sa paghigugma sa aton mga kaugalingon. Pero mas labaw pa ang paghigugma sang aton Amay nga Langitnon para sa aton kag mas kilala niya kita sangsa aton pagkilala sa aton mga kaugalingon. Makasalig kita sa Ginuo kag indi magsalig sa aton kaugalingon nga kaalam.⁹

Nakaagi ka bala nga ikaw lang ang wala ginhagad sa kaadlawan sang isa ka tawo?

Nakaagi ka bala nga ulihi ka ginpili, ukon wala ka gid ginpili, sang ginpili ang mga grupo?

Nakaagi ka bala nga nabatyagan mo nga handa ka na para sa eksam sa eskwelahan, isa ka interbyu sa trabaho, isa ka oportunidad nga gusto mo gid—tapos nabatyagan mo nga napaslawan ka?

Nakaagi ka bala magpangamuyo para sa isa ka relasyon nga, sa bisan ano nga kabangdanan, wala nangin maayo?

Nakaagi ka bala sang balatian nga nagabalik-balik, ukon nga ginpatumbayaan ka sang asawa ukon bana, ukon nag-antus tungod sa imo pamilya?

Ang aton Manluluwas nakahibalo sang aton mga sirkumstansya. Samtang ginagamit naton ang kahilwayan sa pagpili nga ginhatag sang Dios kag nagagamit sang tanan naton nga ikasarang sa pagpaubos kag pagtuo, ang aton Manluluwas, nga si Jesucristo, makabulig sa aton nga mag-atubang sa mga panghangkat kag mga kalipayan sa sini nga kabuhi. Ang pagtuo nagalakip sang handum kag pagpamat-od nga magpati kita. Ang pagtuo naggikan man sa pagtuman sang mga kasuguan sang Dios, nga ginhatag agud nga bugayan kita, samtang nagasunod kita sa Iya dalan sang mga kasugtanan.

Sang nabatyagan naton ukon nagabatyag kita subong sing wala’y kaseguruhan, nagaisahanon, napaslawan, naakig, ginpabay-an, dismayado, ukon daw malayo sa Dios kag sa Iya ginpanumbalik nga Simbahan, basi kinahanglan sang mas dako nga pagpaninguha kag pagtuo agud makabalik sa Iya dalan sang kasugtanan. Pero mapuslanon ini! Palihog magkari, ukon magkari liwat, kay Ginuong Jesucristo! Mas mabaskog pa ang paghigugma sang Dios sangsa mga gapos sang kamatayon—temporal ukon espirituhanon.¹⁰ Ang Pagpasag-uli sang aaton Manluluwas wala’y dulunan kag wala’y katapusan. Kita tanan nagakatalang kag nagakakulangan. Ayhan, sa makadali nga panahon, nagtalang kita. Mahigugmaon nga ginaseguru sa aton sang Dios, nga bisan diin na kita ukon bisan ano na ang aton nahimo, wala gid sang lugar nga sa diin indi na kita sarang magbalik sa Iya. Sia nagahulat kag handa maghakos sa aton.¹¹

Ika-duha, ang aton dabok sang pagtuo makabulig sa aton nga mag-alagad sa bag-o, mas mataas, kag mas balaan nga mga paagi nga puno sang Espiritu.

Ang amo sini nga pag-alagad nagadala sang mga milagro kag sang mga bugay sang pagpasakop sa mga kasugtanan—nga sa diin mabatyagan naton ang paghigugma sang Dios kag nagatinguha kita nga mag-alagad sa mga iban sa amo sina nga espiritu.

Sang nagligad lang, kami ni Sister Gong nakakilala sang isa ka amay kag ang iya pamilya nga ginbugayan sang isa ka matutom nga brother nga priesthood nga nagpalapit sa ila bishop kag nangabay kon pwede siya (ang brother nga priesthood) mangin kaupod sang amay sa home teaching. Ang amay indi aktibo sa simbahan kag indi sia interesado sa pag-home teaching. Pero, samtang nagabag-o ang tagipusuon sang amay, sia kag ang iya mapinalanggaon nga brother nga priesthood nagsugod sa pagbisita sa mga pamilya nga ila ginaalagaran. Pagkatapos sa isa sa amo sini nga mga pagbisita, ang iya asawa—mismo nga wala sadto nagasimba—nagpamangkot sa iya bana kon kamusta ang ila pagbisita. Gin-aku sang amay, “Daw may nabatyagan ako.”—tapos nagderetso siya sa kusina kag nag-inom sang beer.¹²

Apang nagsunod-sunod ang mga eksperiyensya: maluluy-on nga mga eksperiyensya, mga eksperiyensya sa pag-alagad, sa pagbag-o sang mga tagipusuon, klase sa paghanda nga magsulod sa templo, pagsimba, kag pagpahugpong bilang isa ka pamilya sa balaan nga templo. Hunahunaa kon ano kamapisalamaton ang mga kabataan kag ang mga kaapuhan para sa ila amay kag iloy kag sa nagaalagad nga brother nga nagpalapit bilang abyan kag kaupod sa ila amay agud alagaran kag higugmaon ang iban.

Ang ika-tatlo nga mabulig sang kalayo sang pagtuo: kalipay sa ebanghelyo kag mga bugay nagaabot kon nagatinguha kita nga higugmaon ang Ginuo kag ang mga iban sa aton bug-os nga tagipusuon kag mga kalag.

Ginaagda kita sang balaan nga mga kasulatan nga maghalad sang bug-os naton nga pagkatawo kag mga pagpaninguha naton sa altar sang paghigugma kag pag-alagad. Sa Daan nga Katipan, ginapaisug kita sa Deuteronomio nga “Higugmaon mo Ginuo ang Ginuo nga imo Dios” sa bug-os naton nga tagipusuon, kalag, kag ikasarang.¹³ Si Joshua nagalaygay, “Higugmaa ang Ginuo nga imo Dios, … magkabuhi sa iya mga pamaagi, … tumana ang iya mga sugo, … magmatutom sa iya, … kag alagare siya sa bug-os mong tagipusuon kag kalag.”¹⁴

Sa Bag-ong Katipan, ginhambal sang aton Manluluwas ang duha ka labing importante nga mga sugo: “Higugmaon mo ang Ginoo nga imo Dios sa bug-os mo nga tagipusuon, sa bug-os mo nga kalag, sa bug-os mo nga kusog, … Kag ang imo kapareho pareho sang paghigugma mo sa imo kaugalingon.”¹⁵

Sa Libro ni Mormon: Isa pa ka Katipan nahanungod kay Jesucristo, si Haring Benjamin nagpangabudlay “sa bug-os nga kusog sang iya lawas kag sang ikasarang sang iya bug-os nga kalag” kag nagpaluntad sang paghidaet sa duta.¹⁶ Sa Doctrine and covenants, suno sa nahibal-an sang tagsa ka misyonero, nagapangabay ang Ginuo sa aton nga mag-alagad sa Iya sa bug-os naton nga “tagipusuon, ikasarang, panghunahuna, kag kusog.”¹⁷ Sang nag-abot ang mga Santos sa Jackson County, ginsugo sila sang Ginuo nga pakabalaanon ang Adlaw sang Inugpahuway paagi sa pagpalangga “sa Ginuo nga imo Dios sa bug-os ninyo nga tagipusuon, sa bug-os ninyo nga ikasarang, panghunahuna, kag kusog; kag mag-alagad sa iya sa ngalan ni Jesucristo.”¹⁸

Nagakasadya kita sa pagpangagda nga maghatag sang bug-os nga kalag naton sa pagpangita sang mas mataas kag mas balaan nga mga paagi nga higugmaon ang Dios kag ang mga tawo sa palibot naton kag pabakuron ang aton pagtuo sa Amay nga Langitnon kag kay Jesucristo sa aton mga tagipusuon kag sa aton mga panimalay kag sa simbahan.

Ika-apat, ang aton dabok sang pagtuo nagatulod sa aton nga magtukod sang dalayon nga mga pangginawi sa matarong nga pagpangabuhi nga magpabakod sa pagtuo kag sa espiritu.

Ining balaan nga mga pagginawi, matarong nga mga hinimuan, ukon mga pagsulundan nga puno sang pangamuyo nagalakip sang pagpangamuyo; pagtuon sa balaan nga mga kasulatan; pagpuasa, pagdumdum sa Manluluwas kag sa mga kasugtanan paagi sa ordinansa sang sakramento; pagpaambit sang mga bugay sang ebanghelyo paagi sa pangmisyonaryo, templo kag family history, kag iban pa nga mga klase sang pag-alagad; pagsulat sa isa ka personal nga journal; kag madamo pa.

Kon mag-updanay ang matarong nga mga pagsulundan kag ang espirituhanon nga mga handum, maga-isa ang tion kag ang wala’y katapusan. Nagaabot ang espirituhanon nga kasanag kag kabuhi kon magpalapit kita sa aton Amay nga Langitnon kag sa aton Manluluwas, nga si Jesucristo, paagi sa dalayon nga paghimo sang relihiyuso nga mga panggawi. Kon higugmaon naton ang tinutuyo kag ang sugo sang layi, makasulod ang pang-wala’y katapusan nga mga butang sa aton mga kalag pareho sang tun-og nga halin sa langit.¹⁹ Sa inadlaw-adlaw nga pagtuman kag sa makapapresko nga nagailig nga tubig, makita naton ang mga sabat, pagtuo, kag kusog agud maatubangan ang inadlaw-adlaw nga mga pagtilaw kag mga oportunidad sing may pasensya tungod sa ebangheylo, panan-awon, kag kalipayan.

Ika-lima, sa pagpadayon naton sa pinakamaayo nga mga sulundan nga nabal-an naton samtang nagapangita kita sang bag-o kag mas balaan nga mga paagi nga higugmaon ang Dios kag mabuligan kita kag ang mga iban nga mangin handa nga mag-atubang sa Iya, makabulig ang aton dabok sang pagtuo sa aton nga madumduman nga ang pagkaperpekto ara kay Cristo, kag wala sa aton mga kaugalingon ukon sa pagkaperpekto suno sa kalibutan.

Ang mga pagpangagda sang Dios puno sang paghigugma kag posibilidad tungod si Jesucristo amo “ang dalan, ang kamatuoran, kag ang kabuhi.”²⁰ Sa mga nakabatyag sang kabudlayan, nagapangagda sia, “Magkari kamo sa akon,” kag sa ila nga magpalapit sa iya, Sia nagapromisa, “Papahuwayon ko kamo.”²¹ “Magkari kamo kay Cristo, kag magmagin himpit sa iya, … higugmaa ang Dios sa inyo bug-os nga ikasarang, kaisipan kag kusog, nian ang iya grasya igo para sa inyo, agud paagi sa iya grasya mahimo kamo nga mahimpit kay Cristo.”²²

Sa sini nga kaseguradohan “paagi sa iya grasya mahimo kamo nga mahimpit kay Cristo” ara man ang kaumpawan, paghidaet, kag promisa nga makapadayon kita sing may pagtuo kag kaisug sa Ginuo, bisan kon indi matabo ang tanan nga ginalauman naton, ginapaabot, ukon bisan ang nagakadapat sa aton, bisan kon wala kita sala, bisan pagkatapos nga nahimo naton ang tanan.

Sa sari-sari nga mga panahon kag mga pamaagi, kita tanan makabatyag nga kulang kita, nga indi segurado, basi indi nagakabagay. Pero sa aton matutom nga mga pagpaninguha nga higugmaon ang Dios kag mag-alagad sa aton isigkatawo, pwede naton mabatyagan ang paghigugma sang Dios kag ang kinahanglanon gid nga inspirasyon para sa ila kag sa aton mga kabuhi sa bag-o kag mas balaan nga mga paagi.

Sing may kaluoy, ang Manluluwas nagapaisug kag nagapromisa nga kita “makadutdot pasulong nga may kalig-on kay Cristo, nga may isa ka himpit nga kasanagan sang paglaum, kag isa ka gugma sang Dios kag sang tanan nga mga tawo.”²³ Ang doktrina ni Cristo, ang Pagpasag-uli sang Manluluwas, kag ang aton pagsunod sa Iya dalan sang mga kasugtanan sa aton bug-os nga kalag makabulig sa aton nga mabal-an ang Iya mga kamatuoran kag magahilway sa aton.²⁴

Nagapamatuod ako nga ginpanumbalik na ang kabug-usan sang Iya ebanghelyo kag ang Iya plano sang kalipayan kag gintudlo ini sa Simbahan ni Jesucristo sang mga Santos sa Ulihing mga Adlaw, sa balaan nga mga kasulatan, kag sang mga propeta humalin pa sa propeta nga si Joseph Smith pakadto kay Pangulong Russell M. Nelson sa karon. Nagapamatuod ako nga ang Iya dalan sang mga kasugtanan nagapadulong sa pinakadako nga regalo nga ginapromisa sang aton mapinalanggaon nga Amay nga Langitnon: “Inyo maangkon ang kabuhi nga wala’y katapusan.”²⁵

Kabay pa nga mangin aton ang Iya mga bugay kag nagapadayon nga kalipay samtang ginabuksan ang aton mga tagipusuon kag mga paglaum kag pangako sa dabok sang aton pagtuo, ginapangamuyo ko sa sagrado kag balaan nga ngalan ni Jesucristo, amen.