Ib txoj Hauj Lwm Muaj Hwj Chim Heev

Kuv zoo siab tias hnub no kuv yuav hais txog cov poj niam lub luag hauj lwm nyob hauv txoj Kev Muab Txoj Moo Zoo Txum Tim Rov Qab Los. Yeej paub tseeb tias cov poj niam yeej muaj ib txoj hauj lwm tseem ceeb hauv Leej Txiv Saum Ntuj Ceeb Tsheej txoj hau kev. Thawj Tswj Hwm Russell M. Nelson tau hais tias, yeej suav tsis txheeb tej yam uas cov poj niam tau ua, tsis yog rau tsev neeg xwb, tab sis rau tus Tswv lub Koom Txoos, ua cov niam tsev, pog, niam tais; cov viv ncaus thiab cov phauj; cov xib hwb thiab cov thawj coj, thiab qhov tseem ceeb cov uas coj yam ntxwv zoo thiab tiv thaiv kev ntseeg. ¹

Thaum ub tus Yaj Saub Joseph Smith tau hais rau cov viv ncaus hauv lub Koom Haum Niam Tsev hauv Nauvoo hais tias kom “ua neej raws li lawv tej meej mom.” ² Lawv tus yam ntxwv qhia peb hnub no. Lawv koom siab ua ke ua raws li tus yaj saub tej lus hais thiab ua neej nrog kev ntseeg Yexus Khetos thaum lawv pua lub hauv paus ntawm lub Koom Txoos rau peb. Cov viv ncaus, txog peb lub sij hawm lawm. Tus Tswv muaj hauj lwm tseem ceeb rau peb ua, thiab peb txoj kev ntseeg thiab txoj kev txawj tseem ceeb heev li.

Thawj Tswj Hwm Spencer W. Kimball piav hais tias: “Txoj kev ua ib tug poj niam ncaj ncees nyob hauv lub ntiaj teb rau lub sij hawm ua ntej tus Cawm Seej yuav los Zaum Ob, yog ib txoj hauj lwm muaj hwj chim heev. Ib tug poj niam ncaj ncees lub zog thiab txoj kev qhia niaj hnub nim no yuav zoo heev.” ³

Thawj Tswj Hwm Nelson tau hais tias: “Kuv thov kom kuv cov muam hauv … lub Koom Txoos … kom los pab! Cia li ua txoj hauj lwm uas nej muaj txoj cai ua nyob hauv nej lub tsev, nej lub zej zog, thiab nyob hauv Vajtswv lub nceeg vaj—rau siab ua tshaj nej tau ua yav dhau los.” ⁴

Tsis ntev tas los no, kuv thiab ib co me nyuam yaus tau mus ntsib Thawj Tswj Hwm Russell M. Nelson hauv ib lub tsev uas zoo li tsev neeg Smith lub qub tsev nyob hauv Palmyra, New York. Mloog peb tus yaj saub qhia rau cov me nyuam yaus saib lawv yuav tsum ua li cas es thiaj los pab tau.

Muam Jones: “Kuv xav paub seb nej puas muaj dab tsi xav nug Thawj Tswj Hwm Nelson. Nej nyob nrog tus yaj saub. Puas muaj dab tsi uas nej ib txwm xav nug ib tug yaj saub? Koj hais, Pearl.”

Pearl: “Puas nyuaj ua ib tug yaj saub? Koj puas khwv heev?”

Thawj Tswj Hwm Nelson: “Yeej nyuaj heev. Txhua yam yus ua kom hloov los ua neeg zoo li tus Cawm Seej yuav nyuaj heev. Piv txwv hais tias, thaum Vajtswv xav muab Kaum txoj Lus Txib rau Mauxes, Nws qhia Mauxes mus qhov twg? Mus pem roob, saum lub Roob Xinais. Yog li ntawd Mauxes yuav tsum mus puag pem roob kom txais tau Kaum txoj Lus Txib. Leej Txiv Saum Ntuj Ceeb Tsheej muaj peev xwm hais tias, ‘Mauxes koj pib mus kev, thiab kuv yuav pib mus kev, ces wb yuav sib ntsib nyob nruab nrab.’ Tiam sis tus Tswv nyiam thaum peb siv zog, vim ua rau peb txais tej nqi zog uas peb txais tsis tau yog tias peb tsis siv zog. Piv txwv hais tias, nej puas tau kawm ntaus piano?”

Cov Me Nyuam: “Kawm mas.”

Pearl: “Kuv kawm qoj xem xau.”

Thawj Tswj Hwm Nelson: “Es nej puas xyaum?”

Cov Me Nyuam: “Peb xyaum os.”

Thawj Tswj Hwm Nelson: “Yuav zoo li cas yog nej tsis xyaum?”

Pearl: “Yus tsis nco qab.”

Thawj Tswj Hwm Nelson: “Yog mas, yus tsis txawj ua tau zoo tshaj puas yog? Yog li ntawd, Pearl, yeej nyuaj heev. Yuav tsum siv zog, khwv hauj lwm, kawm ntau, thiab tsis muaj qhov kawg. Yeej yog ib qho zoo! Yeej yog ib qho zoo vim peb kawm txhua lub sij hawm. Nyob hauv lub neej tom ntej los peb kuj kawm ntxiv.”

Cov lus uas Thawj Tswj Hwm Nelson hais rau cov me nyuam no yeej yog hais rau peb txhua tus thiab. Tus Tswv nyiam txoj kev rau siab, vim kev rau siab ncav tau nqi zog. Peb yuav tsum rau rau siab xyaum. Peb yeej yuav mus tau rau yav tom ntev yog tias peb rau rau siab ua raws li tus Tswv ua. ⁵ Nws yeej paub tias peb yuav ua tsis tau tag nrho txhua yam hnub no. Peb yuav tsum rau rau siab nce peb lub Roob Xinais. Peb yeej paub zoo raws li yav tas los hais tias, txoj kev peb taug yuav tsum rau siab, siv dag zog, thiab siv kev kawm, tab sis peb tej kev rau siab yuav ncav tau tej nqi zog nyob mus ib txhis. ⁶

Peb kawm tau dab tsi ntxiv los ntawm tus Yaj Saub Joseph Smith thiab Thawj Zaug Ua Yog Toog txog kev rau siab, kev siv dag zog, thiab kev kawm? Thawj Zaug Ua Yog Toog qhia peb li cas txog peb txoj hauj lwm tseeb ceem heev no? Ua ib co poj niam ntawm txoj kev ntseeg, peb kawm tau tej ntsiab cai tseeb los ntawm tej uas muaj los rau tus Yaj Saub Joseph uas qhia tias peb yuav ua li cas thiaj yuav txais tau kev tshwm sim. Piv txwv hais tias:

• Peb yeej muaj tej hauj lwm nyuam kawg li.

• Peb yeej nyeem vaj lug kub kom peb thiaj li paub hais tias yuav ua dab tsi.

• Peb yeej ua raws li peb txoj kev ntseeg thiab kev tso siab.

• Peb yeej siv peb tej hwj chim thov Vajtswv pab peb kom tiv thaiv tau tus yeeb ncuab tej kev ntxias.

• Peb muab tej yam uas peb lub siab ntshaw tso rau Vajtswv.

• Peb cia Nws txoj kev kaj coj peb lub neej thiab thaum peb tig mus rau Nws ces peb yuav pom qhov kaj.

• Peb paub hais tias Nws paub peb txhua tus lub npe thiab Nws muaj hauj lwm rau peb ua. ⁷

Thiab Joseph Smith tau muab txoj kev paub hais tias peb muaj peev xwm thiab muaj nqis txum tim rov qab los. Vim peb txoj kev sib raug zoo rau peb Leej Txiv Saum Ntuj Ceeb Tsheej, kuv ntseeg hais tias Nws xav kom peb txais tau kev tshwm sim los ntawm Nws.

Tus Tswv hais rau Emma Smith kom “txais tus Vaj Ntsuj Plig Dawb Huv,” rau siab kawm, “muab tej yam ntawm lub ntiaj teb tso tseg, … nrhiav tej yam ntawm ib qho chaw uas zoo dua,” thiab “muab siab npuab tej kev khi lus uas [nws] tau khi” rau Vajtswv. ⁸ Txoj kev kawm yuav pab peb loj hlob, tus Vaj Ntsuj Plig Dawb Huv yuav qhia peb saib yam twg yog yam uas peb yuav tsum muab tso tseg—vim tej yam no yuav thaiv peb txoj kev loj hlob.

Thawj Tswj Hwm Nelson tau hais tias, “Kuv taij thov kom nej sab ntsuj plig yuav haj yam muaj peev xwm txais kev tshwm sim.” ⁹ Kuv nco ntsoov txog peb tus yaj saub cov lus thaum kuv xav txog cov poj niam txoj kev txawj ntse los pab. Vim nws thov li no, ces yog ib qhov tseem ceeb heev. Nws qhia kom peb txawj kov yeej tej yam phem heev hauv lub ntiaj teb es kom peb los txais thiab ua raws li tej kev tshwm sim. ¹⁰ Thaum peb hwm thiab ua neej raws li tus Tswv tej lus txib, ces twb cog lus rau peb ib yam li hais rau Emma Smith tias, peb yuav tau kev ncaj ncees. ¹¹ Tus Yaj Saub Joseph qhia tias kev paub tias Vajtswv pom zoo rau txoj kev uas peb taug hauv lub neej no yog ib qho tseem ceeb. Yog peb tsis paub li ntawd peb yuav “qaug zog nyob hauv [peb] lub siab thiab tsaus muag.” ¹²

Nyob hauv lub tuam rooj sab laj no, peb yuav hnov tej lus tseeb uas yuav ua kom peb hloov siab, coj zoo dua, ua neej dawb huv. Los ntawm peb tej kev tshwm sim, peb yuav tswj tau txoj kev xav uas hais tias “lub rooj sab laj no hais ntau yam dhau heev lawm”—ces peb thiaj yuav rau siab mus ua kom tag nrho txhua yam tam sim no. Cov poj niam yeej muaj ntau txoj hauj lwm uas yuav tsum ua, tab sis yeej yuav ua ib zaug ua tsis tau txhua txoj hauj lwm. Tus Ntsuj Plig yuav pab peb txiav txim siab hais tias yuav ua txoj twg hnub no. ¹³

Tus Tswv yuav ua tib zoo qhia peb los ntawm tus Vaj Ntsuj Plig Dawb Huv hais tias saib Nws yuav xav kom peb ua dab tsi ua ntej es thiaj pab peb txoj kev loj hlob. Peb txoj tshwm sim ntawm tus kheej yuav coj peb mus rau kevloj hlob ntawm peb tus kheej. ¹⁴ Peb mloog zoo ces peb mam ua. ¹⁵ Tus Tswv twb hais tias: “Tuav kuv lub npe thov Leej Txiv los ntawm txoj kev ntseeg, hais tias neb yuav tau txais, ces neb yuav muaj tus Vaj Ntsuj Plig Dawb Huv, tus uas yuav muab txhua yam uas tsim nyog coj los qhia tawm.” ¹⁶ Peb txoj hauj lwm tsis tu tsis tseg yog kom txais kev tshwm sim tsis tu tsis tseg.

Thaum peb paub ua tau tej no zoo dua lawm ces, peb yuav txais tau hwj chim ntau dua los pab peb ua peb hauj lwm ntawm kev cawm seej thiab kev tsa nto—kom peb thiaj yuav paub “muab tej yam ntawm lub ntiaj teb no tso tseg, thiab nrhiav tej yam ntawm ib qho chaw uas zoo dua.” ¹⁷ Ces peb yuav muaj peev xwm pab peb tiam neeg uas tab tom loj hlob tuaj ua ib yam li ntawd.

Cov nus thiab cov viv ncaus, peb sawv daws yeej nrhiav Vajtswv lub hwj chim hauv peb lub neej. ¹⁸ Yeej yog ib qho zoo heev uas cov poj niam thiab cov txiv neej sib pab los ua Vajtswv txoj hauj lwm niaj hnub nim no. Peb yeej muaj tau lub hwj chim ntawm lub pov thawj hwj los ntawm kev khi lus, ntawm thawj qhov ces yog kev ua kev cai raus dej thiab thaum kawg los ntawm lub tuam tsev. ¹⁹ Thawj Tswj Hwm Nelson tau qhia rau peb hais tias, “Txhua tus poj niam thiab txhua tus txiv neej uas ua kev khi lus rau Vajtswv thiab ua raws li lawv tej kev khi lus, thiab ua neeg tsim nyog ua cov kab ke pov thawj hwj, yeej txais tau Vajtswv lub hwj chim.” ²⁰

Kuv qhia rau nej hnub no hais tias yav tas los kuv yeej tsis paub hais tias kuv yeej muaj peev xwm ncav tau lub hwj chim pov thawj hwj, los ntawm kuv tej kev khi lus. ²¹ Cov viv ncaus, kuv thov kom peb yuav to taub thiab saib lub hwj chim pov thawj hwj rau nqi thaum peb “muab siab npuab [peb] tej kev khi lus,” ²² ntseeg tej lus tseeb hauv vaj lug kub, thiab ua raws li peb cov yaj saub tsej lus.

Thov kom peb hawm peb Leej Txiv Saum Ntuj Ceeb Tsheej thiab tus Cawm Seej, “nrog rau txoj kev ntseeg nws uas khov kho, vam khom tag nrho rau tej hauj lwm zoo ntawm tus uas muaj hwj chim cawm tau.” ²³ Thov kom peb muaj kev xyiv fab mus tom ntej kom peb sab ntsuj plig muaj peev xwm tshaj plaws thiab pab cov nyob ib puag ncig peb ua ib yam li ntawd los ntawm peb txoj kev ua thawj coj, kev hlub, kev pab, thiab kev khuv leej.

Txwj Laug James E. Talmage tau hais kom peb nco ntsoov hais tias, “Tus uas saib cov poj niam rau nqi tshaj plaws yog Yexus Khetos.” ²⁴ Thaum kawg, cov poj niam txoj hauj lwm uas tseem ceeb tshaj plaws ntawm txoj Kev Muab Txoj Moo Zoo Txum Tim Rov Qab Los yog dab tsi? Kuv ua tim khawv hais tias yog losmloogNws, ²⁵ los ua raws li Nws, ²⁶ tso siab rau Nws, ²⁷ thiab los ua tus cev Nws txoj kev hlub. ²⁸ Kuv paub hais tias Nws muaj sia nyob. ²⁹ Los ntawm Yexus Khetos lub npe dawb ceev, amees.