Lub Tuam Rooj Sab Laj
Kev Txiav Txim Ncaj Ncees
Plaub Hlis Ntuj xyoo 2020 lub tuam rooj sab laj

Kev Txiav Txim Ncaj Ncees

Los ntawm Txwj Laug James R. Rasband

Ntawm Pawg Xya Caum

Xwv kom muaj ib txoj kev txiav txim ncaj ncees, tus Cawm Seej yuav rho tej ntoo tuaj pos uas ua rau peb mob vim lwm tus tsis paub zoo los sis lawv tau ua txhaum.

Phau Ntawv Maumoos Qhia txog Khetos cov Lus Qhuab Qhia

Lub Kaum Hli Ntuj tas los, Thawj Tswj Hwm Russell M. Nelson tau hais kom peb xav txog qhov uas peb lub neej yuav txawv li cas yog peb “tsis muaj tej kev txawj ntse los ntawm Phau Ntawv Maumoos.”1 Kuv twb xav txog nws cov lus nug, ib yam li nej tau xav thiab. Ib yam uas kuv pheej xav txog yog qhov uas yog tsis muaj Phau Ntawv Maumoos thiab cov lus qhuab qhia txog Khetos thiab Nws txoj kev txi theej txhoj nyob hauv, kuv yuav mus qhov twg nrhiav tau kev kaj siab lug?

Khetos cov lus qhuab qhia—uas yog cov ntsiab cai thiab cov kab ke cawm seej xws li kev ntseeg Khetos, kev hloov siab lees txim, kev cai raus dej, lub txiaj ntsim Vaj Ntsuj Plig Dawb Huv, thiab nyiaj mus kom txog thaum kawg—los twb qhia ntau zaus nyob hauv tag nrho cov vaj lug kub ntawm lub Caij Txum Tim Rov Qab Los tiam sis tej no muaj hwj chim heev nyob hauv Phau Ntawv Maumoos.2 Cov lus qhuab qhia pib nrog kev ntseeg Khetos, thiab txhua yam nyob ntawm seb peb puas tso siab rau Nws txoj kev txi theej txhoj.

Ib yam li Thawj Tswj Hwm Nelson tau qhia, “Phau Ntawv Maumoos muaj cov lus qhia uas muaj hwj chim thiab meej tshaj plaws hais txog Yexus Khetos txoj Kev Theej Txhoj, ntau dua lwm phau ntawv qhov twg los xij.”3 Peb yim to taub tus Cawm Seej lub txiaj ntsim zoo tshaj no, peb yim yuav los paub hauv peb lub siab lub ntsws,4 txog qhov uas Thawj Tswj Hwm Nelson hais tias “Tej qhov tseeb hauv Phau Ntawv Maumoos muaj lub hwj chim kho peb lub neej, nplij peb lub siab, coj peb rov qab los, txhawb nqa peb, ntxiv zog rau peb, ua rau peb zoo siab, thiab ua rau peb nyob kaj siab lug.”5

Tus Cawm Seej txoj Kev Theej Txhoj Them Kev Txij Lim tej Nqi

Qhov uas Phau Ntawv Maumoos pab peb to taub txog tus Cawm Seej txoj Kev Theej Txhoj yog txoj kev qhia tias Khetos txoj kev hlub tshua ua Nws tus kheej txi rau peb twb them tej nqi ntawm txoj kev txim lij. Ib yam li Amas piav, “Vajtswv tus kheej thiaj li theej rau neeg ntiaj teb tej kev txhaum, kom coj tau txoj hau kev hlub tshua los, kom them tej nqi ntawm txoj kev txim lij, hais tias Vajtswv yog ib tug Vajtswv uas zoo tag nrho, uas ncaj ncees, thiab kuj yog ib tug Vajtswv uas muaj kev hlub tshua thiab.”6 Leej Txiv txoj hau kev hlub tshua7—cov vaj lug kub hu ua txoj hau kev zoo siab8 los sis txoj hau kev cawm seej9—yuav tsis muaj hlo li tsuas yog twb them tej nqi ntawm txoj kev txim lij tag nrho.

Tiam sis “tej nqi ntawm txoj kev txim lij” yog dab tsi? Cia li xav txog Amas lub neej. Cia li nco qab tias thaum nws yog ib tug hluas, Amas xav “ua kom lub koom txoos puas tsuaj.”10 Muaj tseeb tiag, Amas tau qhia nws tus tub Hilamas tias nws “raug tsim txom nrog tej kev mob ntawm ntuj txiag teb tsaus” vim nws xav tias zoo li “tau tua [Vajtswv] cov me nyuam coob leej” thaum nws “coj lawv mus rau txoj kev puas tsuaj.”11

Amas piav rau Hilamas tias kev kaj siab lug twb los rau nws thaum nws “lub siab tsom ntsoov rau” qhov uas nws txiv qhia “ntsig txog … Yexus Khetos, … [uas] yuav los theej neeg ntiaj teb tej kev txhaum.”12 Amas twb lees txhaum thiab thov kom Khetos hlub tshua nws13 ces nws muaj kev xyiv fab thiab kev nplij siab thaum nws kawm tias Khetos tau theej nws lub txhoj thiab them tej nqi ntawm kev txim lij. Ces, kev txim lij yuam Amas them nqi dab tsi? Ib yam li Amas tau qhia tom qab ntawd, “tsis muaj leej twg uas tsis huv yuav muaj peev xwm tau Vajtswv lub nceeg vaj los ua nws tug.”14 Yog li ntawd, Amas txoj kev nplij siab yog vim tsis muaj kev hlub tshua los pab, ces kev txim lij yuav txwv tsis pub nws rov qab mus nrog Leej Txiv Saum Ntuj Ceeb Tsheej nyob.15

Tus Cawm Seej Kho tej Mob uas Peb Kho Tsis Taus

Tiam sis Amas txoj kev xyiv fab puas yog vim nws xav txog nws tus kheej xwb—xav txog nws txoj kev dim txim thiab nws txoj kev yuav mus rov qab nrog Leej Txiv nyob? Peb paub tias Amas txhawj heev txog cov uas nws twb coj mus deb ntawm qhov tseeb.16 Tiam sis Amas tsis txawj kho thiab pab txhua tus uas nws twb tau coj mus lawm. Nws tsis muaj peev xwm muab cib fim rau lawv kawm txog Khetos cov lus qhuab qhia thiab foom koob hmoov rau lawv kom ua raws li txoj moo zoo tej ntsiab cai uas ua rau neeg muaj kev xyiv fab. Nws coj tsis tau cov uas twb tuag lawm thaum lawv tseem pom tsis tseeb vim nws qhia tej yam cuav rau lawv.

Ib yam li Thawj Tswj Hwm Boyd K. Packer tau qhia tias: “Kev xav uas cawm Amas dim … yog li no: Lub hom phiaj ntawm Khetos txoj kev theej txhoj yog kom kho qhov mob uas yus tsis muaj peev xwm kho thiab muab tej yam uas yus twb ua piam tas kom rov zoo li qub.”17 Qhov tseeb zoo siab uas Amas tsom ntsoov rau tsis yog vim nws yuav ua neeg huv xwb tiam sis nws kuj xav txog cov uas nws twb ua phem rau thiab lawv muaj cib fim txais kev kho mob thiab ua tau neeg huv.

Tus Cawm Seej txoj Kev Txi Ua rau Peb Txais Tau Kev Txiav Txim Ncaj Ncees

Ntau xyoo ua ntej Amas txais kev cawm seej los ntawm cov lus qhuab qhia no, Vaj Ntxwv Npeyamis tau qhia txog txhua yam uas tus Cawm Seej txoj kev txi theej txhoj kho tau. Vaj Ntxwv Npeyamis tau hais tias Vajtswv ib tug tim tswv tau qhia “tej moo zoo siab ntawm txoj kev xyiv fab heev” rau nws.18 Ib qho los ntawm tej moo zoo siab ntawd yog qhov tseeb uas qhia tias Khetos yuav raug txom nyem thiab tuag rau peb tej kev txhaum thiab tej peb ua yuam kev kom muaj “ib txoj kev txiav txim ncaj ncees yuav muaj los rau noob neej.”19

“Txoj kev txiav txim ncaj ncees” yog dab tsi? Nyob hauv nqe tom qab ntawd Vaj Ntxwv Npeyamis piav tias, xwv kom muaj ib txoj kev txiav txim ncaj ncees, tus Cawm Seej cov ntshav tau theej “rau tej kev txhaum ntawm cov uas tau poob los ntawm Adas txoj kev ua txhaum” thiab rau cov uas “tau tuag es tsis paub Vajtswv lub siab nyiam ntsig txog lawv, los sis cov uas tsis paub tias lawv ua txhaum.”20 Nws kuj qhia tias ib txoj kev txiav txim ncaj ncees yog qhov uas “Khetos cov ntshav theej” rau cov me nyuam yaus tej kev txhaum.21

Cov vaj lug kub no qhia ib txoj lus qhuab qhia zoo kawg: tus Cawm Seej txoj kev txi theej txhoj kho peb tus mob, yog ib lub txiaj ntsim Nws pub dawb, rau cov uas tsis paub lawv ua txhaum—zoo li Yakhauj qhia tias, “cov uas tus Tswv tsis tau muab txoj kev cai rau.”22 Kev lav ris kev txhaum nyob ntawm seb peb tau txais txoj kev kaj npaum li cas thiab nyob ntawm peb txoj kev txawj siv peb txoj kev ywj siab xaiv.23 Peb paub qhov tseeb uas nplij peb lub siab no tsuas yog vim Phau Ntawv Maumoos thiab lwm phau vaj lug kub ntawm lub Caij Txum Tim Rov Qab Los.24

Thaum twg tau muab ib txoj kev cai rau peb, yog peb paub txog Vajtswv lub siab nyiam, ces peb lav ris txoj kev cai ntawd. Ib yam li Vaj Ntxwv Npeyamis hais: “Tiam sis kev txom nyem, kev txom nyem raug tus uas paub tias nws ntxeev siab tawm tsam Vajtswv! Vim txoj kev cawm seej yuav tsis los rau ib tug uas ua li ntawd tsuas yog los ntawm kev hloov siab lees txim thiab kev ntseeg tus Tswv Yexus Khetos xwb.”25

Qhov no kuj yog tej moo zoo siab ntawm Khetos cov lus qhuab qhia. Tsis yog tus Cawm Seej kho cov uas tsis paub lawv ua txhaum xwb, tiam sis rau cov uas ua txhaum rau txoj kev kaj, tus Cawm Seej kho tau lawv yog lawv hloov siab lees txim thiab ntseeg nws.26

Amas twb “tsom ntsoov” rau tej lus tseeb no. Puas yog Amas yuav piav hais tias nws muaj kev “xyiv fab”27 yog nws xav tias Khetos tau cawm nws dim tiam sis cov uas nws tau coj mus deb ntawm qhov tseeb tseem raug txom nyem? Tsis yog li ntawd. Yog Amas yuav muaj kev kaj siab lug tag nrho, cov uas nws ua txhaum rau yuav tsum muaj cib fim rov zoo.

Tiam sis yuav ua li cas kom lawv—los sis cov uas peb ua txhaum rau—yuav rov zoo? Txawm peb tsis to taub tus Cawm Seej txoj kev txi theej txhoj kho peb zoo li cas, peb yeej paub tias xwv kom muaj ib txoj kev txiav txim ncaj ncees, tus Cawm Seej yuav rho tej ntoo tuaj pos uas ua rau peb mob vim lwm tus tsis paub zoo los sis lawv tau ua txhaum.28 Vim nws ua li no Nws thiaj li qhia tias tag nrho Vajtswv cov me nyuam yuav pom meej muaj cib fim xaiv kom coj raws li Nws thiab lees yuav txoj hau kev zoo siab.29

Tus Cawm Seej Yuav Kho Txhua Yam uas Peb Ua Tawg Lawm

Yog tej lus tseeb no uas ua rau Amas nyob kaj siab lug. Thiab yog tej lus tseeb no uas yuav ua rau peb nyob kaj siab lug thiab. Vim peb yog txiv neej thiab poj niam ntawm sab cev nqaij daim tawv, peb txhua tus yeej sib raug tsis zoo thiab ib leeg ua txhaum rau ib leeg. Ib yam li ib tug niam tsev txiv tsev hais tau, qhov mob los ntawm tej yam peb ua yuam kev tsis yog kev ntshai peb txoj kev raug txim tiam sis yog kev ntshai tias peb twb tau tab kaum peb cov me nyuam kom tsis muaj kev xyiv fab los sis kom lawv tsis pom thiab to taub qhov tseeb. Qhov uas tus Cawm Seej cog lus los ntawm Nws txoj kev theej txhoj yog qhov uas hais ntsig txog tej uas cov niam tsev txiv tsev ua yuam kev, Nws tsis liam peb cov me nyuam thiab cog lus tias Nws mam li kho lawv zoo.30 Thiab txawm yog lawv twb ua txhaum hauv txoj kev kaj—ib yam li peb txhua tus ua—Nws txhais npab hlub tshua cev los31 thiab Nws yuav txhiv lawv dim yog lawv yuav saib ntsoov nws thiab muaj sia.32

Txawm tus Cawm Seej muaj hwj chim kho tej yam uas peb kho tsis taus, nws txib peb ua txhua yam peb ua tau kom thiaj li kho tau, ua li no yog ib feem ntawm peb txoj kev hloov siab lees txim.33 Peb tej kev txhaum thiab tej yam peb ua yuam kev ua rau peb tsis sib raug zoo nrog Vajtswv thiab tsis sib raug zoo nrog lwm tus. Tej lub sij hawm peb txoj kev sov zog kom kho thiab rov zoo yooj yim npaum li yus hais thov txim xwb, tiam sis tej lub sij hawm yuav tsum txo hwj chim siv zog ntau xyoo kom thiaj kho tau.34 Tiam sis, muaj ntau yam kev txhaum, uas peb yeej kho tsis taus tag nrho. Kev kaj siab lug zoo kawg nkaus uas Phau Ntawv Maumoos thiab txoj moo zoo cog lus tias peb txais tau yog vim tus Cawm Seej yuav kho txhua yam uas peb twb ua puas tsuaj tas.35 Thiab Nws yuav kho peb yog tias peb muaj kev ntseeg mus cuag Nws thiab hloov siab lees txim rau tej yam phem peb tau ua.36 Nws muab ob lub txiaj ntsim no rau peb vim Nws hlub peb nrog ib txoj kev hlub zoo tag nrho37 thiab vim Nws cog lus tias Nws yuav txiav txim ncaj ncees raws li kev txim lij thiab kev hlub tshua. Kuv ua tim khawv hais tias qhov no muaj tseeb los ntawm Yexus Khetos lub npe, amees.

Lus Cim

  1. Russell M. Nelson, “Tej Lus Xaus,” Liahona, Kaum Ib Hlis Ntuj 2019, 122.

  2. Saib 2 Nifais 31; 3 Nifais 11:28, 32, 35, 39–40; Lus Qhuab Qhia thiab Kev Khi Lus 10:62–63, 67–70; 68:25; Mauxes 6:52–54; 8:24; Tej Nqe Kev Ntseeg 1:4.

  3. Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” Liahona, Kaum Ib Hlis Ntuj 2017, 62.

  4. Saib Lus Qhuab Qhia thiab Kev Khi Lus 8:2–3.

  5. Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” 62.

  6. Amas 42:15.

  7. Saib Amas 42:15.

  8. Saib Amas 42:8.

  9. Saib Amas 24:14; Mauxes 6:62.

  10. Saib Mauxiyas 27:8–10.

  11. Amas 36:13, 14.

  12. Amas 36:17, 18.

  13. Saib Amas 36:18.

  14. Amas 40:26; kuj saib 1 Nifais 15:34; Amas 7:21; 11:37; Hilamas 8:25.

  15. Saib 3 Nifais 27:19; kuj saib Mauxes 6:57.

  16. Saib Amas 36:14–17.

  17. Boyd K. Packer, “The Brilliant Morning of Forgiveness,” Ensign, Kaum Ib Hlis Ntuj 1995, 19–20.

  18. Mauxiyas 3:2, 3.

  19. Mauxiyas 3:10; ntxiv qhov uas ntawv qaij.

  20. Mauxiyas 3:11; kuj saib 2 Nifais 9:26.

  21. Mauxiyas 3:16; kuj saib Mauxiyas 15:25; Maulaunais 8:11–12, 22.

  22. 2 Nifais 9:25.

  23. Saib 2 Nifais 2:26–27; Hilamas 14:29–30.

  24. Saib Tej Nqe Kev Ntseeg 1:2; kuj saib Lus Qhuab Qhia thiab Kev Khi Lus 45:54. Thaum nws hais txog cov lus qhuab qhia ntawm kev cai raus dej rau cov tuag, tus Yaj Saub Joseph hais tias: “Thaum ib txhia neeg tab tom txiav txim thiab liam txim rau lwm cov neeg tsis muaj kev hlub tshua hlo li, Leej Txiv rau tag nrho qaum ntuj saib tib neeg ntiaj teb vim Nws yog Leej Txiv uas hlub lawv thiab ua tib zoo saib xyuas li Leej Txiv zoo; Nws saib lawv yog Nws cov me nyuam. … Nws yog tus kws tsa txoj Kev Cai, thiab yuav txiav txim rau tib neeg sawv dawv, tsis yog yuav txiav txim raws li tej neeg tej tswv yim. … Nws yuav txiav txim rau lawv, ‘tsis yog raug kev txiav txim rau tej yam uas lawv tsis tau paub, tiam sis raws li tej yam uas lawv twb paub los lawm’; cov uas tau ua neej nyob tsis paub txog txoj kev cai, yuav raug kev txiav txim raws li cov uas tsis paub txoj kev cai, thiab cov uas paub txog txoj kev cai, yuav raug kev txiav txim raws li txoj kev cai ntawd. Peb yuav tsum tso siab ntseeg tus Yehauvas Zoo Kawg Nkaus lub tswv yim thiab kev txawj ntse; Nws yuav rau txim los sis muab kev hlub tshua rau txhua lub teb chaws nyob ntawm seb lawv tau ua tej hauj lwm zoo li cas, lawv tau kawm txawj kawm ntse li cas, lawv tau tsa tej kev cai zoo li cas, seb lawv tau ua raws li tej cib fim li cas, thiab raws li Nws txoj hau kev li cas uas nws tau npaj tseg rau tib neeg ntiaj teb; thiab … peb txhua tus yuav tsum lees paub hais tias tus Kws Txiav Txim rau tag nrho lub ntiaj teb tau ua qhov zoo lawm” (Teachings of Presidents of the Church: Joseph Smith [2007], 404).

  25. Mauxiyas 3:12; kuj saib 2 Nifais 9:27.

  26. Saib Mauxiyas 3:12; Hilamas 14:30; Maulaunais 8:10; Lus Qhuab Qhia thiab Kev Khi Lus 101:78. Tej lub sij hawm cov neeg yuav tsis paub txog tej lus txib thiab tej kev khi lus los sis lawv tsis txawj siv lawv txoj kev ywj siab xaiv tiam sis lawv tseem muaj kev lav ris lwm lub sij hawm vim lawv muaj Khetos txoj Kev Kaj (saib 2 Nifais 9:25; Maulaunais 7:16–19). Tus Cawm Seej, tus uas yog peb tus txiav txim thiab yuav txiav txim ncaj ncees, nws yuav paub thaum twg yog tej lub sij hawm zoo li no (saib Maumoos 3:20; Mauxes 6:53–57). Thiab Nws twb them nqi rau ob hom sij hawm no—thaum peb tsis paub tiag thiab thaum peb paub zoo yog tias peb hloov siab lees txim.

  27. Amas 36:21.

  28. Saib Mauxiyas 3:11; kuj saib D. Todd Christofferson, “Redemption,” Liahona, Tsib Hlis Ntuj 2013, 110; Amas 7:11–12 (“Nws yuav ris nws cov neeg tej kev mob thiab tej kev nkeeg. … Thiab nws yuav ris lawv tej kev qaug dag qaug zog”); Yaxayas 53:3–5 (“Twb yog nws ris peb tej kev nyuaj siab, thiab nqa peb tej kev tu siab mus”); 61:1–3 (“Tus Tswv tau tsa kuv … mus nplij cov neeg uas muaj kev lwj siab, … muab kev zoo siab pauj kev quaj ntsuag rau cov neeg uas nyob hauv lub nroog Xi-oos, muab kev zoo siab thiab kev kaj siab pauj kev lwj siab”). Qhov uas tus Cawm Seej tau hais tej nqe los ntawm Yaxayas thaum Nws tshaj tawm tias Nws yog tus Mexiyas yog ib qho tseem ceeb: “Vajtswv txoj lus pwm uas nej lub qhov ntsej tau hnov kuj tiav rau hnub no lawm” (saib Lukas 4:16–21).

  29. Nyob hauv lub ntuj ntsuj plig, “muaj neeg qhia txoj moo zoo rau cov neeg tsis paub, cov uas tsis tau hloov siab lees txim, thiab cov uas ntxeev siab lawv thiaj li yuav dim ntawm txoj kev ua cev qhev thiab mus tom ntej kom txais cov koob hmoov los ntawm Leej Txiv Saum Ntuj Ceeb Tsheej uas hlub lawv” (Dallin H. Oaks, “Tso Siab rau tus Tswv,” Liahona, Kaum Ib Hlis Ntuj 2019, 27). Saib 1 Petus 4:6; 2 Nifais 2:11–16; Lus Qhuab Qhia thiab Kev Khi Lus 128:19; 137:7–9; 138:31–35.

  30. Saib Mauxes 6:54. Thawj Tswj Hwm M. Russell Ballard tau qhia cov lus qhuab qhia no thaum hais txog kev tua yus tus kheej: “Tsuas yog tus Tswv paub txhua nrho, thiab nws yog tus uas yuav txiav txim rau tej yam peb ua hauv lub ntiaj teb no. Thaum nws txiav txim peb, kuv xav tias nws yuav suav txhua yam: peb keeb kwm roj ntshav, peb lub hlwb zoo li cas, peb txoj kev txawj kawm ntawv, tej lus qhia uas peb tau txais, peb cov yawg koob tej kab lig kev cai, peb txoj kev noj qab nyob zoo, thiab li ntawd. Peb kawm los ntawm cov vaj lug kub tias Khetos cov ntshav yuav theej tib neeg lub txhoj ‘cov uas tau tuag es tsis paub Vajtswv lub siab nyiam ntsig txog lawv, los sis cov uas tsis paub tias lawv ua txhaum’ (Mauxiyas 3:11)” (“Suicide: Some Things We Know, and Some We Do Not,” Ensign, Kaum Hli Ntuj 1987, 8; Tambuli, Peb Hlis Ntuj 1988, 18).

  31. Saib Yakhauj 6:5; Mauxiyas 29:20; 3 Nifais 9:14; Lus Qhuab Qhia thiab Kev Khi Lus 29:1.

  32. Saib Hilamas 8:15.

  33. Saib Levis Kev Cai 6:4–5; Exekhees 33:15–16; Hilamas 5:17; Lus Qhuab Qhia thiab Kev Khi Lus 58:42–43.

  34. Yog kev siv zog li no uas Amas nws tus kheej tau ua (saib Amas 36:24).

  35. Thawj Tswj Hwm Boyd K. Packer tau qhia lub ntsiab cai no:

    “Muaj tej lub sij hawm thaum yus kho tsis tau ib yam uas yus tau ua txhaum. Tej zaum yus tau ua txhaum ntev dhau los, los sis tus uas yus ua phem rau tsis kam zam txim rau yus. Tej zaum yus tau ua phem loj heev yus thiaj kho tsis tau tsis hais yus xav muab kho heev los yog.

    “Yus yeej yuav hloov siab lees txim tsis taus yog tias yus tsis tau kho kom rov zoo li qub. Yog tias yus kho tsis taus tej yam yus twb ua lawm, ces ntshe yus mag lawm xwb. Yooj yim rau yus to taub tias yus tsis muaj kev cia siab hlo li thiab vim li cas yus xav muab txhua yam tso tseg xwb, ib yam li Amas xav. …

    “Vim li cas Nws txawj kho txhua yam, peb tsis paub. Tej zaum yuav kho tsis taus hauv lub neej no tag nrho. Peb paub los ntawm tej kev ua yog toog thiab cov tim tswv tej kev tuaj xyuas hais tias tus Tswv cov tub qhe tseem ua hauj lwm txhiv dim nyob sab tid ntawm daim ntaub thaiv.

    “Qhov uas peb paub li no yeej nplij cov neeg tsis muaj txim lub siab ib yam li cov uas muaj txim thiab. Kuv xav txog cov niam tsev txiv tsev uas raug txom nyem heev vim lawv cov me nyuam loj leeb ua yuam kev loj heev thiab lawv poob siab heev” (“The Brilliant Morning of Forgiveness,” 19–20).

  36. Saib 3 Nifais 12:19; kuj saib Mathais 6:12; 3 Nifais 13:11.

  37. Saib Yauhas 15:12–13; 1 Yauhas 4:18; Dieter F. Uchtdorf, “Kev Hlub Tiag Tiag Ntiab Tau Kev Ntshai Tawm,” Liahona, Tsib Hlis Ntuj 2017, 107.