Kev Qhia zaj txog Kev Txum Tim Rov Qab Los thiab Kev Sawv Rov Los
Kev Muab Txoj Moo Zoo Txum Tim Rov Qab Los yog pub rau lub ntiaj teb lawm, thiab zaj lus no yeej tseem ceeb hnub no.
Nyob hauv rooj sab laj no peb tau hais lus thiab hu nkauj nrog kev xyiv fab txog kev “rov qab muaj ib puas tsav yam txum tim rov qab los”1 uas txij puag thaum ub tau cog lus yuav muaj xwv kom “txhua yam los ua ib ke rau Khetos ua tus thawj,”2 xws li txoj moo zoo uas muaj txhij txhua, lub pov thawj hwj, Yexus Khetos lub Koom Txoos, tag nrho tej no peb hu ua “Kev Txum Tim Rov Qab Los.”
Tiam sis Kev Muab Txoj Moo Zoo Txum Tim Rov Qab Los tsis yog rau peb cov uas zoo siab txog qhov no. Tej kev tshwm sim los ntawm Thawj Zaug Ua Yog Toog tsis yog rau Joseph Smith nws ib leeg xwb tiam sis yeej yog txoj kev kaj thiab qhov tseeb rau leej twg uas “tsis muaj tswv yim.”3 Phau Ntawv Maumoos yog pub rau txhua leej txhua tus. Cov kab ke pov thawj hwj ntawm kev cawm seej thiab kev tsa nto twb tau npaj rau txhua leej txhua tus, tsis hais cov uas tau tso lub ntiaj teb no tseg lawm. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab cov koob hmoov yog pub rau txhua tus uas xav tau. Lub txiaj ntsim Vaj Ntsuj Plig Dawb Huv yog pub rau txhua tus. Kev Muab Txoj Moo Zoo Txum Tim Rov Qab Los yog pub rau lub ntiaj teb lawm, thiab zaj lus no yeej tseem ceeb hnub no.
“Yog li ntawd, yog ib qho uas tseem ceeb kawg nkaus kom muab tej xwm txheej no qhia rau tej neeg uas nyob hauv ntiaj teb no paub, kom lawv yuav paub tias tsis muaj ib tug neeg uas muaj peev xwm nyob tau ntawm Vajtswv xub ntiag, tsuas yog los ntawm tus Mexiyas uas Dawb Huv txoj hauj lwm zoo, txoj kev hlub tshua, thiab txoj kev tshav ntuj, tus uas tau tso nws txoj sia raws li sab cev nqaij daim tawv, thiab rov qab txais txoj sia dua los ntawm tus Ntsuj Plig lub hwj chim, xwv kom nws yuav coj tau cov neeg tuag sawv rov los, vim nws yog thawj tug uas yuav sawv los.”4
Txij thaum tus Yaj Saub tus kwv, Samuel Smith, tso tej Phau Ntawv Maumoos rau hauv nws lub hnab puv lawm thiab npaj mus ko taw mus qhia lwm tus txog cov vaj lug kub tshiab los, Haiv Neeg Ntseeg twb ua hauj lwm tsis tu tsis tseg “muab tej xwm txheej no qhia rau tej neeg uas nyob hauv ntiaj teb no paub.”
Xyoo 1920, Txwj Laug David O. McKay ntawm Pawg Kaum Ob tug Thwj Tim tau pib mus xyuas tej qhov chaw tshaj tawm txoj moo zoo ntawm lub Koom Txoos. Thaum lub Tsib Hlis Ntuj xyoo 1921, nws nyob hauv ib qho chaw faus neeg nyob hauv Fagali‘i, Samoa, nyob rau ntawm peb lub ntxa ntawm peb tug me nyuam yaus, Thomas thiab Sarah Hilton ib tug ntxhais thiab ob tug tub. Peb tug me nyuam no—tus hlob muaj ob xyoos xwb—lawv tuag thaum lub sij hawm uas Thomas thiab Sarah ub tub txib ua ke hauv ua ntej txog xyoo 1900.
Ua ntej nws ncaim Utah, Txwj Laug McKay cog lus rau Sarah, uas yog ib tug poj ntsuam, hais tias nws yuav tuaj xyuas nws cov me nyuam tej lub ntxa hauv Samoa vim nws tsis tau muaj cib fim rov qab mus ntawd. Txwj Laug McKay sau ntawv tuaj rau nws hais tias, “Nej peb tus me tub me ntxhais, Muam Hilton, nyob tswm seeb … ua koj txoj hauj lwm tshaj tawm txoj moo zoo uas koj tau pib peb caug xyoo tas los.” Ces nws twb sau paj lug rau nws:
Cov uas hlub lawv tau xuas tes qi lawv qhov muag,
Cov uas hlub lawv tau tso lawv tes taw kom zoo,
Cov nyob hauv pej kum teb chaws tau tu lawv cov ntxa,
Cov tsis paub lawv qhuas lawv, thiab quaj rau lawv.5
Zaj no yeej yog ib zaj xwb los ntawm ntau txhiab zaj uas hais txog kev pub sij hawm, nyiaj, thiab lub neej txij thaum 200 xyoo tas los no kom qhia tau zaj lus txog lub caij nyoog Txum Tim Rov Qab Los. Qhov uas peb xav tshaj tawm rau txhua haiv neeg, xeem neeg, yam lus, thiab cov neeg los yeej tsis tau ploj mus raws li nej kawm tau los ntawm txhiab txhiab tus tub hluas ntxhais hluas thiab khub niam txiv uas yog cov tub txib ntxhais txib, los ntawm lub Koom Txoos cov mej zeej uas ua raws li Filis cov lus kom los thiab saib,6 thiab los ntawm cov nyiaj uas siv txhua xyoo kom txhawb nqa txoj hauj lwm nyob thoob plaws lub ntiaj teb.
Peb tsis yuam lwm tus ua raws li peb caw, tiam sis peb cia siab tias tib neeg yuav xav paub txog qhov uas peb hais. Xwv kom muaj li ntawd, kuv ntseeg tias yuav tsum ua peb yam: yam thib ib, nej txoj kev hlub; yam thib ob, nej tus yam ntxwv; thiab yam thib peb, nej txoj kev siv Phau Ntawv Maumoos.
Peb yuav tsum tsis txhob caw lwm tus vim peb xav txog peb tus kheej; tiam sis peb yuav tsum caw lwm tus vim peb hlub lawv.7 Txoj kev hlub no, uas yog Khetos txoj kev hlub dawb huv, los peb yuav tsum thov kom tau xwb. Tus Tswv caw peb, los yog txib peb, kom “cia li thov Leej Txiv kawg siab kawg ntsws, xwv kom [peb] yuav muaj txoj kev hlub no puv npo.”8
Ua piv txwv, kuv hais ib zaj los ntawm Muam Lanett Ho Ching, uas tam sim no nrog nws tus txiv, Thawj Tswj Hwm Francis Ho Ching, uas tswj hwm qhov chaw tshaj tawm txoj moo zoo Samoa Apia. Muam Ho Ching hais tias:
“Ntau xyoo tas los, peb tsev neeg tau tsiv tsev rau hauv ib lub tsev me me nyob hauv Laie, Hawaii. Chaw nres tsheb hauv peb lub tsev los twb kho ua ib lub tsev kem me me, es ib tug txiv neej hu ua Jonathan nyob ntawd. Jonathan yog peb tus neeg zej zog thaum peb nyob lwm qhov chaw. Peb xav tias yeej tsis yog txoj hmoov xwb uas tus Tswv tau cia peb rov qab sib ntsib li no, yog li ntawd peb txiav txim siab tias peb yuav hais lus me ntsis txog tej yam peb ua thiab peb txoj kev ua mej zeej hauv lub Koom Txoos. Jonathan nyiam nrog peb ua phooj ywg thiab nyiam siv sij hawm nrog peb tsev neeg. Nws nyiam kawm txog txoj moo zoo, tiam sis nws tsis xav koom lub Koom Txoos.
“Sij hawm dhau mus, es cov me nyuam twb hu Jonathan ua ‘Dab Laug Jonathan’ Thaum peb tsev neeg loj tuaj, Jonathan xav paub ntxiv txog tej yam uas peb ua. Peb twb caw nws los koom nrog peb ua si, kev ua koob tsheej txog hnub yug, hauv tsev kawm ntawv, thiab nyob hauv lub Koom Txoos, tsis tas li ntawd, peb caw nws koom nrog peb muaj tsev neeg hmo ua ke thiab thaum cov me nyuam ua kev cai raus dej.
“Muaj ib hnub Jonathan hu tuaj rau kuv. Nws xav tau kev pab. Nws muaj ntshav qab zib thiab nws txhais ko taw raug kab mob heev ntshe yuav tsum txiav nws txhais ko taw pov tseg. Peb tsev neeg thiab cov hauv peb pawg ntseeg tau pab nws kov yeej kev sim siab ntawd. Peb tau nyob nrog nws hauv tsev kho mob thiab foom koob hmoov pov thawj hwj rau nws. Thaum Jonathan tseem tab tom rov zoo, nrog cov muam hauv Koom Haum Niam Tsev txoj kev pab, peb tau tu nws lub tsev. Cov kwv tij uas tuav lub pov thawj hwj tau npaj ib txoj kev mus txog nws lub qhov rooj thiab tej pas tuav hauv chav da dej. Thaum Jonathan rov qab los tsev, nws los kua muag ntau.
“Jonathan pib rov mloog cov tub txib ntxiv. Lub lim tiam ua ntej Xyoo Tshiab, nws hu kuv thiab nug tias, ‘Koj ua dab tsi thaum Hmo Ua Ntej Xyoo Tshiab?’ Kuv hais kom nws nco txog peb txoj kev ua si uas ua txhua xyoo. Tiam sis, nws teb hais tias, ‘Kuv xav kom nej los saib kuv ua kev cai raus dej! Xyoo tshiab no kuv xav pib ua qhov yog.’ Tom qab 20 xyoo uas peb pheej hais ‘los thiab saib,’ ‘los thiab pab,’ thiab ‘los thiab nyob,’ tus neeg uas muaj nqis no twb npaj siab ua kev cai raus dej.
“Xyoo 2018, thaum wb raug hu mus ua qhov chaw tshaj tawm txoj moo zoo tus thawj tswj hwm thiab tus khub, Jonathan pib mob zuj zus. Wb thov nws kom muaj zog tos wb rov qab los tsev. Nws nyob li no yuav luag tau ib xyoos, tiam sis tus Tswv npaj rau nws mus tsev. Nws tau tas sim neej thaum lub Plaub Hlis Ntuj xyoo 2019. Kuv cov ntxhais twb mus rau lawv ‘Dab Laug Jonathan’ lub ntees tuag thiab tau hu tib zaj nkauj uas hu thaum nws ua kev cai raus dej.”
Kuv xav hais yam thib ob uas yuav pab nej tshaj tawm zaj lus txog kev muab txoj moo zoo txum tim rov qab los thaum kuv nug li no: yuav ua li cas kom lwm tus xav ua li nej cov lus caw lawv mloog? Puas yog nej, thiab nej tus yam ntxwv ua neej? Neeg coob uas tau hnov thiab txais yuav zaj lus ntawm Kev Txum Tim Rov Qab Los tau xav mloog vim lawv saib cov mej zeej ntawm Yexus Khetos lub Koom Txoos. Tej zaum yog vim lawv ua zoo rau lwm tus, lawv tau hais tej yam los sis tsis tau hai, lawv nyob khov kho thaum muaj xwm txheej nyuaj heev, los sis lawv lub ntsej muag ci ci.9
Txawm yog li cas los xij, peb yuav tsum to taub thiab ua raws li tej ntsiab cai ntawm txoj moo zoo ua zoo npaum li peb ua tau kom lwm tus yuav xav mloog peb tej lus caw lawv. Yog ib yam uas hnub peb hais tias yog kev tsis cuav. Yog tias Khetos txoj kev hlub nyob hauv peb, lwm tus yuav paub tias peb hlub lawv tiag tiag. Yog tias tus Vaj Ntsuj Plig Dawb Huv ci ci hauv peb, ces Khetos txoj kev kaj yuav ci ci hauv lawv.10 Qhov uas nej yog neeg zoo ua rau lawv paub tias nej tej lus caw kom lawv muaj kev xyiv fab los ntawm Yexus Khetos txoj moo zoo yog hais tiag tiag.
Yam thib peb yog kev siv lub cuab yeej ntawm kev hloov siab los ntseeg uas Vajtswv tau npaj rau lub caij nyoog qhia txoj moo zoo kawg no, uas yog Phau Ntawv Maumoos. Phau no ua pov thawj tias Joseph Smith yog ib tug yaj saub thiab Yexus Khetos tau Sawv Rov Los thiab los saum ntuj los. Phau no piav txog peb Leej Txiv Saum Ntuj Ceeb Tsheej txoj hau kev txhiv dim zoo tshaj. Thaum yus muab Phau Ntawv Maumoos rau lwm tus, yus qhia txog Txoj Moo Zoo uas Txum Tim Rov Qab Los.
Thaum Jason Olson yog ib tug tub hluas, nws tsev neeg thiab lwm tus pheej ceeb toom nws kom tsis txhob los ua ib tug ntseeg Khetos. Tiam sis nws muaj ob tug phooj ywg zoo uas yog mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab lawv pheej sib tham txog kev teev ntuj. Nws ob tug phooj ywg, Shea thiab Dave, twb tau hais lus piav txog tej lus uas lwm tus tau hais rau Jason kom nws tsis txhob ntseeg Yexus Khetos. Ces nkawd muab ib Phau Ntawv Maumoos rau nws, thiab hais tias, “Phau no yuav teb koj tej lus nug. Thov koj cia li nyeem.” Nws lam txais phau ntawd thiab tso rau hauv nws lub hnab, es nws cia nyob ntawd tau ob peb lub hlis. Nws tsis xav tso hauv nws lub tsev cia nws tsev neeg pom, thiab nws tsis xav ua rau Shea thiab Dave poob siab yog nws muab rov qab rau nkawd. Ces, nws txiav txim siab nws mam li muab phau ntawv hlawv kom kub nyiab.
Muaj ib hmo, ib sab tes tuav tus zes taws thiab ib sab tuav Phau Ntawv Maumoos, es nws yuav muab phau ntawv hlawv thaum nws hnov ib lub suab hauv nws lub siab hais tias, “Tsis txhob muab kuv phau ntawv hlawv.” Ua rau nws ceeb, nws thiaj li nres. Ces, nws xav tias lub suab yog los ntawm nws txoj kev xav xwb, es nws cia li sim zes cov ntawv. Tiam sis, lub suab rov qab los hais tias: “Mus rau koj hoob thiab nyeem kuv phau ntawv.” Jason twb tso tus zes taws tseg, rov qab mus hauv nws hoob pw, nthuav Phau Ntawv Maumoos, thiab pib nyeem. Nws twb nyeem ib hnub dhau ib hnub, feem ntau yog thaum sawv ntxov heev. Thaum Jason tau nyeem txog qhov kawg thiab tau thov Vajtswv, nws sau hais tias, “Tus Ntsuj Plig nyob hauv kuv puv npo txij ntawm kuv lub taub hau mus txog kuv txhais ko taws. … Kuv xav tias kuv puv txoj kev kaj. … Yog kev xyiv fab ntau tshaj plaws kuv ib txwm tau hnov hauv kuv lub neej.” Nws tau ua kev cai raus dej thiab los ua ib tug tub txib.
Tej zaum tsis tas hais tias txawm peb hlub tib neeg npaum li cas tiag tiag, feem coob yuav tsis mloog peb tej lus caw lawv kawm txog zaj lus ntawm txoj moo zoo uas tau muab txum tim rov qab los. Tiam sis nco ntsoov qhov no: txhua leej txhua tus tsim nyog txais kev caw li no—“txhua tus yeej zoo tib yam rau Vajtswv”;11 tus Tswv zoo siab rau txhua zaus peb siv zog, txawm qhov kawg zoo li cas los; qhov uas ib tug tsis ua raws li peb caw tsis txhais tias peb yuav tsum tsis txhob ua phooj ywg; thiab txawm lawv tsis xav kawm txog txoj moo zoo hnub no los tej zaum yav tom ntej lawv yuav xav kawm. Txawm yog li cas los, peb yeej hlub lawv tsis tu tsis tseg.
Thov kom peb nco qab ntsoov tias twb tau muab txoj moo zoo Txum Tim Rov Qab Los los ntawm kev sim siab thiab kev txi loj heev. Yuav hais txog qhov ntawd lwm hnub. Hnub no peb zoo siab kawg vim muaj tej uas tau los ntawm kev muab txoj moo zoo txum tim rov qab los, ib qho zoo kawg nkaus yog lub hwj chim kom muab tib neeg khi ua ke hauv lub ntiaj teb thiab nyob saum ntuj.12 Ib yam li Thawj Tswj Hwm Gordon B. Hinckley hais tias, “Yog tias tsis muaj dab tsi uas tau los ntawm kev tu siab nyuaj siab thiab kev mob kev nkeeg thaum muab txoj moo zoo txum tim rov qab los, tsuas muaj lub hwj chim pov thawj hwj dawb huv kom muab tsev neeg khi ua ke tas mus li xwb, ces yeej tsim nyog uas peb tau them tus nqi ntawd.”13
Kev cog lus ntawm lub caij nyoog Txum Tim Rov Qab Los yog kev txhiv dim los ntawm Yexus Khetos. Yexus Khetos txoj Kev Sawv Rov Los ua pov thawj tias Nws muaj hwj chim muab txhua tus uas los cuag Nws txhiv dim—txhiv lawv kom dim kev tu siab, kev tsis ncaj ncees, kev nyuaj siab, kev txhaum, thiab kev tuag. Hnub no yog hnub Palm Sunday; ib lub lim tiam tom ntej yog hnub Easter. Peb nco ntsoov, peb yeej nco ntsoov, Khetos txoj kev raug txom nyem thiab kev tuag kom theej peb lub txhoj, thiab peb zoo siab ua koob tsheej txog hnub Sunday zoo tshaj plaws, tus Tswv hnub, uas Nws tau sawv rov los. Vim Yexus Khetos tau Sawv Rov Los, Kev Muab Txoj Moo Zoo Txum Tim Rov Qab Los yeej muaj nqis, peb lub neej no muaj nqis, thiab peb txoj sia muaj nqis.
Joseph Smith, tus yaj saub ntawm lub caij nyog Txum Tim Rov Qab Los, tau hais lus tim khawv tseem ceeb tshaj plaws hauv peb lub caij nyoog txog tus Khetos uas tau sawv rov los: “Hais tias nws muaj txoj sia nyob! Vim wb pom nws, nyob ntawm Vajtswv sab tes xis.”14 Kuv txo hwj chim ua tim khawv ntxiv rau Joseph cov lus thiab tag nrho cov thwj tim thiab cov yaj saub ua ntej, thiab cov thwj tim thiab cov yaj saub tom qab nws, hais tias Yexus los ntawm Naxales yog tus Mexiyas, Vajtswv Tib Leeg Tub, thiab tus Txhiv Dim uas sawv rov los rau txhua tus neeg
“Peb ua tim khawv tias cov uas thov Vajtswv thaum lawv kawm txog zaj lus ntawm lub Caij Nyoog Txum Tim Rov Qab Los thiab muab siab rau ntseeg yuav tau koob hmoov kom txais tau kev ua tim khawv tias zaj no yog los saum ntuj los thiab muaj lub hom phiaj uas yog npaj lub ntiaj teb rau peb tus Tswv thiab tus Cawm Seej, Yexus Khetos, txoj Kev Los Zaum Ob.”15 Khetos txoj Kev Sawv Rov Los ua rau Nws tej lus cog tseg muaj tseeb. Los ntawm Yexus Khetos lub npe, amees.