Phau Ntawv Maumoos lub Hwj Chim Pab Neeg Hloov Siab Los Ntseeg

Thaum kuv saib ntawv ceeb toom tom qab tshuaj ntsuam ib ce, kuv kawm tias kuv yuav tsum hloov tej yam hauv kuv lub neej. Kom pab kuv, kuv tus kws kho mob hais kom kuv noj haus zoo thiab qoj cev, es yog kuv ua li ntawd, ces kuv yuav hloov los ua ib tug uas noj qab nyob zoo ntxiv.

Yog tias peb tshuaj ntsuam peb sab ntsuj plig, ces peb yuav kawm dab tsi txog peb tus kheej? Tus kws kho mob ntawm sab ntsuj plig yuav hais kom peb hloov dab tsi? Yog peb yuav hloov los ua neeg zoo, ces peb yuav tsum paub ua li cas thiab ua raws li peb paub.

Yexus Khetos yog tus Thawj Kws Kho Mob.¹ Los ntawm Nws txoj Kev Theej Txhoj, Nws qhwv peb tej qhov txhab, ris peb tej kev mob kev nkees, thiab kho peb lub siab uas puas tas.² Los ntawm Nws txoj kev tshav ntuj peb tej kev qaug zog yuav hloov los muaj zog.³ Nws caw peb coj raws li nws⁴ thaum peb kawm txog Nws, mloog Nws tej lus, thiab txo hwj chim taug kev raws li Nws tus Ntsuj Plig.⁵ Nws tau cog lus tias Nws yuav pab peb⁶ hloov siab los ntseeg, uas hloov peb lub siab thiab ua rau peb muaj kev xyiv fab kav mus ib txhis.⁷

Tus Cawm Seej tau muab Phau Ntawv Maumoos rau peb kom pab lwm tus hloov siab los ntseeg. Phau Ntawv Maumoos pab peb sab ntsuj plig muaj zog, qhia peb yuav ua li cas, thiab pab peb muaj tus Vaj Ntsuj Plig Dawb Huv nrog nraim peb. Twb sau phau no rau peb,⁸ nws muaj Vatjswv txoj lus⁹ uas meej heev thiab qhia peb tias peb yog leej twg, peb lub hom phiaj yog dab tsi, thiab peb yuav mus qhov twg.¹⁰ Koom ua ke nrog phau Npaivnpaum, Phau Ntawv Maumoos ua tim khawv txog Yexus Khetos¹¹ thiab qhia tias peb yuav ua li cas paub qhov tseeb thiab hloov los ua neeg zoo li Nws.

Daim Duab

Tij Laug Saw Polo

Tij Laug Saw Polo muaj 58 xyoo thaum nws tau kawm txog Yexus Khetos txoj moo zoo. Thaum kuv ntsib nws, nws yog ib ceg ntseeg tus thawj tswj hwm tau ob peb xyoo, tiam sis kuv kawm tias nws tsis tau nyeem Phau Ntawv Maumoos vim tsis tau muab phau no txhais ua lus Burmese. Thaum kuv nug nws seb nws ho ua li cas paub tias Phau Ntawv Maumoos muaj tseeb yog nws tsis tau nyeem, nws teb tias nws tau kawm Tej Zaj Dab Neeg ntawm Phau Ntawv Maumoos txhua hnub, es nws saib daim duab, siv ib phau qhia ntsiab lus kom pab txhais lus Akiv, thiab sau ntawv txog tej yam uas nws tau kawm. Nws piav hais tias, “Txhua zaus kuv tau kawm tej no, kuv tau thov Vajtswv, thiab kuv nyob kaj siab lug, kuv xav tau meej, thiab kuv lub siab mos muag. Kuv tau hnov tus Vaj Ntsuj Plig Dawb Huv ua tim khawv rau kuv tias phau no muaj tseeb. Kuv paub tias Phau Ntawv Maumoos yog Vajtswv txoj lus.”

Ib yam li Tij Laug Saw Polo, peb txhua tus txawj kawm Phau Ntawv Maumoos raws li peb tej xwm txheej. Thaum peb xav ntseeg thiab xav txog Phau Ntawv Maumoos tej lus qhia hauv peb lub siab, peb muaj kev ntseeg thov Vajtswv nug seb tej lus qhia ntawd puas muaj tseeb.¹² Yog tias peb xav paub tiag tiag thiab muaj siab xav ua raws li Nws qhia, ces Nws yuav teb peb los ntawm tus Vaj Ntsuj Plig Dawb Huv. Yog los ntawm tus Vaj Ntsuj Plig Dawb Huv lub hwj chim, peb yuav paub tau qhov tseeb ntawm tag nrho txhua yam.¹³ Thaum peb paus tias Phau Ntawv Maumoos muaj tseeb, peb kuj yuav paub los ntawm lub hwj chim ntawd hais tias Yexus Khetos yog tus Cawm Seej ntawm lub ntiaj teb no, hais tias Joseph Smith yog Nws tus yaj saub, thiab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Nws lub Koom Txoos.¹⁴

Thaum kuv yog ib tug tub txib hluas, kuv tau caij nyab hoom mus rau Audaliyas Teb. Kuv kho siab heev, kuv txhawj xeeb, thiab xav tias kuv tsis txaus, tiam sis kuv twb cog lus tias kuv yuav ua hauj lwm, kuv thiaj li xav paub tiag tiag seb tej no uas kuv ntseeg puas muaj tseeb. Kuv tau thov Vajtswv thiab nyeem kuv cov vaj lug kub, tiam sis thaum sij hawm dhau mus, kuv tsis ntseeg kuv tus kheej thiab kuv tab tom tsis muaj zog zuj zus. Tom qab kuv nyuaj siab tau ob peb teev, ib tug kws saib xyuas tuaj ntawm kuv lub rooj zaum thiab nws nres. Nws nqa Phau Ntawv Maumoos uas kuv nyeem los ntawm kuv txhais tes. Nws saib lub plhaub thiab hais tias, “Phau no zoo kawg!” ces nws muab phau ntawv rau kuv thiab mus lwm qhov chaw. Kuv yeej tsis tau pom nws dua.

Thaum kuv tseem xav txog nws tej lus, kuv tau hnov hauv kuv lub siab tej lus no hais tias, “Kuv nyob no, thiab kuv paub koj nyob qhov twg. Ua zoo npaum li koj ua tau, vim kuv yuav ua txhua yam ntxiv.” Nyob hauv nyab hoom nyob saum Dej Hiav Txwv Pacific, kuv tau txais kev tshwm sim los ntawm kuv txoj kev kawm Phau Ntawv Maumoos thiab tus Vaj Ntsuj Plig Dawb Huv tej kev tshoov siab qhia kuv tias tus Cawm Seej paub kuv yog leej twg thiab txoj moo zoo muaj tseeb.

Txwj Laug David A. Bednar qhia tias: “Qhov uas yus paub tias txoj moo zoo muaj tseeb yog lub ntsiab ntawm ib zaj lus tim khawv. Kev ua raws li txoj moo zoo tas mus li yog lub ntsiab ntawm kev hloov siab los ntseeg.”¹⁵ Yog peb yuav hloov siab los ntseeg peb yuav tsum “ua raws li txoj lus, tsis yog ua cov mloog xwb.”¹⁶ Tus Tswv txoj kev qhia peb ua raws li Khetos cov lus qhuab qhia los Phau Ntawv Maumoos qhia meej tshaj.¹⁷ Xws li no:

• Qhov thib ib, muab siab rau ntseeg Yexus Khetos thaum peb tso siab rau Nws, ua raws li Nws cov lus txib, thiab paub tias Nws yuav pab peb.¹⁸

• Qhov thib ob, hloov siab lees txim txhua hnub thiab muaj kev xyiv fab thiab kev kaj saib lug thaum Nws zam txim pub rau peb.¹⁹ Yog peb yuav hloov siab lees txim peb yuav tsum zam txim pub rau lwm tus²⁰ thiab yuav pab peb mus tom ntej. Tus Cawm Seej tau cog lus tias Nws yuav zam txim pub rau peb thaum twg peb hloov siab lees txim.²¹

• Qhov thib peb, ua raws li tej kev khi lus nrog Vajtswv los ntawm cov kab ke xws li kev cai raus dej. Ua li no yuav pab peb coj raws li txoj kev khi lus uas mus txog Nws.²²

• Qhov thib plaub, txais lub txiaj ntsim Vaj Ntsuj Plig Dawb Huv. Lub txiaj ntsim no yuav cia peb muaj tus uas coj peb, nplij peb lub siab, thiab hloov peb los ua neeg dawb huv.nrog nraim peb.²³

• Qhov thib tsib, nyiaj mus txog thaum kawg thaum txiv mus lawm tom ntej; peb yuav ua li ntawd yog peb mloog ntsoov Khetos txoj lus txhua hnub.²⁴ Yog peb mloog ntsoov tej lus los ntawm Phau Ntawv Maumoos thiab ua raws nraim li tej lus qhia ntawd, peb yuav kov yeej tej kev ntxias thiab txais kev pab thiab kev pov hwm tas peb lub neej.²⁵

Yog peb ua raws li Khetos cov lus qhuab qhia hauv peb lub neej, peb yuav kov yeej tej yam uas tab kaum peb txoj kev hloov siab thiab kov yeej kev ntshai uas ua rau peb tsis xav ua tej yam. Peb yuav txais kev tshwm sim vim tus Vaj Ntsuj Plig Dawb Huv “yuav qhia rau nej txhua yam uas nej yuav tsum ua,”²⁶ thiab “Khetos tej lus yuav qhia nej txhua yam uas nej yuav tsum ua.”²⁷

Tau 20 xyoo, Tij Laug Huang Juncong haus cawv, haus luam yeeb, thiab twv txiaj tsis tu tsis tseg. Thaum nws kawm txog Yexus Khetos thiab Nws txoj moo zoo, Tij Laug Huang xav hloov kom pab nws tsev neeg hluas. Nws qhov teeb meem loj tshaj yog kev haus luam yeeb. Nws haus luam yeeb txhua lub sij hawm, nws sim txiav luam yeeb ntaus zaus tiam sis ua tsis taus. Muaj ib hnub, cov lus los ntawm Phau Ntawv Maumoos nkag hauv nws lub siab: “nrog lub siab dawb paug, nrog kev mob siab ntso.”²⁸ Txawm nws ua tsis taus dhau los, nws xav tias tej zaum nws hloov tau yog muaj Leej Txiv Saum Ntuj Ceeb Tsheej thiab Yexus Khetos txoj kev pab.

Cov tub txib tau koom nrog nws muaj kev ntseeg thiab npaj tej yam rau nws ua, thiab thov Vajtswv ntau thiab kawm Vajtswv txoj lus ntau. Nrog ib lub siab dawb paug thiab nrog kev mob siab ntso, Tij Laug Huang rau siab ntseeg thiab kawm tias thaum nws tsom ntsoov rau tej yam nws xav ua ntxiv, xws li Phau Ntawv Maumoos, nws thiaj li tsis tsom ntsoov rau tej yam nws tsis xav ua ntxiv.

Hais txog 15 xyoos tas los, nws hais tias, “Kuv tsis tshua nco qab thaum twg kuv txiav luam yeeb, tiam sis thaum kuv sim ua tej yam uas kuv paub kuv yuav tsum ua txhua hnub kom caw tus Tswv tus Ntsuj Plig rau hauv kuv lub neej thiab ua tej ntawd tsis tu tis tseg, ces ua rau kuv tsis xav haus luam yeeb thiab txij thaum ntawd los kuv tsis tau haus.” Vim nws tau ua raws li Phau Ntawv Maumoos tej lus qhia, Tij Laug Huang lub neej twb hloov lawm, thiab nws tau hloov los ua ib tug txiv tsev zoo dua ntxiv.

Daim Duab

Huang Juncong thiab tsev neeg

Thawj Tswj Hwm Russell M. Nelson tau cog lus tias: “Thaum nej ke thov Vajtswv ke kawm Phau Ntawv Maumoos txhua txhua hnub, nej yuav txiav txim siab zoo dua—txhua hnub. Kuv cog lus hais tias thaum nej xav txog tej yam uas nej kawm, lub rooj ntug yuav qhib plho, thiab nej yuav txais lus teb rau nej cov lus nug thiab kev coj rau nej lub neej. Kuv cog lus hais tias thaum nej rau rau siab nyeem Phau Ntawv Maumoos, nej yuav tiv thaiv nej tus kheej tawm ntawm tej kev phem uas muaj niaj hnub nim no, suav tus kab mob ntawm kev saib duab liab qab thiab lwm yam muaj yees taus.”²⁹

Cov phooj ywg zoo, Phau Ntawv Maumoos yog Vajtswv txoj lus, thiab peb yuav los nyob ze Nws yog peb kawm phau ntawv no.³⁰ Thaum peb sim ua raws li Phau Ntawv Maumoos tej lus,³¹ peb yuav paub tias phau no muaj tseeb. Thaum peb ua raws nraim li phau no tej lus qhia, peb yuav tsis muaj ib lub siab xav ua phem.³² Peb lub siab, lub ntsej muag, thiab tus cwj pwm yuav hloov hlo kom zoo li tus Cawm Seej.³³ Kuv ua tim khawv tseeb rau nej tias Yexus yog tus Khetos, peb tus Cawm Seej, tus Txhiv Dim, thiab Phooj Ywg. Los ntawm Yexus Khetos lub npe, amees.