Cov Neeg Tim Khawv txog Yexus Khetos uas Muaj txoj Sia Nyob
Lub ntsiab ntawm Phau Ntawv Maumoos yog kom muab kev txawj ntse txog Yexus Khetos lub luag hauj lwm rau tib neeg txoj kev cawm seej thiab kev tsa nto txum tim rov qab los.
Ib hnub hauv lub caij nplooj ntoo hlav thaum xyoo 2017, twb qhib lub Tuam Tsev Paris France rau sawv daws thaum ib tug uas coj kev tau ntsib ib tug txiv neej uas muaj ntsej muag tu siab heev. Nws hais tias nws nyob ze lub tuam tsev thiab lees tias nws twb tawm tsam peb txoj kev ua lub tuam tsev. Nws hais tias muaj ib hnub thaum nws ntsia ntawm qhov rais hauv nws lub tsev, nws pom ib lub tsheb nqa khoom muab ib tug mlom Yexus loj nqis los thiab tso rau hauv thaj av ntawm lub tuam tsev. Tus txiv neej hais tias lub sij hawm no ua rau nws hloov siab kiag txog peb lub Koom Txoos. Nws paub tias peb coj raws li Yexus Khetos thiab thov zam txim pub rau nws rau qhov phem uas tej zaum nws tau ua rau peb.
Tus mlom Christus, uas nyob hauv thaj av rau lub Tuam Tsev Paris thiab lub Koom Txoos lwm qhov chaw, yeej ua tim khawv tias peb hlub tus Cawm Seej. Tus mlom uas xub ua yog los ntawm tus kws puab mlom Bertel Thorvaldsen, uas tau ua thaum xyoo 1820—yog tib xyoo uas muaj Thawj zaj Ua Yog Toog. Tus mlom no yeej tsis zoo li tej daim duab uas cov kws kos duab kos txog tus Khetos uas raug txom nyem thaum nws raug ntsia saum ntoo khaub lig. Thorvaldsen tus mlom no yog tus Khetos uas muaj sia nyob, tus uas tau kov yeej kev tuag, thiab ncav tes caws txhua tus los cuag Nws. Tsuas pom tej qhov los ntawm cov ntsia hlau nyob hauv Nws txhais tes thiab txhais taw thiab qhov txhab nyob hauv Nws sab tav uas ua tim khawv txog Nws txoj kev mob uas piav tsis tau uas Nws nyiaj tau kom cawm txhua tus neeg.
Tej zaum peb cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg nyiam tus mlom no yog vim ua rau peb nco txog zaj lus nyob hauv Phau Ntawv Maumoos txog tus Cawm Seej txoj kev tshwm sim los rau Amelikas:
“Thiab saib seb, lawv pom ib tug Neeg nqis saum ntuj los; thiab nws hnav ib lub tsho tshaj sab dawb; thiab nws nqis los sawv ntsug nyob hauv nruab nrab ntawm lawv. …
“Thiab tau muaj tias nws xyab nws txhais tes thiab hais rau cov neeg, hais tias:
“Saib seb, kuv yog Yexus Khetos, …
“… Thiab kuv twb tau haus ntawm lub khob dej iab uas Leej Txiv muab rau kuv, thiab ua rau Leej Txiv tau yeeb koob ntawm qhov uas kuv ris neeg ntiaj teb tej kev txhaum.”1
Ces Nws caw txhua tus txiv neej, poj niam, thiab me nyuam los cev lawv txhais tes los xuas Nws sab tav thiab xuas tej qhov ntsia hlau hauv Nws ob txhais tes thiab hauv Nws ob txhais taw, lawv thiaj paub tseeb tiag Nws yeej yog tus Mexiyas uas yuav los.2
Zaj no yog zaj tseem ceeb hauv Phau Ntawv Maumoos. Txoj moo zoo los yeej muaj hauv tus mlom txog tus Cawm Seej tus uas muab Nws “txhais caj npab hlub tshua” cev tuaj3 kom caw txhua tus neeg los cuag Nws thiab txais cov koob hmoov ntawm Nws txoj Kev Theej Txhoj.
Lub ntsiab ntawm Phau Ntawv Maumoos yog kom muab kev txawj ntse txog Yexus Khetos lub luag hauj lwm rau tib neeg txoj kev cawm seej thiab kev tsa nto txum tim rov qab los. Tag nrho phau no ua tim khawv txog lub ntsiab no pib ntawm zaj lus piav txog phau ntawv mus txog thaum hais tej lus hauv tshooj kawg. Vim neeg tau tso qhov tseeb tseg, lub ntsiab txog qhov uas Khetos tau ua li cas hauv Khexemanes thiab nyob saum lub Roob Khaulakhauthas twb ploj lawm los sis hloov. Nyaj Joseph Smith zoo siab heev, thaum nws muab phau 1 Nifais txhais lus, es nws nyeem cov lus cog tseg zoo kawg no: “Cov ceev xwm txheej kawg no [uas yog Phau Ntawv Maumoos] … yuav qhia tias thawj cov ceev xwm txheej [uas yog phau Npaivnpaum] muaj tseeb … thiab yuav qhia txog tej yam uas meej thiab muaj nuj nqis uas tau raug muab rho tawm ntawm thawj cov ceev xwm txheej; thiab yuav qhia rau txhua xeem neeg, txhua yam lus, thiab tej neeg sawv daws, hais tias Vajtswv tus Me Nyuam Yaj yog Leej Txiv tus uas Nyob Mus Ib Txhis Leej Tub, thiab nws yog neeg ntiaj teb tus Cawm Seej; thiab hais tias tag nrho neeg txhua leej yuav tsum los cuag nws, yog tsis li ces lawv yuav tsis dim.”4
Tej yam tseeb uas muaj nqis txog tus Cawm Seej txoj Kev Theej Txhoj los muaj nyob thoob plaws Phau Ntawv Maumoos. Thaum kuv hais txog ob peb yam tseeb no, kuv caw nej xav txog qhov uas tej no yuav hloov nej lub neej li cas.
-
Yexus Khetos txoj Kev Theej Txhoj yog ib lub txiaj ntsim uas Nws pub dawb rau txhua tus uas tau nyob, cov uas nyob tam sim no, thiab cov uas yuav nyob hauv lub ntiaj teb.5
-
Ntxiv rau kev ris lub nra uas yog peb tej kev txhaum, tus Khetos tau ris peb tej kev tu siab, kev txom nyem, kev mob, thiab tag nrho tej kev nyuaj siab uas muaj hauv lub ntiaj teb no. Tsis muaj ib yam kev tu siab, kev mob, los sis kev nyuaj siab uas Nws tsis tau raug kom theej peb.
-
Tus Cawm Seej txoj kev txi theej txhoj no cia peb kov yeej tej yam phem uas los ntawm Adas txoj kev poob, tsis hais kev tuag ntawm sab cev nqaij daim tawv los yog. Vim muaj Khetos, Vajtswv cov me nyuam uas yug los hauv ntiaj teb no txhua tus, tsis hais lawv ncaj ncees npaum li cas los, lawv sab ntsuj plig yuav rov qab koom nrog lawv sab cev nqaij daim tawv los ntawm lub hwj chim ntawm Kev Sawv Rov Los7 thiab yuav rov qab mus cuag Nws kom “raug txiav txim raws li tej yam lawv tau ua.”8
-
Tiam sis, kev txais cov koob hmoov tag nrho ntawm tus Cawm Seej txoj Kev Theej Txhoj yeej nyob ntawm seb peb rau siab9 npaum li cas ua raws li “Khetos txoj lus qhuab qhia.”10 Thaum nws ua npau suav, Lihais tau pom “txoj kev ti thiab nqaim”11 uas mus txog tus ntoo uas cawm txoj sia. Cov txiv ntoo, uas sawv cev rau Vajtswv txoj kev hlub uas yog cov koob hmoov ntawm Khetos txoj Kev Theej Txhoj “muaj nuj nqis tshaj thiab qab tshaj txhua yam txiv ntoo; muaj tseeb tiag, thiab yog ib lub txiaj ntsim uas zoo tshaj ntawm tag nrho Vajtswv tej txiaj ntsim.”12 Yog peb xav noj cov txiv ntoo no, peb yuav tsum muab siab rau ntseeg Yexus Khetos, hloov siab lees txim, “mloog Vajtswv txoj lus,”13 txais cov kab ke tseem ceeb, thiab ua raws li kev khi lus dawb ceev mus txog thaum peb tas sim neej no.14
-
Yexus Khetos ntxuav peb tej kev txhaum mus, dhau los ntawm Nws txoj Kev Theej Txhoj, tiam sis nws kuj muab hwj chim muaj peev xwm rau Nws cov thwj tim kom lawv “tso tus neeg ntawm sab cev nqaij daim tawv tseg,”15 kawm “ib nqe lus ntxiv rau ib nqe lus,”16 thiab ua neeg dawb huv ntxiv17 txog thaum muaj ib hnub lawv yuav ua neeg zoo tag nrho zoo li Khetos,18 tsim nyog nrog Vajtswv nyob19 thiab txais tau tag nrho cov koob hmoov nyob hauv lub nceeg vaj ceeb tsheej.20
Ib yam tseeb uas nplij neeg lub siab nyob hauv Phau Ntawv Maumoos yog qhov uas txawm yog tus Tswv txoj Kev Theej Txhoj yeej yog ib qho uas nyob mus ib txhis thiab pab txhua leej txhua tus, Nws txoj Kev Theej Txhoj kuj yog ib lub txiaj ntsim uas pub rau yus ib leeg, tsim nyog muab rau peb ib tug dhau ib tug.21 Ib yam li Yexus tau caw Nws cov thwj tim uas yog Neeg Nifais los ib tug mus ib tug xuas tej qhov ntsia hlau, Nws twb tuag rau peb txhua tus, zoo li nej los sis kuv yog tib tug neeg nyob hauv lub ntiaj teb. Nws caw peb los cuag Nws thiab siv cov koob hmoov zoo kawg nkaus uas los ntawm Nws txoj Kev Theej Txhoj.22
Qhov uas Khetos txoj Kev Theej Txhoj pab txhua tus yeej yog ib qho uas yus paub tiag tiag thaum yus xav txog cov txiv neej thiab cov poj niam tus yam ntxwv hauv Phau Ntawv Maumoos. Muaj neeg xws li Enos, Amas, Xi-elas, Vaj Ntxwv Lamaunais thiab nws tus poj niam, thiab Vaj Ntxwv Npeyamis cov neeg. Lawv tej zaj lus txog kev hloov siab los ntseeg thiab tej zaj lus tim khawv uas muaj zog pab ua tim khawv tias peb lub siab muaj peev xwm hloov thiab peb lub neej yuav hloov los ntawm tus Tswv txoj kev zoo thiab lub siab hlub tshua.23
Tus yaj saub Amas tau nug nws cov neeg cov lus no. Nws hais tias, “Yog nej lub siab twb hloov, thiab yog nej lub siab xav hu zaj nkauj txog txoj kev hlub uas txhiv dim, kuv nug hais tias, nim no nej puas tseem xav zoo li ntawd?”24 Cov lus nug no yeej tseem ceeb rau peb niaj hnub no, vim rau qhov peb yog tus Tswv cov thwj tim, Nws lub hwj chim txhiv dim yuav tsum nrog peb, pab txhawb nqa peb, thiab hloov peb txhua hnub.
Tej zaum yus hloov tau Amas cov lus nug kom hais li no tias, thaum twg yog zaus kawg uas nej tau txais lub hwj huam ntawm tus Cawm Seej txoj Kev Theej Txhoj hauv nej lub neej? Muaj li no thaum nej muaj kev xyiv fab uas “zoo nkauj thiab qab zib ”25 uas ua tim khawv rau nej sab ntsuj plig tias Vajtswv tau zam txim rau nej tej kev txhaum; los sis thaum zoo li nej tej kev sim siab yog ib lub nra uas sib me ntsis; los sis thaum nej muaj lub siab mos muag thiab nej txawj zam txim pub rau ib tug uas tau ua rau nej mob. Los sis yog txhua zaus nej pom tias nej haj yam muaj peev xwm hlub thiab pab lwm tus, los sis tus txheej txheem ua kom neeg dawb huv ua rau nej hloov siab ntau, hloov los ua neeg zoo li tus Cawm Seej.26
Kuv ua tim khawv tias tej no muaj tseeb thiab ua pov thawj tias tib neeg lub neej yuav hloov los ntawm kev ntseeg Yexus Khetos thiab Nws txoj Kev Theej Txhoj. Phau Ntawv Maumoos qhia meej thiab pab peb to taub txog lub txiaj ntsim zoo tshaj plaws no. Thaum nej kawm phau no, nej yuav hnov tus Khetos lub suab caw nej los cuag Nws. Kuv cog lus tias yog nej ua raws li Nws caw nej thiab coj yam ntxwv zoo li Nws, ces Nws lub hwj huam txhiv nej dim yuav los rau hauv nej lub neej. Los ntawm tus Vaj Ntsuj Plig Dawb Huv lub hwj chim, tus Cawm Seej yuav hloov nej ib hnub dhau ib hnub “mus txog hnub uas zoo tag nrho”27 thaum nej yuav, zoo li Nws hais tias, “[cia li] pom kuv lub ntsej muag thiab paub hais tias muaj kuv.”28 Los ntawm Yexus Khetos lub npe, amees.