Xwv Kom Lawv Yuav Pom
Cia li nrhiav thiab thov Vajtswv kom muaj cib fim ua nej lub teeb ci rau lwm tus pom kev mus cuag Yexus Khetos.
Cov nus thiab cov viv ncaus, peb twb tau koob hmoov thiab tus Ntsuj Plig tau tshoov peb lub siab hauv lub rooj sab laj no.
Ob puas xyoo tas los, ib tug duab ci roos ib tug tub hluas hauv ib koog ntoo. Nyob hauv txoj kev kaj ntawd, Joseph Smith pom Vajtswv Leej Txiv thiab Nws Leej Tub, Yexus Khetos. Nkawd txoj kev kaj tau tshem kev tsaus ntuj ntawm sab ntsuj plig uas roos lub ntiaj teb thiab taw tes rau txoj kev mus tom ntej uas cia Joseph Smith—thiab peb txhua tus—pom kev mus tom ntej. Vim muaj txoj kev kaj uas tau tshwm sim hnub ntawd, peb txais tau cov koob hmoov tag nrho uas foom pub rau peb los ntawm peb tus Cawm Seej, Yexus Khetos, txoj Kev Theej Txhoj.
vim peb muaj Nws txoj moo zoo, peb yuav muaj peb tus Cawm Seej txoj kev kaj puv rau peb tus kheej. Tiam sis, txoj kev kaj ntawd tsis yog rau nej thiab kuv peb xwb. Yexus Khetos tau hais kom peb “cia [peb] lub teeb ci li no rau cov neeg no, xwv kom lawv yuav pom tej yam uas [peb] ua zoo thiab muab yeeb koob rau [peb] Leej Txiv tus uas nyob saum ntuj ceeb tsheej.”1 Kuv nyiam cov lus no “xwv kom lawv yuav pom.” Yog tus Tswv tej lus caw kom peb pab lwm tus pom txoj kev uas lawv yuav taug mus thiaj li los cuag Khetos.
Thaum kuv muaj 10 xyoos, peb tsev neeg tos Txwj Laug L. Tom Perry ntawm Pawg Kaum Ob tug Tim Thawj thaum nws tuaj xyuas kuv lub zos.
Thaum txog tsaus ntuj lawm, kuv tsev neeg thiab tsev neeg Perry zaum ua ke hauv peb chav nyob thiab noj kuv niam cov khob noom txiv avpaum thaum peb mloog Txwj Laug Perry hais dab neeg txog Tsoom Haiv Neeg Ntseeg uas nws twb mus xyuas nyob thoob plaws lub ntiaj teb. Kuv zoo siab kawg xav mloog.
Twb lig heev thaum kuv niam hu kuv mus hauv chav ua mov thiab nug kuv tias: “Bonnie, koj puas tau pub qaib?”
Ua rau kuv poob siab lawm; kuv tsis tau pub. Kuv tsis xav ncaim tus Tswv tus Tim Thawj, kuv thiaj hais tias tej zaum yuav cia cov qaib yoo txog sawv ntxov.
Kuv niam tias ua tsis tau li ntawd. Tam sim ntawd Txwj Laug Perry nkag rau hauv hoob ua mov thiab hais lus nrov nrov nug hais tias, “Kuv puas tau hnov hais tias leej twg yuav tsum pub qaib? Koj puas kam kuv tus tub thiab kuv wb pab koj pub qaib?”
Tam sim ntawd kuv zoo siab kawg uas kuv yuav mus pub qaib! Kuv khiav mus nqa lub teeb tsom loj. Kuv mus ua ntej, dhia zoo siab taug txoj kev mus rau lub cooj qaib. Kuv nqa lub teeb, es wb hla daim teb pob kws thiab hla daim teb nplej.
Thaum wb los txog tus kwj deg me me uas tshuam txoj kev, kuv cia li dhia hla tus kwj li kuv ua txhua hmo. Kuv tsis tau paub tias yuav nyuaj rau Txwj Laug Perry taug ib txoj kev uas nws tsis paub thaum tsaus nti. Kuv lub teeb uas kuv ua fiav mus ub mus no tsis pab nws pom tus kwj deg. Vim tsis muaj ib lub teeb uas ci khov, nws tsuj kiag hauv tus kwj deg ua rau nws ntsaj nrov heev. Kuv tig mus saib kuv tus phooj ywg tshiab no tshem nws txhais ko taw tawm hauv tus kwj deg thiab pib nchos nws ib sab khau.
Nrog ib sab khau ntub ntub, Txwj Laug Perry tau pab kuv pub qaib. Thaum wb pub qaib tas, nws qhia kuv tias, “Bonnie, kuv xav pom txoj kev. Kuv xav tau lub teeb ci rau txoj kev uas kuv taug.”
Kuv twb ua kuv lub teeb ci ci tiam sis tsis tau ua ci kom pab Txwj Laug Perry pom kev. Tom qab ntawd, vim kuv paub tias nws yuav tsum muaj kuv lub teeb ci rau nws pom kev, kuv twb muab lub teeb ci rau txoj kev ua nws ntej thiab wb thiaj tau rov qab mus tsev.
Kuv cov kwv tij thiab cov muam, ntau xyoo no kuv twb xav txog lub ntsiab cai uas kuv tau kawm los ntawm Txwj Laug Perry. Tus Tswv tej lus hais kom peb cia peb lub teeb ci tsis yog kev lam yoj tus duab ci mus rau ub rau no ci rau ntau yam hauv lub ntiaj teb no. Peb yuav tsum cia lub teeb ci kom lwm tus thiaj yuav pom txoj kev mus cuag Khetos. Peb yuav tsum muab Ixayees sau los ua ke nyob ntawm sab daim ntaub thaiv no—pab lwm tus pom tom ntej me ntsis thaum lawv khi lus rau Vajtswv thiab ua raws li lawv tej kev khi lus ntawd.2
Tus Cawm Seej ua tim khawv tias, “Saib seb kuv yog txoj kev kaj; kuv tau ua ib tug yam ntxwv rau nej.”3 Cia peb saib Nws coj yam ntxwv li cas.
Tus poj niam nyob ntawm lub qhov dej yog ib tug neeg Xamalis uas tsis paub Yexus Khetos thiab neeg coob saib nws tsis muaj nqis. Yexus ntsib nws thiab pib nrog nws tham. Yexus hais txog dej rau nws. Ces Yexus ua rau tus poj niam to taub ntxiv thaum Nws hais tias Nws yog yog “dej uas cawm txoj sia.”4
Khetos paub nws thiab tej yam uas nws xav tau. Tus Khetos twb qhia nws thiab pib tham txog ib yam txhua tus paub zoo. Yog tias nws twb tsum tsis hais ntxiv, ces tej zaum yuav zoo. Tiam sis ntshe tus poj niam yuav tsis mus rau hauv lub nroog kom tshaj tawm tias, “Cia li mus saib … : es tus no tsis yog tus Khetos los?”5 Thaum nkawd sib tham, ces tus poj niam tau kawm txog Yexus Khetos, thiab txawm yog nws ua tsis zoo thaum yav tas los, nws tau hloov los ua ib lub teeb, uas ci rau lwm tus pom kev mus.6
Nim no, cia peb mloog txog ob tug uas coj raws li tus Cawm Seej tus yam ntxwv ua nkawd lub teeb ci rau lwm tus pom kev. Tsis ntev tas los kuv tus phooj ywg Kevin noj hmo zaum ua ke nrog ib tug uas nrog nws ua lag luam. Nws txhawj hais tias nws yuav tsum sib tham txog dab tsi rau ob xuab moos. Kevin txais kev tshoov siab thiab nug tias, “Qhia kuv txog koj tsev neeg. Lawv los qhov twg los?”
Tus txiv neej no tsis tshua paub txog nws caj ceg, yog li ntawd Kevin nqa nws lub xov tooj thiab hais tias, “Kuv muaj ib qho app uas pab yus nrhiav yus tsev neeg. Cia peb nrhiav seb yuav nrhiav tau li cas.”
Tom qab nkawd sib tham ntev, Kevin tus phooj ywg tshiab nug tias, “Vim li cas tsev neeg tseem ceeb heev rau koj lub koom txoos?”
Kevin teb hais tias, “Peb ntseeg peb tseem muaj txoj sia tom qab tuag. Yog peb kawm txog peb cov poj koob yawm ntxwv thiab coj lawv tej npe mus rau ib qho chaw dawb huv hu ua lub tuam tsev, ces peb ua tau kab ke uas yuav pab peb tsev neeg nyob ua ke tsis hais tom qab tuag los yog.”7
Kevin tau pib hais txog ib yam uas nws thiab nws tus phooj ywg tshiab ob leeg nyiam. Ces nws nrhiav kev ua tim khawv txog tus Cawm Seej txoj kev kaj thiab txoj kev hlub.
Zaj ob yog hais txog Ella, ib tug kws ntaus pob basketball hauv tsev kawm ntawv college. Nws coj yam ntxwv zoo thaum nws tau txais nws txoj kev hu ua ib tug ntxhais txib. Nws xaiv qhib nws cov ntawv tab meeg nws pawg ntaus pob. Lawv tsis tau paub dab tsi txog Yexus Khetos lub Koom Txoos thiab tsis to taub vim li cas Ella xav mus. Nws tau thov Vajtswv tas zog kom paub piav txog nws txoj kev xav ua ntxhais txib kom nws pawg yuav hnov tus Ntsuj Plig. Nws tau ua li cas?
Ella hais tias, “Kuv npaj ib qho PowerPoint, vim kuv haib heev.” Nws qhia lawv txog qhov uas muaj 400 tawm qhov chaw tshaj tawm txoj moo zoo thiab tej zaum nws yuav kawm ib yam lus tshiab. Nws tau hais txog ntau txhiab tus tub txib uas ua hauj lwm tam sim no. Ces Ella muab ib daim duab txog tus Cawm Seej rau lawv saib thiab ua tim khawv li no: “Basketball yeej yog ib yam tseem ceeb kawg hauv kuv lub neej. Kuv twb tsiv tsev mus hla lub teb chaws no thiab ncaim kuv tsev neeg kom ntaus pob rau tus kws cob qhia no thiab pawg no. Tsuas muaj ob yam uas tseem ceeb dua basketball rau kuv: kuv txoj kev ntseeg thiab kuv tsev neeg.”8
Yog nej xav tias, “Cov no coj yam ntxwv ci ntsa iab heev, tiam sis ntshe kuv ci quaj les xwb,” cia li nco ntsoov tias tus Cawm Seej ua tim khawv, “Kuv yog lub teeb uas nej yuav tsa.”9 Nws pab peb nco qab tias Nws yog txoj kev kaj yog peb tsuas yuav taw tes rau Nws.
Peb muaj txoj kev kaj txaus faib rau lwm tus tam sim no. Peb muaj peev xwm ua peb lub teeb ci rau lwm tus mus ib ruam tom ntej kom los cuag Yexus Khetos, ces mus ib ruam ntxiv, thiab ib ruam ntxiv.
Nug nej tus kheej, “Leej twg xav tau txoj kev kaj uas nej muaj kom pab lawv nrhiav tau txoj kev uas lawv tsis pom?”
Kuv cov phooj ywg zoo, vim li cas peb yuav tsum ua peb lub teeb ci? Tus Tswv tau hais tias “tseem muaj ntau tus nyob hauv ntiaj teb … cov uas tsis paub qhov tseeb tsuas yog vim lawv tsis paub mus nrhiav qhov tseeb nyob rau qhov twg.”10 Peb pab tau lawv. Peb muaj peev xwm ua peb lub teeb ci kom lwm tus pom kev. Peb caw tau lawv.11 Peb muaj peev xwm taug kev nrog cov uas maj mam ua ib ruam tom ntej txog tus Cawm Seej, tsis hais nyuaj rau lawv npaum li cas. Peb muaj peev xwm muab Ixayees sau los ua ke.
Kuv ua tim khawv tias thaum peb ua ib yam me xwb, Nws yuav ua kom loj. tus Vaj Ntsuj Plig Dawb Huv yuav tshoov peb lub siab kom paub hais thiab ua dab tsi. Tej lub sij hawm peb yuav tsum nyiaj mus thaum nyuaj heev, tiam sis peb paub tias tus Tswv yuav pab peb lub teeb ci ntsa iab.
Kuv ua Vajtswv tsaug rau tus Cawm Seej txoj kev kaj uas coj lub Koom Txoos dhau los ntawm kev tshwm sim.
Kuv caw peb txhua tus kom coj raws li Yexus Khetos tus yam ntxwv thiab hlub txhua tus nyob ib puag ncig peb. Cia li nrhiav thiab thov Vajtswv kom muaj cib fim ua nej lub teeb ci rau lwm tus pom kev mus cuag Yexus Khetos. Nws cog lus tias: “Tus uas raws kuv qab yuav tsis taug txoj kev uas tsaus ntuj nti, tiam sis nws yuav tau lub neej tshav ntuj nrig.”12 Kuv ua tim khawv tias peb tus Cawm Seej, Yexus Khetos, yog txoj kev, qhov tseeb, txoj sia, txoj kev kaj, thiab txoj kev hlub ntawm lub ntiaj teb. Los ntawm Yexus Khetos lub npe, amees.