Kev Qw Hauxanas

Nim no, kuv cov kwv tij thiab cov muam, thaum peb nco txog Joseph Smith Thawj Zaug Ua Yog Toog pom Leej Txiv thiab Leej Tub, peb xav tias yuav tsim nyog yog peb koom siab ua ke ua Kev Qw Hauxanas.

Kev qw dawb ceev no los thawj zaug lawv ua hauv lub caij nyoog no yog thaum muab lub Tuam Tsev Kirtland fij tseg thaum lub Peb Hlis Ntuj hnub tim 27, xyoo 1836. Niaj hnub nim no peb ua txhua zaus peb muab ib lub tuam tsev fij tseg. Yog ib txoj kev qhuas Vajtswv thiab Nws Leej Tub, uas yog ib lub cim txog cov uas neeg coob ua thaum tus Cawm Seej nkag los rau hauv Yeluxalees. Kev qw no kuj qhia txog qhov uas Joseph pom hnub ntawd nyob hauv Koog Ntoo Dawb Ceev—uas yog, Leej Txiv thiab Leej Tub yog ob tug Neeg muaj yeeb koob uas peb teev tiam thiab qhuas.

Tam sim no kuv yuav piav tias yuav ua Kev Qw Hauxanas li cas. Thaum kuv ua li no, kuv thov kom peb cov uas tshaj tawm xov xwm ua tib zoo saib kab ke no rau nqi thiab tseem ceeb.

Txhua tus uas ua yuav tuav ib daim phuam dawb thiab huv huv, tuav ib ces kaum, thiab muab yoj mus yoj los thaum koom ua ke hais tias, “Hauxanas, Hauxanas, Hauxanas rau Vajtswv thiab tus Yaj,” hais peb zaug, ces tom qab ntawd hais “Amees, Amees, thiab Amees.” Yog tias nej tsis muaj ib daim phuam dawb, nej yoj tes xwb los tau.

Cov kwv tij thiab cov muam, kuv caw nej sawv thiab koom tes ua Kev Qw Hauxanas, tom qab ntawd yuav hu Zaj Nkauj Hauxanas thiab “Vajtswv tus Ntsuj Plig.”¹

Thaum tus coj nkauj coj nej, cia li koom tes hu nkauj “Vajtswv tus Ntsuj Plig.”