Thov Vajtswv nrog Kev Ntseeg

Vajtswv tab tom teb Txwj Laug Maynes tej lus thov thaum qhib tuas rooj sab laj no. Kev tshoov siab tau los rau peb los ntawm tej zaj lus zoo thiab cov nkauj zoo mloog. Twb pib muaj raws li Thawj Tswj Hwm Russell M. Nelson tej lus cog tseg tias lub rooj sab laj no yuav zoo kawg nkaus thiab nej yuav nco ntsoov.

Thawj Tswj Hwm Nelson tau hais tias xyoo no yog “200 xyoo tom qab Vajtswv Leej Txiv thiab Nws Leej Tub, Yexus Khetos, tau tshwm sim rau Joseph Smith ua yog toog pom.” Thawj Tswj Hwm Nelson tau caw peb npaj peb tus kheej ua ntej lub rooj sab laj no, vim kev nco qab txog lub sij hawm no yuav ua “ib lub sij hawm qhib kev rau hauv lub Koom Txoos zaj keeb kwm, thiab nej txoj hauj lwm yeej tseem ceeb heev.”¹

Ib yam li kuv, tej zaum nej tau mloog nws zaj thiab nug nej tus kheej tias, “Vim li cas kuv txoj hauj lwm yeej tseem ceeb heev?” Tej zaum nej tau nyeem thiab thov Vajtswv txog lub caij muab txoj moo zoo txum tim rov qab los. Tej zaum, nej twb nyeem tej zaj txog tej lub sij hawm zoo kawg nkaus thaum Vajtswv Leej Txiv tau muab Nws Leej Tub tshwm sim rau neeg pom. Tej zaum nej twb nyeem txog tej lub sij hawm thaum tus Cawm Seej tau hais lus rau peb Leej Txiv Saum Ntuj Ceeb Tsheej cov me nyuam. Kuv twb tau ua txhua yam no.

Kuv nrhiav tau tej lus uas hais txog Vajtswv lub pov thawj hwj thiab kev qhib tej lub caij nyoog tso cai. Kuv txo hwj chim thaum kuv kawm tias kuv txoj kev npaj rau lub rooj sab laj no yog ib txoj kev qhib caij nyoog hauv kuv lub neej thiab. Kuv lub siab tau hloov. Kuv ris Vajtswv txiaj heev. Kuv muaj kev xyiv fab vim kuv yuav koom nrog kev ua koob tsheej txog kev muab txoj moo zoo txum tim rov qab los no.

Nyaj muaj lwm tus uas tau ua tib zoo npaj es lawv muaj kev xyiv fab ntxiv, saib rau yav tom ntej zoo dua ntxiv, thiab rau siab ntxiv xav ua hauj lwm twg uas tus Tswv txib lawv ua.

Tej yam uas peb nco txog hnub no yog tej yam uas cov yaj saub hais tias yuav qhib lub caij nyoog tso txoj cai kawg, thaum tus Tswv npaj Nws lub Koom Txoos thiab Nws cov neeg, cov uas ris Nws lub npe, kom txais Nws. Ib feem ntawm peb txoj kev npaj rau Nws txoj kev los yog qhov uas Nws yuav txhawb nqa peb txhua tus peb thiaj yuav kov yeej tej teeb meem ntawm sab ntsuj plig thiab ua rau tej hauj lwm uas tsis tau muaj txij thaum chiv keeb los.

Thaum lub Cuaj Hlis Ntuj 1840, tus Yaj Saub Joseph Smith thiab nws ob tug pab cuam hauv Thawj Pawg Thawj Tswj Hwm tau hais li no: “Tus Tswv txoj hauj lwm hauv hnub nyoog kawg no, yeej yog ib txoj hauj lwm loj kawg thiab tib neeg hauv ntiaj teb ntshe tsis txawj to taub. Txoj hauj lwm no lub yeeb koob los piav tsis tau, thiab tsis muaj dab tsi tseem ceeb tshaj. Cov yaj saub thiab cov neeg ncaj ncees txij thaum ntuj tsim teb raug los txog txhua tiam neeg yeej tsom ntsoov rau lub ntsiab no; thiab nov yeej yog lub caij nyoog tso txoj cai uas muaj txhij txhua, thaum txhua yam los ntawm tus Khetos Yexus, tsis hais nyob saum ntuj ceeb tsheej los yog hauv ntiaj teb los yog, yeej yuav koom ua ke nyob hauv Nws, thiab yuav muab txhua yam txum tim rov qab los, raws li cov yaj saub dawb huv sawv daws tau hais txij thaum ntuj tsim teb raug los; vim nyob hauv lub caij nyoog no yuav muaj raws li txhua txoj kev cog lus uas tau cog rau cov yawg koob, thiab tej kev tshwm sim ntawm tus uas Siab Tshaj Plaws yuav loj, zoo kawg nkaus, thiab muaj laj lim tswv yim.”

Lawv hais ntxiv tias: “Peb muaj siab xav mus tom ntej thiab koom ua ke kom txhim tsa lub Nceeg Vaj no, thiab tsa lub Pov Thawj Hwj kom muaj tag nrho thiab muaj yeeb koob. Txoj hauj lwm uas yuav tsum ua hauv hnub nyoog kawg yeej yog ib txoj hauj lwm tseem ceeb kawg thiab yuav tsum siv Haiv Neeg Ntseeg lub dag zog, tej txuj ci, thiab rab peev xwm, thiaj li yuav mus tom ntej nrog lub yeeb koob uas tus yaj saub [Daniyees] tau hais txog [saib Daniyees 2:34–35, 44–45]; thiab Haiv Neeg Ntseeg yuav tsum tsom ntsoov rau txoj hauj lwm no kom thiaj li ua tau tej yam uas loj thiab tseem ceeb npaum li no.”²

Tej yam uas peb yuav ua thiab thaum twg peb mam li ua nyob hauv kev muab txoj moo zoo txum tim rov qab los mas tseem tsis tau muab tshwm sim lawm. Tiam sis Thawj Pawg Thawj Tswj Hwm thaum ntawd twb paub tias txoj hauj lwm uas tus Tswv tau hais kom peb ua loj thiab tseem ceeb npaum li cas. Nov yog ob peb yam xwb uas peb paub tias yuav muaj los:

Dhau los ntawm Nws Haiv Neeg Ntseeg, tus Tswv yuav muab lub txiaj ntsim uas yog Nws txoj moo zoo rau “txhua haiv neeg, txhua xeem neeg, txhua yam lus, thiab txhua yam neeg.”³ Tej txuj ci technology thiab tej txuj ci tseem ceeb yuav pab—thiab cov uas “nrhiav neeg”⁴ uas txhawb pab nrog lub hwj chim thiab kev ntseeg kuj yuav pab.

Peb yuav ua ib haiv neeg uas koom siab thaum muaj kev kub ntxhov tuaj zuj zus. Peb yuav muaj zog ntawm sab ntsuj plig nyob hauv peb tej pawg thiab tsev neeg uas muaj txoj kev kaj los ntawm txoj moo zoo.

Neeg ntiaj teb uas tsis ntseeg kuj yuav saib taus Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab paub txog Vajtswv lub hwj chim uas coj lub Koom Txoos no. Cov thwj tim uas rau siab ntseeg thiab ua siab loj yuav txo hwj chim thiab tsis ntshai ris Khetos lub npe nyob hauv lawv lub neej txhua hnub.

Yog li ntawd peb txhua tus yuav ua li cas kom ua tau hauj lwm uas loj thiab tseem ceeb npaum li no? Thawj Tswj Hwm Nelson tau qhia tias peb yuav ua li cas kom muaj hwj chim ntawm sab ntsuj plig ntxiv. Thaum peb saib kev hloov siab lees txim yog kev xyiv fab vim peb txoj kev ntseeg tias Yexus yog tus Khetos loj tuaj, thaum peb to taub thiab ntseeg tias Leej Txiv Saum Ntuj Ceeb Tsheej hnov peb tej lus thov txhua zaus, thiab thaum peb sim ua raws li cov lus txib, ces peb lub hwj chim kom txais tau kev tshwm sim yuav loj tuaj. Tus Vaj Ntsuj Plig Dawb Huv yuav nrog nraim peb nyob. Txoj kev kaj yuav nrog nraim peb tsis hais thaum lub ntiaj teb tsaus ntuj zuj zus tuaj.

Joseph Smith yog ib tug yam ntxwv txog kev muaj hwj chim ntawm sab ntsuj plig ntxiv. Nws tau qhia rau peb tias kev thov Vajtswv nrog kev ntseeg yog tus yawm sij kom txais tau tej kev tshwm sim los ntawm Vajtswv. Nws tau thov Vajtswv nrog kev ntseeg tias Vajtswv Leej Txiv yuav teb nws tej lus thov. Nws tau thov Vajtswv nrog kev ntseeg tias tsuas yog los ntawm Yexus Khetos nws thiaj yuav dim txim rau nws tej kev txhaum. Thiab nws tau thov Vajtswv nrog kev ntseeg tias nws yuav tsum nrhiav tau Yexus Khetos lub Koom Txoos tseeb kom txais tau kev zam txim ntawd.

Thaum nws ua nws txoj hauj lwm qhuab qhia, Joseph Smith twb thov Vajtswv nrog kev ntseeg kom txais tau kev tshwm sim uas tsis tu. Thaum peb raug tej teeb meem niaj hnub no thiab tej uas yuav muaj los, peb kuj yuav tsum ua ib yam li nws. Thawj Tswj Hwm Brigham Young hais tias, “Kuv tsis paub lwm txoj kev rau Tsoom Haiv Neeg Ntseeg hauv Hnub Nyoog Kawg tsuas yog txhua zaus lawv ua pa lawv yuav thov Vajtswv coj Nws cov neeg.”⁵

Tej lus los ntawm ob zag thov foom koob hmoov rau lub cim nco txog piav txog peb lub neej txhua hnub: “Nco ntsoov txog nws.” “Nws” yeej yog Yexus Khetos. Cov lus tom qab ntawd, “coj raws li nws tej lus txib,” qhia tias peb yuav tsum ua li cas kom nco ntsoov txog Nws.⁶ Thaum peb nco ntsoov txog Yexus Khetos, tej zaum peb yuav tsum thov, “Nws xav kom kuv ua li cas?”

Tej lus thov li no, uas thov nrog kev ntseeg Yexus Khetos, twb tau qhib lub caij nyoog tso txoj cai kawg no. Thiab yuav tsum thov li no thaum peb txhua tus ua peb tej hauj lwm nyob hauv lub caij nyoog no. Kuv twb nrhiav tau cov neeg uas coj yam ntxwv zoo txog kev thov Vajtswv li no.

Tus thib ib yog Joseph Smith. Nws tau muaj kev ntseeg li ib tug me nyuam thov tus Tswv seb nws yuav tsum ua dab tsi. Tej lus teb rau nws twb hloov lub ntiaj teb zaj keeb kwm.

Kuv tau kawm ib yam tseem ceeb los ntawm qhov uas Joseph ua thaum Dab Ntxwg Nyoog tawm tsam nws thaum Joseph txhos caug thov Vajtswv.

Kuv paub los ntawm kuv lub neej hais tias Dab Ntxwg Nyoog thiab nws cov tub qhe yuav sim ua rau peb xav tias peb yuav tsum tsis txhob thov. Thaum Joseph Smith siv zog thov Vajtswv kom dim lub hwj chim uas sim muab nws khi, twb teb nws tej lus thov kom txais kev pab thaum Leej Txiv Saum Ntuj Ceeb Tsheej thiab Yexus Khetos tshwm sim los.

Dab Ntxwg Nyoog twb siv zog heev kom tsis txhob cia txoj moo zoo raug txum tim rov qab los vim Joseph txoj kev thov Vajtswv yog ib yam tseem ceeb kawg nkaus. Peb yuav tsis muaj feem loj npaum li ntawd nyob hauv kev muab txoj moo zoo txum tim rov qab los. Tiam sis tus yeeb ncuab ntawm kev muab txoj moo zoo txum tim rov qab los yuav sim tab kaum peb kom txhob thov. Joseph txoj kev ntseeg thiab kev rau siab yuav txhawb nqa peb txoj kev xav thov. Nov yog ib yam uas kuv ua Leej Txiv Saum Ntuj Ceeb Tsheej tsaug rau tus Yaj Saub Joseph.

Enos nyob hauv Phau Ntawv Maumoos yog ib tug yam ntxwv rau kuv txoj kev thov Vajtswv nrog kev ntseeg thaum kuv sim ua kuv txoj hauj lwm hauv txoj kev muab txoj moo zoo txum tim rov qab los. Txawm nej txoj hauj lwm yog dab tsi los, tej zaum nej yuav xav coj yam ntxwv zoo li nws.

Ib yam li Joseph, Enos tau thov Vajtswv nrog kev ntseeg. Nws tau piav txog lub sij hawm ntawd li no:

“Thiab kuv tus ntsuj plig ntshaw; thiab kuv txhos caug ntawm tus uas Tsim kuv lub xub ntiag, thiab kuv thov nws thov tas zog thiab thov pab rau kuv tus kheej tus ntsuj plig; thiab kuv thov nws tas hnub; muaj tseeb tiag, thiab thaum uas twb tsaus ntuj lawm los kuv tseem tsa kuv lub suab siab kom mus txog ntua puag saum ntuj.

“Thiab muaj ib lub suab los rau kuv, hais tias: Enos, twb zam txim rau koj tej kev txhaum lawm, thiab koj yuav tau koob hmoov.

“Thiab kuv, Enos, paub tias Vajtswv yeej dag tsis taus; yog li ntawd, kuv txoj kev muaj txim ploj huv tib si.

“Thiab kuv hais tias: Tus Tswv, ua li cas thiaj ua tau li ntawd?

“Thiab nws hais rau kuv tias: Vim yog koj txoj kev ntseeg Khetos, tus uas yav tas los koj ib txwm tsis tau hnov los sis pom dua li. Thiab ntau xyoo yuav dhau mus ua ntej nws yuav ua nws tus kheej tshwm los ntawm cev nqaij daim tawv; yog li ntawd, cia li mus, koj txoj kev ntseeg tau ua rau koj huv.”⁷

Zaj lus uas foom koob hmoov rau kuv nyob hauv tej lus no: “Vim yog koj txoj kev ntseeg Khetos, tus uas yav tas los koj ib txwm tsis tau hnov los sis pom dua li.”

Joseph tau muaj kev ntseeg Khetos mus rau hauv koog ntoo thiab thov Vajtswv kom dim Dab Ntxwg Nyoog lub hwj chim. Nws tseem tsis tau pom Leej Txiv thiab Leej Tub, tiam sis nws thov Vajtswv nrog kev ntseeg kawg siab kawg ntsws.

Enos zaj no twb qhia kuv qhov uas muaj nqis no. Thaum kuv thov Vajtswv nrog kev ntseeg, tus Cawm Seej yog tus uas daws kuv zaj rau Leej Txiv thiab kuv hnov kuv tej lus thov mus txog ntuj ceeb tsheej. Yuav muaj lus teb. Yuav tau koob hmoov. Muaj kev kaj siab lug thiab kev xyiv fab txawm muaj tej lub sij hawm nyuaj heev los.

Kuv nco qab thaum kuv yog tus mej zeej tshiab tshaj hauv Pawg Kaum Ob tug Tim Thawj, es kuv txhos caug thov Vajtswv nrog Txwj Laug David B. Haight. Thaum ntawd nws laus npaum li kuv tam sim no, thiab muaj teeb meem uas kuv muaj tam sim no. Kuv nco txog nws lub suab thaum nws thov Vajtswv. Kuv tsis tau rua muag, tiam sis zoo li kuv hnov nws luag nyav. Nws hais lus rau Leej Txiv Saum Ntuj Ceeb Tsheej nrog kev xyiv fab.

Kuv hnov nws txoj kev zoo siab thaum nws hais tias, “Los ntawm Yexus Khetos lub npe.” Zoo li kuv hnov hais tias Txwj Laug Haight xav tias tus Cawm Seej tau pom zoo rau tej lus uas nws nyuam qhuav thov rau Leej Txiv tam sim ntawd. Thiab kuv paub zoo tias Vajtswv twb tau txais nws tej lus nrog kev luag nyav thiab.

Peb haj yam yuav muaj peeb xwm ua hauj lwm hauv txoj kev muab txoj moo zoo txum tim rov qab los thaum peb muaj kev ntseeg tias Yexus Khetos yog peb tus Cawm Seej thiab Leej Txiv Saum Ntuj Ceeb Tsheej yog peb Leej Txiv uas hlub peb. Thaum peb thov Vajtswv nrog kev ntseeg, peb ua peb txoj hauj lwm tseem ceeb thaum tus Tswv npaj lub ntiaj teb rau Nws txoj Kev Los Zaum Ob. Kuv thov kom peb yuav muaj kev xyiv fab ua tej hauj lwm uas Nws caw peb txhua tus ua.

Kuv ua tim khawv tias Yexus Khetos muaj txoj sia nyob. Nov yog Nws lub Koom Txoos thiab lub nceeg vaj hauv lub ntiaj teb no. Joseph Smith yog tus yaj saub ntawm Kev Muab txoj Moo Zoo Txum Tim Rov Qab Los. Thawj Tswj Hwm Russell M. Nelson yog tus Tswv tus yaj saub hauv lub ntiaj teb hnub no. Nws tuav tag nrho cov yawm sij ntawm lub pov thawj hwj hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Los ntawm Yexus Khetos lub npe, amees.