Mloog Nws Hais

Kuv cov kwv tij thiab cov muam, kuv ua Vajtswv tsaug vim, los ntawm kev siv txuj ci technology, peb muaj peev xwm sib ntsib ua ke kom teev tiam Vajtswv thaum Hnub Sunday sawv ntxov no. Peb tau koob hmoov vim peb paub tias tau muab Yexus Khetos txoj moo zoo txum tim rov qab los rau hauv lub ntiaj teb!

Ob peb lim tiam no, peb feem coob twb raug kev ntxhov siab hauv peb lub neej. Muaj av qeeg, hluav taws, dej nyab, phaum mob, thiab tej yam uas muaj tom qab ua rau peb hloov tej yam peb ua txhua hnub thiaj tsis muaj zaub mov, tej yam tseem ceeb, thiab nyiaj pes tsawg.

Txawm zoo li no los, peb qhuas nej thiab ua nej tsaug vim nej xav mloog tus Tswv txoj lus thaum lub sij hawm ntxhov hnyo thaum nej koom nrog peb mloog lub tuam rooj sab laj. Kev tsaus ntuj uas muaj thaum peb raug kev sim siab ua rau Yexus Khetos txoj kev kaj haj yam ci ntsa iab. Cia li xav txog tej yam zoo uas peb txhua tus muaj cib fim ua thaum muaj kev kub ntxhov thoob ntiaj teb no. Nej txoj kev hlub thiab txoj kev ntseeg tus Cawm Seej tej zaum yuav pab ib tug neeg kawm txog lub caij nyoog no uas tau muab Yexus Khetos txoj moo zoo Txum Tim Rov Qab Los.

Tau ob xyoo no, Muam Nelson thiab kuv wb tau ntsib nej coob heev nyob thoob plaws lub ntiaj teb. Wb tau koom nrog nej nyob hauv tej chaw nyob nraum zoov thiab hauv tej chav loj dhia cev. Nyob hauv txhua qhov chaw, ua rau kuv xav tias kuv nrog cov uas tus Tswv xaiv tseg lawm thiab kuv txawj pom kev muab Ixayees sau los ua ke.

Peb nyob hauv lub caij nyoog uas “peb cov yawg koob tau kub siab lug tos ntsoov.”¹ Tej yam uas peb pom tab meeg peb yog tej yam uas tus yaj saub Nifais ua yog toog pom xwb, hais tias “Vajtswv tus Me Nyuam Yaj lub hwj chim” yuav nqis los “rau tus Tswv cov neeg khi lus, cov uas tau tawg khiav ri niab mus thoob plaws hauv lub ntiaj teb; thiab lawv tau muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv.”²

Nej, kuv cov kwv tij thiab cov muam, yog cov txiv neej, cov poj niam, thiab cov me nyuam uas Nifais pom. Cia li xav txog qhov ntawd!

Txawm nej nyob qhov twg los txawm nej raug xwm txheej li cas los, tus Tswv Yexus Khetos yog nej tus Cawm Seej, thiab Vajtswv tus yaj saub Joseph Smith yog nej tus yaj saub. Twb tau qhia ua ntej ntuj tsim teb raug hais tias nws yuav los ua tus yaj saub hauv lub caij nyoog kawg no, thaum “cheem tsis taus dab tsi”³ ntawm Tsoom Haiv Neeg Ntseeg. Kev tshwm sim yeej los ntawm tus Tswv tsis tu tsis tseg nyob hauv txoj kev muab txoj moo zoo txum tim rov qab los.

Qhov uas tau muab Yexus Khetos txoj moo zoo txum tim rov qab los rau lub ntiaj teb txhais li cas rau nej?

Nws txhais tias nej thiab nej tsev neeg muaj cib fim sib khi ua ke! Nws txhais tias vim ib tug uas muaj Yexus Khetos txoj cai tau muab nej ua kev cai raus dej thiab pom zoo rau nej ua ib tug mej zeej hauv Nws lub Koom Txoos, ces nej yuav muaj tus Vaj Ntsuj Plig Dawb Huv nrog nraim nej nyob. Nws yuav coj nej thiab pov hwm nej. Nws txhais tias nej yeej yuav muaj kev nplij siab thiab muaj Vajtswv lub hwj chim pab nej. Nws txhais tias nej yuav muaj lub hwj chim pov thawj hwj foom koob hmoov rau nej thaum nej txais cov kab ke thiab ua kev khi lus nrog Vajtswv thiab ua raws li tej kev khi lus ntawd. Tej yam tseeb no yeej yog tej yam uas txheeb peb, qhov tseem ceeb yog thaum cua daj cua dub hlob heev.

Phau Ntawv Maumoos hais txog ob haiv neeg uas nce zuj zus thiab poob mus. Lawv zaj keeb kwm qhia tias yuav yooj yim npaum li cas rau ib co neeg tsis nco qab txog Vajtswv ntxiv, xyeej tus Tswv cov yaj saub tej lus, thiab nrhiav hwj chim, koob meej, thiab tej yam uas sab cev nqaij daim tawv nyiam.⁴ Cov yaj saub tas los twb tau hais “tej yam tseem ceeb thiab zoo kawg nkaus rau cov neeg, tej uas lawv tsis ntseeg.”⁵

Nyob hauv peb lub caij nyoog los yeej tsis txawv. Thaum sij hawm dhau mus, peb twb tau mloog tej yam tseem ceeb thiab zoo kawg nkaus uas los ntawm tej lub sam thiaj nyob thoob plaws lub ntiaj teb. Tiam sis neeg feem coob tsis muab siab npuab tej lus tseeb no—tej zaum yog vim lawv tsis paub nrhiav qhov twg⁶ los sis lawv mloog cov uas tsis muaj qhov tseeb tag nrho los sis yog vim lawv xyeej tej lus tseeb kom nrhiav tej yam lawv nyiam xwb.

Tus yeeb ncuab txawj ntse heev. Tau ntev lawm nws ua kom neeg xav tias kev zoo yog kev phem thiab kev phem yog kev zoo.⁷ Nws tej zaj lus nrov thiab khav theeb.

Tiam sis, tej zaj lus los ntawm peb Leej Txiv Saum Ntuj Ceeb Tsheej txawv heev. Nws hais lus ntsiag to, hais lus yooj yim, thiab hais lus meej heev peb thiaj to taub zoo.⁸

Piv txwv hais tias, thaum twg Nws qhia txog Nws Tib Leeg Tub rau neeg nyob hauv lub ntiaj teb, Nws yeej siv tej lus tsawg tsawg xwb. Nyob pem Roob Hloov Hlo, Vajtswv tau hais rau Petus, Yakaunpaus, thiab Yauhas hais tias, “Tus no yog kuv tus Tub uas kuv hlub: nej cia li mloog nws lus.”⁹ Nws cov lus rau cov Neeg Nifais hauv thaj av Huaj Vam puag thaum ub yog li no “Saib seb kuv Leej Tub uas kuv Hlub, tus uas ua rau kuv zoo siab heev, tus uas ua rau kuv lub npe tau yeeb koob—nej cia li mloog nws hais.”¹⁰ Thiab rau Joseph Smith, thaum Vajtswv hais lus qhib lub caij nyoog tso txoj cai no, Nws hais tias, “Tus no yog kuv Leej Tub uas kuv hlub. Cia li mloog Nws hais!”¹¹

Nim no, cov kwv tij thiab cov muam, xav txog qhov uas hauv peb zag kuv tau hais no, ua ntej Leej Txiv qhia txog Nws Leej Tub, cov neeg twb ntshai, thiab xav xav dim.

Cov Tim Thawj ntshai thaum lawv pom lub huab roos Yexus Khetos nyob saum lub Roob Hloov Hlo.

Cov Neeg Nifais ntshai vim lawv twb tau nyiaj kom dhau kev puas tsuaj thiab kev tsaus ntuj tau ob peb hnub.

Joseph Smith raug tej kev tsaus ntuj lub hwj chim ua ntej rooj ntug qhib plho.

Peb Leej Txiv paub tias thaum muaj kev paub tsis tseeb thiab kev ntshai nyob ib puag ncig, ces qhov uas yuav pab peb zoo tshaj yog kev mloog Nws Leej Tub hais.

Vim thaum peb xav mloog—xav xav mloog—Nws Leej Tub tiag, ces yuav coj peb paub ua li cas txhua lub sij hawm.

Thawj lo lus nyob hauv phau Lus Qhuab Qhia thiab Kev Khi Lus yog mloog.¹² Lo lus no txhais hais tias yus mloog vim yus xav ua raws li nws hais.¹³ “Mloog Nws Hais” txhais tias yus mloog tej uas tus Cawm Seej hais ces yus ua raws li Nws tej lus ntuas. Nyob hauv cov lus no—“Mloog Nws Hais”—Vajtswv qhia tias peb yuav tsum ua li cas kom vam meej, muaj kev zoo siab thiab muaj kev xyiv fab hauv lub neej no. Peb yuav tsum mloog tus Tswv tej lus, thiab ua raws li tej yam uas Nws tau hais rau peb!

Vim peb xav ua Yexus Khetos cov thwj tim, peb yuav tsum txhob txwm mloog Nws hais. Yuav tsum rau siab txhua hnub kom muaj Nws tej lus, Nws tej lus qhia, Nws tej lus tseeb, hauv peb lub neej txhua hnub.

Peb yuav tsum tsis txhob tso siab rau tej yam uas peb kawm los ntawm social media. Vim muaj tej lus ntau tsis ntau hauv lub ntiaj teb no uas tus yeeb ncuab siv kom nrov thiab ua phem heev, ces peb yuav mus qhov twg kom thiaj mloog Nws hais?

Peb nrhiav hauv vaj lug kub los tau. Vaj lug kub qhia peb txog Yexus Khetos thiab Nws txoj moo zoo, Nws txoj Kev Theej Txhoj, thiab peb Leej Txiv txoj hau kev zoo siab thiab kev txhiv dim. Peb yuav tsum kawm txog Vajtswv txoj lus txhua hnub kom peb thiaj li yuav muaj peev xwm nyiaj kom dhau hauv lub caij nyoog uas muaj tej xwm txheej ntawm sab ntsuj plig. Thaum peb mloog ntsoov Khetos tej lus txhua hnub, Khetos tej lus yuav qhia peb paub ua li cas thaum peb raug tej teeb meem uas peb xav tias peb yeej yuav tsis raug.

Peb kuj yuav mloog Nws hais nyob hauv lub tuam tsev. Tus Tswv lub tsev yeej yog ib lub tsev rau peb kawm. Tus Tswv qhia raws li Nws txoj kev. Nyob ntawd txhua txoj kab ke qhia txog tus Cawm Seej. Nyob ntawd peb kawm tias yuav ua li cas kom qhib daim ntaub thaiv thiab sib txuas lus nrog Vajtswv. Peb kawm paub ntiab tus yeeb ncuab tawm thiab siv tus Tswv lub hwj chim pov thawj hwj kom txhawb nqa peb thiab cov uas peb hlub. Tsim nyog uas peb txhua tus yuav nrhiav kev pov hwm nyob ntawd.

Thaum twg tej kev txwv tsis pub peb mus qhov twg vim muaj COVID-19 los tsis muaj lawm, thov nej teem sij hawm mus teev tiam thiab ua hauj lwm hauv lub tuam tsev. Txhua lub sij hawm nej ua li ntawd yuav foom koob hmoov rau nej thiab nej tsev neeg es tsis muaj ib yam dab tsi uas pab tau nej npaum li ntawd. Cia li siv sij hawm xav seb nej hnov dab tsi thaum nej nyob ntawd. Thov tus Tswv qhia nej qhib rooj ntug kom foom koob hmoov rau nej lub neej thiab cov uas nej hlub lub neej.

Yog tias nej tsis muaj cib fim mus rau lub tuam tsev, kuv caw nej koom tes nrhiav zaj keeb kwm thiab txheeb xyuas tej npe ntawm cov neeg thaum ub. Kuv caw nej tias thaum nej siv sij hawm ntxiv nyob hauv lub tuam tsev thiab ua hauj lwm nrhiav tsev neeg zaj keeb kwm, nej haj yam yuav txawj hnov Nws.

Peb kuv yuav mloog Nws hais meej ntxiv thaum peb kawm txawj paub mloog tus Vaj Ntsuj Plig Dawb Huv tej lus ntxhi. Tsis muaj ib lub sij hawm tseem ceeb tshaj lub sij hawm no rau nej kawm tias tus Ntsuj Plig hais li cas rau nej tam sim no. Nyob hauv Pawg Vajtswv, tus Vaj Ntsuj Plig Dawb Huv yog tus tub xa xov. Nws yuav ua rau nej xav txog tej yam uas Leej Txiv thiab Leej Tub xav kom nej txais. Nws yog tus Nplij Siab. Nws yuav ua rau nej nyob kaj siab lug. Nws ua tim khawv txog qhov tseeb thiab qhia li ntawd thaum nej mloog thiab nyeem tus Tswv tej lus.

Kuv rov qab thov nej kom nej ua txhua yam nej ua tau kom nej haj yam muaj peev xwm txais kev tshwm sim.

Yog nej ua li ntawd nej yuav paub ua nej lub neej, paub ua li cas thaum raug kev kub ntxov, thiab paub kom tsis txhob raug tus yeeb ncuab tej kev ntxias.

Thiab, qhov kawg, peb yuav mloog Nws hais thaum peb ua raws li cov yaj saub, cov pom tau, thiab cov txais kev tshwm sim tej lus. Yexus Khetos cov Tim Thawj yeej ua tim khawv txog Nws. Lawv taw tes rau txoj kev rau peb taug thaum peb raug kev nyuaj siab hauv lub neej no.

Yuav muaj li cas thaum nej txhob txwm mloog thiab ua raws li tej uas tus Cawm Seej tau hais thiab tej uas Nws hais tam sim no los ntawm Nws cov yaj saub? Kuv cog lus rau nej tias nej yuav txais hwj chim ntxiv kom paub ua li cas thaum raug ntxias, raug teeb meem, thiab muaj kev qaug zog. Kuv cog lus tias yuav muaj txuj ci tseem ceeb hauv nej tej kev sib yuav, tsev neeg kev sib raug zoo, thiab tej hauj lwm uas nej ua txhua hnub. Thiab kuv cog lus rau nej tias nej yuav txawj muaj kev xyiv fab ntxiv txawm yog muaj kev kub ntxhov hauv nej lub neej.

Lub tuam rooj sab laj thaum lub Plaub Hlis Ntuj xyoo 2020 no yog kev nco txog ib qho xwm txheej uas tau hloov lub ntiaj teb no. Thaum peb tau xav txog 200 xyoo tom qab Joseph Smith Thawj Zaug Ua Yog Toog, Thawj Pawg Thawj Tswj Hwm thiab Pawg Kaum Ob tug Tim Thawj tau xav seb peb yuav ua li cas kom nco txog qhov xwm txheej no.

Qhov uas Vajtswv tau tshwm sim no tau qhib kev rau kev muab Yexus Khetos txoj moo zoo uas muaj txhij txhua Txum Tim Rov Qab Los thiab qhib lub caij nyoog tso txoj cai uas muaj txhij txhua.

Peb tau xav seb puas tsim nyog tsa ib tug mlom. Tiam sis thaum peb tau xav txog Thawj Zaug Ua Yog Toog ntawd, peb tau txais kev tshoov siab kom tsis txhob tsa ib tug mlom pob zeb tiam sis peb yuav tsa suab hais ib zaj lus tshaj tawm tseem ceeb thiab dawb ceev—uas tsis yog “txaug rau saum ib daig txiag zeb” tiam sis yog tej lus uas tau sau “rau hauv daim txiag nqaij uas yog [peb] nplooj siab.”¹⁴

Txij thaum tau txhim tsa lub Koom Txoos los, tau sau tsib zaj lus tshaj tawm xwb, zaj kawg yog “Tsev Neeg: Ib zaj Lus Tshaj Tawm rau lub Ntiaj Teb,” uas Thawj Tswj Hwm Gordon B. Hinckley hais thaum xyoo 1995.

Thaum peb xav txog lub sij hawm tseem ceeb hauv lub ntiaj teb zaj keeb kwm no thiab tus Tswv cov lus txib kom muab Ixayees sau los ua ke kom npaj rau Yexus Khetos txoj Kev Los Zaum Ob, peb, uas yog Thawj Pawg Thawj Tswj Hwm thiab Pawg Kaum Ob tug Tim Thawj, hais zaj lus tshaj tawm no. Lub npe hu ua “Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los: Ib zaj Lus Tshaj Tawm rau lub Ntiaj Teb Thaum Nco txog Ob Puas Xyoo Tas Los.” Thawj Pawg Thawj Tswj Hwm thiab Pawg Kaum Ob tug Tim Thawj ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog cov uas tau sau zaj lus no. Twb sau thaum lub Plaub Hlis Ntuj xyoo 2020. Xwv kom npaj rau hnub no, kuv thiaj li tau kaw kev hais lus tshaj tawm no nyob hauv Koog Ntoo Dawb Ceev, qhov chaw uas Joseph Smith tau pom Leej Txiv thiab Leej Tub.

“Peb tshaj tawm tias Vajtswv hlub Nws cov me nyuam nyob hauv txhua lub teb chaws hauv lub ntiaj teb. Vajtswv Leej Txiv tau muab Nws Leej Tub, Yexus Khetos, txoj kev yug los, Nws lub neej, thiab Nws txoj kev txi theej txhoj pub rau peb. Los ntawm Leej Txiv lub hwj chim, Yexus tau sawv rov los thiab kov yeej kev tuag. Nws yog peb tus Cawm Seej, peb tus Yam Ntxwv, thiab peb tus Txhiv Dim.

“Ob puas xyoo tas los, yog ib tag kis sawv ntxov zoo nkauj hauv lub caij nplooj ntoo hlav rau xyoo 1820, Joseph Smith yog ib tug tub hluas uas xav paub nws yuav tsum koom lub koom txoos twg, nws thiaj li mus thov Vajtswv hauv hav zoov ze nws lub tsev nyob hauv lub xeev New York, lub Teb Chaws Amelikas. Nws xav paub seb nws puas yuav txais kev cawm seej thiab nws tso siab tias Vajtswv yuav coj nws txoj hau kev.

“Peb txo hwj chim tshaj tawm hais tias kom teb nws tej lus thov, Vajtswv Leej Txiv, thiab Nws Leej Tub, Yexus Khetos, tau tshwm sim rau Joseph thiab qhib kev rau ‘kev muab txhij txhua txum tim rov qab los’ (Tes Hauj Lwm 3:21) raws li hais nyob hauv phau Npaivnpaum. Thaum ua yog toog no, nws kawm tias tom qab cov Tim Thawj tau tuag, Khetos lub Koom Txoos hauv Phau Tshiab twb ploj mus thiaj tsis nyob hauv lub ntiaj teb no lawm ntxiv. Joseph yuav pab muab lub Koom Txoos no txum tim rov qab los.

“Peb qhia tseeb tias raws li Leej Txiv thiab Leej Tub tau qhia, cov tub xa xov saum ntuj tau los qhia Joseph thiab rov qab txhim tsa Yexus Khetos lub Koom Txoos. Yauhas tus uas Muab Neeg Ua Kev Cai Raus Dej tau sawv rov los thiab tau muab txoj cai ua kev cai raus dej kom zam txim rau tej kev txhaum txum tim rov qab los. Peb tug ntawm Yexus cov Tim Thawj—Petus, Yakaunpaus, thiab Yauhas—tau muab kev ua tim thawj thiab cov yawm sij ntawm txoj cai pov thawj hwj txum tim rov qab los. Muaj lwm tus uas los thiab, xws li Eliyas, uas muab txoj cai khi tsev neeg ua ke mus ib txhis kom dhau kev tuag txum tim rov qab los.

“Peb kuj ua tim khawv tias tau muab Vajtswv lub txiaj ntsim thiab lub hwj chim txhais lus rau Joseph Smith kom txhais ib phau ceev xwm txheej uas sau puag thaum ub—Phau Ntawv Maumoos: Ib zaj Tim Khawv Ntxiv txog Yexus Khetos. Nyob hauv cov ntawv dawb ceev no muaj ib zaj lus uas hais txog Yexus Khetos txoj kev qhuab qhia rau ib co neeg nyob hauv lub Ntiaj Teb Sab Hnub Poob tsis ntev tom qab Nws txoj Kev Sawv Rov Los. Phau no qhia txog lub hom phiaj ntawm lub neej no thiab piav txog Khetos cov lus qhuab qhia, uas tseem ceeb kawg nkaus rau lub hom phiaj ntawd. Yog cov vaj lug kub uas koom ua ke nrog phau Npaivnpaum, Phau Ntawv Maumoos ua tim khawv tias txhua tus neeg yog ib Leej Txiv Saum Ntuj uas muaj siab hlub cov tub thiab cov ntxhais, Nws muaj ib txoj hau kev rau peb lub neej, thiab Nws Leej Tub, Yexus Khetos, hais lus rau peb niaj hnub no ib yam li Nws tau hais puag thaum ub.

“Peb tshaj tawm hais tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, uas tau txhim tsa thaum lub Plaub Hlis Ntuj hnub tim 6, xyoo 1830, yog Khetos lub Koom Txoos hauv Phau Tshiab uas Nws tau muab txum tim rov qab los. Lub Koom Txoos yeej txheem rau Yexus Khetos lub neej zoo tag nrho, uas yog lub Koom Txoos tus ncej zeb tag, thiab txheem rau Nws txoj Kev Theej Txhoj uas kav ib txhis thiab Nws txoj Kev Sawv Rov Los. Yexus Khetos twb tau rov qab hu cov Tim Thawj thiab tau muab txoj cai pov thawj hwj rau lawv. Nws caw peb txhua tus los cuag Nws thiab Nws lub Koom Txoos, txais tus Vaj Ntsuj Plig Dawb Huv, cov kab ke cawm seej, thiab muaj kev xyiv fab uas kav ib txhis.

“Ob puas xyoo twb dhau mus tom qab Vajtswv Leej Txiv thiab Nws Leej Tub uas Nws Hlub, Yexus Khetos, tau qhib Kev Muab Txoj Moo Zoo Txum Tim Rov Qab Los no. Tib neeg ntau heev nyob thoob plaws lub ntiaj teb twb tau tso siab plhuav rau txoj kev paub txog tej xwm uas cov yaj saub tau hais txog.

“Peb zoo siab tshaj tawm tias lub Caij Nyoog Txum Tim Rov Qab Los no tseem mus tom ntej los ntawm kev tshwm sim uas tsis tu tsis tseg. Lub ntiaj teb yeej yuav tsis zoo li qub, vim Vajtswv yuav ‘sau txhua yam los ua ib ke rau Khetos ua tus thawj’ (Efexus 1:10).

“Nrog kev tswm seeb thiab kev ris txiaj, peb uas yog Nws cov Tim Thawj caw kom txhua tus paub—ib yam li peb paub—hais tias rooj ntug twb qhib plho lawm. Peb qhia tseeb tias Vajtswv qhia txog Nws lub siab nyiam rau Nws cov tub thiab cov ntxhais uas Nws hlub. Peb ua tim khawv tias cov uas thov Vajtswv thaum lawv kawm txog zaj lus ntawm lub Caij Nyoog Txum Tim Rov Qab Los thiab muab siab rau ntseeg yuav tau koob hmoov kom txais tau kev ua tim khawv tias zaj no yog los saum ntuj los thiab muaj lub hom phiaj uas yog npaj lub ntiaj teb rau peb tus Tswv thiab tus Cawm Seej, Yexus Khetos, txoj Kev Los Zaum Ob.”¹⁵

Cov kwv tij thiab cov muam, nov yog peb txoj kev nco txog ob puas xyoo tas los zaj lus tshaj tawm rau lub ntiaj teb txog kev muab Yexus Khetos txoj moo zoo uas muaj txhij txhua txum tim rov qab los. Twb tau txhais ua 12 yam lus. Yuav txhais ua lwm yam lus tom qab no. Nej txais tau ib daim los ntawm lub Koom Txoos qhov website tom qab no. Cia li kawm zaj no ntawm nej tus kheej thiab nrog nej tsev neeg thiab cov phooj ywg. Cia li xav txog tej lus tseeb no thiab xav txog qhov uas tej lus tseeb yuav ua li cas rau nej lub neej yog tias nej mloog tej lus ntawd, ua raws li tej lus ntawd, thiab ua raws li cov lus txib thiab tej kev khi lus uas muaj nrog nraim tej lus tseeb ntawd.

Kuv paub tias Joseph Smith yog tus yaj saub uas tus Tswv xaiv ua ntej kom qhib lub caij nyoog tso txoj cai zaum kawg. Los ntawm Joseph, tus Tswv tau muab Nws lub Koom Txoos txum tim rov qab los. Joseph tau muab nws cov ntshav ua hom thawj rau nws zaj lus tim khawv. Kuv hlub nws thiab qhuas nws heev!

Vajtswv muaj txoj sia nyob! Yexus yog tus Khetos! Yexus muab Nws lub Koom Txoos txum tim rov qab los! Nws thiab Nws Leej Txiv, peb Leej Txiv Saum Ntuj Ceeb Tsheej, yeej saib xyuas peb. Kuv ua tim khawv li no los ntawm Yexus Khetos lub npe dawb ceev, amees.