Stap Faenem Glad long Kraes

Lod i no askem ol Aronik Prishud yut blong mekem evri samting, be wanem Hem i askem, i blong gat gudfala insperesen.

Sam yia i pas, famli blong mifala i bin go tru wanem we plante famli oli fesem long wol ia blong sin. Yangfala boe blong mifala, Tanner Christian Lund, i kasem sik ia kansa. Hem i gat wan gudfala sol, olsem evri boe blong naen yia oli gat. Hem i fani wetem ol smol stronghed blong hem, be semtaem long saed blong spirit hem i save gud wanem i stap. Smol devel mo enjel, strong hed mo naes. Taem hem i smol, i mekem mifala i sapraes evri dei wetem tugeta fasin blong save mekem samting i luk gud mo taem hem i no stap lisin. Mifala i agri se maet bae i groap i kam wan profet o wan man blong stil long bank. Nomata wanem wei, i luk olsem bae hem i putum wan mak i stap long wol.

Kwiktaem nomo, hem i kam sik bigwan. Afta nara tri yia i pas, hem i bin go tru long plante hevi tritmen we i mekem se oli mas jenisim tu bun blong hem mo hem i kasem numonia mekem se hem i mas slip mo pulum win tru long win paep blong 10 wik. Wan merikel i hapen, hem i bin kam oraet blong wan sot taem, be afta kansa blong hem i kambak.

Bifo ded blong hem, sik blong Tanner i kavremap ol bun blong hem, mo nomata long ol strong meresin, i stil soa. I had blong hem i kamaot long bed. Long Sandei moning ia, mama blong hem, Kalleen, i kam long rum blong jekem hem bifo famli i aot blong go long jos. Hem i sapraes blong luk Tanner i dresap finis i sidaon long en blong bed mo stap traehad wetem harem nogud long bodi blong batenem wan baten blong set. Kalleen i sidaon kolosap long hem. Hem i talem “Tanner,” “?yu sua se yu oraet gud blong go long jos? ?Yu no wantem stap long haos mo spel tedei?”

Hem i stap lukluk long floa nomo. Hem i bin wan dikon. Hem i gat wan kworom. Mo hem i gat wan wok blong mekem.

“Mi ting se mi mas pasem sakramen tedei.”

“Mi save se, i gat man blong i save mekem blong yu.”

“Yes,” hem i talem, “be … mi luk olsem wanem ol man i stap luk mi taem mi pasem sakramen. Mi ting se i helpem olgeta.”

So Kalleen i help batenem sot blong hem mo fasem nektae blong hem, mo oli draev i go long jos. Long klia ples, wan impoten samting i stap tekem ples.

Mi kambak insaed afta we mi bin atendem wan eli moning miting, mi sapraes blong luk Tanner i sidaon wetem ol dikon. Kalleen i talem slo nomo long mi from wanem hem i sidaon longwe, mo wanem hem i talem: “Mi ting se i helpem ol pipol.”

Mo mi stap luk taem ol dikon oli go long tebol blong sakramen. Hem i lei smol long nara dikon taem ol pris oli pasem trei long olgeta. Tanner i wokbaot sloslo i go long ples blong hem mo i holem en blong stul blong stretem hem taem hem i stap pasem sakramen long man we i stap long fored blong hem.

I luk olsem evri ae insaed long japel i fas long hem, oli filim bigfala soa ia blong hem taem hem i stap mekem simpol pat blong hem. Be long taem ia, Tanner i givim wan toktok we oli no save harem taem hem i stap traehad blong muv long wan ro i go long narawan—bolhed blong hed i wetwet wetem swet— i stap ripresentem Sevya long wei we ol dikon oli stap mekem. Bodi blong dikon ia we i bin fit long wan taem, nao i kasem kil, i brok, mo i sik, yet i givim hemwan blong safa mo pasem simbol blong Atonmen blong Sevya long yumi.

Blong stap lukluk tabu eksperiens ia i mekem mifala i tingting long sakramen long wan defren wei—abaot Sevya—mo tingting long ol dikon, mo ol tija, mo ol pris long wan defren wei bakegen.

Mi stap tingting yet long merikel ia we i bin pusum hem long moning ia blong ansa wetem paoa long kwaet, smol koling ia blong givim seves mo abaot paoa mo wanem we evri yut blong yumi oli save mekem blong ansa wan singaot we i kam long profet blong joenem ami blong God mo blong sevem man mo kam olsem wan god.

Evri taem wan dikon i holem trei blong sakramen, i rimaenem yumi long tabu stori blong Las Sapa, blong Getsemane, blong Kalvari, mo blong tumb long garen. Taem Sevya i talem long ol Aposol blong Hem: “Mekem samting ia blong tingbaot mi bakegen,”¹ Hem i stap toktok tu long wanwan long yumi stat long tetaem ia kasem naoia. Hem i stap tokbaot merikel ia se bae Hem i givim olsem ol fiuja dikon, tija, mo pris we bae oli presentem saen blong Hem mo invaetem ol pikinini blong Hem blong akseptem Atonmen blong Hem.

Evri simbol we i ripresentem odinens blong sakramen i poenem yumi go long presen ia. Yumi tingting long bred we Hem i bin brekem long wan taem—mo bred we ol pris naoia oli brekem long fored blong yumi. Yumi tingbaot mining blong wota we i tabu, bifo mo naoia, taem ol toktok blong ol prea ia blong sakramen i kamaot long maot blong ol pris i go insaed long ol hat blong yumi mo i go long heven, i mekem i kam niu ol kavenan we i konektem yumi wetem ol paoa blong Kraes blong sevem man. Long taem blong odinens blong sakramen, maet bae yumi tingting abaot wanem nao i minim taem wan dikon i karem tabu simbol ia i kam long yumi, stanap long ples we Jisas bae i stanap long hem sapos Hem i stap long ples ia, blong leftemap mo hilim ol harem nogud blong yumi.

Laki nomo se, ol yang man mo ol yang woman oli no nid blong kasem sik blong save fanemaot glad mo stamba tingting blong givim seves long Sevya.

Elda David A. Bednar i talem se blong stap groap mo kam olsem ol misinari we oli stap, tedei, yumi mas mekem wanem ol misinari oli stap mekem, mo afta, “tijing folem tijing mo rul folem rul, … [yumi ] save kam olsem ol misinari … we Sevya i wantem.”²

Sapos yumi wantem “blong kam olsem Jisas,”³ yumi mas mekem wanem Jisas i mekem, mo long wan sapraes sentens, Lod i eksplenem wanem Hem i mekem: Hem i talem: “From luk, hemia i wok mo glori blong mi—blong mekem man i nomo save ded mo i kasem laef we i no save finis.”⁴

Misin blong Sevya i oltaem blong mekem wok blong Papa blong Hem blong sevem ol pikinini blong Hem.

Mo wan tru wei blong faenem glad long wol ia i blong joenem Kraes blong helpem ol narawan.

Hemia i simpol trutok we i givim insperesen long program blong Ol Pikinini mo Ol Yut.

Evri aktiviti mo tijing blong Ol Pikinini mo Ol Yut oli abaot helpem ol yang pipol blong kam moa olsem Jisas taem oli wok fulwan wetem Hem long wok blong sevem man mo kam olsem god.

Ol Pikinini mo Ol Yut i wan tul blong helpem evri Praemeri pikinini mo yut blong groap blong kam olsem ol disaepol mo kasem wan fet we i fulap wetem visen blong wei blong wan hapi laef. Oli save luk fored from ol saen folem kavenan rod ia, we bae oli baptaes mo kasem konfemesen blong presen ia we i Tabu Spirit mo afta kam pat blong ol kworom mo Ol Yang Woman klas, we bae oli filim glad blong helpem ol narawan tru ol seves we oli mekem we i olsem blong Kraes. Bae oli setemap ol gol, bigwan mo smol, we bae i givim balens long laef blong olgeta mo helpem olgeta i kam moa olsem Sevya. Ol konfrens blong, Blong Mekem Ol Yut Oli Kam Strong mo ol magasin , Fren, mo Gospel Living (Laef Folem Gospel) ap bae i helpem olgeta faenem tru glad long Kraes. Bae oli tingting strong long ol blesing blong holem limit yus tempol rekomen, mo plante bae oli filim spirit blong Elaeja tru long paoa blong Tabu Spirit taem oli stap mekem tempol mo famli histri wok. Bae petriakel blesing bae i gaedem olgeta. Long taem bae i kam, bae oli luk olgeta oli stap go long tempol blong kasem endaomen wetem paoa, blong faenem glad, mo blong oli konektem olgeta wetem famli blong olgeta blong taem we i no save finis, nomata wanem i hapen.

Agensem ol strong win blong wol sik ia, mo ol nara disasta, blong tekem ful promes blong niufala program blong Ol Pikinini mo Ol Yut i kam, i wan wok we oli stap wok long hem yet—be yumi mas hariap. Ol yut blong yumi bae oli no save wet blong wol ia i stretem hemwan bifo olgeta oli kam blong save Sevya. Sam oli stap mekem ol desisen naoia we bae oli no save mekem sapos oli bin save tru tru aedentiti blong olgeta—mo save huia Hem.

Mekem se, impoten singaot ia we i kam from ol ami blong God blong go long strong trening ia i blong “!Evriwan oli mas wok!”

Ol mama mo papa, ol boe blong yufala oli nidim yufala blong sapotem olgeta naoia olsem we yufala i bin mekem ol wok ia long bifo. Ol mama mo ol papa, ol lida blong prishud mo ol lida blong Ol Yang Woman, sapos ol yut blong yufala oli stap traehad, program blong Ol Pikinini mo Ol Yut bae i helpem olgeta i go long Sevya, mo Sevya bae i karem pis i kam long olgeta.⁵

Ol presidensi blong kworom mo klas, kam antap mo tekem stret ples blong yufala insaed long wok blong Lod.

Ol bisop, yufala i konektem ol ki blong yufala wetem hemia blong ol kworom presiden, mo ol kworom blong yufala—mo ol wod blong yufala—bae oli jenis blong oltaem.

Long yufala we i blong jeneresen ia we i stap kam antap, mi testifae long yufala, from we mi mi save, se yufala i ol pikinini boe mo gel blong God we Hem i lavem yufala, mo Hem i gat wan wok blong yufala i mekem.

Taem yu stap kam antap blong kasem ful paoa blong koling blong yu, wetem evri hat, paoa, mo tingting, bae yu kam blong lavem God mo kipim ol kavenan blong yu, mo trastem Hem taem yu stap wok blong blesem ol narawan, mo statem hemia long hom blong yuwan fastaem.

Mi prea se bae yufala i traehad, wetem dabol paoa blong yufala we i blong taem ia, blong givim seves, praktisim fet, sakem sin, mo mekem gudfala wok evri dei, blong kwalifae blong kasem ol blesing blong tempol mo glad ia we i stap oltaem we i kam nomo tru long gospel blong Jisas Kraes. Mi prea se bae yufala i rere blong kam misinari we i wokhad oltaem wetem strong tingting, stap ol fetful hasban o waef, stap wan papa mo mama we i gat lav, we oli promesem yufala se, long en, bae yufala i kam wan tru disaepol blong Jisas Kraes.

Bae yufala i help blong mekem wol ia i rere blong taem we Sevya bae i kambak taem yufala i stap invaetem evriwan blong kam long Kraes mo kasem ol blesing blong Atonmen blong Hem. Long nem blong Jisas Kraes, amen.