I Gat Kaekae I Stap long Evri Ples

Bifo oli sarem ol boda from sik ia we i stap go raon, mi bin stap kambak hom, we mi go mekem wok nara ples, mo from sam problem blong taem, mi bin stap Sandei aot. Mi bin gat taem, bitwin ol defren plen, blong go long wan lokol sakramen miting, mo serem tu wan sot mesej. Afta long miting, wan smat dikon i kam luk mi mo i askem sapos mi mi save Presiden Nelson mo sapos mi mi gat wan janis blong sekhan long hem. Mi ansa, mi talem se mi save hem, se mi bin sekhan long hem finis, mo olsem wan memba blong Prisaeding Bisoprik, mi gat janis ia blong mit wetem Presiden Nelson mo ol kaonsela blong hem tu taem long wan wik.

Yangfala dikon i sidaon long wan jea, i sakem han blong hem long ea mo i singaot se: “!Hemia nambawan dei long laef blong mi!” Ol brata mo sista. Bae mi no sakem han blong mi long ea mo singaot, be mi mi glad blong taem we i no save finis from wan profet we i stap laef mo from daereksen we yumi kasem long ol profet, ol sia, mo ol reveleta, speseli long ol taem blong jalenj olsem.

Stat long stat blong taem, Lod i bin givim daereksen long ol pipol blong Hem blong helpem olgeta blong rere, long saed blong spirit mo laef long wol ia, blong fesem ol bigfala trabol mo tes we Hem i save se bae oli kam pat blong eksperiens long laef long wol ia. Ol bigfala trabol, oli olgeta blong yuwan mo blong evriwan, be toktok blong Lod bae i givim proteksen mo sapot i folem hamas yumi folem toktok ia, mo tekem aksen folem kaonsel blong Hem. Wan gudfala eksampol i stap long stori we i stap long Jenesis, we yumi lanem abaot Josef long Ijip mo taem we, wetem insperesen, i talem mining blong drim blong Fero.

“Nao Josef i talem long hem se, “King. … God i stap talemaot ol samting ya long yu we bambae hem i mekem. …

“Olbaot long kantri ya, … bambae ol garen oli karem fulap kakae, gogo seven yia i pas.

“Be biaen, bambae i gat hadtaem blong kasem kaekae, we bambae i stap seven yia bakegen. Mo long taem ya, ol man bambae oli no moa save tingbaot gudfala taem ya we i gat fulap kakae i stap, … from we hadtaem ya bambae i spolem kantri ya.”¹

Fero i bin lisin long Josef, i mekem folem wanem we God i bin soem long hem long wan drim, mo kwiktaem i go blong rere from wanem we i stap kam. Nao, ol skripja oli talem:

“Mo long ol seven yia ya, i gat nambawan taem blong garen, we ol garen wit oli stap karem fulap kakae.

“Nao oltaem, long evri taon we hem i pas long hem, hem i stap tekem ol wit, i stap putumgud olgeta insaed long ol taon ya. …

“Mo ol wit ya we hem i stap hivimap i kam plante we plante, gogo ol man blong hem oli no moa makem hamas i stap. Wit ya i plante we plante olsem sanbij long solwota.”²

Taem we ol seven yia ia blong plante oli pas, skripja i talem yumi se “nao hadtaem blong kasem kakae i kamtru, mo hadtaem ya i stap seven yia, stret olsem we Josef i bin talem bifo. Nao olbaot long ol narafala kantri, ol man oli stap trabol tumas blong kasem kakae, be long kantri ya, i gat kaekae i stap long evri ples.”³

Tedei, yumi gat blesing blong ol profet oli stap lidim yumi, mo oli andastanem nid blong yumi mas rere from ol bigfala trabol “we bae oli kam yet”⁴ long saed blong laef long wol ia, mo long saed blong spirit; mo tu, oli luksave ol limit mo ol samting we oli save blokem yumi taem yumi stap traehad blong folem kaonsel blong hem.

I gat wan klia andastaning se ol samting we KOVID 19 bae i mekem, mo tu ol nara disasta, oli no wantem save long taetol blong man, long ol haf kas, o sosol mo relijin long evri ples. Man i lusum wok mo mane i kam smol from i nomo gat janis blong wok, from oli sakemaot man long wok, mo man i nomo save wok from ol jalenj blong helt mo loa.

Yufala evriwan we i gat jalenj, mifala i talem se mifala i andastanem mo wari long situesen blong yufala, mo tu, mifala i talem tru se, i gat ol moa gud dei oli stap kam. Yufala i gat blesing blong gat ol bisop mo ol branj presiden we oli lukaot long yufala, mo stap helpem ol memba blong ol kongregesen blong yufala wetem ol nid blong laef ia, mo we oli save yusum samfala tul mo risos we oli save helpem yufala blong stanemap bak laef, mo putum yufala i gobak long rod blong dipen long yufalawan taem yufala i stap praktisim ol prinsipol blong stap rere.

Long kaen laef blong tedei, wetem wan wol sik we i spolem gud ful ekonomi, mo tu, laef blong wanwan man, bae i no stret blong wan Sevya we i gat lav mo sore blong no luk ril samting we i stap, se i gat plante oli gat hadtaem, mo askem olgeta blong kwiktaem stat blong sevem mane mo kaekae. Be, hemia i no minim se yumi mas sarem ae wantaem long ol prinsipol blong stap rere—be olgeta prinsipol ia, bae oli yusum “wetem waes mo wetem oda”⁵ blong yumi save talem long fiuja, olsem Josef long Ijip, “i gat kaekae i stap long evri ples.”⁶

Lod i no wantem yumi mekem moa bitim we yumi save mekem, be Hem i wantem luk tu se yumi mekem wanem we yumi save mekem, long taem we yumi save mekem. Presiden Nelson i mekem yumi tingbaot long las Jeneral Konfrens se “Lod i lavem ol hadwok blong yumi.”⁷

Pikja

Ol lesenbuk blong Faenens blong Miwan long ol lanwis

Ol lida blong Jos, plante taem, oli leftemap tingting blong ol Lata-dei Sent “blong rere from wanem i kam agens taem yumi putum i stap wan besik saplae blong kaekae mo wota, mo sam mane i stap long seving.”⁸ Long sem taem, oli leftemap tingting blong yumi blong yumi “mas waes” mo “no mekem samting i go tumas”⁹ taem yumi traehad blong stanemap wan hom storej mo wan seving blong mane. Wan risos we oli singaotem Mane blong Yuwan blong Dipen long Yuwan, we oli pablisim long 2017, mo i stap long websaet blong Jos long 36 lanwis, i stat wetem wan mesej we i kam long Fas Presidensi, we i talem:

“Lod i talem se: ‘Hem i stamba tingting blong mi blong mi lukluk long ol sent blong mi’” [Doktrin mo Ol Kavenan 104:15]. Revelesen ia i wan promes we i kam long Lod se bambae Hem i lukluk long ol blesing blong yumi long laef ia mo bae i openem doa blong wan indipenden laef. …

Blong akseptem mo stap laef folem olgeta prinsipol ia, bae i mekem yumi gat moa paoa blong kasem ol blesing blong wol ia we Lod i bin promesem long yumi. …

“Mifala i stap invaetem yufala blong wok strong wetem strong tingting blong stadi mo praktisim olgeta prinsipol ia, mo tijim olgeta long ol memba blong famli blong yufala. Mo taem yufala i stap mekem hemia, bae laef blong yufala i gat blesing … [from se] —yu yu wan pikinini blong Papa we i stap long Heven. Hem i lavem yu mo neva lego yu. Hem i save yu mo Hem i rere blong givim yu ol blesing blong save dipen long yuwan long laef long wol ia mo long saed blong spirit.¹⁰

Risos ia i tekem ol japta we oli lukluk nomo blong krietem mo laef folem wan bajet, protektem famli agensem had laef, lukaot gud long taem blong hadtaem blong mane, mo inves long fiuja, mo buk ia i blong evriwan tru long websaet blong Jos mo tru long ol lokol lida blong yu.

Taem yumi stap tingting long prinsipol blong stap rere, yumi save luk i gobak long Josef long Ijip blong kasem insperesen. Blong save wanem bae i hapen, bae i no inaf blong tekem olgeta i gotru long taem we i no gat samting sapos oli no bin mekem sam sakrifaes long ol taem we i gat plante. Oli no yusum evri samting we ol wokman blong Fero oli bin karem, oli putum sam limit long olgetawan, mo oli folem, oli putum inaf blong stret nid blong olgeta, mo tu, blong ol fiuja nid blong olgeta. I no bin inaf blong save nomo se bae ol taem blong jalenj bae oli kam. Oli mas tekem aksen, mo, from hadwok blong olgeta, “i bin gat plante kaekae i stap.”¹¹

Hemia i lidim yumi i go long wan impoten kwestin: “?Naoia, wanem?” Wan gud ples blong stat wetem i blong andastanem se evri samting, long Lod, oli long saed blong spirit, “mo i no gat eni taem” we Hem i bin givim long yumi “wan loa we i blong laef long wol ia nomo.”¹² Evri samting, nao, i poenem yumi i go long Jisas Kraes, we i fandesen ia we yumi mas bildimap yumi long hem, iven blong yumi rere long laef long wol ia.

Blong stap rere long laef long wol ia mo gat indipenden laef, i minim “blong stap bilivim se tru long gladhat, o paoa we i mekem yumi save mekem samting, we i kam long Jisas Kraes mo hadwok blong yumiwan, bae yumi save kasem evri samting we yumi nidim long saed blong spirit mo laef ia, we yumi nidim blong yumiwan mo famli blong yumi.”¹³

Ol defren pat moa blong wan fandesen long saed blong spirit blong yumi rere long laef long wol ia, i: blong mekem samting “wetem waes mo oda,”¹⁴ we i minim se sloslo yumi hivimap kaekae mo sevem mane ova long wan taem, mo nambatu, stap akseptem “ol smol mo simpol” rod we i kam,¹⁵ we i soemaot se yumi gat bilif ia se Lod bae i dabdabolem ol smol hadwok we yumi gogohed blong mekem oltaem.

Wetem wan fandesen long saed blong spirit we i stap, yumi save gat sakses blong praktisim tufala impoten pat blong stap rere long laef long wol ia—lukaotem mane mo hom storej blong yumi.

Ol ki prinsipol blong stap lukaotem gud mane blong yu, i blong pem taeting mo ofring; katemaot mo nomo mekem kaon; stap rere mo stap laef we yumi no ova long bajet; mo sevem mane blong fiuja.

Ol ki prinsipol blong hom storej, i blong hivimap kaekae i stap; putum wota i stap; mo tu, ol nara samting we i nid, folem ol nid blong wanwan man, woman mo famli, evri samting ia from se “bes stoahaos”¹⁶ hem i hom, we i kam “stoa we yumi save go long hem oltaem long taem blong nid.”¹⁷

Taem we yumi akseptem ol prinsipol long saed blong spirit, mo lukaotem insperesen we i kam long Lod, bae Spirit i soemaot long yumi blong save wanem nao Lod i wantem, blong yumi wanwan mo olsem wan famli, mo wanem i bes wei blong praktisim ol impoten prinsipol blong rere long laef long wol ia. Step we i moa impoten long olgeta evriwan, i blong stat.

Elda David A. Bednar i tijim gud prinsipol ia taem hem i talem: “Blong tekem aksen, hem i blong praktisim fet. … Tru bilif i lukluk nomo long, mo i stap nomo long Lod Jisas Kraes mo oltaem i lidim yumi blong tekem aksen.”¹⁸

Ol brata mo sista. Long wan wol we i stap jenis oltaem, yumi mas rere from ol taem we oli no klia tumas. Iven we bae i gat ol moa dei i stap kam, yumi save se ol hil mo ol vale blong laef long wol ia, bae oli gohed. Taem yumi lukaot blong rere long laef ia, yumi save fesem ol tes blong laef wetem bigfala moa tras long yumiwan, pis long hat blong yumi, mo, olsem Josef long Ijip, bae yumi save talem long taem we i fasfas: “i bin gat kaekae i stap long evri ples.”¹⁹ Long nem blong Jisas Kraes, amen.