Lod I Blesem Mi Bigwan
Ol taem blong hadtaem mo harem nogud oli no jenisim fasin we ae blong Lod i lukluk gud long yumi, i stap blesem yumi.
Wan dei, sam yia i pas, olsem ol yangfala misinari long wan smol branj long smol aelan blong Amami Osima, Japan, kompanion blong mi mo mi i bin glad bigwan blong harem se Presiden Spensa W. Kimbol bae i visitim Esia mo evri memba mo ol misinari long Japan, oli bin invaetem olgeta blong go long Tokio blong harem profet long wan eria konfrens. Wetem ol memba blong branj, kompanion blong mi mo mi, i glad tumas nao mitufala i bin stat blong mekem sam plan blong konfrens ia, we bae i tekem 12 aoa long sip blong krosem Is blong Si blong Jaena i go kasem mama graon Japan, afta 15 aoa long tren blong kasem Tokio. Be sore tumas, i no bin olsem. Mifala i bin kasem toktok long misin presiden, se, from ples i longwe mo taem, kompanion blong mi mo mi, bae mitufala i no save go long konfrens long Tokio.
Taem we ol memba blong smol branj blong mifala i aot i go long Tokio, mitufala i stap nomo. Ol dei ia oli kwaet mo oli emti. Mitufala i bin holem sakramen miting mitufalawan insaed long smol japel ia, taem we ol Lata-dei Sent mo ol misinari blong Japan oli bin go long konfrens.
Harem nogud blong mi i jes go bigwan taem we, wetem glad, mi bin lisin long ol memba blong branj oli kambak long konfrens sam dei afta mo talem se Presiden Kimbol i anaonsem se bae i gat wan tempol long Tokio. Oli bin toktok bigwan wetem bigfala glad taem oli bin serem se drim blong olgeta i kamtru. Oli bin tokbaot olsem wanem, taem oli harem anaonsmen blong tempol, se ol memba mo ol misinari oli no bin save holemtaet glad blong olgeta mo oli bin jiam mo klapem han blong olgeta.
Ol yia oli pas, be mi stil tingbaot harem nogud we mi bin filim from we mi no bin save tekpat long histri miting ia.
Long ol las manis, mi bin tingtingbak long eksperiens ia, taem mi stap luk ol narawan oli fesem bigfala harem nogud long tingting mo long hat—we i bigwan moa mo i dip moa long hemia blong mi taem mi bin stap olsem wan yang misinari—from wol sik ia KOVID-19.
Eli long yia ia, taem we wol sik ia i muv hariap, Fas Presidensi i bin mekem promes se “Jos mo ol memba blong hem bae oli fetful mo soem komitmen blong stap olsem ol gud sitisen mo ol gud neba”1 mo bambae oli “meksua se oli lukaot gud.”2 Olsem ia nao yumi luk se ol kam tugeta blong Jos raon long wol oli bin stop, moa long haf blong paoa blong misinari oli gobak long homples blong olgeta, mo ol tempol oli bin klos raon long Jos. Taosen long yufala i bin stap rere blong go long tempol blong kasem ol odinens blong yufalawan—wetem ol siling blong tempol. Sam narawan moa oli bin finisim seves olsem ol misinari eli, o oli bin rilis blong sot taem mo oli sendem yufala long nara ples.
Long tetaem ia, gavman mo ol edukesen lida oli bin klosem ol skul—we i mekem se i gat ol jenis long graduesen mo oli fosem blong kanselem ol spot, ol sosol, ol kalja taem, mo ol nara aktiviti we skul i oganaesem. Plante long yufala i bin rere from sam samting we i nomo hapen, ol konset we oli no harem, mo ol atletik kompetisen we oli no hapen.
Iven moa strong, oli ol tingting blong ol famli we oli lusum ol memba blong famli long tetaem ia; plante we oli no save mekem fenerol o gat ol smol kam tugeta olsem we oli bin hop from.
Long sot toktok, plante, plante long yufala i bin fesem bigfala harem nogud long tingting, krae sore, mo slak tingting. ?So hao nao yumi stap kam oraet, mo muv fored taem oli samting oli brokbrok olbaot?
Profet Nifae i stat blong raet long ol smol buk taem we hem i wan bigfala man finis. Taem we hem i stap luk i gobak long laef mo seves blong hem, hem i bin givim wan bigfala tingting, long ol fas ves blong Buk blong Momon. Ves ia i tekem wan impoten prinsipol blong yumi mas tingting gud long hem tedei. Afta long ol toktok ia we yumi save gud: “Mi, Nifae, from we mi bin bon long wan gudfala mama mo papa,” hem i raetem, “long laef blong mi, mi bin luk plante hadtaem, be, Lod i blesem mi bigwan oltaem long ol dei blong mi.”3
Olsem ol studen blong Buk blong Momon, yumi save gud wetem ol hadtaem we Nifae i stap tokbaot. Be yet, afta we hem i talemaot abaot ol hadtaem blong hem long ol taem blong hem, Nifae i givim gospel lukluk blong hem, se Lod i bin blesem hem bigwan oltaem long evriwan long ol dei blong hem. Ol taem blong hadtaem mo harem nogud oli no jenisim fasin we ae blong Lod i lukluk gud long yumi, i stap blesem yumi.
I no longtaem i pas, Lesa mo mi i mit onlaen wetem samples 600 misinari long Ostrelia, we plante long olgeta, oli mas folem ol rul blong sarem olgetawan o no wokbaot tumas, from wol sik ia KOVID 19, mo plante oli stap long haos mo wok. Tugeta, mifala i lukluk long wanwan man o woman insaed long Niu Testeman, long Buk blong Momon, mo Doktrin mo Ol Kavenan, we Lod i bin blesem blong mekem ol bigfala gud samting long taem blong samting i kam agensem olgeta. Evriwan ia, oli bin luksave olgeta tru long wanem we oli bin save mekem wetem help blong Lod, i bitim we wanem we oli no bin save mekem from se oli no bin save muv mo mas stap wan ples.
Yumi rid abaot Pol mo Saelas, we tufala i prisena long ol wud bokis, we tufala i stap singsing, stap tijim, mo testifae—mo iven baptaesem man we i putum tufala long kalabus.4
Mo bakegen, Pol, long Rom, we i prisena blong tu yia, mo long tetaem ia i gohed blong “talemgud long olgeta we God i King, mo … hem i stap talem ol tok blong Loa,”5 i “ pulum olgeta oli kam man blong Jisas.”6
Yumi rid abaot Nifae mo Lihae, ol boe blong Hileman, we afta we oli bin abiusum mo putum olgeta long kalabus, wan faea i raonem olgeta blong protektem olgeta long semtaem we “wan kwaet voes we i sofsof stret, … i go tru i go kasem sol [blong olgeta we oli holem olgeta.]”7
Abaot Alma mo Amulek long Amonaeha, we oli faenem se plante “oli bin biliv … mo oli stat blong sakem sin, mo blong stadi gud long ol skripja,”8 iven sapos, afta, man i bin jikim tufala mo tufala i no gat kaekae, wota, o klos mo oli sarem mo putum tufala long kalabus.9
Mo laswan, Josef Smit, we i stap wari we i wari insaed long Libeti Kalabus, i filim se oli fogetem hem mo oli lego hem fogud, nao i harem ol toktok ia blong Lod: “ol samting ia … bae oli blong gud blong [hem]”10 mo “God bae i stap wetem [hem] blong oltaem mo oltaem.”11
Wanwan long olgeta ia, oli bin save wanem we Nifae i bin save: se i nomata oli bin luk plante hadtaem long laef blong olgeta, yet, Lod i bin blesem olgeta bigwan.
Yumi tu, yumi luk ol samting we oli semsemmak long wanwan long yumi mo olsem wan jos, long wei ia we Lod i bin blesem yumi bigwan oltaem long ol taem blong jalenj we yumi bin fesem long ol manis we oli pas. Taem mi stap talem ol eksampol ia, letem oli mekem testemoni blong yumi i kam strong moa, se i tru se profet we i stap laef i wan sia, se hem i mekem yumi rere wetem ol stret jenis bifo i gat eni noes blong wan wol sik, mo i mekem se yumi gat paoa blong gotru long ol jalenj ia we oli kam.
Nambawan: blong kam wan hom we i wan senta mo Jos i sapotem.
Tu yia i pas, Presiden Russel M. Nelson i talem: “Olsem Ol Lata‑dei Sent, yumi kam blong stap ting se, ‘jos,’ i wan samting we i hapen insaed long mitinghaos blong yumi, wetem sapot blong wanem i stap hapen insaed long hom. Yumi nidim blong stretem kaen fasin ia. … Wan Jos we senta blong hem i stap long hom, mo sapot i kam long wanem i stap tekem ples insaed long ol … bilding blong yumi.”12 !Hemia i wan jenis we i kam tru long profet! Stap lanem gospel long hom olsem senta, yumi bin praktisim hemia taem we oli bin sarem ol mitinghaos blong sot taem. Iven we taem wol ia i stat blong kam oraet bakegen mo yumi gobak long ol japel, bae yumi wantem blong holemtaet paten ia blong stadi long gospel mo lanem samting long hom we i senta, olsem yumi bin mekem long taem blong wol sik ia.
Nambatu eksampol blong Lod i blesem yumi bigwan, hem i blong givhan long wan wei we i moa hae mo i moa tabu.
Long 2018, Presiden Nelson i bin statem wok blong givhan blong stretem wei we “yumi stap kea long wanwan long yumi.”13 Wol sik ia i bin karem plante janis i kam blong kam antap long givhan skil blong yumi. Ol givhan brata mo sista, ol yang woman mo ol yang man, mo ol narawan oli bin go aot blong kasem man, storian, blong lukaot long ol yad, kukum kaekae, sendem mesej tru long teknoloji, mo givim sakramen odinens blong blesem olgeta long nid. Jos tu i bin givhan long ol narawan long taem blong wol sik ia wetem wan bigfala help blong ol samting i go long bank blong kaekae, ol selta blong olgeta we oli no gat haos, ol senta we oli sapotem ol man defren ples, mo wetem ol projek long ol ples blong wol we oli gat ol bigfala problem blong hanggri. Ol sista long Rilif Sosaeti mo famli blong olgeta oli bin helpem ol jalenj taem oli mekem ol milian mask blong olgeta wokman blong helt.
Las eksampol blong Lod i blesem yumi bigwan long medel blong hadtaem, hem i blong faenem wan hae glad blong gobak long ol odinens blong tempol.
Stori ia bae i tokbaot gud hemia. Taem we Sista Kaitlyn Palmer i bin kasem misin koling blong hem long las Epril, hem i bin glad tumas blong oli singaotem hem olsem wan misinari, be hem i filim se i impoten tu mo i spesel blong go long tempol mo kasem endaomen blong hem, mo mekem ol tabu kavenan. I no longtaem afta we hem i bin putum apoenmen blong endaomen blong hem, oli anaonsem se evri tempol bae oli klos blong sot taem from wol sik ia. Afta we hem i kasem infomesen ia we i brekem hat blong hem, nao hem i lanem se bae hem i go long misinari trening senta (MTS) onlaen long haos blong hem. I nomata ol harem nogud ia, Kaitlyn i bin lukluk nomo blong stap kipim spirit blong hem i laef.
Long ol manis afta, Sista Palmer i neva lusum hop blong stap go long tempol. Famli blong hem i bin livim kakae mo i bin prea se ol tempol bae oli open bifo hem i aot. Kaitlyn bae i statem ol hom MTS moning blong hem, i talem: “?Bae tedei nao bae mi kasem wan merikel mo ol tempol oli open bakegen?”
Long namba 10 Ogis, Fas Presidensi i bin anaonsem se tempol long ples blong Kaitlyn bae i open bakegen blong ol odinens blong man we i laef nomo, long stret dei we oli bin bukum eli moning plen blong hem i go long misin. Bae hem i no save go long tempol mo semtaem tekem plen. Hem i gat smol hop blong gat sakses, nao famli i kontaktem Presiden Maekel Velinga blong luk sapos i gat wan wei we merikel we oli bin stap prea from bae i save kamtru. !Prea mo wok blong livim kakae i karem ansa i kam!
Long 2 klok moning, sam aoa bifo plen bae i go, Sista Palmer mo famli blong hem, wetem wota long ae, oli bin kasem doa blong tempol, mo tempol presiden we i smael i stap, i welkamem olgeta wetem ol toktok ia: “Gud moning Palmer famli. !Welkam long tempol!” Taem hem i bin stap finis blong gotru long endaomen blong hem, oli bin talem long olgeta blong muv kwik from nekis famli i stap wet long doa. Oli bin draev i go stret long eapot, stat long taem blong kasem plen i go long misin.
Ol tempol odinens we yumi no bin gat long samfala manis, oli swit moa bitim we yumi tingting long hem taem ol tempol raon long wol oli stap open bakegen sloslo folem ol step.
Taem mi endem toktok blong mi, plis lisin long ol toktok we oli leftemap tingting, oli fulap long paoa we oli kam long Profet Josef Smit. Bae i no gat wan i ting se hem i bin raetem ol toktok ia taem hem i bin fesem hadtaem mo i stap hemwan, i stap long wan smol ples we hem i no save muv insaed long wan hom long Nauvu, we i stap haed long olgeta we oli stap wantem arestem hem, we i no folem loa:
“Nao, ?wanem nao yumi stap harem long gospel ia we yumi bin kasem? !Wan voes blong stap glad! Wan voes blong sore we i kam long heven; mo wan voes blong trutok we i kamaot long graon; ol gudfala nius blong olgeta we oli ded; wan voes blong stap glad blong olgeta we oli laef mo olgeta we oli ded; ol gudfala nius blong bigfala glad. …
?Bae yumi no gohed long wan bigfala wok olsem? Go fored be i no arier. !Gat strong paoa long tingting … mo gohed, go fored kasem viktri! Hat blong yumi i mas stap glad, mo stap glad tumas. Wol i mas stat blong singsing.”14
Ol brata mo sista. Mi biliv se, wan dei, wanwan long yufala bae i lukluk i gobak long ol samting we oli kanselem, harem nogud long hem, mo filing blong stap yuwan we i pat blong ol taem blong jalenj ia we yumi stap gotru long ol, mo luk se ol blesing mo moa bigfala fet mo testemoni i kavremap evri samting ia. Mi biliv se long laef ia, mo long laef we i stap kam, ol hadtaem blong yu, Amonaeha blong yu, Libeti Kalabus blong yu, bae yu konsekretem ol hadtaem blong yu blong oli kam wan blesing blong yu.15 Mi prea se, wetem Nifae, yumi save luksave ol hadtaem ia long rod blong taem blong yumi, mo long semtaem, yumi luksave se Lod i blesem yumi bigwan.
Mi endem toktok blong mi wetem testemoni blong mi abaot Jisas Kraes, we Hemwan i save gud long ol hadtaem, mo olsem pat blong Atonmen blong Hem we i bigwan tumas, i bin kamdaon bitim evri samting.16 Hem i andastanem krae sore blong yumi, sobodi mo fasfas tingting blong yumi. Hem i Sevya blong yumi, Ridima blong yumi, hop blong yumi, harem gud blong yumi, mo Man we bae i Mekem Yumi Kam Fri. Long hemia, mi testifae long tabu nem blong Hem, Jisas Kraes, amen.