Naesfala Presen Ia we Pikinini blong God I Givim

Taem mi stap ridim Buk blong Momon blong wan lesen blong Kam, Folem Mi las sama, mi sapraes long ripot blong Alma taem hem i kam blong luksave ol sin blong hem mo talem se “i no gat eni samting we i dip tumas mo konkon tumas olsem ol soa blong bodi blong [hem].”¹ Mi talemaot long yufala se soa ia blong bodi we i dip tumas i bin hapen long mi taem mi stap harem nogud long wik blong lesen ia wetem wan seven milimita ston long kidni blong mi. Neva wan man i gotru “ol bigfala samting” olsem taem we “ol smol mo simpol” samting oli kam blong hapen.²

Lanwis blong Alma i bin pulum ae blong mi from toktok ia tumas we yumi yusum oltaem blong talem se samting i naes tumas o i naes tumas bitim evri samting. Eksampol, Josef Smit i raetem se enjel Moronae i bin werem wan longfala klos we “waet kala blong hem i naes tumas.” Waet kala ia, hem i talem se “i bitim evri samting we i waet long wol ia”³ Toktok ia i gud tumas i save yus tu long samting we i nogud tumas. Taswe Alma mo ol top diksonari oli konektem soa tumas bigfala safaring,” “filim nogud tumas,” mo “sol i filim nogud” kasem mak we i bigwan olgeta.⁴

Alma i givim yumi wan pikja blong luklukbak mo tingting se i mas gat long wan poen blong taem, wan i mas filim bigfala harem nogud blong evri sin we yumi mekem. Jastis i askem, mo God i no save jenisim.⁵ Taem Alma i tingbaot “evri” sin blong hem—speseli hemia we hem i bin spolem fet blong ol narafala man—harem nogud blong hem i bigwan tumas, mo tingting ia blong stanap long fored blong God i fulumap hem wetem wan “bigfala fraet.” Hem i wantem tumas blong “ded long saed blong sol mo bodi.”⁶

Evri samting i stat blong jenis long taem we Alma i talem se hem i, “tingbaot we Jisas Kraes bae kam … blong pem praes blong ol sin blong wol,” mo hem i krae insaed long hat blong [hem]: “O Jisas, yu yu Pikinini blong God, gat sore long mi.” Wetem wan tingting ia mo wan prea ia, sol blong Alma i bin “fulap” wetem glad we i bitim evri glad.”⁷

Ol fren blong mi, stamba tingting blong tru fasin blong sakem sin hem i blong tekem fasin nogud mo tanem i kam wan bigfala glad. Tangkyu long “gudfala fasin blong Hem,”⁸ long semtaem yumi kam long Kraes—stap soem fet long Hem mo wan tru jenis blong hat—ol hevi blong sin blong yumi i stat blong legobak blong yumi i go long Hem. Hemia i posibol nomo from se Hem we i no gat sin i bin safa “long harem nogud we i nogat en mo man i no save tokbaot”⁹ blong evri sin blong ful wol ia we i ol kriesen blong Hem—wan harem nogud we i bigwan tumas, blad i kamaot long evri hol blong skin blong Hem. Long eksperiens blong mi, Sevya i wonem yumi long skripja se yumi no save nating se “harem nogud” blong yumi bae i bigwan olsem wanem sapos yumi no sakem sin. Be afta, wetem bigfala gladhat, Hem i talem se: “Mi God, mi bin safa evri samting ia blong evriwan, blong oli no save safa sapos oli sakem sin”¹⁰—wan fasin blong sakem sin we i letem yumi “testem” “bigfala glad” we Alma i testem.¹¹ From tru doktrin ia, “mi sapraes tumas.”¹² Be tu, wetem bigfala sapraes, Kraes i givim moa.

Samtaem ol dip harem nogud oli no kam from sin be from ol ones mistek, ol aksen blong ol narafala man, o fos we i ova long kontrol blong yumi. Taem hemia i hapen, yumi bae filim olsem man we i raetem buk blong Ol Sam, taem hem i krae i talem:

“’Mi mi fraet we mi fraet mo tingting blong mi i foldaon olgeta from we mi fraet long ded.

“Mi fraet tumas mo mi seksek from mi harem nogud we i nogud.

“… Mi wantem tumas se mi gat wing olsem sotleg nao bambae mi save flae blong go faenem ples blong spel.”¹³

Long ol taem olsem, ol samting long saed blong meresin, ol help long saed blong givim kaonsel, o ol samting long saed blong loa i save help blong mekem harem nogud i go daon. Tekem not, evri presen we i gud—wetem olgeta ia—oli kam long Sevya.¹⁴ Nomata long ol samting we i mekem yumi harem nogud tumas mo hat i brok, nambawan ples blong kasem hiling hem i semmak nomo: Jisas Kraes. Hem nomo i holem ful paoa mo meresin blong save stretem evri mistek, mekem raet evri rong, stretem gud evri samting we i no stret gud, fiksim evri soa, mo sendem evri blesing we yumi wet longtaem from. Olsem ol witnes blong bifo, mi testifae se “yumi no gat wan hae pris ia we i no save filim ol samting we yumi stap harem nogud from”¹⁵ be yumi gat wan Ridima we i gat lav we i lego jea blong Hem antap mo i kam daon mo go aot “Hem i harem nogud long ol soa blong bodi mo fulap hadtaem mo temtesen blong evri kaen; … mekem se Hem i save … olsem wanem blong helpem ol man blong Hem.”¹⁶

Long eniwan tedei wetem harem nogud we i bigwan tumas o i spesel tumas we yu filim se i nogat wan man i save luk save olgeta, yu talem tru nomo. Ating bae i no gat wan memba blong famli, fren, o prishud lida—nomata hem i luklukgud long yu mo respektem yu—hem i save gud wanem filing yu stap gat o hem i gat stret toktok blong helpem yu blong kasem hiling. Yu mas save hemia se: i gat wan man we i save gud wanem yu stap go tru long hem, Hem i ”moa strong bitim ful wol.”¹⁷ mo Hem i save mekem ol bigbigfala wok we i bitim mak olgeta, long wanem yu stap askem mo yu stap tingbaot.”¹⁸ Hem bae i hilim yu long wei blong Hem mo long taem blong Hem, be Kraes i rere oltaem blong hilim yu fulwan.

Taem yu letem Hem blong hilim yu, yu bae yu luk se ol krae blong hevi trabol blong yu i no bin go nating. Baebol i tokbaot stori blong plante hae man wetem ol bigfala harem nogud blong olgeta, Aposol Pol i bin talem “God … Hem i mekem wan plan finis, se bambae hem i mekem i gud moa long yumi folem ol safaring blong yumi, from we taem i nogat ol safaring bae yumi no save kam stret evriwan.””¹⁹ Yu luk, fasin blong God mo stamba tingting blong yumi blong stap long wol ia i blong yumi gat glad,²⁰ be yumi no save kam stret evriwan wetem tabu glad ia sapos yumi no go tru long ol eksperiens we oli traem yumi, samtaem oli had tumas long yumi. Pol i wokem ripitim, Sevya Hemwan “i harem nogud long bodi blong Hem blong mekem Hem i kam prapa man blong sevem man.”²¹ From hemia, yumi mas lukaot long smol voes blong Setan we i talem se sapos yumi kam wan gudfala man, bae yumi no fesem ol hadtaem long laef.

Yu mas go agensem giaman ia se ol safaring blong yu i minim se yu stanap aotsaed long grup ia blong olgeta we God i jusum, we oli stap muv i go long wan hapi ples. Be yu luk yuwan olsem Jon, man blong kasem revelesen we hem i bin luk naesfala revelesen i blong ol Lata dei. Jon i bin luk “bigfala hip blong ol man, we olgeta i plante we plante, i nogat man i save kaontem olgeta. Ol man ia oli kamaot long olgeta kala, mo long olgeta kantri, mo long olgeta laen mo long olgeta lanwis. Olgeta oli werem waet klos, … [oli] singaot bigwan oli talem se, God ia nao i wokem rod blong sevem yumi.”²²

Taem oli askem se: “E!, ?Ol man ya we oli werem waet klos, yu save olgeta? Yu save weples olgeta oli kamaot long hem?” Jon i kasem ansa: “Hemia ol man ya we oli kasem bigfala trabol, mo oli wasem ol klos blong olgeta finis long blad blong Smol Sipsip ya we i ded, blong mekem ol klos ya oli waet.”²³

Ol brata mo sista. Safaring blong kasem fasin blong stap stret mo gud i mekem yumi inaf blong God i jusum yumi be i no seperetem yumi long olgeta we Hem i jusum. Mo Hem i mekem promes blong olgeta i kam promes blong yu. Folem toktok blong Jon, yu “bambae yu nomo hanggri bakegen, yu nomo tosta bakegen; bambae san i nomo bonem [yu] bakegen. “From we Smol Sipsip ya we i stap long medel long bigfala jea blong God, hem bambae i [fidim olgeta] … Hem bambae i lidim olgeta oli go dring long ol springwota ya we i save givim laef. Mo God bambae i ravemaot wota blong ae blong olgeta.”²⁴

“And there shall be no more death, neither sorrow, nor crying, neither shall there be any more pain.”²⁵

Mi witnes long yu se tru long klin fasin blong Jisas Kraes mo Atonmen blong Hem we i no save finis, yumi no save ronwe long bigfala harem nogud blong yumi from ol sin blong yumi mo winim ol bigfala harem nogud we i kam long yumi tru long ol mistek blong yumi. Anda long daereksen blong Hem, tabu samting we i givim glad we i bigwan bitim evri glad—wan glad we i bigwan tumas mo spesel blong yu, we wol ia i no save givim wan kaen glad olsem.”²⁶ Blong yu testem glad ia naoia mo fulap long hem blong taem we i no save finis, Mi invaetem yu blong mekem wanem Alma i bin mekem: letem yu holem taet naesfala presen ia we i Pikinini blong God olsem we gospel blong Hem i bin soem, tru long Jos blong Hem. Long nem blong Jisas Kraes, amen.