Ol Sista long Saeon

Ol sista we mi lavem tumas. Mi gat blesing blong toktok long gudfala taem ia long histri blong wol. Evri dei, yumi stap kam kolosap moa long dei blong glori taem bae Sevya, Jisas Kraes, i kambak long wol ia. Yumi save smol abaot ol nogud taem we bae oli kam bifo Hem i kam, be yet, hat blong yumi i solap wetem glad mo tras ia tu blong save ol promes blong glori we bae oli kamtru bifo Hem i kambak.

Olsem ol gel blong Papa long Heven we Hem i lavem yufala tumas, mo olsem ol gel blong Lod Jisas Kraes insaed long kingdom blong Hem,¹ bae yufala i plei wan stamba pat long ol bigfala taem we oli stap kam. Yumi save se Sevya bae i kam long wan pipol we oli kam tugeta mo oli rere blong laef olsem ol pipol oli bin laef long siti blong Inok. Ol pipol long tetaem ia oli bin wan long fet blong olgeta long Jisas Kraes, mo oli bin kam klin evriwan mekem se Lod i tekem olgeta i go long heven.

Hemia i wanem Lod i bin talemaot tru long revelesen se wanem bae i hapen long ol pipol blong Inok, mo wanem bae i hapen long las dispensesen ia we evri wok blong God oli kamtru.

“Mo dei bae i kam we bae wol i spel, be bifo dei ia, ol heven bae oli kam tudak, mo wan vel blong tudak bae i kavremap wol; mo ol heven bae oli seksek, mo wol tu; mo bigfala hadtaem bae i kam long medel blong ol pikinini blong ol man, be bae mi mekem ol pipol blong mi oli stap sef;

“Mo stret mo gud fasin, bae mi sendem i kamdaon aot long heven; mo bae mi sendem trutok i go long wol blong testifae abaot Wan Stret Pikinini Ia Nomo blong mi; taem we hem i bin laef bakegen long ded; yes, mo tu, taem we evri man bae i laef bakegen long ded; mo bae mi mekem stret mo gud fasin mo trutok bae i swipim wol olsem wan bigfala wota, blong karem i kam wanples, olgeta we mi jusum aot long ol fo pat blong wol ia, i go long wan ples we bae mi mekem rere, wan Tabu Bigtaon, blong mekem se ol pipol blong mi oli save rere, mo oli stap wet from taem ia we bae mi kam from tabenakol blong mi bae i stap ia, mo bae mi singaotem Saeon, wan Niu Jerusalem.

“Mo Lod i bin talem long Inok: ‘Nao long tetaem ia bae yu mitim olgeta, yu mo ful bigtaon blong yu, mo bae yumi tekem olgeta oli kam kolosap gud long yumi, mo bae oli luk yumi; mo bae yumi putum han blong yumi raon long nek blong olgeta, mo bae oli putum han blong olgeta raon long nek blong yumi, mo bae yumi kisim yumi;

“Mo hemia i ples we bae mi stap long hem, mo bae hem i Saeon, we bae i defren long evri kriesen we mi bin mekem; mo blong wan taem blong wan taosen yia, bae wol i spel.”²

Ol sista blong yufala, ol gel blong yufala, ol apugel blong yufala, mo ol woman we yufala i bin tijim, bae oli stap long stamba blong krietem sosaeti ia blong ol pipol we bae oli joenem Sevya long glori. Bae yufala i wan stamba paoa blong mekem Isrel i kam tugeta, mo blong krietem wan Saeon pipol we bae oli stap long pis long Niu Jerusalem ia.

Lod, tru long ol profet blong Hem, i bin mekem wan promes long yu. Long ol eli dei blong Rilif Sosaeti, Profet Josef Smit i talem long ol sista: “Sapos yufala i laef folem ol janis blong yufala, bae ol enjel bae oli kam ol fren blong yufala.”³

Bigfala paoa ia we yufala i save kasem i slip insaed long yufala, mo oli stap mekem yufala i rere from hemia.

Presiden Gordon B. Hinckley i bin talem:

“Yufala, ol sista. Yufala i no stap long nambatu ples long plan ia blong Papa, long saed blong hapines we i no save finis mo gudlaef blong ol pikinini blong Hem. Yu yu wan pat we i stamba long plan ia.

“Sapos i no gat yufala, plan ia bae i no save wok. Sapos i no gat yufala, bae ful program ia bae i no save kamtru. …

“Wanwan long yufala i wan gel blong God, we Hem i kavremap yufala wetem wan tabu raet we yufala i bon wetem.”⁴

Profet blong yumi blong tedei, Presiden Russell M. Nelson, i bin tokbaot olsem long saed blong pat ia we yufala i plei blong rere from seken kaming blong Sevya:

“Bae i no posibol blong skelem paoa we … ol woman oli gat, i no long famli nomo, be tu, long Jos blong Lod, olsem ol waef, ol mama, mo ol bubuwoman; olsem ol sista mo ol anti; olsem ol tija mo ol lida; mo speseli olsem ol eksampol mo strong difenda blong fet.

“Hemia i bin tru long evri dispensesen blong gospel stat long taem blong Adam mo Iv. Yet, ol woman blong dispensesen ia oli defren evriwan long ol woman blong eni nara dispensesen from se dispensesen ia i defren long eni narawan. Wanem i defren ia, i tekem ol spesel janis mo ol responsabiliti.”⁵

Dispensesen ia i defren long wei we Lod bae i lidim yumi blong rere blong stap olsem Siti blong Inok. Hem i bin tokbaot, tru long ol aposol mo ol profet blong Hem, se jenis ia i go long wan Saeon pipol, bae i minim wanem.

Elda Bruce R. McConkie i tijim:

“Taem blong Inok, i wan taem blong fasin nogud mo ivel, wan taem blong tudak mo agens, wan taem blong wo mo ples i rabis, wan taem we i go kasem we Lod i klinim wol ia wetem wota.

“Be, Inok i bin fetful. Hem i bin ‘luk Lod,’ mo i bin toktok wetem Hem, we i fesem hem, semmak olsem wan man i toktok wetem wan narafala man.(Moses 7:4.) Lod i bin sendem hem blong talemaot fasin blong sakem sin long wol, mo i bin givim wok long hem blong ‘mekem baptaes long nem blong Papa, mo long nem blong Pikinini, we i fulap long gladhat mo trutok, mo long nem blong Tabu Spirit, we i stap testifae long saed blong Papa mo Pikinini.’ (Moses 7:11.) Inok i bin mekem ol kavenan mo i bin putum tugeta wan kongregesen blong ol tru man we oli biliv, evriwan we oli bin kam fetful evriwan nao, Lod i bin kam mo i stastap wetem ol pipol blong hem, mo oli bin stastap long stret mo gud fasin, mo heven i bin blesem olgeta. ‘Mo Lod i bin singaotem pipol blong hem, Saeon, from se oli bin gat wan hat mo wan maen, mo oli bin stap laef long stret mo gud fasin; mo i no bin gat puaman long medel blong olgeta.’ (Moses 7:18)

“Afta we Lod i bin singaotem ol pipol ia blong hem, Saeon, ol skripja oli talem se Inok i bildim wan siti we oli singaotem Siti blong Tabu Fasin, we i Saeon; Saeon ia i bin go long heven, long ples we ‘God i tekem hem i go kolosap gud long hem; mo stat long tetaem ia i go, toktok ia i stat: Saeon i ronwe.’ (Moses 7:19, 21, 69)

“Semfala Saeon ia we Lod i tekem i go long heven bae i kambak … taem we Lod i tekem Saeon bakegen, wetem olgeta we oli stap laef long hem blong oli joen wetem niu Jerusalem, we afta, bae oli stanemap.”⁶

Sapos bifo bae i hapen yet, long taem blong kaming blong Sevya, ol gel we oli komitim olgeta bigwan long ol kavenan blong olgeta wetem God, bae oli moa long haf ia we oli rere blong welkamem Hem taem bae Hem i kam. Be i nomata wanem namba, kontribusen blong yufala blong krietem yuniti long medel blong ol pipol we oli rere from Saeon ia, bae i bigwan moa i bitim haf.

Bae mi talem from wanem mi biliv se bae i olsem. Buk blong Momon i givim wan stori abaot wan Saeon pipol. Yufala i tingbaot se i bin afta we Sevya we i laef bakegen long ded i bin tijim, lavem, mo blesem olgeta: “I no gat raorao long graon, from lav ia blong God we i bin stastap insaed long hat blong ol pipol.”⁷

Eksperiens blong mi i bin tijim mi se ol gel blong Papa long Heven oli gat wan presen blong sakemaot raorao mo promotem stret mo gud fasin wetem lav we oli gat long God mo wetem lav blong God we oli putum insaed long olgeta we oli wok blong olgeta.

Mi bin luk hemia long yangfala taem blong mi, taem we smol branj blong mifala i bin mit long hom blong mifala taem mi smol. Brata blong mi mo mi, mitufala nomo i holem Aronik Prishud, papa blong mi nomo i holem Melkesedek Prishud. Presiden blong Rilif Sosaeti long branj, i bin wan konvet we hasban blong hem i no hapi blong hem i mekem wok blong Jos. Ol memba oli ol olfala sista we oli no gat wan we i holem prishud insaed long hom blong olgeta. Mi bin stap luk mama blong mi, mo olgeta sista we hem i lavem, leftemap, mo kea long olgeta. Mi luksave naoia se mi bin stap luk wan smol pis blong Saeon.

Ol lesen we mi kasem long saed blong paoa blong ol fetful woman oli gohed long wan smol branj blong Jos long Albukek, Niu Meksiko. Mi wajem waef blong branj presiden, waef blong distrik presiden mo presiden blong Rilif Sosaeti blong oli mekem gud gat blong evriwan we i niu, mo evri konvet we i bin kam. Long Sandei ia we mi aot long Albukek, afta tu yia we mi stap wajem paoa blong ol sista long ol narawan long ples ia, oli krietem fasfala stek. Naoia, Lod i putum wan tempol finis long ples ia.

Mi muv i go long Boston, ples we mi givim seves long distrik presidensi we i bin prisaed ova ol smol branj raon long tu stet. I bin gat ol raorao, we, moa long wan taem, ol woman we oli gat lav mo save fogiv, oli bin stretem mo oli bin help blong mekem hat i sofsof. Long Sandei ia we mi aot long Boston, wan memba blong Fas Presidensi i bin oganaesem fasfala stek long Masajusets. I gat wan tempol long ples ia nao, we i kolosap long ples ia we distrik presiden i bin stap laef long hem long wan taem. Oli tekem hem i kambak long Jos, mo afta, oli singaotem hem i kam stek presiden, mo afta, wan misin presiden, from waef blong hem we i fetful mo i gat lav.

Ol sista. Yufala i bin kasem blesing blong stap olsem ol gel blong God wetem ol spesel presen. Yufala i tekem wetem yufala i kam long laef ia, wan paoa long saed blong spirit blong save fidim ol narawan, mo blong leftemap olgeta i go hae moa i go from lav mo fasin ia we i klin gud we bae i mekem oli kwalifae blong stap tugeta long wan Saeon sosaeti. I no wan aksiden we Rilif Sosaeti, fasfala Jos oganaesesen we i blong ol gel blong Papa long Heven nomo, i tekem moto ia : “Bigfala Lav I Neva Sot.”

“Bigfala lav, i klin lav blong Kraes.” Mo hem i fet long Hem mo ol ful paoa blong Atonmen blong Hem we i no gat en we bae i mekem yu kwalifae, mo i mekem olgeta we yu lavem mo wok blong olgeta oli kwalifae from hae mo tabu presen ia blong stap laef long wan sosol laef insaed long wan promes Saeon we yumi lukaotem longtaem finis i kam. Long ples ia, bae yufala i ol sista long Saeon, we Lod Hemwan i lavem yufala mo olgeta we yufala i bin blesem.

Mi testifae se yufala i ol sitisen blong kingdom blong Lod long wol ia. Yufala i ol gel blong wan Papa long Heven we i gat lav, we i sendem yu long wol ia wetem ol presen we i blong yufala nomo, we yufala i bin promesem blong yusum blong blesem ol narawan. Mi promesem yufala se Lod bae i tekem han blong yufala mo lidim yufala, tru long Tabu Spirit. Bambae Hem i go fastaem long yufala taem yufala i stap helpem Hem blong mekem pipol blong Hem i rere blong kam Saeon ia blong Hem, we Hem i promesem. Mi testifae olsem long tabu nem blong Jisas Kraes, amen.