Delmerab el ngara Lengiil el Blai
Chelecha el Baskua, ea Jesus Kristo a olengit er kid el mo, uai Ngii, el ungil Chad er a Samaria, el mo rulii a Blil (Ikelesia er Ngii) el sebecheklir a rokui el chad.
Rodam me a rodos, meng mlo smecher er sera lluich er rak ra mla memong, eng di ngarngii a taem e ak mo oureng er ngii. A tebliil el knguu er a Baskua a kmo ak lemuut el mo mesang.
Se er ak ngara daingak er a England, ea demak a mle oldingel. Sel rengul el chedam a mle medengei el kmo a kuluureng er a rechad ra blik.
A demak a mle soal el mesarch a beluu ngdi dimlak el soal a kall er a ikel beluu. Meng France, el merael chisel a kelir, eng melekoi el kmo, “Me donga kall er a Sina”. A meketeket el mesiou el bdelul a Ikelesia, a demak a kmal chedal a chelid e mui el chubechubechad. Tara kesus, eng melebusech a mlai er a bkais emrungel el klou a ngerel e spido er a chelsel a Paris, eng millekoi el kmo, “Gerrit, aikei a lengelel a telemall el ngara beluu.”
Mlar tiiakid el omerael, e ak mlo melchesiu er a bebil er a langel me a telemall. A ngeasek el redil a ulterau a chaiskurim el ngara kekerel doldubech e oltak a klalo. A kall el kob ra chaiskurim a di soiseb er ngii a chimol ongisb ra chaiskurim. Ng kmo ngera uchul, ea tal klou el chad a mlo outekangel er ngikal ngalek. Ngoldiu e odbechii, e mitechii tial blil a kall, el cheubel a blil a chaiskurim. Ng dimlak a ngeral sebechek el rulii er sera lorderd aikal blil a chaiskurim lolab a kaua er ngii. Ak dirk sebechek el mesa ngikal ngeasek el redil el outubaruach er a rael, el melasem el melai aikal cherrad el kob, a lengelel er a ringel a merberebet er a medal. Tial siasing er ngii a di ngara uldesuek, el omeklatk er a mekngit el reng, diak lomekerreu, ng cheleuid el kid a dirrek el blechoel el meruul el mora derta er kid.
A tara ieta sils, er bi tara Paris, e ngak ma demak a mlo mesarch er a ikelesia er a irechar el ngara Chartres. Malcolm Miller,1 el selmong er aikal okedecheraol, a tilutk a kldei el sunga el ngara klas el mado er a Chartres . Ng dilu el uasei ngouchais a cheldecheduch el chelid.
Sel kot el mado olecholt er a Adam me a Eva el tobeda er a Sers er a Eden.
Sel ongeru a mesaod er a cheldechedechal a ungil chad er a Samaria.
Sel ongedei a olecholt er sel Ongeru el Lemei a Rubak.
Mo dmak el rokui, ea ikal sunga er a karas el mado a smodii a omeroled er tial klengar. Te olengit er kid el mo mengemedaol er a rokui el mora delmerab el ngara Blil.2
iStock.com/digitalimagination
Di uai a Adam me a Eva, e kid a mei er a beluulechad er a toched me a chemull.3
iStock.com/digitalimagination
Ngar a hokori el roled el mora Jericho, e kid a modechelakl, metemall , e cheloit el ngara ringel.4
Meng kired el kaingeseu, e bai blechoel el mo imuul er a bital rael, leng kmong ngera uchul.
Engdi, oba klechubechub, el Ungil Chad er a Samaria a stob e lemechet a telemellel a bedenged lolab a bino me a cheluch. A olangch er a chedaol belsoil me a bebil er a chedaol ruoll, e a bino me a cheluch a melutk er kid el mo er a chedaol omekungil el Jesus Kristo.5 Ngkel Ungil Chad ra Samaria otekid er a chermel danki malechub, eng ngarsel cheldecheduch el ngara sunga er a mado, eng otekud er a chongelngelel. Ngii a ngoikid losisebid er a lengiil el blai, el sebechel olengchelel a Ikelesia er Ngii. Chelsel tial lengiil el blai, e a Ungil chad er a Samaria a kmo, “Momkerreu er ngii; … me sel kluut el mei, e ak meskau a medal a ududem.”6 Ngika Lungil Chad ra Samaria, a olengchelel Osobeled, el yaksok el lemuut el mei, loba chetengakl ma klebkall.
iStock.com/digitalimagination
Chelecha el temel a Baskua, ea Jesus Kristo a olengit er kid el mo, uai Ngii, el Ungil Chad er a Samaria, el rulii a lengiil el Blil (Ikelesia er Ngii) el sebecheklir a rokui el chad er a telemall me a ringelel a klengar.7 Kid a mengedmokl el kirel a blal tibir el Ongeru el Lemei er Ngii sel bek el sils e doruul el mora “ta er tirkang”8 el diua doruul el mo er Ngii. “A ta er tirkang” a derta er kid.
Me sel dobengkel a Ungil Chad er a Samaria el mora lengiil el Blai, e kede suub a kleim el tekoi el kirel a Jesus Kristo me a kid.
A kot, e kede me soiseb er a Lengiil Blai er sel kmal teleteled, el chemur a chelitechetud me a ngelsengesed. Eng di kid el rokui a ngarngii a sebeched lodersii. A omeroled el mora Dios a blechoel dedak er ngii. Ke de teloi er a uldak el beluu—el mla chobangel a mekngit el rakt, sesel eolt, ngau, bosech, malechub e kede mekemokid el mengedmokl a dousbech er a bek el sils. Kede ngmai a ulekrael sel bo de dak e dekadecheduch, kaiuerenges, molmuut er a derta er a odos, me a Chedaol Reng.
Sel le mengodech a rengud me denguu a Llecheklel el mei er kid,9e kede Mesang e mesekid el ngara Ikelesia er Ngii. A de bo er Ngii, e kede moungil mes a tekoi, e ra bai klautok. A de bo er Ngii, e kede metik ra ungil uchul e kede mo meruul a ungil, me a uchul e ke de ungil, me kid a merael el mo mesisiich el mo ungil chad. A de bo er Ngii, e kede metik a di ngarngii el klaumerang, mimokl lomekerreu, e oumerang er a Dios. Chelsel a Blil, e kede smisichii a deleuill er kid el mora Dios, el Demad, me a Jesus Kristo.
Ngii a oumerang er kid el mo olngeseu el rulii a Blil el mo basio el Ngii a soal. Me sel dousbech a duch er kid me a dechal a rengud, ea sengk er Ngii er a reng a dirrek el mo melisiich e omekngeltengat.10
A chad er a Sebangiol el oleiuid a tekoi a dilu er ngak , “Elder Gong, ak mle medengei lokiu a Chedaol Reng el kmo ngera ke mo kmung meng mlo sebeched el oleiuid,” ngikal odam a dilu el kmo, “lokiu a sengk er a omelekoi.”
A sengk er a klaumerang me a kloulreng a mei, el mocholt el kakeakl lokiu a kekerous el teletael. A ta er a odos a ngiluu a ongelaod er a reng er sera bolsecher el mad a bechil er a COVID-19. Ng millekoi, “Ak medengei el kmo ngak ma bechik a lmuut el mo dmak.” Tara teletael el dirrek al kirel a COVID, ea tara odos a millekoi, “A kulmelchesiu el kirek el olengit er a Rubak me a re toktang me bo lebsa telkib el taem a bechik.”
Ongerung, Ngii a kmal olengit er kid el rulii a Blil el basio er a krasia, e basio el derta er kid a sebechir el mo kldibel, el ngarngii a delmerad el mora rokui el chad. Kid el oltirakl er a Jesus Kristo, a rokui a di osisiu, el diak a rengariou el chelechad.
A rokui el chad a disubed el mora ongdibel er a chedaol belsoil, bebil er a ongdibel er a Sandei, me a ongdibel buai.11 Kede oldanges er a Osobeled, e melatk e meruul el mora ta ma tang. Kede kasues e mengemedaol er a ta me a tang. Kede mo klikm, e mo dengchokl lobengkel a di ngii el tang, momedenge ngakl, ngii metirkel beches el chedal a ikelesia, remla lmuut el mei el rodam me a rodos, ngeasek el redil ma resechal, me a rengalek er a Primary.
Sel de omdasu er kid el dechor er a ikel le ngarngii, e kede mengemedaol er a resechelei, roldingel er kid, dirk siliseb ra beluu, mechesang el chad el chemau a betok el tekoi. Kede ngara klengitelreng, oldeu a rengud, e ngar sei el kirel a ta me a tang. Sel bode kedeb er a ikel domdasu me kede orreched, diak dolchesuar, ngara omerritel malechub e kede oltelechakl, e kede osiik a klausubes er a tang a melasem el moungil.
A telungalek er a Africa el kiei ra Merikel er chelechang a dilu el kmo, “Sera kot el sils, ea rechedal a Ikelesia a mle ungil e kmal ngoikemam ra tmuil. A rokui el chad a rirellemam el omelchesiu el ngara belumam. Ng dimlak a ouketui er kemam.” A chedam a dilu el kmo, “A Chedaol Bibilia a olisechakl a rdechel a ebangkelio el mengai er a risel ebangkelio.” “Me a re misionari,” te millekoi a chedam ma chedil, “ng somam a rengelekam a lorael el mo meklou el mo uai tirkal missionari.” Rodam me a rodos, mei me bo dongemedaol er a rokui el mera Blil.
Ongedei, ngara Blil e ke de subii a omengerrungel el ngara Jesus Kristo, el diak el sel cherrungel lomes er ngii a beluulechad. A diak el merang e diak el klemarang, el tekikengl a beluulechad el “dimereched-el mo cherrungel” a omiich er a cherrungel el ngii a sebechel rullid el mo olngesonges, e llechotel er a , di orrurt a chimad, melecha soad, malechub eng erul domet. Sel erbitang, e a Osobel, el Jesus Kristo, a medengei a rokui el kired e diak el soad a rechad a bolodengei, e Ngii a dirke betik a rengul er kid. Ngii a ebangkelio er a ongeru me a ongedei el techall, el mekedmokl lokiu a tngakireng er Ngii.12 Ngii a siotai er a dersta er kid el mo ungil chad er a Samaria, el mo diak di dorritel e mo mui lousubes er kid me a ta me a tang, tia ngii me sel dolasm el mo mui loltirakl a Llechul.
Ke de ngosukid sel de kaingeseu. Ak medengelii a telungalek el kiliei er a bita er a rael el betok a omerollir a rechad er ngii. A re mesarch a blechoel el mong e olengit a ngesou. Ta er a mochu tutau e tial obliil a rirengesii a melechotech ra chesimer. Te mle mesaul e simbai el kmo ng techa ng kal merma er a eru el klok ra mochu tutau, e ulemsadu el kmo ulekum, meng kmal di ta er chelechang, ea kuk tara chad a mo ngosouir. Sera le mekudem el melechotech er a chesimer, e te rirengesii a diu el kmo, “Ngau—ngarngii a ngau er a rebai er a blimiu!” A rungil chad er a Samaria a kaingeseu.
Ongeuang, ngara Blil, e kede mo tebedechel a chelechad er a ebangkelio el chemau a Jesus Kristo, el chotil a mla moluut el klemerang, ngar el re profet ma re apostol, me a tara sioning er a Jesus Kristo—el Babier er a Mormon. Ngii a ngoikid el mora lengiil el Blil e dirrek el mora Blil—el chedaol el templo. A blil a Rubak a basio el, uai ngkel telemall el chad el mlara rael el mora Jeriko, ea Ungil chad ra Samaria a sebechel riseuid e milid, e kudmeklid el mo moluut el mora medal a Dios, e oldak er kid er sel diak a ulebengelel el telungalek er a Dios. A templo er Ngii a belkais a chismerel el mora rokui el kiei el ngara ebangkelio er Ngii loba klaumerang e olengesenges.
A oldeu a rengud er a templo uldimukl a dmak el ngara ebangkelio sel ngii mal ngarngii a klekakerous er kid er a dikesed, siukang, omelekoi, me a telecheroll. Sera lolai er a chutem er a mo dechor el Taylorsville Utah Temple, ea 17-a rekil el Max Harker a uluchais er a chisir el telungalek el mle elolem el telecheroll el ulemuchel er a demal-a demal-a demal-a demal a Joseph Harker me a bechil, el Susannah Sneath. Ngar tial mla moluut el ebangkelio er a Jesus Kristo, e a derta er kid a sebechel mo mesisiich el omak el ngara chelsel a betok el telecheroll er a telungalek er kid.
A ulebongel, e ongeim, e kede outkeu e le Dios a betik a rengul er a rengelekel er aikal kakerous el ucheled me a dengar ngii el omeruul, er a bek el beluu, kebliil, me a omelekoi, el ngarngii a delmerab er a rokui el ngara Blil.
Aika el merko el okeua el rak, ea rechedal a Ikelesia a mla mo betok er tir a chad ra kakerous el beluu. Sera 1998, ea betok el chad ra Ikelesia a kiei er a ikrel a Merikel me a Canada. Sel bol 2025, e kid a ua bo domes er a betok el chedal a Ikelesia el kiei er a Latin America el kuk betok er a ngara Merikel me a Canada. A mengedibel er a remekedung lulechellel a Chedam el Lehi a otutii a ocholt. A remekedung el Santo, uldimukl er a taem er a rucheled, a melemolem el blil a klaumerang me a omesiou el mora Ikelesia el blerk er a beluulechad.
Dirrek, a betok er a remeklou el chad er a Ikelesia er chelechang a diak el bechiil, mla melakl, malechub eng delort a chelbechilir. Tiang a klou a belkul ngeldechel. Tia uldimukl er ngii a tedobech er a rodos er a Chelechad er a Rolngeseu e betok er a tedobech er a remeklou el rodam er a klebaderei. Tiakid el teletael er a ulecherangel a di mla uaisei er a Ikelesia liueklii e beluulechad er sera 1992 me a Ikelesia el ngara Merikel me a Canada er sera 2019.
A delecherud er medal a Rubak me a Ikelesia er Ngii a diak el iior er a chebechieled ngbai otirekled el ngii a blakelreng er a klaumera er kid er a Jesus Kristo.13 A remeklou el chad a sorir el meues el bekongerachel e olengeseu el meklou el chad. A roltirakl er a Jesus Kristo a mei el ngar ker me ker, el kakesous a blechelir, meklungir, iro, rekrir, el derta lolab a duch, sorir a melemalt, e klou a techellir el mo omekngeltengat e mesiou. Kede osiik er a bek el sils el mo oltirakl er a Jesus Kristo lultuil er a klaumerang el mo ouchel a rengud14 e melemolem el ngara deureng.
Chelechal klengar, ea lebebil e kede mengiil er a Rubak. Altang locha diak de ngar sel soad el ngarngii malechub e sel soad el morngii er a ngar medad. A tara mesisiich el chedal a ikelesia lodos a kmo, “A mengiil er a Rubak el kirel a klengeltengat el mla er Ngii a chedaol ngerachel. Ng diak el kired lomes er ngii loba klengit el reng, ngarbab el reng, malechub eng reng ra omerritel, e bai oba chedaol blekongesenges.”15 Chelechang, e kid a kiei, ng diak dongiil ra klengar el mo omuchel.
A Isaia yaksok, “Tirke el mengiil er a Rubak a mo mukbeches a klisichir; te ngoriak el morbak el diuai a uasi ; te mo remurt, e diak bol mesel; e mo merael, e diak el taourer.”16
A Ungil chad er a Samaria er kid a yaksok el muut el mei. A ongasireng el tekoi a duubech sel domekerreu er a ta me a tang el di uai Ngii. Sel de mei loba klengariou me a delmedemek el reng,17 eng sebeched el metik er sel ngor el ngara Jesus Kristo el mo iliuekl er a chelsel a ungil medengelii a omesebechakl el chimal.18 A chedaol ruoll a meskid a telbiil el duldimukl er ngii me a “klisichel a kledios”20 el mo mengikiid a rengud me a omerelled. Ngokiu a blekokeuii er Ngii me a klloulereng, ea Ikelesia er Ngii a mo delmerab er kid.
Mesel bo doruul a delmerab er a Blil, el mengemedaol er a rokui, ea Ungil chad er a Samaria er kid a sebechel mo omekungil er kid el ngar sel hokori el roled er a beluulechad. Loba cherrungel el beltikel reng, ea Demad me a Ngelekel, Jesus Kristo, a yaksok “budech er tial beluulechad, me a diak a ulebengelel klengar er a merael mei el beluulechad”20—“me sel kngarngii sei ea oborngii.”21 Ak mui er a saul el sioning e ouchais el ngara chedaol ngklel a Jesus Kristo, amen.