A Kristo a mla Mekiis; A Klaumera er kid er Ngii a Mo Choroid Olibesongel
A klaumerang er a Jesus Kristo a kot el ngarbab el klisiich el kired er tial klengar. A rokui el tekoi a di sebechel el mo er tirkel tir oumerang.
Betik er a renguk el rodam me a rodos, ak mereng a saul er a techall el kungedecheduch er kemiu er chelechal Sandei el Baskua.1 A melngakireng me a Okisel a Jesus Kristo a ngildechii a klengar er kid el mo cherechar. Ng betik a rengud er Ngii e oldanges er Ngii me a Chedam er a Babeluades.
Aika el mereko lelolem el buil, e kede mla melemolem loutekangel er chelsel tial omekodall el rakt. Ng mechas a renguk er a duchelreng me a chedaol klisichiu el chelbangel a secher, kodall, me a klsabisi. Ng blecheol nglunguchek, me a chelsel aika el rokui, e ko momelchesiu er a diak lengemed el beltik el reng er a Rubak el kiriu. A obla msemechokl ongarm loba mesisiich lotireklem, e tial mereko el tal rak a dimlak di blel kelsuul.
Chelechal tutau, e kede mla rongsterir a remengeteklel a Ikelesia er a kakerous el beluu er a beluulechad. Ng klemerang, el klengeltengat er a ebangkelio a mo er a bek elbeluu, omelekoi, me a rechad. A Ikelesia er a Jesus Kristo a mekelkelii a beluulechadel ikelesia. A Jesus Kristo a mengetekled.
Doureng a saul, el tial omekodall el rakt a diak blal tomer er a berekel a klemrang er Ngii. A ebangkelio er a Jesus Kristo a ngii a usbechall er tial cheliseksikd, uldikel, e mechitechetong el beluulechad.
A dersta el ngelekel a Dios a ngarngii a techellir el rongesii e kongei er sel omekungil, e olsobel el klemechel a Jesus Kristo. Ng diak a ngodech el tekoi el klou a belkul er a deurreng er kid—er chelchang el mo cherechar.2 Ng diak a ngodech el tekoi el meskid a mui lurunguled. Ng diak a ngodech el tekoi el oridii a uldikel er a beluad.
A klaumerang er a Jesus Kristo a ngii a dodai er a rokui el klaumerang e tungelel a chedaol klisiich. A Apostol Paulus a kmo, “A lak a klaumerang eng diak el sebeched el rulii a rengul a [Dios]: le ngike losiik er a Dios a kirel loumerang er ngii, e oumera el kmo ngii a omekngeltengat er tirkel blak a rengir losiik er ngii.”3
A bek lungil tekoi er a klengar—a bek el techall er a klengeltengat el meklou a belkul—a omuchel loeak a klaumerang. A mechere Dios me bol mesisiich er a klengar kid a omuchel lokiu a klaumerang el kmo Ngii a soal mo omekrael er kid. A meral ouchel reng omuchel lokiu a klaumerang el kmo a Jesus Kristo a ngarngii a klisichel el mengikiid, omekungil, e melisiich er kid.4
“Lak moltngakl er a klisichel a Dios,” ng millekoi a profet Moroni, “le ngii oureor loba klisiich, loltirakl er a klaumerang er arengelekel a chad.”5 Ng klaumerang er kida kiisii a klisichel a Dios er a chelsel a klengar kid
E sel, dousbech a klaumerang a sebechel ko er a mo meringel. Bebil er a taem e kede oumededenger el kmo ng locha sebechel mui a klaumera er kid el mo ngmai a klengeltengat el kid a kmal lousbech. Eng di, a Rubak oroid aikaikid el dakt lokiu a tekingel a profet Alma er a chelsel a Babier er a Mormon.
A Alma olengit me de bo er a chesemel a tekoi e bo dultuil er a telkib el klaumerang, choi, me a lechub e di le bo er ngii a klemeriar reng er [kid] el mo oumerang.6 A tekoi el “telkib er a klaumerang” a mekletkak er a yaksok er a Rubak el ngara biblia el kmo omko “ngarngii a klaumera er kid el uaia klungel a tane er a mustard,” eng sebeched el “nguklii a risois, El nguklii el mo er a tara basio; eng mo uaisei; e diak a ngii di el ngerang el diak el sebechiu el rulii el mei er [kid].”7
A Rubak a medengei a chelitechetud er tial klengar. Kede rokui el ruebet a lebebil er a taem. Eng di Ngii a dirrek el medengelii sel sebeched el mo er ngii. A tane er a mustard a omuchel kekerei eng di mukeroul el mo klou el kerrekar el sebechel a charm lomechell er a rechelel. A tane er a mustard a uaia lekekerei eng di mukeroulel klaumerang.8
A Rubak a diak longerchir er a cherrungelel klaumerang er kid el kirel a ngeiul a cherrungelKlisichel. Ng di olengit er kid me bo doumerang.
Rodam me a rodos er ngak, a ongtik leko er kemiu er chelechal tutau er a Baskua a kmo momuchel er chelechal silsel mo meleketek er a klaumera er kemiu. Ngokiu a klaumera er kemiu, e a Jesus Kristo a mo choisois a techelliu el choroid olibesongel er a klengar kemiu,9el diak el iior er a kmo a ringel mngarngii a uaia klungel a Rois Everest.
A ringel el mchelbangel a locha klsabisi, rraureng, secher, a lechub eng kuk di bebil er a mondai er kau. Ng kakerous a chelngeliu, eng di a nger el mo er a bek el ringel er kemiu a kmo mongisois er a klaumera er kemiu. Ng ousbech a taem. A remesaik el mesuub me a remeleolt a rengir a di blechoel meringel er tir el dolemii a telkib el klaumerang.
A mo ungil er a ngii di el ngerang a ultuil er a blakereng. Ngosisiu el tekoi el mo er a chad el meral soal mo oltirakl er a Jesus Kristo. A mo mengisois er a klaumerang me a ultiliu er Ngii a ultuil er a blakereng. Msall e kdu a eim el tekoi el mo ngosukemiu el mo mekdebechii a klaumerang me a ultiliu.
A kot, e mosuub. Mo blak a rengmiu el mesuub. Bo mui el mesuub chedaol llechukl el mo ungil medengei a ngerchelel me a urerel a Kristo. Bo modengei osischeklel a Kristo me bo modengei a klisichel er a klengar kemiu. Mdelemii er a rengum a klemerang el kmo a Tngakireng er a Jesus Kristo a melutk el kirem. Ngii a Ngilai a kengtil a rengumteliturkau, chelitechetumme a kengtim. Ngii a tilngetengii e milskau a klisiich el mo choroid a bekel bedengel ongarm el kau a mo chelbangel. Ko mo nguu tial klisiich lultuil er a klaumerang, ultiliu, me a blakereng er kemiu loltirakl er Ngii.
A choroid olibesongel a sebechel lultuil er a ongasireng el teletael. Mosuub el kirel ongasireng el tekoi. Ongasireng a mei lokiu a klaumerang er a Rubak. A kmal techel a klaumerang a sel multuil er a Soal me a Temel—el kmo nguangerang e oingerang e Ngii a mo omekngeltengat er kau er a mengasireng el ngesou el kau osiik. Ng kmal di sel lakmoumerange a Dios a mo diak lomekngeltengat er kau er a mengasireng el teletael el mo choroid olibesongel er a klengarkau.10
Sel molmeolem el mesuub el kirel Osobel, eng mo beot a multuil er a chubechub er Ngii, beltikereng er Ngii, me a Klisichel, lomekungil, e klisiich er a olsobel. A Osobel a kmal kmeed er kau sel mngara ringel e multuil er a klaumerang.
Ongerung, e molilt el mo oumeranger a Jesus Kristo. A lengarngii a rraureng er kau er a Dios el Chedam me a Beltik er a Rengul Ngelekel, a lechub a klemerang el kirel Oluut a lechub a chedaol okedongel a Joseph Smith el profet, e di moliltel mo oumerang11e molemolem el blak a rengum. Mngai a kerim el mo er a Rubak me a bebil er a mesisiich el ngesou er a rechad. Mosuub loba blakereng el mo oumerange lak molatk losiik a mekngit er a klengar er a profet a lechub eng cheleuid er a chedaol llechukl. Lak molechel a rraureng er kau e mosaod el mo er a rebebil er a rrau a rengrir. Becherei a Rubak me lomekrael er kau er tia lomerollem el kirel skel chedaol tekoi.
Ongedei, moruulel ngara klaumerang. Ke mekerang omko ng mlo kloua klaumerang er kau? Ka momtab er ngii. Moluches el kirel. Mluut el nguu a dechelela klaumerang el mo rulii a kmo ngerang el muut el docheliia klaumerang er kau.
Ongeuang, moruul chedaol ruolllokiu a klikiid. A chedaol ruoll a kiisii a klisichel a Dios er a klengar kau.12
E a ongeim, molengiter a Demam er a Babeluades, el ngara ngklel a Jesus Kristo, el kirel a ngesou.
A klaumerang ousbech omeruul. A ngeiul chedaol ocholt ousbech omeruul. Le “ngikel olengit a mo nguu a lolengit er ngii; me ngikel osiik a mo metik er a losiik er ngii; ma chesimer a mo mengai el kirel ngikel melngod er a chesimer.”13 A Dios a mednegei a ikel mo ngoseuir a klaumera er kau el mukeroul. Molengit, e mluut lolengit.
A diak loumera el chad a sebechel kmung el kmo a klaumerang a mo er a rmechitechut. Eng di a ikal tekoi a diak lesang sel klisichela klaumerang. Omomdasu e a re Apostol er a Osobel te millemolem lolisechakl Osischeklel ruriul er a Kodellel, el klengar tir a mlo er a ringel, omko te dimlak loumera er Ngii?14 Omomdasu e a Joseph me a Hyrum Smith te mlo er a kodall er a sebecheklir el kirel Olutel a Ikelesia er a Rubak a le mlak a mesisiich el sioning er tir el kmo ng mle klemerang? Omomdasu e a kmeed leru el telael Santo a mlad er a uchelel omerollir15 alsekum eng dimlak a klaumerang er tir kirel a kmo a ebangkelio er a Jesus Kristo a mla moluut? Ng klemerang, a klaumerang a ngii a klisiich el kudmoklaikel diak el sebechel mekedmokl el tekoi.
Lak mongkekerei er a klaumerang el moba er chelechang. Ngokiu a klaumerang el mo chedal a Ikelesia e melemolem el mesisiich. Ngokiu a klaumerang el mo oltirakl er a reprofet e diak doltirakl a er a resemmong me a meral chisel luldasu. Ngokiu a klaumerang el mo mesiou er tial taem er a omekodall el rakt. Ngokiu a klaumerang el mo kiei er a klikiid el klengar el beluulechad omdasu er chelechal kmo a llechul a Dios er a deleboes a chuodel tekoi. Ngokiu a klaumerang el mo olisechakl er a ebangkelio el mo er a rengalek er tial beluulechad. Ngokiu a klaumerang el mo ngara nglunguuch el kirel a klengar er a betik er a rengud me a lmuut el klaumerang el kongei er a nger el diak el soad.
Eru el rak er a mla memong, ea Sister Nelson me a ngak a mlo oldingerl er a Samoa, Tonga, Fiji, me a Tahiti. Aika el beluu a mla mo tela el klebesei el di le chull. A rechedal a ikelesia a mla olsengerenger e meluluuch me a ikal mitilengir rikl bol sebechel mosebechakl er tial chull.
A beluu er a Samoa, Fiji, me a Tahitii, er alomechela miting, eng mlo diak a chull. Eng di a kuk Tonga, eng dimlakel bolak a chull. Eng di a reteruich me a edei el telael el Santo a di mle uchei e temei el smiik a kingellir, e megiil e meral klou a chull e tir a dilengchokl ngara miting leru el sikang.
Aki milsa smiich el klaumerang er a dersta er tirkal chad er a iuns—el ngii el klaumerang a tirbengii a chull e dirrek el klaumerang loutekangel er a di lolemolem el chull.
A ongarm er a klengar kid a diak di el blechoel mengukl er sel ngii a soad el teletael. Eng di a klaumera er kid a blechoellodbechid el mo ruchei. A klaumerang a blechoelchoisisii a techelled er a klisichel a kledios.
Bo modengelii tiakid: omko a rokui el tekoi me a rokui el chad er tial beluulechad el kau oumerang a nguemed, eng di a Jesus Kristo me a Ikelesia er Ngii a diaklengemed el kirem. A Rubak a diak lolengull, a lechub el Mechiuaiu.16 Ngii “a osisiu er a ideliseb, chelechal sils, me a [klukuk].”17 Ngii a diak el bol choitii a tebiil er Ngii,18 yaksok er Ngii, me a lechub eng beltkil a Rengul el mor er a Rechedal. Ngii oureor ongasireng er chelechal sils, e mo meruul ongasireng er a klukuk.19
A klaumerang er a Jesus Kristo a kot el ngarbab el klisiichel kired er tial klengar. A rokui el tekoi a di sebechel el mo er tirkel tir oumerang.20
A ulekerulela klaumera er kau er Ngii a mo ngmukl a risois—ng diak el risois el bad el menglebokel er a beluulechad eng di risois er a klengitelreng er a klengar kemiu. A merael klungangel klaumera er kau a mo ngosukau el mult ongarm el mo klisichem e techall el mo er kau.
Chelechal Sandei er a Baskua, lobengkel a dmolech el beltkil a renguk me a omereng el saul, e ak lmuut el dmu er kemiu el kmo a Jesus Kristo a mla mekiis. Ng mla mekiis el mo omekrael er a Ikelesia er Ngii. Ng mla mekiis el mo omekngeltengat a klengar er a rokui el ngelekel a Dios, er a ngii di el ker. Ngokiu a klaumera er kid er Ngii, eng sebeched el ngmukl ongarm er a klengar kid. Ak dirrek el olecholt er a klaumerang er ngak loba ngklel a Jesus Kristo, boluaisei.