Oureng el ngara Kristo

Rodam me a rodos, chelecha el temel a Baskua e kede omes el kirel a klebokel el Okisel a Rubak e Osobeled, el Jesus Kristo. Kede lotkii sel ungil okedong el mla er Ngii el kmo “mei er ngak, kemiu el rokui el oureor el chorma e oberedang er a chelungel, e ak mo meskemiu a ulengull.

“Mnguu a chelngelek, e mosuub er ngak; le ngak a medemdemk e ngariou a renguk: me ko mo metik a ulengull er a rengmiu.

Le chelngelek a beot, me a berraod el ngar ngak a kebekakl.”¹

A ongtil Osobel el kmo mei er Ngii a ongtil el mora rokui el diak el dil mei er Ngii te dirrek el mo chedal a Ikelesia er Ngii.

Ngara bades loak uchei er tial ungil ongit, ea Jesus a olisechakl el kmo tia mekedmokl el okiu sel sekum ke dosiik el mo oltirakl er Ngii. Ng millekoi, “Ng diak a chad [malechub a redil] el medengelii a Ngalek, eng di tal Chedam; ma diak el ngii di el chad [malechub a redil] a medengelii Chedam, ngdi ta el Ngalek, me a sechal [malechub a redil] ma ngii di el chad el Ngelekel a mo olecholt el mo er ngii.”²

A Jesus a soal kid a bododengei el kmo a Dios a ungil Chedam er a Babeluades.

Sel dodengei el kmo kid a loubeltikelreng er mer kid a Demad er a Babeluades a mo ngosukid el mo medengelkid el kmo kid a chedal a ngarbab el diak a ulebengelel el telungalek er Ngii.

A Mayo Clinic a dirke lilechesii tiang: “Sel ngarngii a de uldimukl el ngii a kot el klou a belkul. … Ng kmeed el bek el telengtengil a klengar er kid a chelderoder el bedul a kmong ngerang el de uldimukl er ngii.” Tial report a kmo, “Ng diak el sebeched leklii sel domelchesiu luldimukl er a bedenged me a uldesued”³—e, ngak a dochelii, er a reng er kid.

Sel kesus ruchei er a bol charm er a Gethsemane me a kodellel er a kerus, ea Osobel a mlo kebetech ngii me a re oltirakl er Ngii er sel mo meng Ulebongel el Belsoil. Ng dilu er tir el kmo, “A beluulechad a mo omekcharm er kemiung di bo lungil a rengmiu; e ak mla mo mesisiich er a beluulechald.”⁴ Uchei er a ngeltel a sils er a bo le kukuk, ea Jesus Kristo a mla mo chouarm e mla “mad [er a kerus] el kirel a kengtid.”⁵

Ak omdasu el kol uangera el klsabisi a mlo er tirkal kedung el redil me a rsechal el ultirakl er Ngii el mlara Jerusalem sera lorael a sils el mo a ngmelt me a ilkolk me a dakt el mlo iliuekl er tir.⁶

El diuai tirka el roltirakl er a kmeed el 2,000 el rak ra mla memong, rebetok er kemiu a locha dirrek el omelchesiu el sabisi er a bebil er a taem. Ak mla soiseb er tial blekeradel er a klsabisi er sera lemad a betik ra renguk el bechik, er a Barbara, er a kmeed leru el rak er a memong. Ak medengelii sel de teloi er a rechedal a telungalek er kid, rsechelid, me a rdekaodengei el chad eng di ak melemolem el sabisi—le betik er a renguk a mla mo dibus er bita er ngak.

Tial COVID-19 el secher a mla kilungii tial reng er a ileakl me a klsabisi el mora rebetok el chad. Eng di, ng diak el iior er a ringel de chelbangel er a klengar, e ng sebeched el mekiis el soiseb ra beches el klengar el ngara Kristo, me a beches e meang el techall me a beches el klengar sel dobult el mora Rubak el mo oureng e uldimukl.

Ngak omelchesiu er a ringel loba tirkel tir a diak el kora uldimukl. Sel kumes a chais er a beluulechad el rokir, e ak mesterir a rebebil el dirrek el uaia le sabisi. A kumdasou, e te betok er tir, a locha diak lodengei el kmo a Chedam er a Babeluades a betik a rengul er tir e kid el rokui a uldimukl er a chelsel a klou el telungalek er Ngii er a babeluades. Sel oumerang el kmo a Dios a betik a rengul er kid me kid a ngelekel a chemolodid e smisiich a rengud.

E le kid el rengelekel er a reng a Dios, a rokui a di ngarngii a chedaol el uchelir, teletelir, me a techellir el ngoriakl. A dersta er kid “a ngalek er a reng el sechal ma redil er a roubeltikereng el chedam me a chedil er a babeluades.”⁷ Tiang a olengcheled! Tiang a meketeklii el kmo kid kede reua techang!

A chedaol olengcheled a mechemolt sel bo dodengei a betok el olengcheled er tial kelngar, uldimukl a beluad, siukang er kid, malechub a dikesek er a beluad.

Tial rengud er a chedaol klechad me a olengcheled el chad ra beluad, beltikelreng, me a uldimukl a sebechel lomekrael a urunguled me a beltkil a rengud el mora Jesus Kristo.

Ak melekoi er a oureng el ngara Kristo el diak el dil uldasu. Ak bai, melekoi el kirel oureng a tekoi el ngii a mo tmaut. Tiaikid el oureng a klou a ultutelel el kirel a mo mesisiich er a cherarou, melisiich er a chedaol klechad er kid, e meral mo medengei el kmo kid a loubeltikelreng er kid a Diak a Ulebengelel Chedam e kid a ngelekel el uldimukl el ngara telungalek er Ngii.

Sel de oureng el ngara Kristo, e kede momedengei el kmo ng kired el mo meruul e urekodel a chedaol telbiil, ea ikel soad a bol mekdmokl a sebechel mo mutaout lokiu Ngii.

A Chelechad er a Teruich me a terung el Apostol a mla chadecheduch lokiu a reng er a nglunguuch el sorir el mo medengei el kmo ng mekera dolengeseu er a rokui el tir a sabisi malechub eng diak el uldimukl. Aki somam lolngeseu er a rokui el tir omelchesiu el uaisei. Msall e kulekoi, tokuni, el kirir tirkel mesobil.

Rodam me a rodos, betok er a re meklou el chad er a Ikelesia er chelechal taem a mla melakl, mla medorch a chelbechielir, malechub eng dirkak el bechiil. A rebebil a oumededenger er a techellir me a basio er tir er tial uldesuel a Dios me a Ikelesia. Ng kired el momedengei el kmo a diak a ulebengelel klengar a diak el iior er a kmo ke bechiil ng diak ngbai kirel a oltirakl e meral “blak a rengum er a klaumera er kau er a Jesus.”⁸ A loureng a rokui el mesobil a osisiu el mora rokui el chedal a mla moluut el Ikelesia er a Rubak—a techelled el mora kerasia er a Kristo a okiu “blekongesenges er a llach me a chedaol ruoll er a Ebangkelio.”⁹

Msall e kbasech a bebil er a meklou a belkul llach el kired el mo ungil medengei.

A kot, a chedaol llechukl me a uriul-klebesei el profet a oterkeklii el kmo a rokui el tir a mekedung el urrekodel a telbiil er a ebangkelio a mor ngii a techellir el nguu a ngarbab el klebkall. A President Russell M. Nelson ulsisechakl: “Ngokiu a teletael me a temel a Rubak, eng diak a klengeltengat el diak lebora re mekedung el Santo er Ngii. A Rubak a mo merritel e ousengk er a rebek el chad lultuil er a ikel ngara chelsel a rengrir me a urerir.”¹⁰

Ongerung, a ulterekokl el taem me a teletelel a klengeltengat er a mo suobel el mo cherechar a dirkak el mocholt el rokui, eng di kede mla mo medengei.¹¹ A President Dallin H. Oaks a silodii el kmo a bebil er a teletael er tial klengar a mo mesemechokl er sel Tal Telael Rak, el ngii a taem er a kedmeklel aikel rokui el ngara chelsel tial klou luldasou er a deureng el kirir a rokui el klikiid el ngelekel a Demad.”¹²

Tia diak el belkul a kmo a rokui el klengeltengat a mocheuekl dilmerko lemei sel Tal Telael Rak; a bebil a bla dengai ea bebil a melemolem el dolai el mo er sel sils.¹³

Ongedei, sel mengiil er a Rubak a belkul a melemolem el olngesenges me a chedoal klengar er kid a ngoriakl el bedul Ngii. A mengiil er a Rubak a diak el belkul a kmo ng kirel a chad el di chelellakl. Ng diak el kirem el omelchesiu el uai omngara chelsel a mengiilel delmerab.

A mengiil er a Rubak a ultuil er a omeruul. Kede mla mesuub el kmo a urunguled el ngara Kristo a mo mesisiich sel dosiou er a rebebil. A dosiou el uaia Jesus er a losiou, eng oisisii a urunguled er Ngii.

A ulekerulel a tang el sebechel nguu er chelechal taem el longiil er a Rubak me a yaksok er Ngii a mekreos, chedaol el tebedechel a Uldesuel el kirel a derta er kid. Aikel sebechel a chad el remuul e odars er chelechang el mo olngeseu el meleketek er a Ikelesia el ngara beluulechad e mengidb er a Israel a kmal usbechall. A obechiil me a lak a kmal diak a ngera el rellii er a techellel a chad el mesiou. A Rubak a mengull er tirkel tir a mesiou e mengiil er Ngii loba kllouelreng me a klaumerang.¹⁴

Ongeuang, a Dios a oldars er a diak a ulebengelel el klengar el mora rokui el ngelekel. A rokui el tir a kogei er a bekokouii el sengk er a Osobel er a ouchelreng e oltirakl a Llechul a mo nguu a diak a ulebengelel klengar, ngii ma lak el ngai aikel rokui el telengtengil me a cherrengelel er tial klengar. Tirkel mo ouchel a rengrir a mo nguu a kldmokl el klausubes el Ngii a mla melekoi er kid: “Choi, me sel bek el bo louchel a rechedak e ngak a mo ousubes aikel kengterir lomtok er ngak.”²⁰

Sel ulebongel el omesubel tiang, sel sebechel a chad, me a techellel er a tekingel er a omelilt, dirrek a delcherud er a diak a ulebengelel klengeltengat, a rokui el di ngara Rubak el mo merritel.

Ongeim, a mui el klemedengei er kid er a ikang a delalm er a klaumerang er kid er a Jesus Kristo, el krasia er Ngii a uchul e a rokui el tekoi er a chutem a mekedmokl lungil.¹⁶ A rokui el bla el yaksok el klengeltengat a di mosebechel lokiu Ngii, le ngokiu, a Tngakireng er Ngii, “eng mlo riou er a rokui el tekoi”¹⁷e mla mo “mesisiich er a beluulechad.”¹⁸ Ngii a “mla mo dengchokl er a klisichel a Dios, el mo melai er a Chedam sel llemeltel er a kerasia el ngii a obang el mora rokui el ngelekel a chad … ; maleuaisei e ngii a oureor el kirel a moktek er a rengelekir a rechad.”²⁴ E sel ulebongel, “e a resanto a mo mui er a klebkellel, e mo nguu sel kirel dikesir ”²⁰el “oudiukes lobengkel a Kristo.”²¹

Sel soad a kmo aikal llach a mo ngosuterir a rokui el mo merael mo mesisiich el oureng el ngara Kriso e omelchesiu er a reng er a uldimukl.

Ke le mobes el kmo kau a ngelekel a Dios, el Diak a Ulebengelel Demad, er chelechang el mo cherechar. Ngii a betik a rengul er kau, me a Ikelesia a soal e ousbech er kau. Aki ousbech er kau! Aki ousbech er a ngerem, duch, ungil teletelem, me a kldung er kau.

Mla mo betok el rak, el dosaod er a “ngeasek el chad el mesobil,” “mesobil me a klou el chad,” me a “re me klou el chad.” A bingel a ikal tekoi a sebechel ngosukid sel bebil ra taem engdi sebechel diak dodengei eng ngodechii a osenged er a rebebil.

Ngar ngii a roled e kede mo ikrii tial teleteled a rechad el sebechel ieklid er a ta ma tang?

A President Nelson olengit me dosaod er kid el chedal a Ikelesia er a Jesus Kristo er a Uriul-klebesei el Santo. Tia uai a le cherrengelel a rokui el chad, ng uaisei?

A ebangkelio er a Jesus Kristo a ngarngii a klisichel ngoikid el mo tang. Kid a lmuut el klou losisiu er a de kakerous. Me sel de chedal a telungalek er a Dios, e kid a meral rodam e rodos. A Paul a dilung, “Me a [Dios] a rirelii meng di chimo el rasech a rokui el belurir a rechad el mo kiei er a bebul tial beluulechad.”²²

Kemiu a remerreder a stake, re bishop, me a chelechad me a rodos loungerachel, a kulengit er kemiu me bo momes er a bek el chedal a stake, ward, quorum, malechub a cheldebechel el chedal a ikelesia el sebechir el ngarngii a rrelii e mesiou er aikel ngerchelir e teloi el meruull a bek el bedengel a tekoi.

A bek el chedal a chelechad, cheldebechel, ward, me a stake a olab a sengk mea duch el mlara Dios el sebechel lolengeseu el meleketek er a rengedel er chelehang.

Mei e domekedong er a rokui el chedal a ikelesia el mesobil me bo losiou, mengider a reng, e lolisechakl. Mechoit a blekeradel me a uldesu el bebil ra taem eng diak dolchesuar eng melechel er a klsabisi me a diak el uldimukl malechub eng diak el sebechir el mesiou.

A kuchotii a sioning er ngak er tial Baskua er a Osobel, el Jesus Kristo me a diak a ulebengelel el oureng el Ngii a meskak me rokui el tir a oumerang er a Ngklel. E ouchais er tial klaumerang el ngara chedaol Ngklel, ngii el Jesus Kristo, amen.