Omerollel a Dersta el Ngelekel a Dios
Me kid el ngelekel a Dios er a telbiil, e kede betik a rengud, e mengull, e omekeroul, e omecheliu, e mengemedaol er tirkaikid el reng el tir a ngara beluu er a redeleb el mei.
Kede rokui el mla soiseb er a ringelel tial omekodall el secher, me a retelungalek me a resechelid el mla mo ikrii tial klengar. Msall e kuuchais er a retedei el dolatk er tir, el lomtechei er tirkel rokui el kid a kmal oubeltikelreng el mo er tir.
Ngkang a Brother Philippe me a Sister Germaine Nsondi. Brother Nsondi a milesiou el patriach er sel Brazzaville Republic ra Congo Stake sera le mad. Ng mle toktang el kmal mle bekerurau el kirir a rebebil.1
E ngkang a Sister Clara Ruano de Villareal er a Tulcán, Ecuador. Ng mlo chedal a mla moluut el ebangkelio er a lokedei me a eua rekil e kmal mle ungil loungerachel. A telungalek er ngii a milmesumech er ngii el milngitakl er a kmal soal chelitakl el, “I Know That My Redeemer Lives.”2
Ngika Brother Ray Tuineau er a Utah, lobengkel a klebokel telungalek er ngii. A bechil, er a Juliet, a millekoi el kmo, “Ng soak [tirkal ngelekek el sechal] a [bo lodengelii a demerir] el kmo ng millasm el oba Dios el mo kot er a rokui.”3
A Rubak a mla melekoi el kmo, “kom dmak el kiei el ngara beltikereng, e mo lmangel el mortirkel mora kodall.”4
Me kede ngara klengitelreng, eng di kired el dirrek el mo ngara deureng er a klebokel Lokiis er a kodall er a Osobeled. E le Ngii a uchul, e a rebetik er a rengud me a resechelid a melemolem er a diak a ulebengelel lomerollir. El uaia President Joseph F. Smith el millekoi: “Ng diak dobes er tir; e diak lengemed a beltikereng er kid el kirir. … Te mla ngosechekl; me kid me kede olngesechekl; kede mukeroul me tir me te mla mukeroul.”5 A President Russell M. Nelson a dilu el kmo, “A lengeled … a obult el mo lengelel a urunguled.”6
Kede Medengelii a klengar er a uchei er a Cheroll
A osenged er a diak a ulebengelel a diak di lekelungii a klmedengei er kid er tirkel melemolem er a omerollir el mla mo ikrii tial klengar ng dirrek el mekengii osenged er tirkel lomechela er a omerollir el soiseba er a klengar er a beluulechad.
A dersta el chad el soiseb er a beluulechad a tokubets el sechal malechub eng redil ngelekel a Dios.7 A omerollel a dersta er kid a dimlak lomuchel er a cheroll. Uchei er a demechell, e kede dilak er sel beluu el dulngedmokl er kid el mo “nguu sel [kot] el subeled er a belurir a redeleb.”8 A Jehovah a dilu er a Jeremiah el kmo, “Uchei er a mobeob er a diil e ak mle medengelkau; e uchei er a omechell e ak childolau.”9
Atla ea rebebil a rrau a rengrir el kmo a klengar ngomuchel, er a diil, ng sel lomuchel a chaidireng el mengitengtik, a lechub eng sel lemechell a tolechoi, eng di kid, a diak a rraureng er kid le redil me a sechal reng el ngelekel a Dios a ngara omerollir el mei er a beluulechad el mo nguu a bedengir er a tech e kiei er a beluulechad.
Me kid el ngelekel a Dios er a telbiil, e kede betik a rengud, e mengull, e omekeroul, e omecheliu, e mengemedaol er tirkaikid el reng el tir a ngara beluu er a redeleb el mei.
Ongasireng Omeruul er a Redil
A denguu er a redil, e a mo oungalek a klou el ringel er a bedenged, rengud, me a omesiou. Ng betik a rengud e chemat er a rmengasireng el redil er a Ikelesia. Lungil a bdelmiu e mellomes, e ko melikou a berraod er a telungalek er kemiu. Ko moubeltikereng. Ko mesiou. Kom chuarm. Ko melisiich a klaumerang, e mesiou er a rengesool, e dirrek el klou omrellii er a beluu.
Sel Chedaol Ngerachel el Mengeluolu a Klengar
Betok el rak er a memong, e ngokiu a sebekereng er a iidisel omelebech er a kldiull er a beluulechad, e a President Gordon B. Hinckley a milngedecheduch el mo er a redil er a Ikelesia lolab a tekoi el ngii a domes er chelechal sils. Ng millekoi: “Kemiu el bechiil redil e chedil a otil a telungalek er kemiu. Ko momechell er a rengalek. Ng meral klou e chedaol ngerachel tiang. … Ng mla mekesakl omereng el saul er kid el kirel chedaol klengar er a chad? A omelecheb er a kldiull a mekngit, kikiongel e diak lungil lomeruul, el di mla mekelkelii a beluulechad. A kulengit er kemiu a redil er tial Ikelesia el tomer ngii, el diak moruul er ngii, e choridemiu er a ikel teletael el rulii me a oleko ngungil. Ngarngii a bebil er a teletael e tiang a sebechel dubech, eng di ngkmal kekerel techall.10 … Kemiu a derrir a rengelekel a Dios el sechal me a redil, el klengar er tir a chedaol. A omengeluolu er tir a chedaol ngerachel el diak el sebechel ko er a beot a rengmiu er ngii.”11
A Elder Marcus B. Nash a ulechais er ngak er a cheldechedechal a tal okai me a eua rekil mechas, er sel taem er a longedmokl er ngii el kirel a techolbechelid, “e nguluuchais el kirel omelebech lekildmeklii [er a betok el rak ruchei].” Ngoumekikngit el reng, e dula el kmo: “Ak chellungel er a berraod el mle tochebii a klengar er a ngalek me ak chellungel er ngii er a bek el sils el mla mo okeua me a elolem el rak. … Ng dimlak a ngera el sebechek el rulii el choridii a ringel me a klengitelreng. Ng dimlak kudengei el kmo ak mekerang el mo er sera kmosisechakl er a meral ebangkelio er a Jesus Kristo. Ak mlo meduch louchel a renguk … me ak mlo mui er a deureng. Ak mlo medengei el uase ng sebechek el mousubes alskeum ak meral louchel a renguk er a kengtik.”12
Kede mereng a saul el kirel a chedaol sengk er a ouchel reng me a klausubes.
Me Ngerang Sebeched el Meruul?
Me ngera ngercheled kid el mekedung loltirakl er a Jesus Kristo? Bo doltirakl a llechul a Dios, e dolisechakl el mo er a rengeleked, e douchais el mo er a rebebil el tir a sorir lorenges.13 Douchais er sel dmolech el ngara rengud el kirel a cheledolel a klengar el mo er tirkel melib a llach er a beluu. Te locha diak el mui el sorir aikel doumerang, eng di nglunguched me bol lungil medengei el kmo ngera uchul, e kid, a kerekikl aikel dolilt el meruul lengelakl er sel di soal a chad el meruul er ngii er a klengar ngii.
Alsekum eng duubech a dimlak er a reng el kldiull, e dochotii a beltikereng, omelisiich, e a, lesebeched, a ngesou er a udoud, el melisiich er a chedil me bol sebechel mechelii a ngelekel me bo lolemolem er a omerollel er tial beluulechad.14
Sel Klebekelel a Omerrodel
Chelsel a telungalek er kemam, e a ki kmal ngeltengat el tela el rak er a memong, e a teruich me a elolem a rekil redil a mlo dioll. Ngii me a demal a ngalek a dimlak lebechiil, e dimlak lekeldmokl el melemolem el dmak. Ngika el ngeasek el dil a uluumerang el kmo a klengar el ngara delel a mekreos. Ng milchelii a ngalek el redil e kilengei me a kmal ungil telungalek a rodelii el mo ngelekir. A denguu er a Bryce me a Jolinne, e ngii a mle nger er a nglunguchir. Te milngeklii el Emily e ulsischeklii el mo ultuil er a Chedam er a Babeluades me a Ngelekel, el Jesus Kristo.
A Emily mirael klunga el dil. Aki mereng a saul el Emily me a ngelekel a ngelekam el sechal er a, Christian, a mlo kaubuch er a blil a Rubak. Chelecha e a Emily me a Christian a ngarngii a kekerei el ngelekir redil.
Ng dirk milluches a Emily el kmo: “Aika el mereko letiu el buil, e ak mla melbedebek el kirel a teletael er [sera] kmechell. Ak mlo melbedebek er a milchellak, el di mle teruich me a elolem a rekil. Sel kumelchesiu a ringel me a betok el ngeldechel a bedengek el kldiull a uchul, e ak melbedebek el locha kmal mle meringel er a ngeasek el dirk teruich me a elolem a rekil. … Ng merberebet a iiuechel a medak sel kulatk er a milchellak, el mle medengei el kmo ng diak el sebechel [mekerulak er a ungil klengar meng kilengei] el bok merodel. Ng diak el sebechek el mo medengei aikel lulmelchesiu letiu el buil—lomes a bedengel merael mo ngodech, me a omilil er a rengeasek el mo diak lengarngii, e medengei el kmo uriul er a cheroll, eng mo odersii a ngelekel el mo er a tara chad. A kmal mereng a sulel er a omerellel, el dimlak lousbech er a mimokl lomelilt er ngii el mo uchul eng torbengii a klengar ngak.” A Emily mlo rokir a cheldechedechal kmo, “Ak mereng a sulel a Chedam er a Babeluades er a chedaol uldesuel, me a rungil chad er a blik el [betik a rengrir e omekerreu] er ngak, me a templo el sebeched el mo moak el telungalek el mo er a ulebongel.”15
A Osobel a “ngiluu a ngalek, el mekedecherur er a delongelir: e sola e urekedii a chimal, e dula er tir el kmo, Ngike el mo nguu a ta er [tirkang] el ngalek el ngara ngklek, a ngoikak.”16
Sel Mellemalt el Soal a Reng a Dirrekak Bo Lodengelii
A kudersii a beltkil a renguk me a chubechub er ngak el mo er a robekel el bechiil e diak el sebechir el mo oungalek me a dirrek el tirkel redil me a sechal el kuk dirkak a techellir er a tekoi er a chebechiil loltirakl er a llechul a Dios. A uldasu el kirel a klengar a meringel bo dodengelii a lsekum e ke domes er ngii el di oba osenged er tial klengar. Me ngak el mesiungel a Rubak, e ak yaksok er kemiu el kmo sel molemolem lultuil er a klaumerang er a Jesus Kristo me a telbiliu, e ko mo ngmai a klengeltengat er tial klengar me aikel somiu er sel diak a ulebengelel temel a Rubak.17 Ng sebechel ngarngii a deureng er tial klengar er a chutem luldimukl a lsekum aikel melemalt urunguled a diak ledubech.18
Uriul er a cheroll, e a rengalek a melemolem lultuiul er kid er a ngesou. A rebebil a kmal lousbech er ngii. Bek el rak e ngokiu a rebisop me a meklou el uldersiu er a tenget er a sengerenger me a ngesou, e a klengar er a remilion el ngalek a mukngeltengat. A First Presidency a dirk uluuchais el kmo a lmuut el lluich el million ludoud a tilobed el mo olngeseu er a UNICEF el kirel a ngesou er a erul million el yobo.19 A Dios a betik a rengul er a rengalek.
Sel Chedaol Uldasu el mo Oungalek
Ng suebek a rengud le bebil er a ikel kmal ungil besul beluu er a beluulechad, e te kmal mekesai el ngalek a mechell.20 “A llechul a Dios el mo er a Rengelekel el mo omdois e omekeek er a beluulechad a kmal dirk mesisiich.”21 A temel a mo oungalek me a iidisir a rengalek el soad a ultuil er a delongelir a robekel me a Rubak. Ngokiu a klaumerang me a nglunguuch, e a ikal chedaol luldasu a sebechel mo klebokel, e chedaol teletael.22
A kuchais el kirel a cheldechedechal a telungalek er a Laing er a Southern California. A Sister Rebecca Laing a meluches el kmo:
“Sera summer er a 2011, e a klengar er a telungalek er kemam a kmal mle ungil. Ng mle ungil a chebechielam lobengterir a reteua el ngelekam—el rekrir a etiu, euid, eim, me a edei. …
“Aika el kldiul er ngak a uaia [le ble] lokedeldaol … [me a] kemam a ulemelchesiu el [kmal] ngeltengat er tirkal teua el ngelekam, e [millatk] el kmo ng mla mo cherrungel a telungalek er kemam. Sera kurrenges er a klou longdibel er a October, e a kulmelchesiu el kirel muut el mo er ngii a tara ngelekam. A LeGrand me a ngak er a ki molbedebek e ki moluluuch el kirel … e a ki mlo medengei el kmo a Dios a ngodech a moktek er ngii el kiram.
“Uriul er a lmuut el tara meringel el kldiull me a cheroll, e a ki mle ngeltengat er a klebokel el ngalek el redil. Aki milngeklii el Brielle. Ng mle mengasireng. Telkib el taem ruriul er a cheroll, me ak dirk ngara [blil omechell], e ak rirngesii a ngerel Chedaol Reng: ‘Ngarngii a lmuut el chimong.’
“Edei el rak ruriul, e a tara ongasireng a dilubech, el Mia. A Brielle me a Mia a meral klou el deureng er a telungalek er kemam.” Ng mirrekui er a cheldechedechal kmo, “Sel debekengii a uldesued el kirel a ulekrael er a Rubak e doltirakl er a moktek er Ngii el kired e kede mo nguu a klou el deureng … er a bai dultuil er a di klemedengei er kid.”23
A Osobel a betik a rengul er a ta ma ta el mekreos el ngalek
“E ngii a ngiltiterir a remekekerei el ngelekir, lou dersta er tir, e ulemekngeltengat er tir, …
“Me te … ngilai osengir el bedul a babeluades, … e milsterir a reanghel el me metengel riou … el liuekl er a ngau; e a [reanghel] … a mlo iliuekl er tirkal mekekerei el ngalek, … e a reanghel a ulemekngeltengat er tir.”24
A kuchais el kmo a omerollel a dersta er kemiu el ngelekel a Dios a dimlak lomuchel er a kot el eolt el blo mouteliil er ngii er a omechell, e diak bo lengemed sel lobutek a medam er tial klengar.
Bo de blechoel melbedebek el kmo a bek el reng el ngelekel a Dios a mei er a beluulechad el merael er a telutk lomerollel.25 Bo dongemedaol tir, e domecheliu er tir, e de blechoel loubeltikelreng el mo er tir. Sel mngititerir tirkal mekreos el ngalek el ngara ngklel a Osobel e mngesuterir er a diak a ulebengelel lomerollir, e ak yaksok er kemiu el kmo a Rubak a mo omekngeltengat er kemiu e chubelii a beltikereng me a kengei er Ngii el kiriru. El ngara a ngklel a Jesus Kristo, amen.