Ng Kmal Soak el mo Mesang a Templo

Rodam me a rodos er ngak, ak mereng a saul el obengkemiu er tial el kot el miting er tial klou el ongdibel. A rechad el mengedecheduch, chelitakl, me a nglunguuch a milskid a Chedaol Reng—ma reng er a llomes me a oureng.

Tial reng el kulmelchesuar er ngii a rirelak el mo dobedebekii se er ak kot el mo soiseb er a chelsel a Templo ra Salt Lake. Ak mle ngeasek el sechal. Di mle ta el demak me a delak a mle kldemek er sel sils. Chelsel a Templo, e te mlo stob e le chad el oureor er a templo a mle outkeu er tir. Ak milrael mo ruchei er tir, meng dingak el tang el telkib el taem.

A becheleleu a cheiul redil el obail er a klebokel el becheleleu el dores a mle outkeu er ngak. Ngulmes er ngak e klikmechur e mekekokil el melekoi, “Ak mengemedaol er kau el mera templo, e Brother Eyring.” Ak ulmedasu el kmo ngii a locha anghel eleng mle medengelii a ngklek. Ng dimlak kudengei el kmo a kekerei el babier el ngarngii a ngklek er ngii a bereked er a bilek.

Ak mle engelakl er ngii e mo stob. Ak kulmes el bedul rebab er tial becheleleu el tensio el rirellii tial delemerab el kmal mellomes el uai a blel blok el mo er a eanged. Ea chelsel tial taem, ea uldasu a mlera uldesuek a mle bleketakl el tekoi el uasei: “Ngak a mla ngartia el mellomes el basio er a uchei.” E ngdi mle mereched el mera uldesuek, el diak el otto ra ngerek, a ikakid el tekoi: “Ngdiak, kau a dirrekak a ta el bertiang. Kau a melebedebek er a taem ruchei er a omechell. Kau a mla er a chelsel a chedaol basio el uai tiang.”

A ikrel a ikal templo er kid, e kede loiang a tekoi el kmo “Cheledaol el mor a Rubak.” Ngak a medengei el kmo aikal tekoi a klemerang. A templo a chedaol basio el ocholta di beot el merkid a lsekum ngarngii a rengud el mo ngmai e klikiid el kirel.

A uriul er tial kot el sils e ak liluut el mo melchesuar ra osisiu el Chedaol Reng. A ruoll er a templo a uldimukl a bebil er a tekoi el mlo mengeald er a renguk, e smisichii el kmo a ikel mle chemolt a klemerang. Aikel blok kumelechesiu el ngar ngii a belkul el mer ngak el kirel a ngarmedak el taem, el ngii a mlo meral tekoi er a okeua el rak el ruriul lokiu a okedongall el mo mesiou el mla er a Rubak.

A kulmelchesuar ra osisiu el teletael se ra bok bechiil er a chelsel a Logan Utah Templo. A President Spencer W. Kimball a milruul er a omerenged. A bebil er a tekoi el lulekoi, eng milskemam tial olisechakl: “Hal me a Kathy, mkiei me sel mei a okedong, e dil bo el beot er kemiu a merael.”

Sera ledung a ikang el sesei el tekoi, e ak mlo ungil mesang a uldesuek, el ngarngii a chiro er ngii, el ngesachel el bukl me a rael el merael el mor bebul. A becheleleu el kakine a ngara katur er a rael el mo blechobech el kerekar el ngara bebul tial bukl. A becheleleu el blai a desang er a delongelel a ikal kerekar.

A uriul ra ta el rak, e ak mlo metebengir tial bukl sera demal a bechik a loltak er kemam loak tial rael. Ng mle ungil bleketakl sel kisang sera President Kimball a le bilskak sel olisechakl er a chelsel a templo.

Ser a ki bora bebul tial bukl, ea demal a bechik a mlo stob er a bita tial becheleleu el blai. Ng silbedemam el kmo ngii me a bechil a mo omechar er tial basio e ngii a soal ngkal ngelekel redil ma ngak a mo kiei er sel blirir a re okiak. Tir a mo kiei er a klou el blai, el di kmeed. E solang, chelsel a teruich el rak el kim kiei er tial klebokel el basio, ea bechik ma ngak a bek el sils el ki molekoi, “Ng kmal kired el oldeu a rengud el kiei er tiang, e leng diak de ngar tia el mo meketeket.”

A okedong a mlei el mla er a Church Commissioner ra education, el Neal A. Maxwell. Sel omellach el mla er a President Kimball el mo sebechel di “mo beot el merael” a mlo meral tekoi. Ng mle okedong el mo mecherei a kora ungil klengar e mo mesiou er a basio el ngii diak a ngeral kudengelii el kirel. A telungalek er kemam a mle keldmokl el mo mecherei tial ungil taem me a basio ele profet, el ngara chelsel a chedaol templo, el basio er a ocholt, a milsang a ngarmedal teletael el kemam a mlo keldmokl el kirel.

Ak medengei el kmo a re templo er a Rubak a chedaol basio. A moktek er ngak er a chelechal sils el mesaod a templo a mo melisiich a soal a rengmiu me a ngak el mo klikiid e keldmokl el kirel a betok el techall er a omeruul ra templo el ngii a mei er kid er a ngarmedal taem.

A denguu er ngak, sel kot el ngii a melisiich er a renguk el mo klikiid el kirel a omeruul er a templo a sel Rubak a dilung el kirel a chedaol el Blil:

Ng dilu el kmo a lsekum a Rechedal a mo mekedecherur a Blil el ngara ngklel a Rubak, e diak le bo er ngii a mekikiongel tekoi el mera chelsel, mellak el bol mekngit, ea Klebkellel a mo er ngii.

Ngii a mo er sei, ele Ngii a mo er a chelsel, ea rokui el klikiid el reng el mo er a chelsel a mo mesang a Dios.

“Eng di omko a blai a mo mekikiongel, e Ngii a diak el bol soiseb er a chelsel, me a Klebkellel a diak el bo er ngii, e le Ngii a diak el bo el siseb er a chelsel a diak el chedaol el templo.”¹

A President Russell M. Nelson milketeklii el merkid el kmo kid a sebeched el “mesang” a Osobel el ngara chelsel a templo el uai a kmo Ngii a diak el bo lengodech el chad er kid . A President Nelson a dilu el uasei: “Kid a Medengelii. Kede medengelii a Urerel me a Klebkellel. E kid a mo omechelang el mo melchesuar ra diak a ulebengelel el cherrungel el klengar er Ngii.”²

Omko kemiu malechub e ngak a mo er a templo el diak desal klikiid, eng diak el sebeched el mo medengei, lokiu a klisichel a Chedaol Reng, a ikel chedaol osisechakl el kirel a Osobel el sebeched el ngmai er a chelsel a templo.

Sel de klikiid el mo ngmai aikal osisechakl, a techeled a sebechel mo mukeroul lokiu teletael ra templo loureng, deurreng, e mo ungil omeroled er a chelsel a klengar er kid. Tial oureng, deurreng, e ungil a teleteled a ngar ngii el di kmal di okiu a chedaol ruoll el meruul er a chelsel a chedaol templo. Ngara chelsel a templo e kid a mo menglou a rengud el kirel a betik er a rengud telungalek el ngii a melemolem er a uriul er a kodall e melemolem el mo cherechar.

Betok el rak ra mla memong, er serak bisop, ea ngeasek el sechal a uletngakl er a ongtik el mo klikiid el kiei lobengkel a Dios ma retelungalek el mo cherechar. Ng di oureuangel louchais er ngak ra ikel ungil taem sera lobengterir a resechelil. Ak milcherei meng mengedecheduch. E mocha ouchais er ngak el kirel a tara omilil el bla er ngii, el mle klou a cherodech, eng di mle mereched el omelchesuar el sabisi. A kuleker er ngii el kmo me ngera dilubech. Ng dilu el kmo ng dilebedebekii a taem sera le kekerei el buik, el dengchokl er a ochil a delal, ea delal a ulemechull er ngii. Seikid el taem er a louchais er tial tekoi, eng lilangel. Ak dilu er ngii el kmo a ikel kudengei a klemerang: “A di tal rolel eng sebechem el mo omechelsuar sel reng ra diak a ulebengelel telungalek eng kirem el mo klikiid e olngeseu er a rebebil el mo nguu sel omerenged el chedaol ruoll ra templo.

Ng diak dodengei a delongelir a telungalek el ngara beluu ra redeleb malechub eng ngera mo er ngii er a uriul sel debekiis er a kodall. Eng di kede medengei el kmo a profet Elias a mlei el blel yaksok el mo omult a rengrir a rechedam el mo ra rengalek me a rengalek el mo er a rechedam .³ E kid a medengei el kmo a diak a ulebengelel deurreng a ultuil sel blak a rengud el ouchais ra osisiu el deurreng el mo er a rebetok el chedad.

A kumelchesuar ra osisiu el klemeriar reng el mo siotai er a rekiei el rechedal a telungalek me bol sorir el mo klikiid el mo nguu e oldanges a chedaol ruoll er a omerenged el ngara templo. Tiang sel telengtengil sel yaksok el mo mengideb er a Israel er a uriul klebesei er a re dirk ke kiei me a tirkel mla mad.

A tara kot el ungil techall sel rechedal a telungalek a dirk mekekerei. Te milechell el obang a Llemesel a Kristo el sengkir. Ng rulleterir el mo medengei el kmo ngera ungil e ngera mekngit. Sei a uchul, me sel lesang a templo ma lechub eng siasing er a templo eng dolmii a klemeriar reng el mo klikiid e mor ngii a techelir el mo soiseb er a chelsel ra tara klebesei.

Ng mei sel sils, sel ngeasek, e te nguu a babier er a mo er a templo e mo metecholb el omtechei er a mla mad el ngara chelsel a templo. Chelsel tial teletael, ea rengrir a merael mo klou el kmo a chedaol ruoll er a templo a melutk el bedul a Osobel me a Tngakireng er Ngii. Meng mo ngarngii a rengrir el olngeseu er a chad el ngara belurir a redeleb a techall el mo klikiid er a klengit, ea rengrir a mo klou el olngeseu er a Osobel er a chedaol Urerel el omekngeltengat er a ngelekel a Demad er a Babeluades.

Ak mla mesang a klisichel tial teletael el ngildechii a klengar er a ngeasek el chad. Mla memong el rak e ngak a ulebengkel a ngelekek el redil el mo er a templo ra iieta sils. Ng mlo di chimol medechel el mo omtechei el kirir a mla mad er a blil a techolbechelid. Te uleker er a ngelekek el redil mal sebechel el kiei el telkib e bol rekui a chedaol ruoll el kirir tirkel rokui el chad el ngklir a mla mekedmokl. Ng dilu ochoi.

A kulmes sera kekerei el ngelekek el redil a lomakes el soiseb er a chelsel a blil a techolbechelid. A techolbechelid a ulemuchel. A ralm a mereberebt er a medal ngkal kekerei el ngelekek el redil sel tal bel dum er bab. Te melemolem el oker er ngii, “Ng sebechem el lmuut el remuul a bebil?” Meng bek el taem eng kmu choi.

Ak chedam el kora mle bekikl, ea kumechelang el loureng me bol sebechel diak loruul a lmuut el betok. Ngdi ak liletkii sel dechal a rengul sera loker ngii alsekum eng sebechel lmuut el remuul a bebil e semeriar sel otto ra ngerel sel du, “Choi.” Ng kiliei el mocha rokir a mlo ulebongel chad el ngara belsachel lenguu a klengeltengat er a techolbechelid el ngara ngklel a Jesus Kristo.

Sera kurael el tuobed er a templo lobengkel er sel kesus, ea kulmedasu a ikel kbiles. A ngalek a milengai el morbab e mengodech er medak sera losiou er a Rubak er a chelsel a Blil. Ak dirk lotkii sel reng ra llomes me a budech er a kimdak el merael el mla er a templo.

Mla cheuib a betok el rak. E ngii a dirk kmu choi el mor sel ker el mla er a Rubak el kmo ng sebechel lmuut el remuul a betok el Kirel ngii mesel le sal meringel. Tiakid sel urerel a templo el sebechel ngodechid e mengider er kid. Tiakid a uchul ma urungulek el mo er kemiu me a rokui el betik er a rengum el telungalek er kemiu a uasei bo mukeroul ra klemeriar reng me a duch el reng el mo klikiid el mo soiseb er a blil a Rubak sel bol sebechem.

Ngii a soal el mo outkeu er kau erisei. Ak meluluuch me bel sebechemiu el melasm el meruul a rengrir a rengelekel a Chedam er a Babeluades mel bo er a templo, me bo el sebecherir lomelchesiu el kmeed er Ngii, e kemiu a mo olengit er a re ucheliu me bol sebecherir el mo Obengkel me a kemiu el mo cherechar.

A ikal tekoi er tial chelitakl a sebechel a ikel domdasu me a domelchesuar.

Ak ouchais er a klaumerang er ngak el kmo kid a ngelekel a oubeltikelreng el Chedam er a Babeluades. Ngii a ngileltii a Betik er a Rengul Ngelekel, el Jesus Kristo, el mo Osobel e Osobeled. A di tal rolel el deluut el mo kiei el Obengterir me a telungalek er kid a okiu a chedaol ruoll er a chedaol templo. Ak ouchais el kmo a President Russell M. Nelson a olab e ousbech a rokui el kiis er a priesthood el rullii a diak a ulebengelel el klengar meng mo sebechel mo er a rokui el rengelekel a Dios. Ak dirrek el olecholt er a klaumerang er ngak loba ngklel a Jesus Kristo, boluaisei.