“Osisechakl er a Ebangkelio er Ngak”
A osisechakl er a ebangkelio a dodai er a suobel el kirel a melemalt lusbechellel a mimokl lomelilt er a chad.
Sera klou longdibel er a Ikelesia er a Jesus Kristo er a Uriul-klebesei el Santo er a October 1849, e a Elder John Taylor er a Chelechad er a Teruich me a terung el Apostol a mlokedong el mo nguu a chesmerel a beluu er a France el kirel osischeklel ebangkelio er a Jesus Kristo. A urerel a mle uldimukl a omelchesel aikel mle kot el babier er a Ikelesia er a tial beluu. A Elder Taylor a kildmeklii e lilchesii a babier er sera 1851 el nger er a betok el ker el kirel a Ikelesia. A mocha er a ulebongel er tial babier, e a Elder Taylor a mlo dobedebekii tiakid el teletael:
“Sesei el rak ra memong, er a Nauvoo, e a chad el kurrenges, e ngarbab el chad, a uleker er a Joseph Smith el kmo ng mekera e ometebechel er a rekmal betok el chad, e melemomel lurrekodel a kmal ungil omeruul; e uase tia osisiu el taem eng kmal meringel er tir a meruul er ngii er a ngii di el ker. A Mr.Smith a dula el kmo ng kmal beot. ‘Ng mekerang?’ nguleker ngika el chad; ‘le denguu er kemam eng kmal meringel.’ A Mr. Smith a ulenger, ‘Ak di osischekelterir a meral osisechakl, e tir a di tir lomtebechel er tir.’”1
Nglunguchek me a Chedaol Reng bo lolisechakl e loldak er kid er chelechal bo kumeketakl el kirel a klou el ultutelel osisechakl er a mla moluut el ebangkelio er a Jesus Kristo.
Osisechakl
A Rubak a ulechotii er a Profet Joseph Smith el kmo a re elders, baderei me a resensei er tial ikelesia a mo olisechakl a teletael er a ebangkelio, el ngii a ngara Biblia me a Babier er a Mormon, el ngii a cherrengelel ebangkelio.2 Ng dirrek a Rubak el millekoi el kmo a Ruriul-klebesei el Santo a kirir el mosisechakl a tekoi, me a teletael, me a suobel, me a llach er a ebangkelio, er a rokui el tekoi el melutk el kirel a rengedel a Dios, el ngii a kiriu el mo medengei.3
Meng kmal bleketakl, el osisechakl er a ebangkelio a dodai er a suobel el kirel a melemalt lusbechellel a mimokl lomelilt er a chad. A osisechakl a mengai er a dmolech el klemerang er a ebangkelio e meskid a ulekrael me a teletael sel dolemolem el ngara rolel a telbiil.
Okesiul tiang, aikel kot el kldei el Tebechelel a Klaumerang a meketakl osisechakl er a mla moluut el ebangkelio er a Jesus Kristo: a teletelel a Kle Dios el ngara sel kot el tebechelel a klauemranga telmellel a Rebetel a Adam me a Eva er sel ongerung el tebechelel a klaumerangme klengeltengat el mei lokiu a Tngakireng er a Jesus Kristo el ngara sel longedei el tebechelel a klaumerang4Ea ongeua el tebechelel a klaumeranga meketakl aikel kot el osisechakl—a teletael a dultuil er a klaumerang er a Jesus Kristo me a ouchel reng—me a sel kot el chedaol ruoll er a priesthood el uchul e a Tngakireng er a Jesus Kristo a morngii a klisichel er a klengar kid.5
A Llach er a Ulekereuil a bedenged a tara okesiul a bleketakl el osisechakl. A kulengit me bo modengei aike el bades el ngara uchelel a bliongel 89er a Doctrine and Covenants:
“Tia mlei er kid el osisechakl el obengkel a yaksok, a sebechel lousbech er ngii a remechitechut el mo lmuut er tirkel kot el mechitechut el santo, el tir ngii e sebecherir el okedongall el resanto.
Mesa, uaisei, a Rubak a kmu el kmo: chelsel kekka er a mekngit me a telael el meruul e mo ngar ngii er a rengrir a rechad er a ikel ulebongel el sils, ak mla mellach er kau, e ouchais er kau, el lomeskau aikal tekoi er a llomes lokiu a ocholt. 6
A ulekrael tekoi lokiuellel a meskid a teletael el kirel a bedenged er a tech me a reng e ouchais el kirel aikel klengeltengat el bo dengai lultuil er a klaumerang er kid er a ikal osisechakl.
A omesubel, klemedengei er kid, me a otirekled er a osisechakl er a ebangkelio a smisichii a klaumera er kid er a Osobel, e dolechii a ultiled er Ngii, e sioati a betok el klengeltengat me a chedaol sengk el mei er a klengar kid. A otirekled er a llemalt a dirrek el ngosukid lomes lengelakl er sel soad er chelechang e meskid osenged el kirel a diak a ulebengelel klemerang er a chelsel a kakerous el teletael el deseluk er a chelsel, me a ringel, uldasu, me a ikel bo decharm er tial klengar er a chutem.
Okesiu er a Chelechal Taem er a Bleketakl el Osisechakl
A tekingel a Profet Joseph Smith el kirel osischeklel a meral osisechakl a locha tara mle blechoel lolisechakl er ngii el tekoi. E sebeched el metik okesiu er tial ulekrael teletael lokiu tirkel mla metutk el mesiungel a Rubak er a chelechal sils.
Osisechakl el kirel Olibesongel Tekoi
A President Dallin H. Oaks a milngedecheduch er a chelsel a klou longdibel er sera 1998 el kirel a ngerchelir a roba Aaronic Priesthood el kirel a kedmeklel me a omerusel a sakrament. Ng milsaod el kirel aikel teletael el diak bo longesang er kide dilu el kmo a oba Aaronic Priesthood a diak el kirel mechei a teletelel a lechub a blekerdelel mo uchul ongetikaik el mo er a tara chedal a Ikelesia er a longull er ngii a lechub e ngomekbeches a telbilel. A President Oaks a dirrek el ulemeklatk el kirel osisechakl er a ungil teletelel, klungiolel, omengull, me a chetengakl.
Ng mechas a rengud, le President Oaks a dimlak el besterir a rengeasek el chad a kemanget llechukl el tekoi er a ikel kirir me a diak el kirir el meruul. Ng bai, silodii a teletael lultuil er a uldasu el kmo a rengeasek el sechal me a rechad er a blirir me a resensei a sebechir el mo ultuil er a ungil luldesuir me a ulekrael el mo oltirakl aika el teletael.
Ng silodii el kmo, “Ng diak bo kumaches a komakai llach, leng kakerous a teletael er a bek el ward me a branch er a Ikelesia er a beluulechad le chimol llach a locha kuk diak el chatter el mo er a tara basio malechub eng metacherbesul tekoi er a tang. Ak bai, mo dulii a tekoi lultuil er a osisechakl. Omko rokui el chad a mo medengelii tial teletael e mo oltirakl er ngii, eng diak a kmal belkul a llach. Alsekum a llach me a omellach a kirel mo er a dersta el chad, e a roungerachel aikel basio a sebechir el kudmokl, el chatter er a osisechakl me a teletael melutk el kirel.”7
Teletelel Olengchelel Chedaol Sils
Sera April 2015 el klou longdibel, e a President Russell M. Nelson a ulsisechakl er kid el kmo “a Chedaol sils a klebokel sils.”8 Ng dirrek el silodii el kmo ng mekera e ngii a mla mo medengelii a beot el teletelel omengull er a Chedaol sils.
“Kede mekera donguller a Chedaol sils? Sera kngeasek, e ak milsuub a urerir a rebebil er a rechad el tir a mla lmuches aikel tekoi el kirir el meruul me a ikel diakel kirir el meruul er a Chedaol sils. Uriul taem e ak mlo medengei lokiu chedaol llechukl el kmo a tekoi el kuruul me a omerellek er a Chedaol sils a olangcher a deleuill er ngak me a Demak er a Babeluades. Tiaikid el klemedengei a uchul, eng diak kusbech a llechukl el kirek me a diak el kirek el meruul tekoi. Sel kumdasu el kmo tial omeruul el bocha kuruul er ngii ngungil er a Chedaol sils, e ak blechoel loker ngak, ‘Ngera lolangch a soak el msa Dios?’ Tial ker a ngildechii a uldesuek el kirel a kuruul tekoi er a Chedaol sils.”9
A beot eng di mesisiich el keril a President Nelson a smisichii osisechakl e torob a rokui el rraureng el kirel a kmal belkul e ngera kired el meruul lolchotel omengull er a Chedaol sils. A keril a smodii a teletael el ngii a mo omekngeltengat er kid el rokui er a chelsel a kakerous el tekoi dengarngii.
Osisechakl el Kirel a mo Mui el Kongei er a Dios me Longetikaik er Kid
Elolem el buil er a memong er a taem er a klou longdibel, e a President Nelson a silodii a klemeriar reng er ngii er a bo lodengelii a kuk tara belkul a tekoi el Israel. Ng silbedid el kmo ng mlo mechas a rengul er a bo lodengei el kmo “a tekoi el Israela melutk el kirel a chad el meral ngara rengulkongei me a Dios a mo kot el ngaruchei er a klengar ngii.”10 E sola President Nelson a milasech a bebil er a meklou a belkul tekoi lesiluub.
A klemechel el kirel meral kongei me a Dios bol kot el ngarucheia meang lokesiul osischeklel a meral osisechakl me bol sebeched el di kid lomtebechel er kid. Meng uaia klemechel kmo kede rullii Chedaol sils el mo kot lungil sils, e a President Nelson a dilu bebil er a ker el ngii a okesiu e teletael el mo er a dersta er kid.
“Ekauke semeriar el mo mecherei a Dios el mo mesisiich er a chelsel a klengar kau? Ngarngii er a rengum el nguu a Dios el mo kot el klou a ultutelel er a klengar kau?”
Meng melemolem:
“Ka momtab a klengeltengat el bom ngai lokiu a blakereng er kemiu. A lak ko bechiil eng di kosiik er a mo kldemem, e a blakereng er kau el mo ‘teloi er a Israel’ a mo ngosukau er ngike el bom kasisiik el chad.
“E alsekum e ke bechil a chad el kuk mla tomall a telbilel, e a blakereng er kau el mechere Dios me bol mesisiich er a klengar kau a mo ngosukau me a telbilem lobengkel a Dios a di melemolem. A Osobel a mo suumech a telemall el rengmiu. A babeluades a mo obok sel mosiik el kmo ke mekera e melemolem el merael bedul uchei. Ng diak bo el rrau a rengum a lechub e molchedech.
“A lengarngii a rraureng er kau el kirel ebangkelio a lechub a Ikelesia, e alsekum e ke mecherei Dios meng mo mesisiich, e kau a mo mukrael el mo ngmai a mui el klemedengei, me a diak a ulebengelel klemerang el mo omekrael er a klengar kau e ngosukau el mesisiich el ngara rolel a telbiil.
“E sel bom chau ongetikaik—luldimukl a lemei aikal ongetikaik sel msal mesaul a rengum a lechub e komelchesiu el sabisi a lechub eng rraureng—e molatk el kirel a blakereng sel molilt el mechere Dios me bol mesisiich er a klengar kau me a dirrek sel molengit er Ngii me bo lolisiich er kau.
“Sel bol klou er a rengum a mechere Dios me bol mesisiich, e bom teloi er a Israel, e a betok luldasu a mo beot. Betok el mondai a mla mo diak a belkul mondai! Ke medengei el kmo ng mekera omongedmokl er kau. Ke medengei el kmo ngera komes e ngera ke menguiu, e ker a mchoit a temem er ngii, e te ngera mobengterir. Ke medengei el kmo ngera soam el mo kudmokl. Ke medengei el kmo ngera el teletelel a chad a soam el mo er ngii.”11
Ka motab a betok el meklou a belkul tekoi me a teletael er a klengar el sebechel mokdubech omko kede nguu a Dios el mo ruchei: kasisiik me a chebechiil, kerid me a rraureng er kid el kirel ebangkelio, ongetikaik, kedmeklel a bedenged, aikel domes me a donguiu, basio el dengarngii, me a rechad el deteloi er tir me a lmuut, el bebil er a betok el tekoi. A keril a President Nelson a smisichii a beot el osisechakl el ngii a meskid a ulekrael er a klengar kid e rullid el mo sebechel di kid lomtebechel a klengar kid.
Kmal Kekerei Longeu
A Joseph Smith er a lekelebus er a Liberty Jail, eng milluches a babier el mo er a rechedal me a remengeteklel a Ikelesia lulmeklatk er tir el kmo a kmal klou el bilas a di ultuil er a kmal kekerei longeu er a taem er a ses el eolt, e merael lobengkel a eolt me a chedesaoch.12
A “ongeu” a besiull lobengkel a bebil er a klekedall lomesiull er a bilas a lechub eng chert. A “omesiull lobengkel a eolt me a chedesaoch” a melutk el kirel a besiullel a bilas meng melemolem el merael e diak el meuitech er a ringel daob.
A osisechakl er a ebangkelio a uaia besiull er a bilas el mo er a kau me a ngak. A meral osisechakl a ngoikid el mo metik er a rael e dechor el diak demesim, el mesisiich, meng diak derebet e desiseb er a iilkolk me a rraureng er chelechal taem.
Kede kmal mla mukngeltengat er tial klou longdibel el mla suub a diak a ulebengelel osisechakl lokiu a rtelutk el mesiungel a Rubak. Chelecha, e a ngerchelel a dersta er kid a mo omtebechel er kid loltirakl aikel klemerang el tir a mla ouchais.13
Klaumerang
A President Ezra Taft Benson a ulsisechakl el kmo, “Aika el merael mei lelolem el buil, e a babier er a klou longdibel el [Liahonaa kirel mo obengkel aikel llechukl el bo blechoel monguiu.”14
Me ngokiu a rokui klisischel a renguk, e ak siotai er kid el rokui el mo mesuub, e kiei, e soad a melemalt el osisechakl. Ng di tal klemerang er a ebangkelio a sebechel rullid el mo ngara deureng e meruul aikel rokui el sebeched el remuul” e mo melemolem el ngara rolel a telbiil me bo desa rengedel a Dios, me a chimal mo mocholt el kired.15
Ak medengei el kmo a osisechakl me a suobel er a ebangkelio er a Jesus Kristo a kot el dodai e chimol uchul a ulekrael er a klengar kid me a diak a ulebengelel deureng er tial klengar me sel diak a ulebengelel klengar. Chelechal Sandei er a klebokel el Baskua, e ngak oba deureng e sioning el kmo a ngar el Osobeled a ngii a dodai er a ikal klemerang. Ak olecholt er a klaumerang er ngak el oba chedaol ngklel a Rubak el Jesus Kristo, amen.