Fare N’en Nthabi Ga’fan ningan Fanay

Fapi thin nib thothup e weliy mornga’agen ba mo’on nib fal’yangren nib pilung mab fla’ab ni, mil i yean ngak Yesus, me garbug nga but me, fith u fithik’ e yul’yul’, ni fith ngak fare Masta, mang e thingar gu rin’ me yag e yafos ndariy n’umngin nap’an ngog?” Tomuren nike yaen u dakean fapi motochiyel nike rrin’ u fithik e yul’yul’, me yoeg Yesus ko fare mo’on ni nge pi’ ni chuway’ urngin e chugum rok, me fek pilwon nge pi’ ngak e girdi’ nib gafgow, me fek e tin nibe tomal nag, me leak ir. Biney nib tumgin ngak fare pilung nib fal’yangren e ligin ni—dariyfan ni aram fani ba’adag ni ngeyag ngak e yafos ndariy n’umngin nap’an—e thil e tafney rok nrib pay, me yan nike kirban’, ni ga’ar fare thin nib thothup e, “ya rib pire’ ban’en rok.”¹

Magagiyel, ni biney e ba fanathin ni mornga’agen e fla’ab nge tin nib tu’uf ko girdi’ nib gafgow. Machane ku woed ba yat ni mornga’agen e gum’ircha’ey nib polo’, tu’ufeg ndani mudugil ko ngongol rodad nib thothup. Ba’ fa dariy e fla’ab, gadaed gubin e ngad bad ngak Kristus ni demuturug rogon ma ngaed yul’yul’ gaed ko fare gospel Rok ni woed rogon ni rrin’ ere mo’on ney nib fal’yangren. Ulan e ulung ko fal’yangren e daba’, ngad doged ni gadaed e “bang riy ni ga’angin.”²

Woed rogon e thin rok C. S. Lewis nibe tafney nag Somoel nibe yoeg ngodaed ban’en ni woed e biney: “da bug … e tym rom … [fa] salpiy rom … [fa] murwel rom [nri woed] ni gag e [karimus] ni gu ba’dag gur. [Binem e gek’iy e gabe thetha’ab ninge dummal.] Da bug ni nggu thetha’ab papa’ngin u roy nge aram, gu ba’adag … ni ga’angin [yang] ninge mul nga but. [Nge binem e nguwol.] Da bug ni nggu ker [nag], fa gu semen nag, fa gu [tharay] nag. [Gu ba’adag] ni ngan luuf. [Woed ni, gu ba’adag ni ngam] pi’ [ngog] ga’angim nib polo’. … [Ma] bay gu pi’ ngom reb gur nib be’ech. Woed ni, bay gu pi’eg ngom: tirog … ban’en e bay i [mil fan ngom].”³

Gubin nra non ko biney e general conference e gubin nra yoeg, nib thilthil rogon, n’en ni yoeg Kristus ngak fare mo’on nib fla’ab: “Mub ngak e Tathapeg rom. Moy ni gubindad nge gum’ircha’ey nib polo’. Fek e kruth rom, ni dariy’fan rib gaa’ e tomal riy, nge mu Lek.”⁴ Ma yead ra yoeg ni pin’ey ni yaed manang ni ulan gul’il’ungun Got, e dariy e tin ba’aray riy nikemus ni barba’, dariy e tabab nge tael riy, ma dariy e sul riy nga tomur. Ngak e pi’in ni kar fithed ni ngar k’eyag e pilibthir roraed ni kar m’aed fa fingichiy girdi’en e tabinaw roraed, fulweg rok Yesus e ba tamilang ma dariy e marwar riy. “Reb e gidii’ ra rrin’ binem,” ni keyog. “En nra tabab i gi’ e but’ u milay’ mi i changar nga keru’ e dabi yib fan ko gagiyeg rok Got.”⁵ Napan ra fith ngodaed e pi’nen nib mo’omaw’, ma mus ni ra tugthin e pi’nen e gum’ircha’dad ma ba’adag, mu pugurangad e micheg gadad ma fal’eg ko fare fan ku Kristus e thabi tolang ko pubin ba’nen u yafos rodad. Aram rogon nike micheg Isaiah ngodad nribay e ran’ey “ndariy salipiyen nge pilwon,”⁶—ni aray rogon—thingarda fal’eged rogon daed, ni yibe yoeg e thin rok T. S. Eliot’s, ni bay pilwon “ni dani achig ko gubin ban’en.”⁷

Riyul’, gadaed gubin ma bay kirbin daed fa tin mornga’agen daed ni ra taleg daed i rrin’ e biney ni ngan polo’ nigey nib tothup ko mit ney e murwel. Machane Got e ir e Chitamanagdaed me rib chag nag i n’agfan nge pagtalin e denen ni kaed kalngaen’ gaed riy, biney e sana ni bachan ni bo’or yay ni ke gay rogon ni nge n’agfan rodaed. Ma urngin e ngiyal’, ma bay e ayuw nib thothup ni fan ngodaed ni gubin ndemuturug e awa ni gadaed ra thamiy ni ngaed thiliyegned e biney e ngongol. Got ni “pangeg gum’ircha’en” Saul.⁸ Ezekiel ni pining urngin girdi’ nu Isreal ni kakrom ni ngar paged e pi n’en ni ku ur rrin’ed “mi gimed … tay lanin’med nge gum’ircha’med nike be’ech.”⁹ Alma ni pining ni “thil lan gumʼirchaʼen”¹⁰ nra ligin ya’el ninge ga’, me Yesus e fil ni “ndariy be’ nrayag ni nge guy e gin nsuwon Got ni fa’anra dab ni gargelnag bayay.”¹¹ Magagiyel ni ra ngan thil min par ni yib thothup ni gubin ngiyal’ e reb e tawa’ath rok Got ngak e pi cha’en ni yaed ma gay rogon e biney.

Pifagar, ulan e ngiyal’ chiney gadaed be piryeg’ed demtrug e miit e kii’ nge kii’ nib achigchig, yang nge yang nib achigchig, bee’ ura’ nge guyrong e guy ko bee’ uram, nge bay bo’or e cham ko gubin pi’ney. Rayog ni ngaed fithed daed ko fa’anra “tolang nge bin thothup”¹² e yafos, ni ngan fanay e thin rok President Nelson, e woed ban’en ni rayag ni ngaed gayed rogon? Nap’an nran rrin’, ma gadaed ra rrin’ ni bay u wun’daed fare ngiyal’ ulan fare Babyor ku Mormon ni fith fapi girdi’ min fulweg rogon e binem e duwer ni rib puluw rogon:

“Me yibi buch ni dariy e maleʼeg thin u fithikʼ gubin e gidiiʼ, u lan gaʼangin yang fare nam … ni bachan e fare tʼufeg rokʼ Got ni bay u lan gumʼirchaʼen fapi gidiiʼ.

“Ma dariy e moʼowaenʼ, ara togopluw, … ara ba mite dirngalen e galong; ma rriyulʼ ni dakuriy ba ulung i gidiiʼ ni aram fini falfalaenʼ ngab yang u fithikʼ gubin e pi gidiiʼ ni sunmiy Got nga paʼ.

“Dariy e moroʼroʼ, ara piʼin ni tamathang pogofan, ara bay reb fapi Lamanites, ara beeʼ u ba ulung ni-(ites), ya yaed ba taʼareb, ni fapi bitir rokʼ Kristus, nge piʼin taferaed fare gilʼilungun Got.

Ma rib felʼ waʼathraed!”¹³

Mang e kiy ko rogon e biney e par, nib falfaln’uy ko yafos? Bay u roy nikan yoloey ulan fapi ni ta’ab bugithin: “fare tʼufeg rokʼ Got … ni bay u lan gumʼirchaʼen fapi gidiiʼ.”¹⁴ Nap’an fare t’ufeg rok Got e ra dugliy rogon fare yafos rodaed, rogon e tha’ rodaed ngodaed nge rogon e thamtham rodaed ko gubin urngin e girdi’, ma fapi ngongol nima palog nagdaed, fithingan e girdi’ nde fel’, nge fo’od nag e girdi’ u but’ e ra m’ay, ma ra ga’ e gapas. Iraray e n’en ni buch ulan fare Babyor ku Mormon. Ma dakriy e girdi’ ni Lamanites, fa Jacobites, fa Josephites, fa Zoramites. Dakuriy mit e “-ites” ni kabay. Fapi girdi’ e kemus ni kar feked nga dakean raed ta’arab e ngochol. Yaed gubin, nikan noeg, ni yimang raed ni “fapi bitir rokʼ Kristus.”¹⁵

Arogon, gadaed be weliy fare bin somm’on ni th’abi ga’ e motochiyel ni pi’ ngak e girdi—ni ngan t’ufeg Got ko gum’ircha’ey nib polo’, ni gathi kemus ni buchiyang fa kemus ni ta’abochingiyal’, ere, u polo’ i gum’ircha’dad, gelingdaed, ganop, nge ‘angin rodad.¹⁶ Biney e tu’ufeg rok Got e ir fare bin somm’on ni th’abi ga’ e motochiyel ulan e fayleng. Machane bin th’abi ga’ e riyul’ u fayleng e gadaed bt’uf rok Got nrib puluw ni aram rogon—ko gum’ircha’ey nib polo’, ni gathi kemus ni buchiyang fa kemus ni ta’abochingiyal’, u polo’ i gum’ircha’en, gelingen, ganop, nge ‘angin Rok’. Ma napan e gelngin e pin’ey u gum’richa’en nge gum’ircha’endaed e ra mada’ ni danir talag, ma bay gelngin nib thothup nra chub, gelngiy nibay. Me buch, ni woed ni yoloey Teilhard de Chardin “ni [yaen] l’agruw yay ulan e cheppen e fayleng, mo’on e ra pire’eg e nifiy.”¹⁷

Ma fin aray, ni kemus ni aray, fin nrayag ni ngan ayuweg fare bin l’agruw e motochiyel ni th’abi ga’ nga rogon ndariy be’ fa to’ogor. Fa’anra bt’uf Got rodaed ma gadaed be gay rogon ni ngan yul’yul’ ngak, ra pi’ ngodaed fare gelngin, fare ga’angin, fare murwel, nge rogon ni ngan tu’ufeg e buguliyiror rodaed nge rogdaed. Ma rriyulʼ ni rayag ni gadaed ra yoeg biyay, “I gidiiʼ ni aram fini falfalaenʼ ngab yang u fithikʼ gubin e pi gidiiʼ ni sunmiy Got nga paʼ.”¹⁸

Walageg, gube meybil rangad gelnag ko e pi’nen ke mathmit e mo’on nib fal’yangren mab fla’ab, me fek e kruuth ku Kristus, demtrug ko e gafgow, dariy’fan ko e magawon nge ena puluwan’ riy. Gu pii’ e m’ag rog ni napan ngad micheg me leak Ir, e wo’ ra, u ta’areb fa reb rogon, yib chuchugur ko e ban’en ni bay rachangalen nge e ya’an ko kruuth nib Roman. Demuturug urngin e fla’ab rok fare mo’on nib pilung mab bitir, ya dani ga’ e fla’ab rok ni nge chuway’ ngak fapi pow, ni ku aram rogon ndabiyag rodaed. Ya fare tawa’ath ningan thapeg fare n’en nthabi ga’fan ningan fanay—fare tawa’ath ko fare yafos ni manechubog—baga’fan ni kan fith ngodaed ni ngan par u dakean fare pi’ i kanawo’ min laek fare Prist nib Tolang ni’ir e Sensey rodaed, ni’ir e Tu’uf ko Rran, ma Non ni Pa’daed, nge Pilung. Gube micheg ni woed rogon ni yoeg Amaleki ni kakrom ni gadaed gubin ni thingar da “piiʼed [gadad] ni poloʼ nib maligach ngakʼ.”¹⁹ Ko biney nran athamgiliy, thapeg nib thothup, kad don’ed tangin:

U dakean fithingan Yesus Kristus nib thothup, amen.