“Kab Gel Fenag T’uf Rom Ngarogon ni Gub T’uf Rok?”

Ko November 2019, i gag nge tafagar rog e gu warow ko farengi Binaew nib Thothup. Nap’an u rom, ma gamow fil mornga’agen fapi thin nib thothup ni bay ni weliy fare yafos rok Yesus Kristus. Reb e kadbul ngay ni gamow ba sak’iy ko gin ni leel’oech nib ngeak ko farengi Day nu Galilee ko gin ni sana buch ni i moy Yesus riy ni mada’ nag fapi gachalpen u m’on ko Foskoyam’ ni tay.

Tomuren e Foskoyam’ ku Yesus, ni woed rogon ni kad be’eged ulan e guruy ko John 21, Peter nge ku boech fapi gachalpen e ra fita’ gaed ko re balayal’ nem ma dani fel’ wa’athenraed.¹ Nap’an e kakadbul ngay, mar guyed ba mo’on nib sak’iy u dakean e but’ nu arow me yoeg ngoraed ni ngar roned e nug roraed nga barba’ e bowoech roraed. Me gin owchrad ngay, ni yugu aram rogon ni pire’ e nig ni bay u lan fare nug.²

Ma rib pay nra nanged ni fare mo’on e Somoel, mi yaed gur ngar fingichiyed.

Nap’an nra girngiyed fare nug nga dakean e but’ nu arow, nib sug ko nig, me ga’ar Yesus, “Mired ngam abichgad.”³ Yoeg John ni “nap’an ni kar mu’gad ko abich, me ga’ar Jesus ngak Simon Peter, Simon, ni fak Jonas gur, kab gel fenag t’uf rom ngarogon ni gub t’uf rok?”⁴

Nap’an ni gub sak’iy ko rigi n’em u dakean e but’ nu arow, me yib ko tafney rog ni fare duwer ni fith fare Tathapeg e reb e duwer ni th’abi ga’fan ni sana ra borran ngay mara fith ngog. Woed ni ku rung’ag laman nibe fith, “Russell, kab gel fenag t’uf rom ngarogon ni gub t’uf rok?”

Ma yib ko tafney rom ko mang e re n’en nibe yip fan Yesus nap’an ni fith ngak Peter, “Kab gel fenag t’uf rom ngarogon ni gub t’uf rok?”

Biney e duwer ni bay rogon ngodaed ko pi rran rodaed, bay ni bayi fith Somoel ngodaed mornga’agen fani yo’or e magawon rodaed nge rogon e pi n’en nib fel fab kireb nibe yib ngodaed nge ngiyal’rodaed. Bay nra fith ngodaed ni fa’anra bt’uf rodaed ko tin nu fayleng ban’en. Biney e bay ni ba duwer ni mornga’agen e tin ni ri th’abi ga’fan ngodaed, mini’ e gadaed ma lek, rogon e tha’ rodaed ngak e tabinaew rodaed nge pi buguliyiror rodaed. Fa bay sana be fith ko mang e pi n’en nima pi’ e falfalaen’ ngodaed nge tin nib falaen’daed ngay.

Tin nu fayleng ban’en e ma pi’ e tin nibe falaen’daed ngay, falfalaen’, nge gapas ni pi’ fare Tathapeg ngak fapi gachalpen ma ki pi’ boech ngodaed? Karimus ni ir e rayag ni nge fek i yib e tin nra falaen’daed ngay, faflalaen’, nge gapas u dakean e t’ufeg rodaed ngak ma yibe fol ko fapi machib rok.

Uw rogon nrayag ni ngaed fulweged e biney e duwer “Kab gel fenag t’uf rom ngarogon ni gub t’uf rok?”

Nap’an ni gadaed ra pire’eg fan e biney e duwer, ma rayag ni ngaed manged girdi’en e tabinaew nib mangil, buguliyiror, girdi’ ko nam, nge girdi’en e Galasia, nge pi fak Got ni pbin nge pumo’on.

Duw rog, ma bo’or e gaameyag ni kug un ngay. Gu manang ni oran med e manang e ke guy e tin ni gube guy. Nap’an nran weliy mornga’agen facha’ u tabinaew nike yim’ fa fare tafagar, ma facha’ nima non e gathi ma weliy mornga’agen ga’angin e nu’un rok facha’, urngin e karo nibay rok, fa urngin e salpiy ni bay u bank rok facha’. Ma gathi yima weliy mornga’agen e yoel rok facha’ nike post nag ko internert. Oran bo’or e gaameyag kug un’, e baga’ ni yima weliy mornga’agen e tha’ rodaed nib tu’uf ngak facha’, pigpig rodaed ngak e girdi’, tin nike buch ma kan fil, nge rogon e tu’ufeg roraed ngak Yesus Kristus.

Dam mu kireb nag e thin rog. Dagur yoeg ni nu’un ni fel’ fa karo ni fel’ e ba kireb fa yoel ko social media e ba kireb. N’en ni gube yoeg e ran ni tomur riy, tinem e dani ga’fan ni woed fare t’ufeg nag fare Tathapeg.

Nap’an ni gadaed ra t’ufeg min lek, ma aram ni bay e mich rodaed ngak. Kalngaen’ gaed. Min lek wa’en min tawfe min thapeg fare Kan ni Thothup. Ma gadaed athamgil nga mada’ ko tomur min par ulan fare pi’ i kanawo’en e motochiyel. Ma gadaed n’agfan e kireb rok girdi’en e tabinaew nge buguliyiror ni yibe pag e fananikan nibay u gum’ircha’ey. Ma gadaed gay rogon ngad ayuweged fapi motochiyel rok Got. Ma gadaed gay rogon ni ngad fol gaed. Ma gadaed fal’eg e mag man tay chiylen fapi motochiyal. Ma gadaed liyor ngak e pi chitamangindaed nge chitiningindaed. Ma gadaed tay nga orel e tin nu feylang banan nib kireb. Ma gadaed fal’ag rogon daed ko fare bin L’agruw yay e Wub rok.

Ko “Fare Kristus nibay nib Fos: Fare Mich rok fapi Apostles,” e kan be’eg ni: “[Yesus] e ra borran ngay mara sul nga fayleng. … Ma ra par ni ir e Pilung ko Pilung ma ra par nra gagiyeg ni ir Somoel ko fapi Somoel, ma gubin bugun aey ma ra garbug ma gubin blothey ma ra non nibe tay fan. Gadaed gubin ma gadaed ra sak’iy u powchen min pufthin nag ko rogn fapi murwel rok nge fapi arar u gum’ircha’en.”⁵

I gag reb fapi Apostle ni kug sayn nag babyoren “Fare Kristus nibay nib Fos”, rayag ni nggog ni gu manang ni Yesus e “ir fare tamilang, fare yafos, nge athap ko fayleng”⁶ e be pi’ e athamgil ngog ni nggu t’ufeg ni gubin e rran.

Gube micheg ni Chitamangdaed nibay u Tharmiy nge Yesus Kristus a yow fos. Gube micheg ni gadaed bt’uf rorow. Fapi thin nib thothup e be fil ni fare “Got e rib t’uf e girdi’ nu fayleng rok, ma aram me pi’ fak ni kari maagirag rok nge yib, ni fan e nge urngin e pi’in ni michan’ rad ngak e aram e dab kurm’ad, ya keyag e yafos ndariy n’umngin nap’an ngorad.”⁷ Fapi thin nib thothup e ki fil ni Yesus “e rib t’uf e girdi’ nu fayleng rok, me pi’ e yafos rok, ni urngin e pi’in ni machaen’raed e bay ni yaed ra mang pifak Got ni pumo’on [nge bpin].”⁸

Chitamangdaed nibay u Tharmiy e ri gadaed bt’uf rok me ngongliy rogon wo’en e thap nibay fare Tathapeg riy u lukungun. Nge Yesus ni fani ri gadaed bt’uf rok ni nap’an e mu’ulung ulan fare Ulung u Tharmiy, nap’an ni fith e Chitamangiy nibay u Tharmiy ngak, “Mini’ e nggu pi’?” Yesus, ni’ir e bin nganni’ u fithik fak e Chitamangiy ni ya’el, e fulweg, “Gu ba’aray, mu pi’eg.”⁹ Me ga’ar ngak e Chitamangin, “Chitamangig, gura rrin’ ni woed rogon ni kam dugliy, ma fal’ngin e fan ngom ni manechubog.”¹⁰ Yesus e pi’ ir ninge mang e Tathapeg nge Tabyul rodaed ni ngeyag ni ngad boded raed ma gadaed sul ko gin ni yaed be par riy.

Gali thin nib thothup ney e kube fil ni ra ngan sul ko gin ni yaed be par riy ma rib tu’uf ni nge michuwun’uy. Ba tu’uf ni nge michuwaen’daed ngak Yesus nge fare tonom rok Got ko falfalaen’. Ra michuwun’uy e ngan t’ufeg min lek fare Tathapeg rodaed min fol ko fapi motochiyel rok, nib mu’un e ngiyal’ ngay ni gadaed bay u fithik e sikeng ma yibe gay rogon.

Fayleng e dabay e dani yalu’uw. Bay e kirbaen’ riy, dar puluw lunguy, amith, nge fapi lumel.

President Dallin H. Oaks, ni non ko 2017, e yoeg e pi thin ni ba’aray: “Iraray e ngiyal’ ni kari gel e gafgow riy, nib bo’or e tin nibe magfan’uy ngay: maal nge mornga’agen e maal, m’ar nibe garar u dakean e fayleng, ran nike milik, ran nike mathrow, nge gelngin e yal’ nike gel gelngin.”¹¹

Dabiyag ni nge mul e t’ufeg nge athap rodaed ngak Yesus, ndariy fan gelngin e gafgow nibe yib ngodaed. Chitmangdad ni bay u Tharmiy nge Yesus e dariy bi’id ma yow ra pagtalin daed. Ya gadaed bt’uf rorow.

Fare bin ba’aram e October nike thumur, President Russell M. Nelson e fil ngodaed fan nib ga’fan ni ngan tay e Chitamangdaed nibay u Tharmiy nge Yesus Kristus ni yow e tin ni somm’on ulan e yafos rodaed. President Nelson e fil ngodaed ni reb fapi fan fare bugithin ni Israel e “Pag Got ninge Gagiyeg nag.”¹²

Ke fith ngodaed e pi duwer ney: “I gur ga ba’adag ni gara pag Got ninge gagiyeg nag e yafos rom? I gur ga ba’adag ni nge mil fan ngak Got ni’ir e bagel gelngin ni nge gagiyeg nag e yafos rom? Garam pag fapi thin Rok, fapi motochiyel Rok, nge fapi m’ag rok ni nge gagiyeg nag e yafos rom ni gubin e rran? Garam pagem ngam motoyil nga laman mag rrin’ ni kemus ni arram rogon? I gur ga ba’adag ningam pag e tin nib tu’uf Rok nge m’on ko tin ni ga ba’adag? I gur ga ba’adag ningam pag e tirom banan ngam rrin’ e tirok e murwel?”¹³

Thingar ted u wun’daed ni gubin ngiyal’ ni tin nriyul’ e falfalaen’ e be yan u rogon e tha’ rodaed ngak Got, ngak Yesus Kristus, nge tha’ rodaed ngodaed.

Reb wo’en ni gadaed ra dag e t’ufeg rodaed e ngaed uned ko tabinaew, tafagar, nge pi buguliyiror rodaed ngan rrin’ nochi banan nib achichig nra ayuwegdaed ngad pigpigead ngodaed. Rrin’ e tin nrayag ni nge ayuweg e biney e fayleng ninge mon’og.

Mang boech ban’en nrayag ni ngam rrin’ ulan e yafos rom nra dag ni gabe tay Somoel ni’ir e Somm’on mab t’uf rom?

Nap’an ni gadaed ra tiyan’daed i t’ufeg e buguliyiror rodaed ni woed rogon ni yaed bt’uf rok, ma aram ni gadaed ra tabab i t’ufeg e girdi’ nib yilegdaed.¹⁴

Ku fith biyay, uw rogon ni gara fulweg fare duwer rok fare Tathapeg “Kab gel fenag t’uf rom ngarogon ni gub t’uf rok?”

Nap’an ni gara tafney nag ere duwer ney ni woed rogon ni kug rrin’, gube meybil nag ni gara fulweg ni woed rogon ni rrin’ Peter ni kab kakurom, “Er rogon, Somol; tga manang ni gab t’uf rog,”¹⁵ mag rrin’ ni gabe dag e t’ufeg ma gabe pigpig ngak got nge gubin pi girdi’ nib yilegnem.

Gube micheg ni ri gadaed ba tawa’ath nibay fare gospel rok Yesus Kristus rodaed nibe powi’iy daed ko rogon ni nge par e yafos rodaed nge rogon ni ngaed ayuweg e girdi’. U dakean ir, e gadaed ra pire’eg ni gubin e ya’el e rib ga’fan ngak.

Gube micheg Yesus Kristus i’ir e Tathapeg nib t’uf rodad. Ir Fak ni mo’on nigo’ rok Got. Ko pin’ey ni gube meybil nag u dakean fithingan Yesus Kristus, amen.