Fal’eg e Ngiyal’ ni fan ngak Somoel

Pi walageg nib t’uf rog, nifan ko l’agruw e rran kad fil nib fel’ rogon e pi tapigpig rok Somoel ni kar guy rogon nib gel ni ngar nanged e thin ni ba’adag ni ngan weliy ngodad.

Kad thapeged e fonow ko bin migid e nel’ e pul. Chiney fapi duwer ney, u rogon ningad manged nib thil ni bachan e pi n’en ni kad rung’aged nge ma kad thamiyed.

Ngiyal’ ko m’ar ke dag ngodad ra thilyeg e yafos nib papay, bochi ngiyal’ dariy e gelingdad ni ngan thilyeg e n’en nra buch. Machane, bo’or ban’en nrayag gelingin rodaed. Rangad mel’eg e pi n’en ni ngad rrin’ed nge u rogon ni ngad fanayed gelinginded, ngiyal’ rodad, nge ngongol rodad. Gadaed ra mel’eg u rogon ni ngad pii’ e ayuweg ngak boch e gidii’. Gadad ba mel’eg e pi’in ni ngad pagaen’ ngak nifan e tin nib riyul’ nge fonow.

Bay e pi lam nib yo’or nge rib gaa’ u bang ko fayleng. Machane ni rib bo’or e lam ra mang nib sabaenbaen, pingeged laniyaen’ e tin, nge ra fekdad nga wuru’ e wo’. Ma chuw gaed ko kirbaen’ ni ra yib, Gube wenig ngomed daba’ ni ngam gelnag e tin kireb ku feylang napan ni ngam pii’ ngak e Somoel bochi ngiyal’ romed ulan a yafos—uringin nge gubin e rran.

Fa’an bo’or e ganop ni ngam thapeg nibe yib ko social fa reb e media, rogon ni gamed ra rung’ag e kathkath rok fare Thothup e ra achichig i yan. Fa’anra damur sap ngak Somoel u fithik e meybil nge fil e gospel ni gubin e rran, ra m’ay gelingin ko machib be yaen e ya’an mib mangil, machane de riyul’. Ni mus ko pi Gidii’en Got nib yul’yul’ e mich roraed e rayog ni nge kireb nag bachane musik rok Babylon.

Pi walageg, gub wenig ni ngam fal’eg e ngiyal’ ni fan ngak Somoel! Mu toyed e dayif nib gel ko thothup romed e rayog dabi puth u fithik e ngiyal’ napan ningam fol e pi n’en ni ma ayuweg e Kan ni Thothup ma paer ngomed ni gubin e ngiyal’.

Dam pagtalin e tin riyul’ nib gaa’ ni “fare Ya’el ma weliy … morngaʼagen bogi banʼen ni rogon ni bay nge morngaʼagen bogi banʼen ni rogon ni bayyib.”¹ “Dag ngomed rogon gubin e pinʼen ni ngam rinʼed.”²

Gathi reb e ba’nen ra pinning fare Ya’el ni woed ni l’agaen’ ngak Yesus Kristus. Weliy mornga’agen Kristus, gamaed be falfalaen’ rok’ Kristus, mu duruw’iyed gimed ko thin rok’ Kristus, mu pii’ed iyaen nga m’on u fithik’ e yul’yul’ romed ngak’ Kristus.³ Mu fal’eg e rran ni Sabbath ngu’um ted nib fel’ napan ni ngam liyor dag Ngak, thapeged fare sacrament, nge ni ngam tayed nib thothup.⁴

Woed ni kug gog ko re kadbul ney, wenig mu ngongliyed e ngiyal’ nifan ngak Somoel ulan e na’un Rok’ nib thothup. Dariy reb ban’en nra gaa’ nag e dayif ko tothup romed ni woed e pigpig ko temple nge liyor ulan e temple.

Gadad be pinning e magar ngak gubin e gidii’ ma murwel u dakean e pi temple rodad nib bi’ech. Yad be toey ulongob e fayleng. Daba’ gube adag ni nggu yoeg e tanom rodad ni ra toeyed e pi temple ulan ko pi nam ney: Kaohsiung, Taiwan; Tacloban, Philippines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; nge toy bayay ko fare Provo Utah Temple tomuren e yibily ko fare Orem Utah Temple.

Gamed bt’uf rog, pi walageg nib t’uf rog. Somoel e manngem ma gab tu’uf rok. I Ir e Tabiyul romed nge Tathapeg romed. I Ir e ma powi’iy e Galasia Rok. Ir ra powi’iy nag med ulan e yafos romed fa’an ni ngam pireg’ed e ngiyal’ nifan Ngak’ ulan a yafos—uringin nge gubin e rran.

Par Got romed nga mada’ ko’ ngiyal’ ni kad mada’ gaed bayay, Gube meybul u dakean fithingan nib thothup Yesus Kristus, amen.