Dakean fare Gelingin Got nib Manging’ ma rib Tamilang

Chuchugur ko dalip e duw tomur Bin Somm’on e Yi’iy, ulan e nap ko September 21, 1823, Joseph Smith nib pagal ni ke meybil ko kalngaen’ nifan ko denen rok nge mang e sasaliyeb u mit Got.¹ M’ug bee’ nga charen e bet rok’, me pining fithingan Joseph me yoeg ni “ir ea tamilwol ni ke yib u p’owchen Got … me fithingan Moroni.” Ke weliy “Got ni bay e muruwel nifan [Joseph] t’uf ni nge rin’”² nge ni ke fil ngak marunga’agen me yib fare Babiyor ku Mormon. Rib ga’, fare Babyor ku Mormon e ir e bin somm’on e pi n’en Moroni ni ke weliy ko milwol rok.

Fare Babyor ku Mormon e ma par ni yug reb e M’ag ku Yesus Kristus ma rib ga’fan e talen ko thilyeg ulan tin tomur e rran. Fan rodad ni ngad pii’ e gospel ni ngad pinning gubin gidii’ ni ngar sul ngak Yesus Kristus,³ thap e tawa’ath ko fare gospel ni ke sulyarmen, nge athamgil nge yani mada’ ko tomur u fithik e mich ulan fare Tathapeg.⁴ Ma ayuwegraed ni ngar thamey me thil lan gum’ircha’raed⁵ nge m’ag raed ngak fare Somoel u dakean fapi micheg nge gam’ing e baga’fan pi ngongol nifan ko fare gospel.

Tabolngin rok Moroni ulan fare Babyor ku Mormon ngak Joseph Smith ke tabab e muruwel ko wo’en e thap nge falfalaen’ ko n’uf ngalang nifan e gidii’ u barba’ farengi veil ulan e ngiyal’ nra polo’ e tym riy.

Me ul’ul’ e midil ngak Joseph, aram Moroni ke yog e thin ni yib ko fare babyor ko Malaki ni bay u lan ea M’ag nib Kakrom, ni be thil e thin riy ni yib yoloey u lan e rogon ni King James:

“Musap, bay gu pii’ ngom fare Priesthood, u dakean paa’ Elijah ni fare profet, nu m’on fare wub ko fare rran nib yargael mab gaa’ fan rok’ fare Somoel.

“… Ma bayi pii’ ko gum’ir’cha’en e fak fare michmich ni tay ngak fapi chitamangiy, ma bayi chel pi gum’ir’cha’en ea fak ko chitamangraed. Fa’anra gathi arrogon, ma ra paer e fayleng ni dariy fan.”⁶

Fan rodad ni ma toyed fapi temple irra tay pi tafen nib thothup ere ngad faleged pi micheg nge gam’ing nib thothup nib ga’ nifan wo’en e thap nge falfalaen’ ko n’uf ngalang ko gubin gidii’, ni fan ko gidii’ be fos nge kar maed. Midil rok Moroni ngak Joseph Smith marunga’agen e muruwel rok Elijah nge gil’ilungun ko fare priesthood me ga’nag e muruwel ko wo’en e thap nge falfalaen’ ko n’uf ngalang u barba’ farengi veil nge ke tabab e muruwel rodad nifan e gidii’ kar maed u bin barba’ farengi veil.

Ngochi milwol ney, pi machib rok Moroni u September ko 1823 marunga’agen fare Babyor ku Mormon nge muruwel rok Elijah ke sunmiy e dayif ko muruwel ni wo’en e thap nge falfalaen’ ko n’uf ngalang u barba’ farengi veil.

Fapi ganop nike fil Joseph Smith ngak Moroni ke pi ayuw nifan ko urngin e muruwel rok. Susun ni, ulan fare mu’ulung ni solemn assembly nike buch ulan e Kirtland Temple ko April 6, 1837, ke yoeg fare profet: “Tomur gubin e pi thin ney, nib ga’ fan e muruwel rodad i dared nge machib fare Gospel.”⁷

Chuchugur ko medlip e dew kafram, un April 7, 1844, Joseph Smith ke pii’ e machib kanog King Follett Discourse. Keyog ulan e machib ney ni, “Bin thabi gaa’ e murwel ko biney e fayleng nike tay Got nga dakean e ngan gay marngagaen e piin nikar m’ad rodad.”⁸

Machane urogon e machib fare gospel nge ngan gay marunga’agen e pi’in nikar m’ad rodad ke mang bin thabi gaa’ e muruwel rodad nike tay Got nga dakaendad? Gube lem ni Profet Joseph Smith ke weliy u l’agruwi thin rok ni dayif ko thin riyul’ ko fapi micheg, ni fal’eg u dakean e pi gam’ing ko priesthoood, ma m’ag dad ngak fare Somoel Yesus Kristus nge tin’ey e pi dayif ko muruwel ni wo’en e thap nge falfalaen’ ko n’uf ngalang barba’ farengi veil.

Muruwel ko pi missionary, temple nge chepin ko tabinaw ba muruwel u ta’abong nifan ta’areb e ngongol nib gaa’ nifan e pi micheg nib thothup nge pi gam’ing nira pii’ ngodad e gelingn Got u yafos rodad nge, tomur, ra fekdad iyaen rok Chitimangiy nu Tharimy. Ere, fapi thin rok fare Profet woed ni be togopluw, u tin nib riyul’, ma ayuwegrow ni ma gaa’nag e fan biney e muruwel’ nib gaa’ ulan tin tomur e rran.

Fare Tathapeg e ga’ar:

“Mfeked e mat’ rog ngam teg nga pomed, mi gimed folwok rog, ya gub munguy ma gub sobut’aen’: mi gimed pir’eg e toffan.

“Ya re mat’ ni gura pi’ ngomed e bmom, ma tomalngin e ren’en ni gu ra tay nga pomed e bba’ud.”⁹

Gadad mfeked e mat’ rok Somoel ngad ted nga pomed napan ngad fil marung’agen, thapeg, nge liyor e pi micheg nib thothup nge pi gam’ing. Ngad m’agdaed nib gel ngak e Tathaegdad napan ningad puguraen nge guyed rogon e rayog rodad ma fosgad udakaen e pi motochiyl ni kad thapeged. Nge m’ag ney Ngak be mang e gelingen fan ko e yal’ rodad ulan e yafos rodad.

Gube pinning med ni ngam lemnag e pi micheg ngak e gachalpen Yesus Kristus ni be fal’eg e m’ag mab kol chilen ea m’ag. Woed rogon, Nephi “gguy fare galasia rok’ fare Saaf ku Got [ulan tin tomur e rran], nib lichlich e gidii’ riy, … ni yaed chongin Got, ni kur suguyed dakean e fayleng; ma gin ni kar suweyed … e ba achichig.”¹⁰

Make “gguy fare gelingin fare Saaf ku Got, ni yibi aw nga dakean chongin e galasia rokʼ fare Saaf, ngo dakean fapi gidiiʼ rokʼ Somoel, … ni kar longbiyed yaed ko felʼ u gelingin Got u fithikʼ e rir.”¹¹

Pi thin ney “ni kar longbiyed yaed ko felʼ u gelingin Got u fithikʼ e rir” ir gathi e tafnaey nib mangil fa e susun ko rib fel’ e thin ulan e babyor nib thouthup. Ere, e tawa’ath ney ke buch ulan e yafos rorad bo’or e gachalpen rok Somoel nu tin tomur e rran.

Muruwel rog ulan e Ragag nge L’agruw ma fekeg ulongob e feylang. Nge kug ba’adag ningu mada’ nge fil pi fil ngorad ni dabgu pagtalin. Gube micheg e gachalpen rok Somoel daba’ ni kar longbiyed yaed ko fel’ u gelingin Got u fithik’ e rir. Kug sap e mich, athamgil, ganop, gelingin, nge falfalaen’ dabi yib ko e gidii’—nge kemus Got rayog ninge pii’.

Kug sap e tin mataw nge gelingin ku Got ufithik fel’ngin ke thapeg udakaen e yul’yul’ e mich ko micheg nge gam’ing ulan e yafos rok e Chongin ni yangren ke fek mugutgut tomur e karo ke crash. Tomuren bo’or e pi pul ko golnog nge guy rogon ni nge fil marunga’agen e yafos nib bi’ech ni bay e mugutgut rok, kug mada’ nge non ngak e ya’el ni fel’ rogon. Ufithik’ e sabathin romow kug fith, “Mang ni kam fil bachane e biney?” Ke fulweg nib papay, “Gag dabi kirebaen’. Gag gathi puwaen’. Nge gubin ban’en ra ang nib FEL’.”

Kug sap e tin mataw nge gelingin ku Got ufithik fel’ngin ke thapeg u dakean e yul’yul’ e mich ko micheg nge gam’ing ulan e yafos rorad e pi’in ni kar tawfe’ raed nge mang e chongin ko Galasia. Pi’in ni ba’adag ni ngar fil’ed nge pigpigrad, yad ba’adag machane dar nanged urogon ni ngar pag e ngongol nge yalen roraed ni de mataw, nge yad falfalaen’ ni ngar manged “boch e girdi’ rok Got, ni kam manged girdi’en e tabinaw rok Got.”¹²

Kug sap e tin mataw nge gelingin ku Got ufithik fel’ngin ke thapeg u dakean e yul’yul’ e mich ko micheg nge gam’ing ulan e yafos rorad ko e tabinaw napan ni kar ayuweg ngak e ppin nge libthir ba’ e m’ar nib kireb. Gachalpen ney ke weliy e tabinaw rorad kar thamey e paag—nge bochi yay kar nanged e pa’ fare Somoel ke fekraed ngalang nge gelnagrad. Tabinaw ney kar pinning e magar ni fan ko e yafos nib momw nira tugul ngodad nge ayuwegdaed ngaed boded fare Chitimangiy nu Tharimy nge Tabayul rodaed, Yesus Kristus. Got ke ayuwegedraed nge tawa’ath nag e tabinaw ney ko fare Kan Thothup nge fal’eg e na’un rorad ni nge mang e tafen nib thothup ni woed e temple.

Kug sap e tin mataw nge gelingin ku Got ufithik fel’ngin ke thapeg u dakean e yul’yul’ e mich ko micheg nge gam’ing ulan e yafos rok e chongin ko Galasia mari kirbaen’ bachane e daraeg ko mabgol rok. Gafgow ko ya’el nge thamey rok ppin ney ke gelnag napan ke lemnag e demataw rok pumon rok bachane ke kireb nag pi micheg rok nge gathay nag ko mabgol rorow. Ke ba’adag justice nge pufthin.

Ufithik e gafgow rok ppin ney nifan ko gubin ban’en ke buch ngak, ke fil nge lemnag marunga’agen e Bayul rok Somoel ni bo’or dabi woed faram. buchuw nge buchuw, ke gaa’ nag e ganop rok ko e muruwel’ rok Kristus nib thap ke ning e ya’el rok—gafgow rok nifan ko denen rodad nge gafgow rodad, oloboch, kirebaen’ nge amith. Ke lemnag thigari fith ngak e duwer ney: Bachane nike pii’ puluw ni fan ko denen ney, rangam fith ni ngey pii’ puluw bayay? Ke nang biney ni ba’adag ir de fel’rogon fa nib wurengaen’.

Ppin ney ke fil napan ke m’ag ngak Somoel udakaen e micheg nge gam’ing ra gol nag e mo’ubich ke buch bachane e ngongol nib kireb rok reb e bee’ nge pii’ e rogon ngak ni nge runguy nge thapeg e gapas, murunguy, nge t’ufeg.

Fapi m’ag nge tawa’ath kemus ma buch bachane e Tathapeg rodaed, Yesus Kristus. Irma pinningdad ni ngad sap ngak,¹³ mi yib ngak,¹⁴ fil marunga’agen,¹⁵ nge m’ag nagdad Ngak¹⁶ u dakean fapi micheg nge gam’ing ko fare gospel nike fulweg. Gu be micheg napan ngad liyor fapi micheg rodad ma longbiyed dad ko felʼ u gelingin Got u fithikʼ e rir. Gu be micheg e Yesus Kristus niba fos nge Ir e fare Tathapeg rodad. Gu be micheg e ren’ey u dakean fithingan Somoel nib Thothup Yesus Kristus, amen.