Fan nib Tu’uf e Galasia
Gadad un ko fare thin ko pi babyor ni thothup u kakrom nge chiney, nibe fil rogon mang fan e galasia kan yarimy nge powi’ iyaen ngay ko matowan rok Somoel, Yesus Kristus.
Bo’or e duw kafram, Elder Mark E. Petersen, be’ ko reb fare Ulung ko fare Ragag nge L’agruwi Apostles, me tabab i weliy wo’en e biney:
“Kenneth nge chitingin, Lucille, yow gidii’ nib fel’, mab riyul’ nge mataw. Machane dar bow nga galasia, mar lemnigew ni dani t’uf riy. Ma fil rognew pifak rad ni ngan yul’yul’ ma dar dirngal gow, mar yow be non ngorad ni kemus e ren’ey ra pii’ fare Galasia norad.
“Ma, amrogon, yow be yoeg nib t’uf e pi wikind rorad e tabinaw rorad nifen e gosgos… [nge] yaen nga galasia era tal’eg e biney.”1
Daba’, mulwol rog e ni fan picha’an woed e biney nib mat’aw mab thothup u waen’ kar tal’egned ngar baed nga pi galasia rorad.2 Nap’an gube yoeg “pi galasia,“ ma un ngay pi synagogue, mosque, fa yug boech e taliw. Kub kirebaen’ ni picha’an nibe yaen ngak urngin e taliw e kan lich nag, u ga’angin yang e nam rodad.3 Fa’anre gadad be lich nag fare galasia rodad demuturug e fan riy, be mak’ar murus pi ya’el rodad, ma fini bo’or e gidii’ ma ki’yag read rok Got ma lich nag e pi tawa’ath Rok nga dakean e nam rodad.
Nap’an gadadma yaen min muruwel ngalan e galasia ma ayuwegdad ni ngad mon’og e paer rodad min ayuweg e gidii’ u ta’abaen rodad. Nga lan fare galasia ke machib ngodad i ngad ngongliy e tin mataw ban’en. Gadad be fil bagdad rok bagdad. Ba’ geleingin e sasun nib fel’ rogon ko thin nib fel’ rogon ngay. Kan gel nagdad nap’an gadadma un tafney e nii’ ni t’ab rogoy. Nap’an gadadma yaen nga galasia min un ngay, pi gum’ircha’dad, woed nibe yoeg fare Bible nib Thothup riy, e “chichir nga ta’bang u fithik’ e t’ufeg rorad.“4
I.
Pi babyor ni thothup ni ke pii’ Got ngak fapi Kristiano ulan fare Bible nge thilin pi fonow ko tin’ey e rran ma fil rogon mang fan b’tuf e galasia. Yow ma dag ni Yesus Kristus ke yarmiy e galasia rok me weliy fan ni ra ul’ul’uy fare galasia re muruwel Rok tomuren Ke yaen. He pinning Ragag nge L’agruw i Apostles me pii’ ngorad matawon nge pi key ni ngar powi’iy gad. Fare Bible ma fil rogon ni “Kristus ni ir e be gagiyegnag e galesiya”5 nge pi tiyugang’ riy e kan pii’ “ni nge ngongliy rogon urngin e girdi’ rok Got ngar pigpiggad ngak Got ni aram e maruwelrok girdi’en Kristus, miyad ayuweg girdi’en e dowef rok Kristus ngarilalgad i yan.”6 Riyul’ ni be tamilang fare Bible ko mang fan e galasia nib kakrom nge ba t’uf e chiney.
Boech me yoeg ni fini kar baed nga galasia pi mo’olung e dani ayuweg rad. Boech ma yoeg, “Dab kug fil ban’en dabay“ fa “Dariy tafagaer rog“ fa “Kug puwaen’ ngak bee’.“ Pi sik’eng nga lan e yafos ku bee’ e dani t’uf ni ngan tal’eg nir ni ngan thapeg fare machib rok Krustus, ni ke fil ngodad ni ngad pig’pig’ nag, gathi gagiyeg nag.7 Arame, reb e chongin ke weliy’ marunga’agen e yib rok ko Galasia:
“Boech e duw faram, ke thiliyeg u wun’ug mang fan gu waen nga galasia. Dab kug waen nga galasia ni fan rog, machane nggu lemnag ku yug bee’. Gube gay rogon nggu mog mogethin ngak picha’ nibe paer ni yigo’ yad, nggu oge magaer ngak picha’ nib bi’ech, … ngu muruwel ko tin nib t’uf riy. …
“Ere, gu waen nga galasia gubin e wik nggu muruwliy ban’en, gathi ni ngan muruwliy ban’en ngog, nggu thiliyeg rogon e paer ku bee’.”8
President Spencer W. Kimball me fil rogon ni “dab da yaen nga mo’olung ko Madnom ni ngan gosgos gad fa kamus ni ngan machib ngodad. Gadad ma yaen ni ngad liyor gad ngak Somoel. Ni’ir e muruwel ni fan dad. … Fa’anre re mo’olung e dani fel’ ngom, dani fel’ rom. Dariy bee’ ni ngan liyor ni fan ngom; thingar da soen rom ngak Somoel.”9
Ni ngan maen nga galasia e ran bing gum’ircha’dad min bi’ech nag pi ya’el rodad.
Ulan e galasia dabda pigpig gad ni yigo dad fa kemus nap’an ni ba’adag riy fa tin nib mom ngodaed. Bo’or gadadma pig’pig’ gad nga ta’abang. U dakean e muruwel ma piri’eg dad pi tawa’ath nu tharmy ni ngan mon’og gad e paer rodad nu fayleng. Pigpig nga lan e galasia ra ayuweg dad ni ngad gel gad pi sik’eng ni birodad ban’en, nra tal’eg e mon’og rodad nib thothup.
Bo’or yug boech e tawa’ath riy nggu gog, mus ni pap’ay. U lan e galasia gadadma un ko picha’an nib falfalaen’ nibe gayed rogoy ni ngan pig’pig’ ngak Got. Ren’ey be sulaen’dad ni gathi yigo’ dad nga lan muruwel e taliw rodad. Gadad b’tuf e tha’ u thilin dad, nge pi ulung e galasia e bang mit nib th’abi fel’ riy, nge ni fan pi le’engiy dad nge pifak dad. Ni dariy riy, nib ga’ fan uthilin pi bitir nge galibthir nib yul’yul’ rorad, ma dag e research ni’ir mom’aw ni ngan chathowliy pifakdad ngalan e mich roraed.10
II.
Mada’ ko chiney, kug gog marunga’agen pi galasia ni gubin. Chiney Gube weliy fan mang fan ni ngan un, maen, nge muruwel ko fare taliw ni sulweg nib chilan rogon, fare Galasia rok Yesus Kristus ni fan ko Gidii’en Got Rok ko Tin Tomur e Rran kan sulweg.
Gadad, arragon, un ko fare thin ko pi babyor nib thothup, u kakrom, nge chiney, nibe fil rogon mang fan e Galasia kan yarimy nge powi’iyaen ngay ko matowan rok Somoel Yesus Kristus. Gamad be micheg ni fare Galasia nikan sulweg nga chilan rogon rok Yesus Kristus, kan toey ni ngan fil rogon fare machib nib polo’ Rok min ngongoliy rok priesthood Rok fapi gam’ing nib t’uf in ngan sul nga gil’ilingun Got.11 Pi chongin nibe pag ni ngan maen nga Galasia nge sap kemus ngak pi lem rorad ma ki’iyag nagrad rok pin’en e gospel nib t’uf riy: fare gelingin nge tawa’ath ko re preisthood, fare polo’ e machib kan sulweg nga chilan rogon, nge fare muruwel ni ngan ngonogliy ngay. Kar talagned rogon ni ngar thapaged e tabinaew roraed ko fare yafos ni manechubog.
Reb o fan nib ga’fan fare Galasia ni kan sulweg e nibe aywuegdad ni ngad mon’og nib thothup riy. Mon’og be yup fan thiliyeg. Nrogon e ya’el be yup fan ni ngan kalngan’ min gay rogon ni ngan chugur ngak Somoel. U lan fare Galasia kan sulweg ba’ machib, ngongoliy, nge ta’ayuw nibe ayuwegdad ni ngad kalngan’dad. Fan rorad, e gathi ni ngan gechig nagrad, woed e tapuf oloboech e nam. Tapufthin nga lan e galasia ma gay nib t’uf rogon ni ngan ayuwegdad ni ngad thapeged fare murnguy nge bugol niba’ ko fare Bayul rok Yesus Kristus.
Fa’anre kemus niba’ tafney nge lem thothup, dariy rogon fa dayif ni ngan muruwel nag fare Galasia nib sulweg chilan rogon. Pi susun nib fel’ rogoy ngay e pi pumo’on nge ppin nib fel’ yangrad mab labthir rorad nibe pag iyaen pi sukul fa toffan ko muruwel ni ngan maen ko mission rorad. Yad be muruwl nib missionary ni fan picha’an nib thil’thil’ rorad u pi nam nib til rorad ni dar mel’egned riy. Ma amrogon pi chongin e galasia nibe un ko “muruwel nga lan e temple“. Dariy bang ko re muruwel ney ni ngan mugu’uliy fa’anre dariy e Galasia nibe yarimy ngay min gagyeg nag.
Mich ko pi chongin e Galasia rodad nge muruwel rorad ke fil nagrad ni ngar muruwel nga ta’abang ni ngan mon’og e paer ko pi am rorad u bang. Re llowaen’ nge gonop nibe un ngay e gathi ba’ ko yalen nge rogon ni u bang ko re fayleng daba’. Nrogon ni kan sunmiy u bang ko fayleng pi ward rodad, gadadma muruwliy gad u ta’abang ko picha’an ni sana dabra mel’eg, picha’ nra fil rogoy ngodad min sik’eng nag dad.
Ren’ey ma fil nagdad tin thothup woed ni t’ufeg, wurengaen’, bugol, nge gum’aen’, mra pii’ ngodad chirofen ni ngad fil rogon nggu muruwliy gad u ta’abang ko picha’an nib thil’ rorad ngodad. Ren’ey e ke ayuweg bo’or e gidii’en e galasia rodad, nge bo’or e ulung u bang nib tawa’ath nag ko yad. Kan nang ni pi’in Got mrayog ni ngar powi’iyrad i yaen min mukun nga ta’abang. Ra yalen ney ke tabab rok pi pioneer rodad ni gelbugwan faram, ni kar pired nga Intermountain West mar toyed e yalen rodad ni ngar muruwliy gad nga ta’abang.
Bo’or e pig’pig’ nge ayuw b’tuf ni ngan kunuy min gagiyeg nag pin’en ni bay rodad nga ta’abang. Amrogon a yalen fare Galasia nib sulweg nga chilan rogon u bang ko fayleng. Tiney ab mu’un e sukul nge talne taflay ngay, gaan ni fan ko pi’in balig, ayuw ko pi’in nu thil e nam rorad, nge tal’eg e ma’cham, nge yug boech ban’en. Pi chongin e Galasia rodad e kan nang u bang ni fan ko pi project ko Helping Hands fini bay e yoko’ u bang. Fa’anre gur chongin e galasia, mrayog ni ngam ayuweg ko pi magowan ney. Pi chongin e Galasia ma pii’ fast offering ni ngan ayuweg pi’in gafgow u fithikrad.
Pi’in nibe un ko Galasia mrayog ni ngan thamiy e gapas nge falfalan’ u dakean e Kan ni Thothup, nge falfalaen’ ko re wa’amngin nibe un ko gospel ngay, ni’ir fare Thin ko Gonop nge tawa’ath nu fayleng nge tharimy nibe un ngay ko tithing. Ma kan tawa’ath nagdad nggu motoyil ngak pithin e tapowi’iy rodad.
Ma bin ga’ fan riy e pi gam’ing nib t’uf ko manechubog, nibe un ngay fare sakrament ni ba’ rodad urngin e rran ko Madnom. Bin ga’ fan e gam’ing u fare Galasia kan sulweg nga chilan rogon e fare m’ag pa’ nu manechubog, nibe fekey u yafos nga m’on pi tabinaw rodad nib machalbog. President Russell M. Nelson e fil e biney e yalen nib mom ningan nangfan. Ke ga’ar: “Dabiyag ni ngaed athapaged wo’endaed i yaen nga mit Got. Ngariy fol ko pi motochiyel ni kan toey [re tawa’ath nem] nga dakean.”12
Reb e motochiyel e ngan liyor nga langin na’un e galasia urngin e rran nu Madnom.13 Liyor nge ngongol rodad ko pin’ey nib manechubog ma chugur nagdad ngak Got ma ga’ nag adag rodad ngodad. Parley P. Pratt, reb e Apostle ko tiney e rran, ke weliy fan ko rogon nike thamiy nap’an fare Profet Joseph Smith ke weliy fan pi kengin e mich riy: “Kug thamiy ni Got e Chitimag nu tharimy riyul’; ni Yesus ni’ir e walageg, nge fare ppin kug l’engiy mra paer nib manemus, nib machalbog: bee’ nib bugol, nib angel rok, kan pii’ ngog ni nge ayuweg neg, ni ngan lung tolang nib manemus. Ere, amrogon ngraog nggu adag dakaen ni bay rog fare yaqal nge llowan’ rog.”14
Tomuren e thin rog, ni gu sulaen’ dad ni dani mich u wun’dad ni tin fel’ mrayog kemus udaken e galasia. Bay yo’or e gidii’ ni dariy galasia rorad nibe ngongoliy yo’or nib yo’or e tin nib fel’ ban’en riy. Pi’in e Galasia nib Tomur e Rran ma un ko bo’or ngay. Gadad ma guy ni pin’ey e mugu’uliy ko fare tin riyul’ ni “fare Kan Thothup ma pii’ magal ngak urngin bee’ nibe paer nga dakaen e fayleng riy.”15
Riyul’ ni ba’ tin nib fel’ nrayog ni fa’anre dariy e galasia, machane fare machib nib urngin nge pi gam’ing nib machalbog mrayog kemus nga lan fare Galasia ni kan sulweg nib chilan rogon. Amrogon, ni ngan maen nga fare Galasia mra fekey e gelingin mra ga’ nag e michaen’ nibe un ngay napan ram mukun nga ta’abang ko picha’an nib michaen’ min liyor gad ga ta’abang ko picha’an nibe fol gad kanawo’en e m’ag e gachalpen Kristus. Gube micheg ni gadad gubin mra sakiy nib gelbugwan ko pin’ey u Galasia fini gadad ma gay e yafos ni manemus, bin th’abi tolang e tawa’ath rok Got, u dakean e fithingan Yesus Kristus, amen.