Hugot nga Pagtuo nga Molihok ug Mamahimo Kon Unsay Angay nga Ikaw Mamahimo

Siya miingon, “Pangayo sa inyong Langitnong Amahan og tabang, sa ngalan ni Jesukristo.”² Ang pagpangayo pinaagi sa pag-ampo mao ang usa sa mga yawe aron masayod kon unsaon nga mahimong usa ka mas maayo nga disipulo ni Jesukristo.

Sa hinapos nga bahin sa Iyang pagpangalagad taliwala sa mga Nephite didto sa Amerika, si Jesukristo mikayab ngadto sa langit. Wala madugay, ang Iyang mga disipulo nagkapundok, “nagkahiusa sa mainiton nga pag-ampo ug pagpuasa. Ug si Jesus mipakita pag-usab sa iyang kaugalingon ngadto kanila, kay sila nag-ampo ngadto sa Amahan diha sa iyang ngalan.”³ Nganong mipakita man pag-usab si Jesus sa Iyang kaugalingon ngadto sa Iyang mga disipulo? Tungod kay nag-ampo sila; nangayo sila.

Dayon Siya mipadayon:

“Ug karon Ako moadto ngadto sa Amahan. Ug sa pagkatinuod Ako moingon nganha kaninyo, bisan unsa nga mga butang nga inyong pangayoon sa Amahan pinaagi sa akong ngalan, ihatag nganha kaninyo.

“Busa, pangayo, ug kamo makadawat; tuktok, ug kini pagabuksan nganha kaninyo; kay siya nga nangayo, makadawat; ug ngadto kaniya nga motuktok, kini pagabuksan.”⁴

Kinahanglan kita nga mangayo uban sa hugot nga pagtuo aron masayod sa kabubut-on sa Ginoo ug modawat nga ang Ginoo nasayod kon unsay mas maayo alang kanato.

Ang paglihok mao ang laing mahinungdanong yawe aron mahimong mas maayo nga disipulo ni Jesukristo. Kon kita molihok, Siya mogiya ug motudlo kanato sa unsay angay nga buhaton. Sigurado ko nga si Nephi nangayo og giya gikan sa Ginoo aron masayod kon unsaon nga makuha ang mga palid nga tumbaga gikan ni Laban, apan siya ug ang iyang mga igsoong lalaki duha ka higayon nga misulay apan napakyas. Apan milihok sila, ug ang Ginoo mitudlo kanila sa unsay angay nga buhaton. Sa kataposan, si Nephi milampos sa ikatulong higayon. Siya nahinumdom, “Ug ako giubanan sa Espiritu, wala masay[o]d sa sinugdanan sa mga butang nga ako mobuhat.”⁵

Ingon niini ang Ginoo motrabaho kon kita mopakita og paningkamot ug molihok, bisan kon kita wala kaayo makasabot kon unsay kinahanglang buhaton. Ang Ginoo misulti ni Nephi unsay angayang buhaton: moadto ug mokuha sa mga palid. Apan wala Siya mosulti ni Nephi unsaon sa pagbuhat niini. Gisalig Niya kini kang Nephi nga maoy maghunahuna ug mangayo og tabang sa Ginoo—ug ingon niini sa kasagaran molihok ang Ginoo sa atong mga kinabuhi. Kon kita molihok uban sa hugot nga pagtuo, ang Ginoo mogiya ug motudlo kanato.

Sa 3 Nephi, ang mga disipulo misulti ngadto sa Manluluwas nga adunay mga panaglalis tali sa mga tawo kalabot sa ngalan sa Simbahan. Agi og tubag, ang Manluluwas mitudlo og importante nga baroganan sa dihang nangutana Siya, “Wala ba sila magbasa sa mga kasulatan?”⁶ Busa ang pagtuon mao ang laing mahinungdanong yawe aron mahimong mas maayo nga disipulo ni Jesukristo. Ang pag-ampo ug pagtuon sa kasulatan mag-uban. Molihok kini alang sa atong kaayohan. Kini mao ang proseso nga giestablisar sa Ginoo. “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.”⁷

Ang Manluluwas mitudlo usab nga kita kinahanglang magtuon dili lang sa mga kasulatan apan magtudlo gikan niini, sama sa Iyang gipakita ngadto sa mga Nephite: “Ug karon nahinabo nga human si Jesus nakapatin-aw sa tanan nga mga kasulatan ngadto sa usa ka tibuok nga mensahe, diin sila misulat, siya misugo kanila nga sila kinahanglan motudlo sa mga butang nga siya mipatin-aw ngadto kanila.”⁸

Kini ang usa sa mga hinungdan nganong importante kaayo nga si Nephi mobalik ug mokuha sa mga palid nga tumbaga: ang iyang pamilya nagkinahanglan sa mga kasulatan dili lang aron matabangan sila sa ilang panaw paingon sa yutang saad kondili aron matabangan usab sila sa pagtudlo sa ilang mga anak. Kita usab kinahanglang magtinguha og paggiya gikan sa mga kasulatan alang sa atong panaw, ug kita kinahanglan gayod nga motudlo gikan niini diha sa atong mga panimalay ug diha sa mga calling sa Simbahan.

Daghang higayon nga ang mga tubag sa pag-ampo dili moabot diha-diha dayon. Apan kita kinahanglan gayod nga adunay hugot nga pagtuo nga mopadayon, molihok diha sa pagkamatarong, ug mapadayonon sama ni Nephi sa dihang naningkamot siya sa pagkuha sa mga palid nga tumbaga. Ang Ginoo motudlo kanato sa hinay-hinay; samtang magtuon kita sa mga kasulatan, ang Ginoo mohatag kanato sa mga tubag o sa gikinahanglan nga kalig-on aron makasugakod kita og usa pa ka adlaw, usa pa ka semana, ug makasulay og usa pa ka higayon. Si Elder Richard G. Scott miingon: “Pagmapasalamaton nga usahay ang Dios motugot kaninyo nga makigbisog sulod sa dugayng panahon sa dili pa kana nga tubag moab[o]t. Kana ang makapadugang sa inyong hugot nga pagtuo ug makapalambo sa inyong kinaiya.”⁹

Pinaagi sa pag-ampo ug pagtuon sa kasulatan, ang Ginoo sa kanunay naghatag nako og kalig-on aron molihok ug molahutay og usa pa ka adlaw, usa pa ka semana, ug mosulay og usa pa ka higayon. Daghang higayon nga ang mga tubag wala moabot diha-diha dayon. Aduna koy mga pangutana nga wala pa matubag, apan nagpadayon ko sa pagpangutana ug pagtuon, ug nalipay ko nga ang Ginoo padayon nga naghatag nako og kalig-on sa paglihok samtang naghulat ko sa mga tubag.

Si Elder Scott miingon usab, “Samtang kamo nagduhaduha sa inyong pagsab[o]t, sa paggamit sa hugot nga pagtuo, kamo giyahan nga makakaplag og mga solusyon nga dili ninyo mabat[o]nan sa laing paagi.”¹⁰

Ang pagkahimong mas maayo nga sumusunod sa Manluluwas nga si Jesukristo usa ka tibuok kinabuhi nga panaw, ug kitang tanan anaa sa managlahi nga mga kahimtang, naglihok sa managlahi nga gipaspason. Kinahanglan gayod nga atong hinumdoman nga dili kini usa ka kompetisyon, ug ania kita dinhi aron sa paghigugma ug pagtabang sa usag usa. Kinahanglan kita nga molihok aron sa pagtugot sa Manluluwas nga motrabaho uban kanato sa atong kinabuhi.

Namulong ngadto kang Sidney Rigdon, ang Ginoo miingon sa mosunod: “Ako nagtan-aw diha kanimo ug sa imong mga buhat. Ako nakadungog sa imong mga pag-ampo, ug nag-andam kanimo alang sa mahinungdanon nga buhat.”¹¹ Ako mopamatuod nga ang Ginoo maminaw ug motubag sa atong mga pag-ampo; Siya nakaila kanato; Siya adunay mahinungdanon nga buhat alang sa matag usa kanato. Pinaagi sa pag-ampo, pagtuon sa kasulatan, ug paglihok, atong maangkon ang mga panalangin sa langit ug mahimong mas maayo nga mga sumusunod sa Manluluwas nga si Jesukristo.

Si Presidente Dallin H. Oaks mitudlo nga “ang Katap[o]sang Paghukom dili lamang usa ka pagtimbang-timbang sa gidaghanon sa maayo ug da[o]tan—nga atong nahimo. Kini maoy usa ka pagdawat sa katap[o]sang sangp[o]tanan sa atong mga buhat ug mga hunahuna—kon unsa ang atong nakab-ot.”¹²

Mapasalamaton ko sa mga propeta, mga manalagna, ug mga tigpadayag; sila ang mga magbalantay diha sa tore. Nakita nila ang mga butang nga wala nato makita. Ako mopamatuod nga pinaagi sa ilang mga pulong, kita mamahimong mas maayo nga mga sumusunod sa Manluluwas nga si Jesukristo ug makakab-ot sa atong potensyal. Ako mopamatuod nga si Kristo buhi ug nakaila sa matag usa kanato sa tinagsa-tagsa nga paagi. Kini ang Iyang Simbahan. Sa sagradong ngalan ni Jesukristo, amen.