Ang Gugma sa Dios: Ang Labing Hingpit nga Kalipay sa Kalag

Kaigsoonan, nasayod ba kamo kon unsa ka hingpit ang paghigugma sa Dios kaninyo, nga atong Langitnong Amahan? Gibati ba ninyo ang Iyang gugma sa kahiladman sa inyong kalag?

Kon kamo masayod ug makasabot unsa ka hingpit kamo nga gihigugma isip usa ka anak sa Dios, kini makausab sa tanan. Makausab kini unsay inyong gibati sa inyong kaugalingon kon kamo makahimo og mga sayop. Makausab kini unsay inyong bation kon mahitabo ang malisod nga mga butang. Makausab kini sa inyong pagsabot sa mga sugo sa Dios. Makausab kini sa inyong pagtan-aw sa uban ug sa inyong kapasidad sa paghimo og kalainan.

Mitudlo si Elder Jeffrey R. Holland: “Ang unang dako nga sugo sa tanang kahangt[o]ran mao ang paghigugma sa Dios sa tibuok natong kasingkasing, gah[o]m, hunahuna, ug kusog—mao kana ang una ug dakong sugo. Apan ang unang dako nga kamatuoran sa tanang kahangt[o]ran mao nga ang Dios nahigugma kanato sa tibuok Niyang kasingkasing, gah[o]m, hunahuna, ug kusog.”¹

Unsaon sa matag usa nato nga masayod sa kahiladman sa atong kalag nianang mahinungdanon nga kamatuoran sa kahangtoran?

Ang propeta nga si Nephi gipakita sa panan-awon sa labing gamhanan nga ebidensya sa gugma sa Dios. Sa pagtan-aw sa kahoy sa kinabuhi, si Nephi mihangyo aron makahibalo sa hubad niini. Agi og tubag, usa ka anghel mipakita ni Nephi sa usa ka siyudad, sa usa ka inahan, ug sa usa ka batang masuso. Samtang nagtan-aw si Nephi sa siyudad sa Nazaret ug sa matarong nga inahan nga si Maria, nga nagsapwang sa bata nga si Jesus diha sa iyang mga bukton, ang anghel mipahayag, “Tan-awa ang Kordero sa Dios, oo, gani ang Anak sa Amahan sa Kahangt[o]ran!”²

Nianang sagrado nga gutlo, si Nephi nakasabot nga diha sa pagkatawo sa Manluluwas, ang Dios nagpakita sa Iyang tiunay ug hingpit nga gugma. Ang gugma sa Dios, mipamatuod si Nephi, “makatag sa tibuok kalib[o]tan diha sa mga kasingkasing sa mga anak sa mga katawhan.”³

Imahe

Ang kahoy sa kinabuhi

Atong mahulagway ang gugma sa Dios isip ang kahayag nga nagagikan sa kahoy sa kinabuhi, makatag sa tibuok kalib[o]tan diha sa mga kasingkasing sa mga anak sa katawhan. Ang kahayag ug gugma sa Dios motuhop sa Iyang tanan nga nilalang.⁴

Usahay sayop kitang maghunahuna nga mabati lamang nato ang gugma sa Dios human kita misubay sa gunitanan nga puthaw ug miambit sa bunga. Hinoon, ang gugma sa Dios, dili lamang madawat niadtong kinsa moduol ngadto sa kahoy apan mao gayod ang gahom nga modasig nato sa pagpangita niana nga kahoy.

“Busa, mao kini ang labing madanihon sa tanan nga mga butang,” mitudlo si Nephi, ug ang anghel mituaw, “Oo, ug ang labing hingpit nga kalipay ngadto sa kalag.”⁵

Baynte ka tuig na ang milabay, usa ka minahal nga sakop sa pamilya mibiya sa Simbahan. Siya adunay daghan nga wala matubag nga mga pangutana. Ang iyang asawa, usa ka kinabig, nagpabilin nga matinud-anon sa iyang pagtuo. Naningkamot sila nga mapatunhay ang ilang kaminyoon sa mga panaglalis nga miabot.

Sa miaging tuig gisulat niya ang tulo ka pangutana mahitungod sa Simbahan nga lisod niyang masulbad ug mipadala niini ngadto sa duha ka mga magtiayon kinsa iyang mga higala sulod sa pipila ka tuig. Gidapit niya sila sa pagpamalandong niadto nga mga pangutana ug manihapon uban nila aron mopaambit sa ilang mga hunahuna.

Human niini nga pagbisita uban sa mga higala, miadto siya sa iyang kwarto ug nagsugod sa pagtrabaho sa usa ka proyekto. Ang panag-istorya nianang gabhiona ug ang gugma nga gipakita ngadto kaniya sa iyang mga higala nagpatigbabaw sa iyang hunahuna. Dayon siya misulat nga siya napugos sa paghunong sa iyang gitrabaho. Miingon siya: “Usa ka kahayag ang mipuno sa akong kalag. … Ako nakasinati niining lawom nga pagbati nga nalamdagan, apan niini nga sitwasyon nagpadayon kini sa pagkakusog kay sa masukad ug milungtad og pipila ka gutlo. Hilom akong naglingkod uban niana nga pagbati, nga akong nasabtan isip usa ka pagpakita sa gugma sa Dios alang kanako. … Gibati nako ang espirituhanon nga impresyon nga nagsulti nako nga ako makabalik ngadto sa simbahan ug mopadayag niini nga gugma sa Dios sa unsay akong buhaton didto.”

Dayon siya naghunahuna sa iyang mga pangutana. Ang pagbati nga iyang nadawat mao nga ang Dios midawat sa iyang mga pangutana, ug nga ang dili pagkadawat og klaro nga mga tubag kinahanglan nga dili makapugong kaniya sa pagpadayon.⁶ Kinahanglan nga Iyang ipaambit ang gugma sa Dios ngadto sa tanan samtang siya mopadayon sa pagpamalandong. Samtang gisunod niya kana nga impresyon, gibati niya nga nahisama ni Joseph Smith, kinsa mipahayag human sa iyang Unang Panan-awon, “Ang akong kalag napuno sa gugma, ug sulod sa daghan nga mga adlaw ako nagmaya sa tumang kalipay.”⁷

Sa talagsaong paagi, paglabay sa pipila ka bulan, kini nga sakop sa pamilya nakadawat sa sama nga calling nga iyang gihuptan 20 ka tuig ang milabay. Sa unang higayon nga siya naghupot sa mao nga calling, gihimo niya ang iyang mga responsibilidad isip usa ka matinud-anon nga miyembro sa Simbahan. Karon ang pangutana alang kaniya dili ang “Unsaon nako nga makatuman niini nga calling?” apan “Unsaon nako nga mapakita ang gugma sa Dios pinaagi sa akong pagserbisyo?” Niini nga bag-ong paagi, gibati niya ang hingpit nga kalipay, ug katuyoan sa tanan nga mga aspeto sa iyang calling.

Kaigsoonan, unsaon nato pagdawat sa makapausab nga gahom sa gugma sa Dios? Ang propeta nga si Moroni midapit nato sa, “pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo.”⁸ Si Mormon wala lamang modapit nato sa pag-ampo aron mapuno kita sa Iyang gugma alang sa uban apan sa pag-ampo aron kita makahibalo sa putli nga gugma sa Dios alang sa atong kaugalingon.⁹

Sa atong pagdawat sa Iyang gugma, makita nato ang tumang kalipay sa pagpaningkamot sa paghigugma ug pagserbisyo sama sa Iyang gibuhat, nga mahimong “tinuod nga mga sumusunod sa iyang Anak, si Jesukristo.”¹⁰

Ang gugma sa Dios dili makita sa mga sirkumstansiya sa atong kinabuhi apan sa Iyang presensya sa atong kinabuhi. Makahibalo kita sa Iyang gugma kon kita makadawat sa kalig-on nga lapas sa atong kalig-on ug kon ang Iyang Espiritu magdala og kalinaw, kahupayan, ug direksyon. Usahay mahimong malisod nga mobati sa Iyang gugma. Makaampo kita aron mabuka ang atong mga mata nga makakita sa Iyang kamot sa atong kinabuhi ug makakita sa Iyang gugma diha sa katahom sa Iyang mga gilalang.

Samtang kita mamalandong sa kinabuhi sa Manluluwas ug sa Iyang walay kinutoban nga sakripisyo, kita makasugod sa pagsabot sa Iyang gugma alang kanato. Matinahuron kitang mokanta sa mga pulong ni Eliza R. Snow: “Bililhong dugo miagas; Gihatag Iyang lawas.”¹¹ Ang pagpaubos ni Jesus sa pag-antos alang kanato motuhop sa atong mga kalag, mobukas sa atong kasingkasing sa pagpangayo og pasaylo sa Iyang kamot ug pagpuno nato sa usa ka tinguha nga magpakabuhi sama Kaniya.¹²

Si Presidente Russel M. Nelson misulat, “Kon mas mapasaligon kita sa pagpahaom sa atong kinabuhi sama sa Iyang kinabuhi, mas mahimong putli ug mas balaan ang atong gugma.”¹³

Ang among anak misaysay: “Sa dihang nag-edad ko og 11, ang akong mga higala nakahukom nga motago gikan sa among magtutudlo ug dili mosulod sa unang bahin sa among klase sa Primary. Sa dihang sa kataposan miabot mi, sa among katingala, ang magtutudlo mainitong mitimbaya namo. Dayon mihalad siya og kinasingkasing nga pag-ampo nga diin siya mipadayag og sinsero nga pasalamat ngadto sa Ginoo nga kami nakahukom nga mosulod sa klase nianang adlawa sa among kaugalingong gawasnon nga kabubut-on. Dili na nako mahinumdoman ang leksiyon o gani ang ngalan sa among magtutudlo, apan karon, mga 30 ka tuig ang milabay, natandog gihapon ko sa putli nga gugma nga iyang gipakita kanako nianang adlawa.”

Lima ka tuig na ang milabay, nakaobserbar ko sa usa ka ehemplo sa balaan nga gugma samtang nagtambong og Primary didto sa Russia. Nakita nako ang matinud-anon nga igsoong babaye nga nagluhod atubangan sa duha ka bata ug nagpamatuod ngadto kanila nga bisan kon sila na lamang ang mga buhi sa yuta, si Jesus mag-antos ug magpakamatay gihapon alang kanila.

Ako mopamatuod nga ang atong Ginoo ug Manluluwas nagpakamatay gayod alang sa matag usa kanato. Usa kadto ka pagpahayag sa Iyang walay kinutoban nga gugma alang nato ug alang sa Iyang Amahan.

“Buhi ang Manunubos ko. Niini nasay[o]d ako! … Buhi nga kanhi namatay.”¹⁴

Hinaot nga atong ablihan ang atong mga kasingkasing sa pagdawat sa putli nga gugma sa Dios alang kanato ug dayon ipakita ang Iyang gugma sa tanan natong buhaton. Sa sagradong ngalan ni Jesukristo, amen.