Ipakita Ninyo ang Inyong Kahayag
Ang akong imbitasyon karon simple ra: ipakigbahin ang ebanghelyo. Magpakatinuod sa inyong kaugalingon ug ipakita ninyo ang inyong kahayag.
Samtang nagsakay sa eroplano padulong sa Peru pipila ka tuig na ang milabay, naglingkod ko tapad sa usa ka tawo nga mitawag sa iyang kaugalingon nga usa ka ateyista. Nangutana siya kon nganong nagtuo ko sa Dios. Sa among madasigon nga pagsultihanay nga misunod, ako siyang gisultihan nga nagtuo ko sa Dios tungod kay si Joseph Smith nakakita Kaniya—ug dayon ako midugang nga ang akong kahibalo bahin sa Dios nagagikan usab sa personal, tinuod nga espirituwal nga kasinatian. Akong gipakigbahin ang akong pagtuo nga “ang tanan nga mga butang nagpakita nga adunay Dios”1 ug nangutana sa iyang pagtuo bahin sa kon giunsa nga ang yuta—kining dapit sa halapad nga kawanangan nga makasustiner og kinabuhi—mitunga man. Mitubag siya nga, sa iyang kaugalingong mga pulong, “ang maong aksidente” tingali nahitabo atol sa taas kaayo nga panahon. Sa dihang akong gipasabot kon unsa kalabihan kaimposible nga ang usa ka “aksidente” moresulta sa maong talagsaon nga katahom ug kahan-ay, nahilom siya og kadali ug dayon mahigalaon nga miingon “Dili ko katubag niana.” Nangutana ko kon mobasa ba siya sa Basahon ni Mormon. Miingon siya nga iya kining buhaton, busa ako siyang gipadad-an og kopya.
Paglabay sa katuigan nakakaplag ko og bag-o nga higala samtang didto ko sa airport sa Lagos, Nigeria. Nagkaila mi samtang iyang gitan-aw ang akong passport. Nangutana ko kabahin sa iyang relihiyoso nga mga tinuohan, ug mipadayag siya og lig-on nga pagtuo sa Dios. Akong gipakigbahin ang hingpit nga kalipay ug kadasig bahin sa gipahiuli nga ebanghelyo ni Jesukristo ug nangutana kon ganahan ba siya nga makakat-on og dugang gikan sa mga misyonaryo. Mitando siya, gitudloan, ug nagpabunyag. Mga usa o duha ka tuig human niadto, samtang naglakaw ko sa airport didto sa Liberia, nakadungog ko og tingog nga misangpit sa akong ngalan. Milingi ko, ug ang mao gihapon nga batan-ong lalaki miduol kanako nga dako kaayo og pahiyom. Malipayon kami nga naghangop, ug gisultihan ko niya nga aktibo siya sa Simbahan ug nakigtambayayong sa mga misyonaryo sa pagtudlo sa iyang uyab.
Karon, wala ko mahibalo kon ang akong ateyista nga higala mibasa ba gayod sa Basahon ni Mormon o mipasakop ba sa Simbahan. Ang akong ikaduhang higala mibuhat niini. Alang kanilang duha, ang akong responsibilidad2—ang akong oportunidad—parehas ra: mopakita sa kahayag sa ebanghelyo—mohigugma, mopakigbahin, ug modapit sa matag usa kanila sa normal, natural nga paagi.3
Mga kaigsuonan, akong nasinati ang mga panalangin sa pagpaambit sa ebanghelyo, ug talagsaon kini. Ania ang pipila niana:
Ang Pagpakigbahin sa Ebanghelyo Magdala og Hingpit nga Kalipay ug Paglaom
Kahibalo mo, kamo ug ako nasayod nga nagpuyo kita isip mga anak sa atong Langitnong Amahan sa wala pa moanhi sa yuta4 ug nga ang yuta gilalang alang sa katuyoan nga mahatagan ang matag tawo og oportunidad nga makaangkon og usa ka lawas, makabaton og kasinatian, makakat-on, ug molambo aron makadawat og kinabuhing dayon—ang kinabuhi sa Dios.5 Ang Langitnong Amahan nasayod nga kita mag-antos ug makasala dinhi sa yuta, busa Iyang gipadala ang Iyang Anak, kinsang “dili hitupngan nga kinabuhi”6 ug walay kinutobang maulaon nga sakripisyo7 naghimo nga posibli aron kita mapasaylo, matambalan, ug mamaayo.8
Ang pagkahibalo niini nga mga kamatuoran makapausab sa kinabuhi! Kon ang usa ka tawo makakat-on sa mahimayaon nga katuyoan sa kinabuhi, makasabot nga si Kristo mopasaylo ug motabang niadtong kinsa mosunod Kaniya, ug dayon mopili sa pagsunod ni Kristo ngadto sa mga tubig sa bunyag, ang kinabuhi mausab aron mahimong mas maayo—bisan kon ang nagpalibot nga mga sikumstansiya sa kinabuhi dili mausab.
Usa ka madasigong malipayon nga sister nga akong nahimamat sa Onitsha, Nigeria, misulti kanako nga sa dihang siya nakat-on sa ebanghelyo ug nagpabunyag (ug karon gamiton ko ang iyang mga pulong), “ang tanang butang maayo ra para nako. Malipayon ko. Ania ko sa langit.”9 Ang pagpakigbahin sa ebanghelyo mopukaw sa hingpit nga kalipay ug paglaom sa mga kalag sa tighatag ug sa tigdawat. Sa tinuod, “unsa ka dako ang imong hingpit nga kalipay”10 samtang ikaw mopakigbahin sa ebanghelyo! Ang pagpakigbahin sa ebanghelyo modugang og hingpit nga kalipay ngadto sa hingpit nga kalipay, paglaom ngadto sa paglaom.11
Ang Pagpakigbahin sa Ebanghelyo Modala sa Gahom sa Dios ngadto sa Atong mga Kinabuhi
Sa dihang kita gibunyagan, ang matag usa kanato misulod og usa ka makanunayon nga12 pakigsaad ngadto sa Dios “sa pag-alagad kaniya ug sa pagtuman sa iyang mga sugo,”13 nga naglakip sa “ “[pag]bar[o]g ingon nga mga saksi [Kaniya] sa tanan nga mga panahon ug diha sa tanan nga mga butang,.”14 Samtang kita “magpabilin diha” Kaniya pinaagi sa pagtuman niini nga pakigsaad, ang makapadasig, makapatunhay, makabalaan nga gahom sa pagkadiosnon modagayday sa atong mga kinabuhi gikan ni Kristo, sama nga ang usa ka sanga mokuha og kalig-on gikan sa bagon.15
Ang Pagpakigbahin sa Ebanghelyo Mopanalipod Kanato gikan sa Tentasyon
Ang Ginoo nagmando:
“Ipakita ninyo ang inyong kahayag aron kini moiwag sa kalib[o]tan. Tan-awa Ako mao ang kahayag diin kamo mopakita—nga diin kamo nakakita kanako nga mihimo. …
“… Ako misugo nga … kamo moduol ngari kanako, nga kamo unta mobati ug makakita; gani mao kini nga kamo mobuhat ngadto sa kalib[o]tan; ug si kinsa kadto nga molapas niini nga sugo nagtugot sa iyang kaugalingon nga bihagon ngadto sa pagtintal.”16
Ang pagpili nga dili mopakita sa kahayag sa ebanghelyo modala kanato ngadto sa ngiob nga mga dapit, diin kita mas dali nga madutlan sa tentasyon. Labing mahinungdanon, ang sukwahi tinuod: ang pagpili nga mopakita sa kahayag sa ebanghelyo mas mopaduol kanato ngadto niana nga kahayag ug sa proteksyon nga ihatag niini batok sa tentasyon. Pagkadako niini nga panalangin sa kalibotan karon!
Ang Pagpakigbahin sa Ebanghelyo Modala og Pagkaayo
Si sister Tiffany Myloan midawat sa pagdapit sa pagsuporta sa mga misyonaryo bisan pa sa bug-at nga personal nga mga panlimbasog, lakip na sa mga pangutana kabahin sa iyang hugot nga pagtuo. Siya bag-ohay lang misulti kanako nga ang pagsuporta sa mga misyonaryo nakapabag-o sa iyang hugot nga pagtuo ug pagbati nga maayo ra ang tanan. Sa iyang mga pulong, “Ang misyonaryo nga buhat makapaayo gayod.”17
Hingpit nga kalipay. Paglaom. Makapatunhay nga gahom sa Dios. Proteksyon gikan sa tentasyon. Pagkaayo. Kining tanan—ug uban pa (lakip sa kapasayloan sa mga sala)18—motuhop ngari kanato gikan sa langit samtang kita mopakigbahin sa ebanghelyo.
Karon, Ang Paglihok sa Atong Dakong Oportunidad
Mga kaigsoonan, adunay daghan taliwala “sa tanan nga … mga pundok, [mga tinuohan], ug mga pundok sa relihiyon … kinsa natago gikan sa kamatuoran tungod kay sila wala masay[o]d asa kini pangitaa.”19 Ang panginahanglan sa pagpakita sa atong kahayag wala pa sukad molabaw ka mahinungdanon sa tibuok nga kasaysayan sa tawo. Ug ang kamatuoran wala pa sukad molabaw sa pagkadali niini karon nga mapalgan.
Si Jimmy Ton, kinsa nagdako nga usa ka Buddhist, nakadayeg sa usa ka pamilya kinsa mipakigbahin sa ilang kinabuhi pinaagi sa YouTube. Sa dihang nahibaloan niya nga sila mga miyembro sa Ang Simbahan ni Jesukristo sa mga Santos sa Ulahing mga Adlaw, gitun-an niya ang ebanghelyo sa online, gibasa ang Basahon ni Mormon gamit ang app, ug nagpabunyag human makighimamat sa mga misyonaryo didto sa kolehiyo.20 Si Elder Ton usa na karon ka full-time nga misyonaryo.
Siya ug ang iyang kaparehas nga mga misyonaryo sa tibuok kalibotan mao ang batalyon sa Ginoo—kinutlo gikan sa atong propeta.21 Kini nga mga misyonaryo misukwahi sa nauso sa kalibotan: samtang ang mga survey nagtaho nga ang Henerasyon Z nagpalayo gikan sa Dios,22 ang atong mga batan-ong manggugubat23 nga mga elder ug mga sister nagtudlo sa mga tawo padulong ngadto sa Dios. Ug ang nagkadaghan nga mga miyembro sa Simbahan nakighiusa sa mga misyonaryo sa pagpakigbahin sa ebanghelyo, pagtabang sa nagkadaghan nga mga higala sa pagduol ngadto kang Kristo ug sa Iyang Simbahan.
Ang atong mga Santos sa Ulahing mga Adlaw sa Liberia mitabang sa 507 ka higala sa pagsulod ngadto sa mga tubig sa bunyag atol sa 10 ka bulan nga walay full-time nga mga misyonaryo nga nagserbisyo sa ilang nasod. Sa dihang ang usa sa atong talagsaon nga mga presidente didto nakadungog nga ang full-time nga mga misyonaryo tingali mobalik na, miingon siya: “O, maayo nuon, karon makatabang na sila nato sa atong gimbuhaton.”
Sakto siya: ang pagpundok sa Israel—ang pinakamahinungdanon nga kawsa sa yuta24—mao ang atong gipakigsaad nga katungdanan. Ug mao kini ang atong panahon! Ang akong imbitasyon karon simple ra: ipakigbahin ang ebanghelyo. Magpakatinuod sa inyong kaugalingon ug ipakita ninyo ang inyong kahayag. Pag-ampo alang sa tabang sa langit ug sunda ang espirituwal nga mga pag-aghat. Ipakigbahin ang inyong kinabuhi sa normal ug natural nga paagi, ug pagdapit og laing tawo sa pagduol ug pagsusi, sa pagduol ug pagtabang, ug sa pagduol ug pagpasakop.25 Ug dayon pagmaya samtang kamo ug kadtong inyong gihigugma makadawat sa gisaad nga mga panalangin.
Ako nasayod nga diha ni Kristo kining maayo nga balita isangyaw ngadto sa maaghop; diha ni Kristo ang nasakitan hupayon; diha ni Kristo ang mga binilanggo hatagan og kagawasan; ug diha ni Kristo, kadtong nagbangotan hatagan og katahom puli sa abo.26 Busa, gikinahanglan kaayo nga kining mga butanga mahibaloan sa tanan nga naglibot kanato!27
Ako mopamatuod nga si Jesukristo mao ang tigpasiugda ug tighingpit sa atong hugot nga pagtuo.28 Siya motapos, Siya mohingpit, sa atong paggamit sa hugot nga pagtuo—bisan kon kini dili pa hingpit—diha sa pagpakita sa kahayag sa ebanghelyo. Siya mopakita og mga milagro sa atong mga kinabuhi ug sa mga kinabuhi sa tanan nga Iyang pundokon, kay Siya usa ka Dios sa mga milagro.29 Sa talagsaon nga ngalan ni Jesukristo, amen.