Pagpalawom sa Atong Pagkakabig ngadto kang Jesukristo
Ang mga kasulatan ug ang atong kahibalo sa Dios mga gasa—mga gasa nga kasagaran atong gipakaingnon nga mao na. Atong mahalon kini nga mga panalangin.
Salamat kaayo, Elder Nielson, sa imong maanindot nga mensahe. Nagkinahanglan kita niana.
Minahal kong mga kaigsoonan, si Presidente Russell M. Nelson nagtudlo kanato bag-ohay lang: “Ang pagbuhat og bisan unsang mas maayo nagkinahanglan og paningkamot. Ang pagkahimong tinuod nga disipulo ni Jesukristo dili eksepsyon. Ang pagpalambo sa inyong hugot nga pagtuo ug pagsalig Kaniya nagkinahanglan og paningkamot.” Lakip sa mga rekomendasyon nga iyang gihatag kanato sa pagpatubo sa atong hugot nga pagtuo diha kang Jesukristo mao nga kita mamahimong mga tigkat-on, nga isubsob nato ang atong kaugalingon diha sa mga kasulatan aron makasabot og maayo sa misyon ug pagpangalagad ni Kristo. (Tan-awa sa “Si Kristo Nabanhaw; Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 102.)
Atong makat-onan sa Basahon ni Mormon nga ang mga kasulatan mahinungdanon nga bahin sa pamilya ni Lehi—ingon kadako nga si Nephi ug ang iyang mga igsoon nga lalaki mibalik sa Jerusalem aron sa pagkuha sa mga palid nga tumbaga (tan-awa sa 1 Nephi 3–4).
Ang mga kasulatan nagpadayag sa kabubut-on sa Dios alang kanato, sama sa gibuhat sa bola kang Nephi ug sa iyang amahan. Human nabali ang iyang pana, si Nephi nagkinahanglan nga masayod asa siya mopaingon aron makakuha og pagkaon. Ang iyang amahan, si Lehi, mitan-aw sa bola ug nakakita sa mga butang nga nahisulat. Nakita ni Nephi nga ang mga igpupunting molihok sumala sa hugot nga pagtuo, kakugi, ug pagtagad nga gihatag ngadto niini. Nakita usab niya ang mga sinulat nga sayon ra mabasa ug diin mihatag kanila sa panabot mahitungod sa mga pamaagi sa Ginoo. Nakamatikod siya nga ang Ginoo makapahinabo sa mga mahinungdanon nga mga butang pinaagi sa gagmay nga mga paagi. Masulundon siya kabahin sa mga direksyon nga gihatag sa bola. Mitungas siya sa bukid ug nakakuha og pagkaon alang sa iyang pamilya, kinsa nag-antos og maayo gikan sa kakulang niini. (Tan-awa sa 1 Nephi 16:23–31.)
Para nako si Nephi usa ka estudyante nga subsob kaayo sa mga kasulatan. Atong mabasa nga si Nephi nahimuot sa mga kasulatan, namalandong niini sa iyang kasingkasing, ug nagsulat niini alang sa kasayoran ug kaayohan sa iyang mga anak (tan-awa sa 2 Nephi 4:15–16).
Si Presidente Russell M. Nelson miingon:
“Kon kita ‘mopadayon sa unahan, magbusog sa pulong ni Kristo, ug molahutay hangtud sa kataposan, … [kita] makabaton og kinabuhi nga dayon’ [2 Nephi 31:20].
“Ang pagbusog nagpasabot og labaw pa sa pagtilaw. Ang pagbusog nagpasabot og pagtagamtam. Atong matagamtam ang mga kasulatan pinaagi sa pagtuon niini diha sa diwa sa makapahimuot nga pagdiskobre ug kamatinud-anon nga pagsunod. Kon kita magbusog sa mga pulong ni Kristo, matisok kini ‘diha sa mga papan [undanong] nga mga kasingkasing sa tawo’ [2 Mga Taga-Corinto 3:3]. Mahimo na kining mahinungdanong bahin sa atong kinaiyahan” (“Living by Scriptural Guidance,” Liahona, Ene. 2001, 21).
Unsa ang Pipila ka Butang nga Atong Buhaton Kon ang Atong mga Kalag Nahimuot diha sa mga Kasulatan?
Ang atong tinguha nga mamahimong kabahin sa pagpundok sa Israel sa duha ka habig sa tabil modako. Normal lamang ug natural alang kanato sa pagdapit sa atong pamilya ug mga higala nga maminaw sa mga misyonaryo. Kita mamahimong takos, ug makaangkon kita og magamit nga rekomend sa templo aron makaadto sa templo sa kasagad nga mahimo. Motrabaho kita aron makakita, makapangandam, ug makasumiter sa mga ngalan sa atong katigulangan ngadto sa templo. Magmatinud-anon kita sa paghupot sa adlaw nga Igpapahulay, motambong sa simbahan matag Domingo aron bag-ohon ang atong mga pakigsaad ngadto sa Ginoo samtang moapil nga takos sa pag-ambit sa sakramento. Mosaad kita nga magpabilin diha sa dalan sa pakigsaad, magpuyo sa matag pulong nga mogula gikan sa ba-ba sa Dios (tan-awa sa Doktrina ug mga Pakigsaad 84:44).
Unsay Buot Ipasabot Niini nganha Kaninyo nga Mahimuot diha sa mga Butang sa Ginoo?
Ang pagkahimuot diha sa mga kasulatan labaw pa sa gutomon ug uhawon alang sa kahibalo. Si Nephi nakasinati og hilabihan nga kalipay sa iyang kinabuhi. Hinoon, miatubang usab siya og mga kalisod ug kagul-anan (tan-awa sa 2 Nephi 4:12–13). “Bisan pa niana,” siya miingon, “ako nasayod kang kinsa ako mosalig” (2 Nephi 4:19). Sa atong pagtuon sa mga kasulatan, mas masabtan nato ang plano sa Dios sa kaluwasan ug kahimayaan, ug mosalig kita sa mga saad nga Iyang gihimo ngari kanato diha sa mga kasulatan, ingon man usab sa mga saad ug mga panalangin sa mga propeta sa modernong panahon.
Usa ka hapon, ang akong asawa ug ako gidapit ngadto sa panimalay sa usa ka higala. Ang ilang pito ka tuig nga anak nga lalaki, si David, wala pa gayod nakadungog sa istorya sa Biblia kabahin ni David ug Goliat, ug gusto siya nga makadungog niini. Sa akong pagsugod og istorya sa sugilanon, natandog siya sa paagi nga si David, uban sa iyang hugot nga pagtuo ug sa ngalan sa Dios sa Israel, misamad ug mipatay sa Filistihanon gamit ang usa ka lambuyog ug usa ka bato, nga walay espada sa iyang kamot (tan-awa sa 1 Samuel 17).
Nagtan-aw kanako uban sa iyang hilabihan ka itom nga mga mata, lig-on nga nangutana kanako, “Kinsa ang Dios?” Mipasabot ako kaniya nga ang Dios mao ang atong Langitnong Amahan ug nga kita makakat-on kabahin Niya diha sa mga kasulatan.
Dayon nangutana siya nako, “Unsa man nang mga kasulatan?” Ako siyang giingnan nga ang mga kasulatan mao ang pulong sa Dios ug nga diha niini siya makakita og maanindot nga mga istorya nga makatabang kaniya nga mas masayod sa Dios. Gihangyo nako ang iyang inahan sa paggamit sa Biblia nga anaa niya sa ilang panimalay ug nga dili niya pakatulgon si David nga dili basahan sa tibuok istorya ngadto niya. Nahimuot siya samtang naminaw niini. Ang mga kasulatan ug ang atong kahibalo sa Dios mga gasa—mga gasa nga kasagaran atong gipakaingnon nga mao na. Atong mahalon kini nga mga panalangin.
Samtang nangalagad og misyon isip usa ka batan-ong lalaki, nakaobserbar ko nga pinaagi sa pagtudlo gamit ang mga kasulatan, ang kinabuhi sa daghang mga tawo nausab. Nasayod ako sa gahom niini ug kon unsaon niini pag-usab sa atong kinabuhi. Ang matag tawo nga atong natudloan sa gipahiuli nga ebanghelyo talagsaon nga indibidwal nga adunay lain-laing panginahanglan. Ang balaan nga mga kasulatan—oo, ang mga panagna nga nasulat sa balaan nga mga propeta—nakahatag kanila og hugot nga pagtuo diha sa Ginoo ug ngadto sa paghinulsol ug pagkausab sa ilang mga kasingkasing.
Ang mga kasulatan mipuno kanila sa kalipay samtang gidawat nila ang inspirasyon, direksyon, kahupayan, kalig-on, ug mga tubag sa ilang mga panginahanglan. Kadaghanan kanila nakahukom sa paghimo og mga kausaban sa ilang kinabuhi ug misugod sa paghupot sa mga sugo sa Dios.
Si Nephi nag-awhag kanato sa pagbusog diha sa mga pulong ni Kristo, tungod kay ang mga pulong ni Kristo magtug-an kanato sa tanan nga mga butang nga kinahanglan natong buhaton (tan-awa sa 2 Nephi 32:3).
Ako modapit kaninyo sa pagbaton og permanente nga plano sa pagtuon sa mga kasulatan. Ang Dali, Sunod Kanako usa ka dako nga kapanguhaan nga anaa kanato alang sa pagtudlo ug pagkat-on sa ebanghelyo, pagpalawom sa atong pagkakabig ngadto ni Jesukristo, ug pagtabang kanato nga mamahimong sama Kaniya. Kon magtuon kita sa ebanghelyo, wala lang kita mangita og bag-ong impormasyon; hinoon, nangita kita nga mamahimong “bag-o nga binuhat” (2 Mga Taga-Corinto 5:17).
Ang Espiritu Santo naggiya kanato paingon sa kamatuoran ug nagpamatuod ngari kanato sa kamatuoran (tan-awa sa Juan 16:13). Siya molamdag sa atong mga hunahuna ug mobag-o sa atong panabot ug motandog sa atong mga kasingkasing pinaagi sa pagpadayag gikan sa Dios, ang tinubdan sa tanang kamatuoran. Ang Espiritu Santo nagpaputli sa atong mga kasingkasing. Siya nagdasig diri kanato og tinguha sa pagsunod sumala sa kamatuoran ug naghunghong kanato og mga paagi sa pagbuhat niini. “Ang Espiritu Santo … magtudlo kaninyo sa tanang butang” (Juan 14:26).
Nagsulti sa mga pulong nga Iyang gipadayag ngadto ni Propeta Joseph Smith, ang atong Manluluwas miingon:
“Kini nga mga pulong dili sa mga tawo ni sa tawo, apan gikan kanako; …
“Kay kini mao ang akong tingog nga namulong kanila nganha kaninyo; kay sila gihatag pinaagi sa akong Espiritu nganha kaninyo … ;
“Busa, kamo makapamatuod nga kamo nakadungog sa akong tingog, ug nahibalo sa akong mga pulong” (Doktrina ug mga Pakigsaad 18:34–36).
Kinahanglan kitang magtinguha sa pagpakig-uban sa Espiritu Santo. Kini nga tumong kinahanglang modumala sa atong mga desisyon ug mogiya sa atong mga hunahuna ug mga lihok. Kinahanglan kitang magtinguha sa tanan nga magdapit sa impluwensiya sa Espiritu ug modumili sa bisan unsa nga motipas gikan niini nga impluwensiya.
Ako mopamatuod nga si Jesukristo mao ang hinigugmang Anak sa atong Langitnong Amahan. Ako nahigugma sa akong Manluluwas. Mapasalamaton ako sa Iyang mga kasulatan ug sa Iyang buhi nga mga propeta. Si Presidente Nelson mao ang Iyang propeta. Sa ngalan ni Jesukristo, amen.