Hinumdomi ang Imong mga Santos nga Nag-antos, O Among Dios

Ang plano sa Langitnong Amahan bahin sa kalipay naglakip sa mortal nga kasinatian diin ang tanan Niyang mga anak pagasulayan ug mag-atubang og mga pagsulay.¹ Lima ka tuig ang milabay nahibaloan nga ako adunay kanser. Akong nabati ug gibati pa gihapon ang pisikal nga kasakit tungod sa mga operasyon, mga pagtambal pinaagi sa radiation, ug mga epekto sa tambal. Nakasinati ko og emosyonal nga mga panlimbasog atol sa mga gabii nga lisod ko makatulog tungod sa labihan nga sakit. Ang medikal nga mga timailhan nagpakita nga basin og mas sayo kong motaliwan sa mortalidad kay sa akong gilaoman, mobiya sa pamilya nga maoy labing mahinungdanon alang kanako, sulod sa usa ka panahon.

Bisan asa pa kamo nagpuyo, ang pisikal o emosyonal nga pag-antos sa nagkalainlaing mga pagsulay ug mortal nga mga kahuyang nahimo na kaniadto, karon, o sa umaabot nga kabahin sa inyong kinabuhi.

Ang pisikal nga pag-antos mahimong resulta sa natural nga pagkatigulang, wala damha nga mga sakit, ug kalit nga mga aksidente; kagutom o pagkawalay panimalay; o abuso, bayolente nga binuhatan, ug gubat.

Ang emosyonal nga pag-antos mahimong maggikan sa kahasol o depresyon; pagluib sa kapikas, ginikanan, o gisaligan nga lider; panarbaho o problema sa pinansyal; dili patas nga paghukom sa uban; mga pagpili sa mga higala, mga anak, o ubang mga sakop sa pamilya; abuso sa daghang matang niini; wala matuman nga mga pangandoy sa kaminyoon o mga anak; grabe nga sakit o pagkamatay og sayo sa mga minahal; o daghan pa kaayong mga hinungdan.

Unsaon man ninyo nga makalahutay sa talagsaon ug usahay makahugno nga pag-antos nga moabot sa matag usa nato?

Salamat na lang, ang paglaom makaplagan diha sa ebanghelyo ni Jesukristo, ug ang paglaom mahimong kabahin usab sa inyong kinabuhi. Karon mopaambit ko og upat ka baroganan sa paglaom nga gikuha gikan sa kasulatan, propetikanhong mga pagtulon-an, daghang pagpangalagad nga mga pagbisita, ug ang akong kaugalingong nagpadayon pa nga pagsulay sa kahimsog sa panglawas. Kini nga mga baroganan dili lang magamit sa kadaghanan apan personal usab kaayo kini.

Una, ang pag-antos wala magpasabot nga ang Dios wala mahimuot sa inyong kinabuhi. Duha ka libo ka tuig ang milabay, ang mga disipulo ni Jesus nakakita og usa ka tawo nga buta didto sa templo ug nangutana, “Magtutudlo, kinsa may nakasala nga natawo man siyang buta, siya ba o ang iyang mga ginikanan?”

Ang iyang mga disipulo morag nasayop sa pagtuo, sama sa kadaghanan gayod sa mga tawo karon, nga ang tanang kalisdanan ug pag-antos maoy resulta sa sala. Apan ang Manluluwas mitubag, “Ang iyang pagkabuta dili tungod sa iyang mga sala, o sa mga sala sa iyang ginikanan: siya natawong buta aron ang gahom sa Dios ikapadayag diha kaniya.”²

Ang buhat sa Dios mao ang pagpahinabo sa atong pagka-imortal ug sa kinabuhi nga dayon.³ Apan sa unsang paagi nga ang mga pagsulay ug pag-antos—ilabi na ang pag-antos nga gumikan sa sayop nga paggamit sa kabubut-on sa ubang tawo⁴—sa kataposan makapalambo sa buhat sa Dios?

Ang Ginoo miingon sa Iyang mga tawo sa pakigsaad, “Ako milimpyo kaninyo … ; Ako mipili kaninyo diha sa hudno sa kasakit.”⁵ Bisan unsa pa man ang hinungdan sa inyong mga pag-antos, ang inyong mahigugmaon nga Langitnong Amahan makapahimo niini nga makalimpyo sa inyong kalag.⁶ Ang nalimpyohan nga mga kalag makatambayayong sa mga palas-anon sa uban sa tinud-anay nga pagsabot ug kalooy.⁷ Ang nalimpyohan nga mga kalag nga nakalahutay “sa dakong paglutos” giandam aron mopuyo sa hingpit nga kalipay sa presensya sa Dios hangtod sa kahangtoran, ug “pahiran sa Dios ang tanang luha sa ilang mga mata.”⁸

Ikaduha, ang Langitnong Amahan nakahibalo gayod sa inyong pag-antos. Samtang anaa taliwala sa mga pagsulay, masayop kita sa paghunahuna nga ang Dios layo kaayo ug wala magpakabana sa atong kasakit. Bisan si Propeta Joseph Smith mipahayag sa iyang pagbati atol sa lisod nga higayon sa iyang kinabuhi. Sa dihang gibilanggo sa Liberty Jail samtang ang liboan ka Santos sa Ulahing mga Adlaw gipalayas gikan sa ilang mga panimalay, si Joseph nagtinguha nga makasabot pinaagi sa pag-ampo: “O Dios, hain ba ikaw? Ug hain ang imong gambalay nga nagsalipod sa imong tagoanan?” Siya mitapos pinaagi niini nga pangamuyo: “Hinumd[o]mi ang imong mga santos nga nag-ant[o]s, O among Dios.”⁹

Ang tubag sa Ginoo nakahatag og kasigurohan ni Joseph ug sa tanang nag-antos:

“Akong anak, kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon;

“Ug unya, kon ikaw molahutay pag-ayo, ang Dios mobayaw kanimo sa kahitas-an.”¹⁰

Daghang Santos nga nag-antos ang mipaambit kanako kon sa unsang paagi sila mibati sa gugma sa Dios atol sa ilang mga pagsulay. Klaro gayod nakong nahinumdoman ang akong kaugalingong kasinatian sa usa ka higayon sa akong pakigbatok sa kanser sa dihang ang mga doktor wala pa mahibalo sa hinungdan sa pipila ka grabe nga kasakit. Milingkod ko tupad sa akong asawa, nga mohatag unta sa naandan nga pagpanalangin sa among paniudto. Apan, ang nahimo lang nako mao ang paghilak, “Langitnong Amahan, palihog tabangi ko. Masakiton kaayo ko.” Sulod sa sunod nga 20 ngadto sa 30 ka segundo, giliyokan ko sa Iyang gugma. Wala ko hatagi sa hinungdan sa akong sakit, walay pagpasabot sa umaabot nga resulta, ug walay kahupayan gikan sa kasakit. Gibati lang nako ang Iyang tiunay nga gugma, ug kadto igo na.

Ako mosaksi nga ang atong Langitnong Amahan, kinsa nasayod sa pagkahulog bisan sa usa ka langgam nga sayaw, nasayod usab sa inyong pag-antos.¹¹

Ikatulo, si Jesukristo motanyag sa Iyang makahatag og katakos nga gahom aron sa pagtabang kaninyo nga makabaton og kalig-on aron molahutay pag-ayo sa inyong pag-antos. Kini nga makahatag og katakos nga gahom nahimong posible pinaagi sa Iyang Pag-ula.¹² Nahadlok ko nga daghan kaayong mga miyembro sa Simbahan ang maghunahuna nga kon mas lig-on lang unta sila, makasugakod ra sila sa bisan unsa nga pag-antos nga sila ra. Lisod kini nga paagi sa pagpakabuhi. Ang inyong temporaryong kalig-on dili gayod ikatandi sa walay kinutoban nga tinubdan sa gahom sa Manluluwas sa paglig-on sa inyong kalag.¹³

Ang Basahon ni Mormon nagtudlo nga si Jesukristo “modala diha kaniya” sa atong mga kasakit, mga balatian, ug mga kahuyang aron Siya makatabang kanato.¹⁴ Unsaon man ninyo sa pagkuha ang gahom nga gitanyag ni Jesukristo aron sa pagtabang ninyo ug paglig-on ninyo sa mga panahon sa pag-antos? Ang labing mahinungdanon mao ang pagbugkos sa inyong kaugalingon ngadto sa Manluluwas pinaagi sa pagtuman sa mga pakigsaad nga inyong gihimo uban Niya. Naghimo kita niining mga pakigsaad samtang modawat kita sa mga ordinansa sa pagkapari.¹⁵

Ang katawhan ni Alma misulod ngadto sa pakigsaad sa bunyag. Wala madugay nag-antos sila sa pagkaulipon ug gidid-an sa pagsimba diha sa publiko o gani sa pag-ampo og kusog. Apan padayon gihapon sila nga mituman sa ilang mga pakigsaad kutob sa ilang mahimo pinaagi sa hilom nga pag-ampo diha sa ilang mga kasingkasing. Agi og resulta, ang balaanong gahom miabot. “Ang Ginoo mipalig-on kanila nga sila makada[o]g sa ilang mga alant[o]son uban sa kasayon.”¹⁶

Sa atong panahon karon, ang Manluluwas nagdapit, “Paghunahuna ngari kanako sa matag hunahuna; ayaw pagduha-duha, ayaw kahadlok.”¹⁷ Kon kita motuman sa atong pakigsaad sa sakramento nga kanunayng mohinumdom Kaniya, Siya nagsaad nga ang Iyang Espiritu mag-uban kanato. Ang Iyang Espiritu mohatag kanato og kalig-on aron sa paglahutay sa mga pagsulay ug mobuhat sa unsay dili nato mahimo nga kita ra. Ang Espiritu makahimo sa pag-ayo kanato, bisan kon sama sa gitudlo ni Presidente James E. Faust, “Ang ubang pag-ayo mahimong mahitabo sa sunod na nga kinabuhi.”¹⁸

Kita gipanalanginan usab og mga pakigsaad ug mga ordinansa sa templo, diin “ang gah[o]m sa pagka-diosnon gipakita.”¹⁹ Mibisita ko sa usa ka babaye nga namatyan og ten-edyer nga anak nga babaye tungod sa aksidente, dayon wala madugay ang iyang bana tungod sa kanser. Nangutana ko niya giunsa niya paglahutay ang pagkamatay sa iyang mga minahal ug pag-antos. Mitubag siya nga ang kalig-on nagagikan sa espirituhanon nga mga kasigurohan bahin sa mahangtorong pamilya, nga nadawat atol sa kanunayng pagsimba didto sa templo. Sama sa gisaad, ang mga ordinansa sa balay sa Ginoo nakahatag kaniya og gahom sa Dios.²⁰

Ikaupat, pilia nga mangita og hingpit nga kalipay kada adlaw. Kadtong nag-antos kasagaran mobati nga ang kagabhion morag walay kinutoban, ug ang kahayag sa adlaw dili na gayod moabot. OK ra nga mohilak.²¹ Apan, kon imong nakita ang imong kaugalingon nga nag-antos diha sa ngitngit nga mga kagabhion, pinaagi sa pagpili sa hugot nga pagtuo makamata kamo ngadto sa hayag nga kabuntagon sa kalipay.²²

Pananglitan, mibisita ko og usa ka batan-ong inahan nga gitambalan alang sa kanser, mapahiyomon kaayo nga naglingkod bisan sa kasakit ug pagkawalay buhok. Nakahimamat ko og magtiayon nga igo na ang pangedaron nga malipayong nagserbisyo isip mga lider sa kabatan-onan bisan kon dili sila makaanak. Naglingkod ko uban sa usa ka minahal nga babaye—usa ka dili pa kaayo tantong edaran nga apohang babaye, inahan, ug asawa—kinsa namatay sulod lang sa pipila ka adlaw, apan taliwala sa mga luha sa pamilya mao ang makalingaw ug malipayon nga mga paghinumdom.

Kining nag-antos nga mga Santos nagpakita og ehemplo sa unsay gitudlo ni Presidente Russell M. Nelson:

“Ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.

“Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.”²³

Ako mopamatuod²⁴ nga ang atong Langitnong Amahan nahinumdom sa Iyang mga Santos nga nag-antos, nahigugma kaninyo, ug nahibalo gayod bahin kaninyo. Ang atong Manluluwas nasayod kon unsay inyong gibati. “Sa pagkamatuod siya mipas-an sa atong mga kagul-anan, ug midala sa atong mga kasub-anan.”²⁵ Ako nasayod—isip usa ka tigdawat kada adlaw²⁶—nga ang pagtuman sa mga pakigsaad mobukas sa gahom sa maulaong sakripisyo ni Jesukristo aron sa paghatag kanato og kalig-on ug gani hingpit nga kalipay nganha kaninyo nga nag-antos.

Alang sa tanang nag-antos, ako nag-ampo, “Hina[o]t pa unta nga ang Dios maghatag nganha kaninyo nga ang inyong mga kabudlay mahimo nga magaan, pinaagi sa hingpit nga kalipay sa iyang Anak.”²⁷ Sa ngalan ni Jesukristo, amen.