Oltaem Tingbaot Hem

Ol dia brata mo sista, taem mi bin stap sev long Esia, samtaem ol man oli stap askem long mi se, “Elda Gong, ?i gat hamas man long Eria blong Jos long Esia?”

“Mi talem se, “haf populesen blong wol—3.6 bilian man.”

Wan i askem se, “?Hem i had blong tingbaot nem blong evriwan?”

Fasin blong stap tingbaot—afta foget—hem i pat blong laef evri dei. Eksampol, wantaem, afta we waef blong mi i bin stap lukaotem niufala mobael fon blong hem, hem i disaed blong yusum wan nara fon blong ringim. Taem hem i harem fon blong hem i stap ring, hem i sta tingting se, “?Huia i stap ringim mi? !Mi no bin givim namba blong mi long eni man!”

Fasin blong stap tingbaot—mo foget—hem i pat blong rod blong yumi i go long laef we i no save finis. Taem, ejensi, mo memori i helpem yumi blong lanem samting, gro, mo leftemap fet.

Long ol toktok blong wan hym we mi laekem tumas:

Evri wik, taem yumi stap tekpat long sakramen, yumi promes blong oltaem tingbaot Hem. Blong yusum ol 400 skripja vas we i gat toktok iatingbaot, hemia sikis fasin we yumi save mekem blong tingbaot Hem oltaem.

Faswan, yumi save tingbaot Hem oltaem taem yumi trastem ol kavenan, ol promes, mo ol toktok blong Hem.

Lod i stap tingbaot ol kavenan blong Hem we i nogat en—stat long taem blong Adam kasem dei we ol laen blong Adam “bae oli holemtaet tru tok, mo lukluk i go antap, afta bae Saeon i lukluk i kam daon, mo bae heven mo wol ia i seksek wetem glad.” ²

Lod i stap tingbaot ol promes blong Hem, ingkludum ol promes blong karem bak Isrel i kam tugeta, tru long Buk blong Momon: Wan narafala testemoni blong Jisas Kraes, mo ol promes blong Hem we Hem i bin givim long evri memba mo ol misinari we oli stap tingbaot praes blong ol sol.³

Lod i stap tingbaot mo i stap promesem ol nesen mo ol pipol. Tedei, long ol taem blong bisi mo konfius, ⁴ “sam man oli stap trastem ol kat blong faet blong olgeta mo sam oli stap trastem ol hos blong olgeta: be yumi Hae God i God blong yumi mo yumi trastem paoa blong Hem,” ⁵ we i stap gaedem “fiuja from se wanem we i pas hem i blong hem.” ⁶ Long “ol taem blong trabol,”⁷ yumi “mas tingbaot se i no wok blong God we i no stret, be hem i wok blong ol man.”⁸

Namba tu, yumi mas tingbaot Hem oltaem wetem glad mo tangkyu long wanem we Hem i stap mekem long ol laef blong yumi.

Han blong Lod long laef blong yumi hem i kam klia moa taem we samting i pas finis. Olsem we wan Kristin man: Soren Kikegad i talem: “Bae yumi save andastanem laef moa taem we samting i pas finis. Be …yumi mas save wanem i stap happen naoia mo rere from wanem we bae i kam.” ⁹

Dia mama blong mi i jes stap selebretem 90 yia betdei blong hem. Hem i testifae wetem gladhat long ol blesing blong God from ol samting we i hapen long laef blong hem. Ol famli histri, ol samting we famli i stap mekem oltaem mo ol famli rilesensip i helpem yumi blong glad blong stap tingbaot ol samting we i pas finis, taem yumi stap plan mo hop from fiuja. Ol Prishud laen blong atoriti mo ol petriakel blesing oli talemaot witnes blong han blong God long evri jeneresen.

? Yu bin stap tingbaot se yuwan yu olsem wan laef buk blong ol samting we yu stap tingbaot—i stap soemaot wanem mo olsem wanem yu stap jus blong tingbaot?

Eksampol, taem mi yangfala, mi wantem tumas blong plei basketbol long skul. Mi praktis mo praktis. Wan dei koj i poenemaot 1.93 meta senta mo 1.88 meta fowod blong mifala we oli ol top atlet mo i talem long mi, Mi save putum yu long tim, be luk olsem se bae yu neva plei.” Mi tingbaot se afta, hem i bin leftemap tingting blong mi wetem kaen fasin, “?Yu no wantem traem futbol? Bae yu gud moa long futbol.” Famli blong mi i bin singsingaot taem mi skorem fas poen blong mi.

Yumi save tingbaot olgeta we oli bin givim wan janis long yumi, mo namba tu janis bakegen, wetem ones fasin, kaen fasin mo fasin blong save wet longtaem mo leftemap tingting. Mo bae yumi save kam wan man we ol nara man i save tingbaot taem oli nidim help. Blong stap tingbaot help blong ol nara man wetem tangkyu, mo paoa blong Spirit we i stap gaedem yumi; i wan wei we yumi stap tingbaot Hem. Hem i wan wei we yumi stap kaontem ol blesing blong yumi mo stap luk wanem we God i bin mekem.¹⁰

Nambatri, yumi save tingbaot Hem oltaem blong gat tras taem we Lod i talem se “hem we i sakem sin, hem bae mi fogivim, mo Mi, Lod, bae mi no moa tingbaot.”¹¹

Taem yumi sakem sin fulwan, ingkludum taem yumi stap konfes mo fogetem ol sin ia, yumi askem wetem Inos, taem rong ia i kamaot long yumi, “?Lod, yu mekem samting ia olsem wanem? Mo harem ansa ia “From fet blong yu long Kraes”¹² mo invitesen blong Hem blong “stap tingbaot mi.”¹³

Taem yumi sakem sin mo olgeta we oli holem prishud oli talemaot se yumi klin inaf, i no nid blong yumi konfes mo konfes bakegen. Blong stap klin inaf i no minim se blong stap stret mo gud. Plan blong Hem blong stap glad i stap invaetem yumi blong putum tingting i stap daon wetem pis long laef ia folem rod ia we wan dei bae yumi save kam stret mo gud long Kraes, ¹⁴ no stap wari oltaem, kros, o no hapi from ol wiknes blong yumi. Tingbaot, Hem i save evri samting i a we yumi no wantem ol narafala man blong save abaot yumi—mo hem i lavem yumi moa.

Samtaem laef ia i stap testem tras we yumi gat long sore, jastis, mo jajmen blong Kraes mo long invitesen blong Hem blong mekem yumi fri mo letem Atonmen blong Hem i hilim yumi taem yumi stap fogivim ol narafala man mo yumiwan.

Wan yang woman blong wan nara kantri i bin aplae blong wok olsem wan man blong raetem nius, be bos ia we i stap givimaot ol wok i wan rabis man. Hem i talem long hem, “Wetem signeja blong mi, mi save talem long yu se bae yu no save kam man blong raetem nius be bae yu go digim ol rod blong wota i ronaot. Hemwan nomo hem i woman we i stap mekem wok ia wetem ol man.

Plante yia i pas, woman ia i kam wan bos. Wan dei wan man i kam from signeja blong hem from wan wok.

Hem i askem, “?Yu tingbaot mi?” Man ia i no tingbaot.

Hem i talem se, “yu no tingbaot mi, be mi mi tingbaot yu. Wetem signeja blong yu, yu mekemsua se mi mi neva kam wan man blong raetem nius. Wetem signeja blong yu, yu sendem mi go digim hol blong wota, wan woman nomo, insaed long grup blong ol man.”

Hem i bin talem long mi se, “Mi filim se mi sud tritim hem moa gud bitim we hem i bin tritim mi—be mi nogat paoa ia blong mekem olsem.” Samtaem paoa ia i no stap insaed long yumi, be yumi save faenem taem yumi stap tingbaot Atonmen blong Sevya blong yumi Jisas Kraes.

Taem tras i lus, ol drim i no moa save kam tru, ol hat i brok, mo i brok bakegen, taem yumi wantem jastis mo nidim sore, taem yumi kros mo wota blong ae i foldaon, taem yumi nid blong save wanem blong holemtaet mo wanem blong lego, yumi save oltaem; tingbaot Hem. Laef i no nogud tumas olsem we yumi stap ting. Sore blong Hem we i nogat en, i save helpem yumi blong faenem rod, trutok, mo laef.¹⁵

Taem yumi tingbaot ol toktok mo eksampol blong Hem, bambae yumi no save mekem o harem nogud from ol rabis fasin.

Papa blong fren blong mi i wok olsem wan makanik. Yu save luksave wok blong hem long ol han blong hem, we hem i traehad blong stap wasem gud. Wantaem, wan man long tempol i talem long papa blong fren blong mi se hem i mas klinim gud han blong hem bifo hem i go long tempol. Be hem i no harem nogud, gudfala man ia i stat blong wasem ol plet blong famli blong hem long han nomo, wetem plante sop, bifo hem i go long tempol. Hem i soemaot olgeta we oli “go antap long hil ia blong Hae God” mo “go insaed long tabu ples ya blong hem” wetem ol han mo hat we i klin bitim evri narafala. ¹⁶

Sapos yumi gat ol nogud filing, ol komplen, o agens o sapos yumi mas askem fogivnes long ol narafala man, naoia hem i taem blong mekem.

Namba fo, Hem i invaetem yumi blong tingbaot se Hem i oltaem welkamem yumi blong kam hom.

Yumi stap lanem samting taem yumi stap askem mo lukaotem. Be plis yu no stop blong lukaotem kasem—long toktok blong T. S. Eliot—“we yu kasem ples we yu bin stat long hem mo filim se yu neva save ples ia bifo.”¹⁷ Taem yu redi, plis openem hat blong yu long Buk blong Momon, bakegen, wetem wan tru hat.

Gat tras long ol memori blong bifo. Letem hemia i leftemap fet blong yu. Wetem God, i no gat wan taem we bae yu no save go bak mo sakem sin.

Ol profet blong bifo mo naoia i stap askem yumi blong no letem ol nogud fasin, o wiknes—blong narafala man mo blong yuwan—i mekem se yu mestem ol tru tok, ol kavenan, mo paoa blong gospel blong Hem we i bin kambak, we i save pemaot sin.¹⁸ Hemia hem i impoten tumas insaed long wan Jos we yumi evriwan i stap wantem gro nomata we yumi gat ol wiknes. Profet Josef Smit i bin talem, “Mi neva talem long yu se mi stret mo gud; be i nogat mistek long ol revelesen we mi bin tijim.” ¹⁹

Namba faef, yumi save tingbaot Hem oltaem long Sabat tru long sakramen. Long en blong ministri blong hem long wol ia mo long stat blong ministri blong Hem taem Hem i laef bakegen, Sevya blong yumi i karem bred mo wota mo askem se bae yumi tingbaot bodi mo blad blong Hem,, ²⁰ “from ol taem we yu mekem hemia, bae yu stap tingbaot ol taem we mi bin stap wetem yu.”²¹

Long odinens blong sakramen, yumi witnes long God Papa se yumi wantem blong tekem nem blong Pikinini Hem long yumi mo oltaem tingbaot Hem mo kipim ol komanmen blong Hem, we Hem i bin givim long yumi, blong oltaem gat Spirit blong Hem i stap wetem yumi.²²

Olsem we Amulek i bin tijim, yumi tingbaot hem taem we yumi pre from ol plantesen, ol animol, mo ol famle blong yumi mo taem yumi tingbaot olgeta we oli gat nid, oli neked, oli sik mo oli harem nogud.²³

Las wan, namba sikis, Sevya blong yumi i invaetem yumi oltaem blong tingbaot Hem olsem we hem i stap tingbaot yumi.

Long Amerika, Sevya blong yumi we i laef bakegen i invaetem olgeta we oli stap blong kam, wan wan, mo putum han long saed blong Hem mo filim ol mak blong ol nil long han mo leg blong Hem.²⁴

Skripja i talem laef bakegen afta long ded olsem we “evri leg mo han mo evri joen bae i kambal long bodi blong hem,” mo “i no gat wan pis hea long hed we bae i lus.” ²⁵ Wetem hemia, tingbaot se olsem wanem nao Sevya blong yumi we i stret mo gud, i laef bakegen long ded be i stil gat ol mak blong soa saed blong Hem mo mak blong nil long ol han mo leg blong Hem.²⁶

Tru aot long histri, i gat sam man long wol ia we oli bin hangem olgeta tu long kros. Be, Sevya blong yumi nomo, Jisas Kraes, hem i haggem yumi wetem ol mak ia blong klin lav blong Hem. Hemwan nomo i fulfilim profesi we oli bin leftemap Hem long kros blong Hem i save singaotem wan wan long yumi, long nem blong yumi, i kam long Hem.²⁷

Sevya blong yumi i talemaot:

“Yes, oli save fogetem, be stil bae mi no fogetem yu.”

“Luk, mi bin raetem yu long skin blong insaedhan blong ol han blong mi.” ²⁸

Hem i testifae se: “Mi mi hemia we oli bin leftemap hem. Mi mi Jisas we i bin krusifae. Mi mi Pikinini Boe blong God.” ²⁹

Mi testifae wetem wan tingting i stap daon mo pre, se bae yumi oltaem tingbaot Hem—evri taem, long evri samting, mo long evri ples we yumi save stap long hem. ³⁰ Long nem blong Jisas Kraes, amen.