Muruwel ko Tamachib e Tawa’ath nag e Yafos Rog ni Gubinfen

Kam magar, President Nelson, nikam pii’ e fanow bayay ni marunga’agen e pigpig ko tamachib.

Pi walageg, boch e duw kafram napan ni kug non u general conference, ke kirebnag bin gilaey’ e p’owcheg bay e m’ar ni kanog e macular degeneration ngay, ni kari kireb nag nib bo’or nge dabiyog ni nggu guy u p’owcheg nem.

Napan ni nggu thapeg e magawon ney, gube falfalaen’ ni fan ko reb mit e guy, ni tay bu’un e sap ko tin kafram. Napan ni kug sap ko yafos rog, kup sap bochi ban’en nike ayuweg nigeg nib ga’. Ta’areb e n’en ir e rogon ni kug rrin’ e muruwel ko missionary napan ni kab fel’yagnreg u England nike yibliy nigeg nge ayuweg e rogon ko ya’el rog.

Kug lemnag maruga’agen e pi magawon nike yib machane Magof nib Ga’ ufithik e pi duw u 1930 nge ke thilyeg nib kireb e tonom rorad e galibthir nge tabinaew rog. Chitamag e kemus ni nge lemnag marunga’agen e rogon ni nge thap e kantin ko karo nge ayuweg e tabinaew rok’ ufithik e ngiyal’ ney nib mo’omaw e galibthir dabi unew ko misa.

Ni yug aram rogon dabgu uned ko misa ulan e tabinaew, de talageg ni nggu un bochi yay ngak pi fagar rog.

U lan e rran nem, ku lemnag marunga’agen ni nggu waen ko mission, machane gathi ban’en ni kug non ngak e galibthir.

Napan ni gu waean nga college, boch e pi fagar rog nge gag e kug me’eleg ni nggu wared ko mission. Kug mada’ ngak e bishof rog, kug yoloy e babyor ko misson napan e galibthir kar yaen nga rab e nam. Napan kar sulgow e galibthir rog, kug non ngorow ni bin somm’on e yay ni kug thapeg e pinning ni nggu pigpig u Great Britain. Gube pining e magar ko ayuw rorow nib fel’ nifan ko me’eleg nge nifan e pi walageg nib mangil ni kar ayuwegeg ni nggu me’eleg ni nggu pigpig.

Pigpig ko mission ke tanmeg nigeg ni nggu mang nib fel’ e figirngiy nge chitamangiy nge kug mang nib chag ko muruwel. Ma ke tanmeg nigeg nifan ko pigpig ko gubin e yafos rog ngak Somoel ulan e Galasia Rok’.

Ulan e general conference ko April 1985, kug thapeg e muruwel ni nggu non ulan e mu’ulung ko priesthood. Kug non ngak e pagael nib fel’yangren. Kug non marunga’agen e ta’ermadliy nifan e pigpig nag ko mission. Ku gog, “Ko gubin e fil ni kug thapeg ulan e pi muruwel ko Galasia, dariy e tiney nib th’abi mangil ni woed e fil ni kug thapeg napan kug mang e elder nib ragag nge meruk e duw nge pgipig ko missionary.”¹

En Somoel e manangem. Napan ni ngam pigpig ko mission romed, e pi’nen ra buch ngomed era ayuwegmed ni ngam nanged Ir nib mangil. Rayog ni ngam ga’ nag e ya’el romed napan ni ngam pigpig Ngak. U Fithingan, rayog ni ngan pii’em ngam pigpig ko boch e gidii’. Ir ra pii’ ngomed e pi’nem nira buch ngomed ufithik’ e yi’iy rok’ fare Kan ni Thothup. Fare Somoel ra pii’ e rayog ngomed ni ngam machib u Fithingan. Ra ngam dag Ngak e rayog irba tay e pagaen’ rok’ ngom.

Lal’ e pul kafram, Elder Jeffrey R. Holland nge Elder Quentin L. Cook, ni kar pigpig ko pi missionary u lan fare British Isles, kar un’ew ngog ni nggu mada’ e fapi chonngin nge pi missionary u nam ney nib fel’ ya’an. Napan kug paer ura’, kug lemnag marunga’agen e pi’nen ke buch ngog napan ni gag e misisonary nib fel’yangren. Gube pii’ e mich rog ni kug nang ni Chitamag nibay u Tharmiy nge Somoel rog ni Yesus Kristus ma nang nge gub t’uf rog.

Kan tawa’awth nigeg ni bay l’agruw e pi mission president nib fel’, ni Selvoy J. Boyer nge Stainer Richards, nge gali ppin rorow Glady Boyer nge Jane Richards. Gube sap kafram, rayog ni nggu guy ni rib moem ni kar mpag nge gub t’uf rog. Kar filew ngog e gospel. Yow ba’adag ni nggu fil bo’or banan. Kar pii’ew ngog bo’or e muruwel nib mo’omaw’ nge muruwel ko tiyugang’ ni ngeyag ni mon’og nge fal’eg rogog nifan e yafos nib sug ko pigpig.

Ku aram rogon ni nggu lemnag e pinning rok’ Presiden Spencer W. Kimball ni kug mat’aweg e Canada Toronto Mission ni nge un le’engig ngog nib t’uf rog, Barbara, nge pi fakmow. President Kimball nike pinningdad ni nggu pigpig u April 1974, de n’uw napan ni ke pii’ e milwol nib yi’iy marunga’agen e muruwel’ ko mission ni kanoeg “Wi’in ni Gubin e Feylang nira Michaen’dad ngak Somoel.”² U milwol ney Presiden Kimball nike weliy marunga’agen e yi’iy rok’ ni urogon e gospel nira yib ulangab e fayleng. Nike pinning nifan ko bo’or reb e pi missionary ni bay ko gubin e nam u fayleng. Nike puguran ngodad e lemnag rok’ Somoel marunga’dad ni “gubin e pumo’on thingarda … non nib gaa’ lamdad ngak e gidii’ nu fayleng.”³ Machib ney rok’ President Kimball marunga’agen e lemnag ko pi pagael nib fel’yangren ni ngar pigpig ko mission ke mang e sabathin ulan e na’un ulangab e fayleng. Lem ney de thilyeg. Gub falfalen’ ni President Russell M. Nelson nike weliy bayay marunga’agen e lemnag rok’ Somoel biney e kadbul.

Chuchugur ko ragag e duw napan President Thomas S. Monson nike thilyeg e duw rok’ e bee’ ni rayog ni ney maen nga mission nifan ko e pagael nib fel’yangren nge ppin nib rugod.⁴ U lem rog, e fan ko thilyeg nira pii’ bo’or e pagal nib fel’yangren e rogon ni ngar thilyeg e yafos rorad napan nira pigpig ko mission.

Gag e Apostle ku Somoel i Yesus Kristus, gube pinning ngak e pi pagal ni fel’yangren—nge fapi ppin nib rugod ni ba’adag ni ngar pigpig ko mission—mu tabab daba’ ni ngam noned ngak e galibthir marunga’agen e pigpig ko mission. Gube pinninegmed ni ngam noned ngak e pi fagar romed marunga’agen e pigpig ko mission, nge fa’an ta’areb e fagar romed de nang fa’anra pigpig, mu pi athamgil ngak ni ngar non ngak e bishof rok’.

Fal’eg e micheg ngom nge Chitamangiy nibay u Tharmiy nira maen ko mission nge nigyal gara guy rogon ni ngam tayed e gum’ircha’em, pa’am, nge tafney rom nib be’ech mab mat’aw. Gube pinning med ni ngam thapeged e mich nib gel marunga’agen fare gospel rok’ Yesus Kristus nike sulyarmen.

Pi chitamangiy nge chitiningiy roraed e pi pagal nge ppin nib fel’yangren ney, bay e muruwel rorad nib ga’ nifan fal’eg e rogon ney. Tabab ko daba’ ni ngam non ngak e pi bitir romed marunga’agen e pigpig ko mission. Gadad manang ni e tabinaew e ir baga’fan nima ayuweg e pi pagal nib fel’yangren nge ppin nib rugod fal’eg e rogon.

Fa’anra duw rom e kabay nrayag ni ngam pigpig ko missionary machane dawor ni ngam pigpig ni bachan fare pandemic fa reb e fan, gube pinningmed ni ngam pigpig e chiney. Mu non ngak e bishof rom, nge fal’eg rogon ni ngam pigpig ngak Somoel.

Gube pii’ athamgil ngak fapi bishof ni ngar ayuweged gubin e pagal nib fel’yangren nge ppin nib rugod nibay e duw rorad ni ngar fal’eged rogonrad ko pigpig, nge gube pii’ athamgil ngak fapi bishof ni ngar nanged pi’in e nrayag ni ngar pigpig e chiney machane daworiy rrin’ed. Pinning ngak gubin e pagal nib fel’yangren ni ngar manged e missionary, ni ta’abrogon gubin e ppin nib rugod ni ba’adag ni nge pigpig.

Ngak fapi missionary e chiney nibe pigpiggad, gamad be pining e magar ngomed. Mission romed e buch u nap’an e m’ar nibe garar u fayleng. Machane bachan e biney, pi’nen nibe buch ngomed ko mission romed de mang boed rogon e mission rog fa demtrug e pi missionary nikar pigpig umon ko 2020. Gu manang ni pi’ney e dani moem. Machane ufithik e ngiyal’ ney nib mo’omaw, bay e muruwel rok’ Somoel ni fan ngomed, nge ni kam rrin’ed biney nib fel’ rogon. Susun ney, kam fanay e technology ko reb kanawo’en nib thil ni ngam pir’eg e pi’in ni ba’adag ni ngar fil’ed marunga’agen e Sulyarmen ko fare gospel rok’ Yesus Kristus. Napan ni ngam pigpig nib mangil nge ufithik e rogon romed, gumanang ni fare Someol e ba’adag e ngongol romed. Gu manang ni pigpig romed era yibliy nag e yafos romed.

Napan ni ngam pag e mission romed, mu tayed u wun’med dabda paged e ngongol ko Galasia. Ngam dumow gaed nga dakean e pi ngongol nib fel’ ni kam fil’ed udakaen e mission romed, ul’ul’ ni ngam gelnag med e mich romed, muruwel nib gel, meybil, nge ma folgad ku Somoel. Liyor e pi micheg romed ni kam fal’eged. Ul’ul’ ni ngam yibliy mag pigpig ngak boch e gidii’.

Gube meybil nag fapi pagal nib fel’yangren nge fapi ppin nib rugod nge fapi galibthir nrayag ni ngar guyed rogon ni pigpig ko mission era yibliy nag med ni gubinfen. Wenig ni ngam nanged ulan e tafney romed nge thamiy ulan e gum’ircha’med gelingen nifan e pinning nike pii’ fare Somoel ngak fapi pagael ni fak Mosiah. Ke yoeg, “Mmaroed … ngam mugu’uliyed e thin rog; machane ngam gum’aen’ gaed u fithik’ e athamgil nge kirbaen’, ni nge yog ni ngam daged e wok nib fel’ … ngoraed ni bay rog, mug taymed ni talin e muruwel u lan pa’ag ni nge yo’or e gidii’ ni polo’ ni nge thap riy.”⁵

Falan’ Got ngak e pi fel’yangren ko Galasia ni ngar adaged ni ngar pigpig gaed ngak ni irreray e meybil rog, ni kug pii’ ko re kadbul ney u daken fithingan Yesus Kristus nib thothup, amen.