Gol Nag fare Fayleng

Pi walageg, ko biney e faang ko Easter, kad tawa’athgad ni kad mada’gad biyay ma gadad be thapeg e mulwol nge powi’iy ni be yib rok’ fapi ta pigpig rok’ Got.

Michib nge powi’iy nib thothup rok’ e Chitamangdad nibay u Tharmiy era ayuwegdad ko yafos nge ngiyal’ ney nike yo’or e kireb. Wod rogon nikan profecy nag, “nifiy, nge yoko’,” “mael, rungʼag morngaʼagen e mael, nge thiin e mael, nge durruʼ ni bayi aw u lan yuyang e nam,” “nge urngin mit e denen,”¹ “gafgow,”² “uyongol nge durru’ u gubin yang”³ nibe gathay e tabinaew, gidii’, nib mu’un e nam ngay.

Bay reb e gafgow be garar u daken e fayleng: cham ko mat’wom nge tiliw rom. Biney ni be gaa’ i yan e yibe gay rogon ni ngan chuweg e tiliw nge rogon e mich ngak Got ko gin nib sug e gidii’ riy, ko sukul, motochiyel ko binaew, nge nam. Pi gidii’ ney ndubun e tiliw e yad be gay rogon ni ngar talagned e tin ni yibe thamiy u gum’ircha’ey nib riyul’. Yad be nonnon nag ma yad be mak’arang ko rogon e yalen e mich.

Biney e ngongol e be dag ni danur dariy fan nag e gidii’, ndanur tay fan e yalen e gidii’, ta’areb nigey, tay fan, tin nib thothup, nge gapas ko tafney.

Mang e be yip’ fan e mat’wom nge tiliw rom?

Biney e mat’wom e gur rom ni ngam tayfan e bin tiliw nib michuwun’um ngay: mat’wom ni ngam gakgad e gidii’ nga ta’abang, mat’won ni ngam non, mat’wom ni ngam rrin’ ni wod rogon e tin nib michuwun’um ngay, ni ku ta’areb rogon nge mat’won e gidii’ ni ngar rrin’ed ni wod rogon ni yad ba’adag. Mat’won nge tiliw rom e gur rom ni ngam dugliy e n’en ni michuwun’um ngay, rogon ni ga ba’adag ni ngam par ni be yan u rogon e mich rom, nge n’en ni ba’adag Got ni ngad rrin’ed.

Rogon ni yibe gay rogon ni ngan taleg mat’woy ko tiliw e gathi ban’en ni fan gi buch e chiney. Kab kakrom i yib, ni gidii’ ni bay e mich rok’ e ma gafgow u tan pa’ boch e gidii’. Gidii’en e Galasia Ku Yesus Kristus ni Fan ko Gidiiʼen Got ko Tin Tomur e Rran e kab ta’areb rogon ni be buch e biney rorad.

Ku somm’on riy, gidii’ ni be gay Got e un ko biney e Galasia ni bachan fapi yalen e michib riy nib thothup, nib mu’un e mich ngay ngak Yesus Kristus nge fare Bayul rok’, kalngan’uy, fare tonom ko falfalaen’, nge fare bin Migid e Wub rok’ Somoel.

Gidii’ ndubun, ma kireb nag, nge cham e gafgow nag fare bin somm’on e profet rodad ko tin tomur e rran, Joseph Smith, nge fapi gachalpen.

Ufithik’ e gafgow nike buch ko 1842, yoloy me pii’ Joseph Smith mornga’agen 13 e dayif ko re Galasia ney, nib mu’un e bin ba’aray ngay: “Gamad be yog nib puf matʼawon e liyor ngak Got ni gubin ma rayog rok ni wod rogon ni be yiluy laniyanʼ mad ngomad, nge kuʼer ngak gubin e gidii ni taareb rogon matawrod, yad rorad ko rogon e liyor rorad ko pinen ara rogon fa gin ni ngar liyor gad ngay.”⁴

Gubin ban’en ma bay ko thin rok’, nib mu’un e gin nran pire’eg e gapas riy, ma yima tay fan. Irreray e n’en nib ga’ fan ko mat’wom nge tiliw rom.

Fare Profet i Joseph Smith e ki ga’ar:

“Dagur rus ni nggog u powchen e Tharmiy ni fel’ rogon nggu par ni dagur rus ni ngg’um ni gube ayuweg e tin nib mat’aw ban’en ko tiliw ni wod e Presbyterian, fa Baptist, fa bee’ nib mangil ko reb e tiliw nib thil; ya ka ta’areb rogon yalen mataw’ nran gafgow nag e … Gidii’en Got ni ku wod nran gafgow nag e tin nib mat’aw ngak fapi Roma Catholic, fa ku boch e tiliw ni gathi yi manang fa dabiyag ni ngar ayuweged yad.

”Ireray e adag rog nra bee’ ma bay mat’won [ni’ir] e be sug nag gum’ircha’eg—bang nra bee’ ma ir rok’ ni bay mat’won ni nge mel’eg e tiliw ni nge un ngay.”⁵

Machane, chonggin gidii’en e Galasia e ni gafgnow nag rad min tulufrad nib pag e biyu’ e mayls nib palog, u New York nga mada nga Ohio, nga mdad nga Missouri, ni fare am ko re binaew nem e pi’ ba motochiyel ni gidii’en e Galasia e ngan “tulufrad nga oren ma yad e gidii’ ni to’ogor.”⁶ Era milgad nga Illinois, machane gafgow rorad ni ki ul’ul’ nde tal. Be’ nib puwan’ nike lii’ fare Profet Joseph, ni tafney nag ni ra lii’ ma aram nra tal e Galasia ni dabki garar nge fapi gidii’ riy nib michuwun’rad. Machane pi’in ni ba gel e mich rorad e ra athamgilgad. Tomuren Joseph, Brigham Young, e fanow nag fapi gidii ’ni pag e biyu’ ngar milekaggad ni gonapan e 1,300 mayls (2,100 km) ngael nga napm nira mang fare state u Utah.⁷ Bay e gidii’ rog ni kakrom u fithik’ e pi pioneers ney nra bad ngaray ni somm’on.

Napan e tinem e rran nib gel e gafgow riy, chiney e ke ga’ e Galasia rok’ Somoel ni bay 17 million gidii’en riy, ni barba’ ko re ulung ney e ma par u wuru’ yu Mariken.⁸

Napan e April 2020 me madnom nag e Galasia rodad fare 200th anniversary ko ngiyal nike Sulyarmen fare gospel nib mu’un bugithin ngay nifen e fayleng, ni yoloy fare bin Somm’on e Presidency nge fare Ulung ko fare Ragag nge L’agruw i Apostles. Tabab ni ga’ar, “Gamaed be micheg ni Got e btu’uf pi fak Rok’ ni gubin yang u daken e fayleng nge nam.”⁹

Profet rodad, Russell M. Nelson, ke ga’ar:

“Mich u wun’dad ko mel’eg, gol nag, nge ta’areb nigey ko gubin e bitir ku Got.

“Gadad gubin ma gadad bugi walag, nra bagdad ma btu’uf rok’ e Chitamangiy nibay u Tharmiy. Fare Fak, i Somoel Yesus Kristus, e ke pining e gidii’ ni gubin ni ngan nib ngak, ‘tilmor fa wechwech, kalbus fa pufrogon, pumo’on fa bpin.’(2 Nephi 26:33).”¹⁰

Mu uned ngog ngad weliyed aningeg kanawo’en nib ga’fan e mat’wom nge tiliw rom ko nam rodad.

Bin Somm’on. Mat’wom nge tiliw rom e be tay fan fare bin somm’on nge bin migid e motochiyel, ni ngan tay ni Got e bay u lukungun e yafos rodad. Ngad be’egned ko Mathew:

“‘Thangri t’uf rom Somol ni ir e Got rom u polo’ i gum’ircha’em, ngu polo’ i lanin’um, ngu polo’ i leam rom.”¹¹

“Ma bin migid ngay e motochiyel, e thangri t’uf rom e en ni buguliyoror rom ni gowe gur.”¹²

Lan e chapel, fa temple, fa tigil’ e gin ni ma liyor e Muslim riy, fa lan e nu’un rom, pi gachalepen Kristus, nge gidii’ nta’ab rogon ni yad be leam, e rayag ni ngar daged e mich rorad ngak Got ni yad be liyor ngak ma yad ba’adag ni ngar pigpig gak ngak pi fak.

Yesus Kristus e ir wo’en e tu’ufeg nge pigpig ni rib polo’. Napan e michib rok’, ni Ke ayuweg e pi’in yad ba gafgow,¹³ me gol nag e m’ar¹⁴ nge pi’in ni bmalmit.¹⁵ Pi’ gan fapi girdi’ ni kar m’ad ko bilig,¹⁶ fal’ag wa’athan e pi’in ni bitir,¹⁷ me n’eg fan ko n’en nib kireb ni be rrin’ e gidii’ ngak, nge gidii’ ni kuruth nag.¹⁸

Thin nib thothup e weliy ni Yesus e yan “ni be rin’ e tin ni bfel’.”¹⁹ Ere ku wod ni ngad rrin’ed ni wod e biney.

Bin l’agruw. Mat’wom nge tiliw e ma pii’ e ayuw ko tin nib michuwun’uy ngay, athapeg, nge gapas.

Gadad gidii’en e Galasia, ngad uned ngak boch e tiliw ngad ayuwegned e gidii’ ko gubin ni bay e mich rok’ min ayuwegrad ni bay mat’won rad ni ngar rogned e tin nib michuwun’urad ngay. Biney e dar yip’ fan ni nge michuwan’dad ko tiliw rorad, fa yad ngodad, machane gadad e bay ban’en u thildad ndariy rok’ e pi’in ni yad be gay rogon ni ngar talaged gadad.

Kug dag e Galasia ngak boch e gidii’ u mu’ulung ni G20 u Italy nib thil e tiliw rorad ngodad. Kan pii’ e athamgil ngog, nge gelngig, napan ni gu mada’ nag facha’ nib ga’ ko am nge fapi tiyugang ni bay e mich roroad u daken ga’ngin yang u fayleng. Kug nang ni tin nib thil e rayag ni ngan fal’eg nge fel’ ma krayag nran gol nag u napan ni gadad be tayfan Got, fare Chitamangiy ni gubin, nge Yesus Kristus, fare Fak. En nib gaa’ nra gol nagdad ni gubin e fare Somoel ni’ir e fare Tathapeg rodad, i Yesus Kristus.

Rib fel’ e n’en ni buch rog u napan ni gu mu’ nag e nummon rog. Medlip e gidii’ nike mu’ i non ma dariy bagyad nike mu’ nag e nummon rok’ u daken fithingan Got. Napan ni gu non, mu gu lemnag, “Kemus ni ngog e kamagargad nge mu’ mug par nga but’, fa nggu mu’ nag e nummon rog ‘u daken fithingan Yesus Kristus?” Me yib ngan’ug ko gag mini’, mu gu nang nra adag Somoel ni ngog fithingan napan ni kug mu’ ko non. Ere ku rrin’ ni aram rogon. Chiney ni ku sap ko biney, irreram e ngiyal’ ni kan pii’ ngog ni nggu dag e mich rog; ma bay mat’wog nrayag ni nggu micheg fare fithingan nib thothup.

Bin dalip. Tiliw e ma thogthog nag ni ngan ayuweg boch e gidii’.

Napan nran pii’ ko tiliw mat’won ni ngar dugliyed e mich rorad, gidii’ nib michuwun’rad e yad ra rrin’ bugi ban’en ni felel’ nge bugi pigpig nib gaa’. Fare bugithin ni Jewish ni kanog e “tikkun olam,” ngay e be yip’ fan e “ngan fal’ag fa ngan gol nag e fayleng,” e bo’or e gidii’ ni be lemnag rogon e biney ni ngan ngongliy. Ku gu uned ngak e Catholic Charities, fa reb fithingan e Caritas International, Islamic Relief, nge boch e Jewish, Hindu, Buddhist, Sikh, nge ku boch gidii’en e ulung nib michuwun’rad Kristus ni wod fare Salvationa Army nge fare National Christian Foundation. U ta’abang ku pii’ed e ayuw ko gidii’ ni pag e mir’ay, ayuweg kan pii’ e tent ngak fapi gidii’ ni yad be mil ko nam rorad ni bachan e mael, chob ni ngar miled riy, nge ggan ni ngar ked,²⁰ pii’ e taflay ko tusha, nib mu’un e tusha ko polio ngay²¹ nge COVID.²² Ga’angin e pi n’en ni kan rrin’ e rib n’uw, machane ku ta’ab rogon ko tin nib tu’uf.

Dariy bee’ ni be de’eriy, gidii’ ni bay e mich rorad, ni yad be muruwel u ta’abang, e rayag ni ngar rrin’ed e ma’ang’ang u ta’abiyang. Ku wod rogon, bee’ nra pipig ngak bee’ e krayag nra thilyeg e yafos rok’ bee’.

Gube lemnag ni biney e wod rogon ni bay ko Luke napan ni taganan’ Yesus Kristus ngak fare bpin nike yim’ e pumo’on rok’. Yesus, ba ulung i gidii ’nra uned ngak, nra bad ko gi n’en ni yima ngongliy rogon e yam’ riy ngar guyed fare pumo’on ni fak fare bpin nike yim’ e pumo’on rok’. Ya re de mo’ ngak, ma ra gel e gafgow rok’ ko tin nibe thamiy, tin nib thothup, nge salpiy nra gafgow riy. Yesus, napan ni guy owchen fare bpin nike maka’alit owchen ko miyor, me ga’ar,“Dakumur yor.”²³ Me yan ngorad nge yan i math ko kahol rok fare yam’.

“Fachi cha’,” Be lungug ngom, “mu suwon.

“Me suwon fare yam’ ngalang me non Ni aram e ke fulweg [Yesus] fachi cha’ ngak e chitiningin.”²⁴

Fosag e yam’ e ba ma’ang’ang, machane gol ngak e gidii’ min pii’ e ayuw ngak be’ ni be gafgow e irreram fare wo’en e m’ag nrayag ni ngad “[dared] ni be rin’ e tin ni bfel’,” ni manang ni “Got [e] bay [rodad].”²⁵

Nge bin aningeg. Mat’wom nge tiliw rom e ba muruwel ni ma ta’areb nigem ko tin nib ga’fan ngom nge yalen.

Ulan fare bin Be’ech e M’ag kad be’egned ni bo’or e gidii ni chuw rok’ Yesus Kristus, ni be nonnon nag e yalen rok’, “Re machib ney e kayigi mo’maw’; mini’ e ra motoyil ko tiney e thin?”²⁶

Biney ni yibe yor nag e kabay e chiney ko gidii’ ni be gay rogon ni ngar talagned mat’won nge tiliw rom. Machane fa’anra de moy e tiliw ni nge pii’ me ayuwegney ko ngiyal’ nib gel e momaw’, ere mini’ era pii’ e ayuw? Mini’ era michib nag e yul’yul’, og nag e magar, min’agfaen, nge gamaen’? Mini’ era dag e tu’ufeg, murunguy, nge gol ko gidii’ ni kan pagtilinrad nge tin nibe gafgow. Mini’ era tu’ufeg e gidii’ nib thil, machane pi’in ni yad gubin ni pi fak Got? Mini’ era bing l’agruw lan paa’ ni nge pii’ e ayuw ngak e gidii’ nib tu’uf ndabin pii’ pilwon ngak? Mini’ era pii’ e gapas me fol ko fapi motochiyel nib gaa’ ko tin nibe buchbuch e dabay? Mini’ era fulweg lungun fare Tathapeg ni wenig nag “Ere mman ma ga rin’ ni aram rogon.”?²⁷

Gadad ra rrin’ed! Aargon, brothers nge sisters, gadad ra rin.

Gube piningmed ni ngan ayuweg e mat’wom nge tiliw rom. Ya biney e ke pii’ Got ni yalen nra bee’ ma nge dugliy rok’.

Mat’won nge tiliw rom e ma ayuwegney ma kuma pii’ e thathabil ko llowean’ ko gidii’. N’en nib fel’ ko tiliw, nge tin nibe rrin’ nib fel’, nge tu’ufney ni gubin ngiyal’ ni yib ko tiliw e rayag ni nge ga’ i yan ni fa’an gadadra rrin’ ma gadad yuluydad ko tin nib michuwan’dad ngay.

Gu ba micheg ni Russell M. Nelson e profet nib fos ku Got. Gube micheg ni Yesus Kristus irma powi’iy ma be gagiyeg nag e Galasia rok’. Yib nge yim’ ni bachan e pi denen rodad, min kuruth nag, me fos ko yam’ ko chirofen ni gaman e dalip fen ngay.²⁸ Bachan Ir, rayag ni ngad pired rok’ biyay nib manechubog; nge pi cha’en ni ri yad ba’adag e krayag ni yadra par rok’ e Chitamangiy nibay u Tharmiy. Pi n’ey nib riyul’ e gube yog ngak e fayleng. Ri gub falfalaen’ ko mat’won e tiliw ni gag rog e gube mel’eg. U dakean fithngan Yesus Kristus, amen.