Chiney e Ngiyal’ Riy
Chiney e ngiyal’ riy nrayag ni ngad filed rogon. Chiney e ngiyal’ riy nrayag ni ngad kalngaen’gad. Chiney e ngiyal’ riy nrayag ni ngad tawath nag e gidii’.
Pi walageg nib t’uf rog, biney e general conference e rib thil ni bo’or fan. Kan tawa’ath nag dad ko fapi meybil, mulwol, nge musik. Kan michib fapi ta pigpig rok’ Somoel ngodad.
Kan thog’thog’ nag ngodad e fanow nib ga’ fan ko tin nga mm’on ban’en. Meybil rog e fare Kan Thothup ke non ngom ko mornga’agen e tin ba’adag Somoel ni gur ngam rrin’.
Tin nga mm’on ban’en e dani mudugil. Wod e yifang nima thilthil. Tin ban’en salipiy nima thilthil. Tin ni be gathay nag e fayleng, mada’ad, nge m’ar e rayag ni nge thilyeg e yafos rok’ be’ nrib papay. Tiney mom’aw nima buch e dani yoeg ni ngan dugliy rogon. Machane bay e tin nrayag ni ngad dugliyed rogon, nib mu’un rogon ni gadad ma fanay e time rodad gubin e rran.
Gu ba’adag e bin ba’aray e thin ko poem ni yoloy i Henry Van Dyke, nni yoloy ko clock u Wells College u New York. Be ga’ar:
Ya’an fon buguliy pa’ag ni be m’ug
Nibe k’iyag e tin nga mm’on nge tin ni tomur:
U mm’on riy, dariy ban’en nrayag ni nggu rrin’ ngay ko fare awa
U fithik’ e lumor, nge dariy ba gelngin nra thilyeg:
Kiru’ nike pii’ ni dabki sul,
Fare awa nike thumur, e dabkiyag ni ngan fanay:
Kerimus ni ta’areb e awa ni kabay ulan pa’am,—
Ma kemus ni CHINEY e ke magay ni nrayag ni ngan fanay.1
Arrogon, thingarda filed e tin nike mu’ i buch, nge arrogon, thingarda fal’aged rogon dad ko tin nga mm’on ban’en. Machane kemus chiney rayog ni ngad rrin’ed. Chiney e ngiyal’ riy nrayag ni ngad filed rogon. Chiney e ngiyal’ riy nrayag ni ngad kalngaen’gad. Chiney e ngiyal’ riy nrayag ni ngad tawa’ath niged e gidii’ min “mpuged pa’med nib m’ay gelngin ngalang.”2 Wod rogon ni mulwol Mormon ngak Moroni, “Mman ngad muruwel gow nib gel; … ya bay ba muruwel ni ngad rinʼew u [napʼan] ni gadow bay u lan e biney e dowef, ni nge yog ni ngad gel gow ko fare toʼogor rokʼ gubin e tin nib mataw banʼen, magdow toffan u lan gilʼilungun Got.”3
Dabi mol fare mo’oniyan’. Gubin ngiyal’ ma bay e tin barba’ ko tin riyul’ ban’en. Nggu sul biyay u daken e pi n’en ni ku gog ko re kadbul ney nra ga’ nag e thothup nibe fekem nga mm’on ko tin nib mangil, fare yean nga lang ni ke weliy Elder Dieter F. Uchtdorf, nra ayuwegnem ngam ul’ul’ nga mm’on ndemuturug e pi n’en nib momaw’ nra yib ngom nge tin nib fel’ nra yib.
Thothup nibe fekem nga mm’on ko tin nib mangil e ra mon’og i yan ko nap’an ni gadad be yaen nga temple nge llowaen’ rodad nra ga’ min nang fan fapi tawa’ath ni yima thapag u rom. Gube wenig nag ngomed ni ngam paged e tin nu fayleng ban’en ngam mon’ed nga lluwan fapi tawa’ath ko temple nib manechubog. Ngiyal’ romed uram ra thapeg e pi to’owath nga tabinaw romed ni gubinfen.
Napan nibe ga’ e Galasia i yan, gamad be gay rogon ngan ul’ul’ ko pi temple ni bo’or. Aningeg i ragag nge aningeg e temple e ba toey e chiney. Boech e ba be’ech nag. Gube meybil nag nifan e gidii’ nibe muruwliy e pi muruwel ney u langab e fayleng.
U fithik e thamiy ko magar, Gu ba falfal’an ni gog tanem rodad ni toey e temple nib be’ech u pi nam ko: Wellington, New Zealand; Brazzaville, Republic ko fare Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; and Modesto, California.
Biney e 17 e temple ra ta’awath nagrad e gidii ko la’agruw barba i veil. Gu ba’adagmed, pi brothers nge sisters. Bin th’abi ga’ fan, Somoel ma gab tu’uf rok. I Ir e Tabiyul rom nge Tathapeg rom. I Ir e ma powi’iy me gagiyeg nag e Galasia rok’. Da pired ni gadad e pi gidii’ ni gadad ba yul’yul’ rok’ Somoel, ni ga’ar, “Bay ra manged girdi’eg, ma bay gu mang Got rorad.”4
Ko pin’ey ni gube meybil nag u dakean fithingan Yesus Kristus nib thothup, amen.