Miyuluy ulan e pi Yoko’

Pi walageg nib t’uf rog, kad thapeged e tawa’ath e daba’ ni ngad rungan’ e pi tapigpig rok’ Got ni kar pii’ e fonow nge athamgil ngodad. Gadad gubin, demtrug e tafan ni ngad pared, nima nanged be pared ufithik e ngiyal’ nib yoyowol. Meybil rog ni nge ayuwegmed sak’iy nga lang nib miyuluy ulan e pi yoko’ rodad, nibay e gum’ircha’med nib gapas.¹

Tafan ni ngam tabab ngan tay u wun’uy ni gadad fapi bitir nib t’uf rok’ Got ma bay e pi tapigpig nib yi’iy Rok’. Fapi tapigpig ku Got ney kar sap e ngiyal’ rodad ni ngad fasgad. Fare Apsotle Paul e yol ngak Timothy, “Mu tay fanam i yan ko re bugithin ney! Tin tomuren e rran e ri bay mo’maw’ ni ngan par nrogon.”²

Demtrug e bee’ ni bay e ochey ni ngar sap e pi pow nifan e tin tomuren e rran nge yil ni ngar rungan’ fapi thin ku pi profet ma nang biney ir riyul’. Magawon ko riya’ riy nira yib ngodad ko e pi’nen nib kireb. Pi’ney e be gaa’ i yaen. Nge ra mang ni rib mo’omaw’, gathi moem, ni ngad liyor e pi micheg thingarda fal’eg nge kol ni ngad folgad e gospel rok’ Yesus Kristus.

Nifan e pi’in ni bay e magaf nifan rad nge gidii’ nib t’uf rorad, bay e athap ulan e micheg Got nike fal’eg ni bay e tafen ba ayal riy ulan e pi yoko’ nira yib.

Ba’aray e sasing nib thin ko rigi n’em. Pi profet u ngiyal’ rodad kar weliyed bayay nge bayay marunga’aen. Wod, ni yoloy ngalan e Babyor ku Mormon, matam nib gel e tu’ufeg rok’ ni yog ngak pi fak ni pumo’on rogon ni ngar sak’iy gad ni yad miyuluy ulan e pi yiko’ ni bay nga mm’on rorad: ”Ere chiney, gal fakag, mu tayew u wunʼmew, mu tayew u wunʼmew ni fare war ni Tabiyul rodaed, niʼir Kristus, ni fachaʼ ni Fak Got, e thingar mu ufungew e dayif romew nga dakean; ya napʼan ni fare moʼoniyanʼ e nge piiʼ e nifeng rokʼ nib gel, arragon, nifngin e yokoʼ rokʼ, arragon, u napʼan ni gubin e nʼuw ni ays nge yokoʼ rokʼ nib gel e nge aw ngomew, ma dariy gelingin ni nge miliymew iyaen nga butʼ ko fare dodow ko gafgow ni dariy nʼumngin i napʼan, ni bachan fare malang ni kam dumow gow nga dakean, niʼir ba dayif nib miyuluy, nib dayif, … ni faʼanra toey e gidiiʼ e naʼun nga dakean ma dabi puth nga butʼ.”³

Binem e dodow ko gafgow ni dariy nʼumngin i napʼan ni ke yoeg ir ra magawon rok’ e pi denen fa’an dabda kalngaen’dad. Be gel e pi yoko’ ir ra fapi lumel nge pi cham rok’ Mo’oniyan’. Ni ba ga’fan ni ngam nanged fan urrogon ni ngam toeyed u dekean e dayif ney. Nifan ngom, dariy reb e tafen ni nggu sap machane u lan bin tomur e mulwol rok’ fare Pilung i Benjamin, ni bay ulan fare Babyor ku Mormon.

Pi thin rok’ Pilung i Benjamin ma ayuwegdad u rran rodad e daba’. Ke nang e tin kireb bachane e pi’nen ni ke buch ngak. Nike daamiiteg e gidii’ rok u lan e mael, nike pagaen’ ko gelingin Got. Ke guy nib moem e gelingin nib kireb rok’ Lucifer ni nge lumel nag, guy rogon e gel nag, nge gathay athamgil ngak pifak Got.

Nike pinning e gidii’ rok’ nge gadad gubin ni ngad toyed nga dakaen e malang ko ayuw, ni ir fare Tathapeg. Nike weliy nib moem ni rayog ni ngad mel’eg e pi’nen nib mat’aw nge kireb nge dabiyog ni ngad mil ko bogi gagyeg nifan e mel’eg rodad. Nike non nib gel bachan nike nang e kirbaen’ ni ra yib ngak e pi’in ni dabi rung’aen’ nge fol e pi ta’magaran.

Ireray nike weliy e bogi gagyeg ni ra yib ko pi mal’eg ni ngad fol e pi non rok’ fare Kan Thothup fa fol e milwol nib kireb nira yib ngak’ Mo’oniyan’, nima ba’adag ni nge lumel nag nge gathay nag dad:

“Ya musap gaed, bay ba gafgow ni kan dugliy nga dakean e chaʼ nra melʼeg ni nge fol ko fabin nib [kireb] e yaʼel; ya faʼanra melʼeg ni nge fol rokʼ, me paer riy nge yimʼ nga fithikʼ e pi denen rokʼ, ma taʼab rogon ngay ni ke unum e gafgow ni tinoewey ngakʼ e yaʼel rokʼ; ya ke thog nag ngakʼ puluwon ni ba gechig ni dariy nʼumngin i napʼan, ni ke denen nib togopluw ko motochiyel rokʼ Got nib thil nga rogon e llowaenʼ ni manang. …

“Ere faʼan rachey ni re moʼon nem e dabi kalngaenʼ, me paer riy nge yimʼ ni ba toʼogor rokʼ Got, ma pi athap ko justice nu tharmiy e be tamilngeg u laniyaenʼ me gagyel u waenʼ nib kireb e rokʼ, ni ireram e gin ra nomeg ni nge lingeg ir riy u pʼoewchen Somoel, ma ra suguy lan ngorngoren ko mʼingaenʼ, nge amith, nge amthun e kalngaenʼ, ni boed ba nifiy ni dabi math, ni be yaen e dramrom riy ngalang ni dariy nʼumngin i napʼan.”

Ul’ul’ fare Pilung Benjamin ni yog, “O, gimed gubin e pumoʼon ni pilibthir, nge ku arragon ngomed e piʼin pagael nib felʼ yangren, nge gimed e piʼin bitir nra yog ni ngam nanged fan e pi thin rog, ya kug non nib tamilang ngomed ni gomanga yog ni ngam nanged fan, gube meybil nag ni gomanga paer u wunʼmed fare murus ni rarogon e piʼin ni kar awgaed nga fithikʼ e ngongol ni kireb.”⁴

Nifan ngog, Gelingin ney ko pi thin ney ko kalngaen’ bay fal’eg e sasing ko e ngiyal’ napan gur nge gag ra sak’iy nga poewchen’ Somoel tomur e yafos ney. Gadad ba’adag ko gubin e gum’ircha’dad ni dabda lul’ gaed nga but’ nge sap nga lang Ngak’, sap e sminmin Rok’, nge motoyil’ gad Ngak’ nima yoeg, “Ri gab manigil, ye gur reb e tapigpig ni gab fel’ ma gab yul’yul’: … ere [moy].”⁵

Pilung ni Benjamin ke weliy nib moem e urogon ni ngad thapeged e athap ni ngad motoyil ko pi thin nem fa’an ni ngad pi’reg e rogon u yafos rodad ni ngad thilyeg e tin ni ba’adag udakaen e Bayul rok’ Yesus Kristus. Ni’ir e yigo’ e rogon ni ngad tay nga dakaen e dayif nib miyuluy nge sak’iy nga lang nib miyuluy ufithik’ e pi yoko’ ko lumel nge magawon ni ra yib. Pilung Benjamin e weliy e thilyeg e thin ni ba’adag udakaen e susun nib fel’ ni ke ying gum’ircha’eg. Fapi profet ufithik’ boch e biyu’ e duw nge fare Somoel nike fanay. Ireray: bt’uf ni ngad boeded rogon e pi’in bitir—bitir nib achigchig.

Nifan boech e gidii’, ni rib mom’aw ni nge mich u wandad riy. Gadad ba’adag ni ngad manged nib gel. Sana gadad be lemnag e bitir ir mo’owaer. Bo’or e pi galibthir ma sap nga rran napan e bitir dabda maen e ya’an boed e bitir. Machane Pilung ni Benjamin, ni manang urogon ni ngam mang e bee’ ni bay e gelingin nge athamgil nga laniyaen’, nike weliy nib moem ni boeded rogon e pi’in bitir e gathi ta’abrogon ko maen e ya’an boed bitir. Ri mang boed fare Tathapeg, nike meybil ngak e Chitamangin nifan ko gelingin ni nge rrin’ e tin ba’adag e Chitamangin nifan gubin e denen nifan e bitir Rok’ Chitamangin nge ni ke rrin’. Gubin e tin ni ba’adag thingarda thilyeg ere gadad ra boeded rogon e pi’in bitir ni ngad thapeged e gelingin ere ngad sak’iy nga lang nib miyuluy u ngiyal’ nib gapas nge nigyal’ nib mo’omaw’.

Ireray Pilung ni Benjamin be weliy urogon e thilyeg nira yib: “Ya gidiiʼ nib fekyath e toʼogor rokʼ Got, ni kaʼaram u napʼan e mul ni tay Adam, ma bayi paer riy ni aram rogon, ni dabi thil biʼid ma kemus ni faʼanra mʼag ir ko fare Kan ni Thothup, me pag e fekyath nge mang reb i gidiiʼen u dakean fare bayul rokʼ Kristus ni ir Somoel, me boed beeʼ nib bitir, ni ma fol, mab muding, mab gumud, mab gumʼaenʼ mab sug ko murnguy, mab mʼagaenʼ ngay ni nge fol u gubin banʼen nibe guy Somoel nib mʼag ni nge chiyliy ngakʼ, ni boed rogon beeʼ nib bitir nib mʼagaenʼ ni nge fol ko chitamangin.”⁶

Gadad ma thapeged e thilyeg ney napan ni ngad fal’eg nge rrin’ bayay fapi micheg ngak Got. Nira fek e gelingin ku Bayul rok’ Kristus nima pii’ e rogon ni ngad thilyeg ulan e gum’ircha’dad. Rangad thamiyed binir gubin yay ni gadad ma fek fare sacrament, rrin’ e gam’ing ko temple nifan e bee’ ke yim’, pii’ e mich ni woed e m’ag ku Tathapeg, fa ayuweg ngak e bee’ ni woed rogon e gachalpen Kristus.

Ulan pi’ney, gadad ra boeded rogon e pi’in bitir udakaen e rogon ni ngad t’uf nge fol. Gadad ra sakiy nga lang udakaen e dayif nib gel. Michaen’ rodad ngak Yesus Kristus ma fekdad ni ngad kalngaen’dad nge fol e pi motochiyel. Gadad ma fol, nge gadad ma thapeged e gelingin ni ngam siyeg e lumel, nge gadad ma thapeged fare Kan ni Thothup nni michmicheg ngoraed.

Tin ni ba’adag ra manged boed beeʼ nib bitir, mafol ngak Got nge bay bo’or e t’ufeg. Thilyeg ney ra pii’ ngodad ni ngad thapeged e fapi tawa’ath ni ra yib ufithik’ fare Kan ni Thothup. Napan ni ngad thapeged Ya’el ni nge ayuweg daed, powi’iy daed, me golnag daed.

Kug nangfan boch marunga’agen e weliy rok’ fare Pilung i Benjamin napan ni ke yog rangad boed beeʼ nib bitir u mit Got. Kug fil udakaen e pi’nen nike buch ngog ni fare Kan ni Thothup bo’or e yay ni bay e math lam, rangam rung’aen’ nib moem napan nibay e gum’ircha’ nib gum’aen’ nge nima fol, ni woed e bitir. Riyul’, fare meybil nri ma yib angin e “kemus ni n’en ni gu ba’adag e n’en ni ri gaba’adag. Kemus ni ngam mog ngog e ran’em. Gura rrin’.”

Napan nira yib fapi yoko’ ko yafos, rangam mang nib miyuluy bachan ni ngam sak’iy nga dakaen e malang ko mich romed ngak Yesus Kristus. Mich ney nira powi’iy med ni ngam kalngaen’ nge thapeg e micheg. Me gamed ma bay u wun’daed. Nge ufithik’ fapi yoko’ ko fananikan nge pi ngongol nib kireb, rangam thmey nib miyuluy nge bay athap.

Bo’or ko biney, rangam sap ngom ni ngam k’iyeg pa’am ngak reb e bee’ ni ngam pug med nga ayuw udakaen’ e malang. Michaen’ u Yesus Kristus ma powi’iy dad ngak athap nib ga’ nge pi thamiy nib t’ufeg ngak boech e gidii’, ni’ir e t’ufeg rok’ Kristus nib riyul’.

Gube pii’ ngomed e m’ag rog ni Somel Yesus Kristus ke pinning med ni ngad “mub ngog.”⁷ Ir ba pinning med, ufithik’ e t’ufen ni fan ngomed nge nifan e gidii’ gamed bt’ufeg, ni ngam yib Ngak nifan ko gapas u lane biney e yafos nge bin migid e yafos ni manemus ni bayi yib nga mm’on. Irma nang nib machalbog e pi yoko’ gamed ra feked ulan e sikeng romed ni ir e yang ko fare wo’n e falfalaen’.

Gube wenig ngomed ni ngam thapeged e pinning rok’ Somoel. Woed e bitir nib mud’ing nge t’uf, thapeg e ayuw Rok’. Fal’eg nge fol fapi micheg irba pii’ ngomed ulan Fare Galasia rok Yesus Kristus ni fan ko Gidii’en Got ko Tin Tomur e Rran. Yad ra gel nag med. Tathapeg nima nang e pi yoko’ nge pi tafen ko ayuw udakaen e wo’ nga na’un Ngak nge ngak e Chitimangdad nibay u tharmiy. Ir e manang kanawo’en. I ir e fare kanawo’. Gube micheg u dakean fithngan Yesus Kristus nib thothup, amen.