Toeni Luhlahp
Lwen Se Inge
Toeni Luhlahp ke Ohktohpa 2022

Lwen Se Inge

Sel Elder Ronald A. Rasband

Ke U luhn Mwet Sap Singucul Luo

Mwet pahluh moul se lasr el oruh ma kunacl in nwacklah facluh ke Puk luhn Mormon. Kuht enenuh in ukwe srihkasrak lal.

Tamuhlwel ac tahmtahel sacohk, ke Puk luhn Mormon kahs “lwen se inge”1 orekmakihnyuck puhs in lohacng nuh ke kahs in kahsruh, olwelah, ac mwe luti. Tohkohsrah Benjamin, ke sramsram sahflah lal, kaiyac mwet lal, “Lohng kahs luhk suc nga fah sruhmuhn nuh suwos ke lwen se inge; … ikacslah insrewos tuh kowos in lohng, ac insiowos tuh kowos in kahlwem, ac nuhnak lowos an lah ma lukmac luhn God in kuh in ikacklah kowos in liye.”2 Toeni luhlahp el oacpacna ohinge. Kuht tuhkuh in lohng kahs in kahsruh ke “lwen se inge,” tuh kuht in “pwacye pacl nuhkwewa”3 nuh sin Leum ac wosasuc Lal. Fihliyac sihk “lwen se inge” muh yohk srihpac kuht in ahksasucye insacnweacng lasr nuh ke Puk luhn Mormon, ma Joseph Smith el pahngon “puk se ma pwacye emet sin kuhtwena puk fin facluh.”4

Petsac
Puk luhn Mormon se oreklac nahtuhl Elder Rasband

Nga sruok ke pouk sie copy ke Puk luhn Mormon. Ma intihk e ke 1970, ac arlac sacohk nuh sihk. Finne mahtuh ac ololac ke luhmah, wacngihn puk se sahyac ma yohk srihpac nuh ke moul luhk ac luhlahlfongi luhk oacna ma se inge. Ke nga riti, nga eis loh sin Nguhn tuh Jisus Kraist El pa Wen nuhtin God,5 lah El pa Mwet Lahngo luhk,6 lah ma suhmuhslah inge pa kahs luhn God,7 ac lah wosasuc sifilpac fohlohkyak.8 Ma pwacye ingacn oan loal insiyuck. Oacna mwet pahluh Nephi el fahk, “Nguhnihk engan ke ma luhn Leum.”9

Petsac
Elder Rasband wi prestuhn ke misin lal ac Elder Hanks

Lacsac nuh lacyot: Elder Ronald A. Rasband, misinacri fuhsr; Prestuhn Harold Wilkinson, prestuhn luhn Eastern States Mission; ac Elder Marion D. Hanks, Mwet Luhlahp ke Un Itngucul.

Pa inge ma sikyak kac. Ke nga tuh misinacri fuhsr ah, nga ukwe kahs in kahsruh sel Elder Marion D. Hanks, suc muhtwacta yohrohsr ke Eastern States Mission. El tuh prestuhn met luhn British Mission, ac luo misineris lal ah oasr meet uh ke lwen se inge: Tamuhlwel sacohk wiyuck Elder Jeffrey R. Holland ac Elder Quentin L. Cook.10 Oacna ke misinacri lal fin acn England, el kwacfe kuht in riti sie copy sasuc ke Puk luhn Mormon pacl luo ma. Nga tuh ukwe nguhsr lal. Rit se met luhk nga tuh mahkiyac kuh sang lain soko nuh ye kahs nuhkwewa ma tuh srihsrngiyac kuh fahkwelihk kacl Jisus Kraist. Nga orekmakihn pinsucl sruhsrah, ac nga lainiyac fuhs puhkantwen. Pacl ahkluo, Elder Hanks el fahk in mahkiyac ip yohk ac mwe luti luhn wosasuc, ac pacl se inge nga orekmakihn pinsucl folfol in mahkiyac ma suhmuhslah. Nga tuh ritelah Puk luhn Mormon pacl luo, oacna kwacfeyuck, ac na pacl luo pac, orekmakihnyacn rangrang ac sralsral in mahkiyac fuhs ma yohk srihpac nuh sihk.11 Oacna ke kom liye nge, nga mahkiyac fuhs puhkantwen.

Petsac
Mahkiyac copy ke Puk luhn Mormon

Yohk srihpen rit luhk liki na in mahkiyac ma suhmuhslah. Kais sie pacl nga ritelah Puk luhn Mormon, muhtwacwacack nuh sahflah, nga sesseslah ke luhngse nuh sin Leum. Nga eis loh loal se luhn pwacyeiyacn mwe luti Lal ac yohk srihpac la nuh ke “lwen se inge.” Puk se inge fal nuh ke sifac lal, “Siepac Wuhlweacng ke Jisus Kraist.”12 Ke lutlut luhk ac ahkloh luhn nguhn nga tuh eis, nga ekihn misinacri ke Puk luhn Mormon ac mwet tuhma lutlut lal Jisus Kraist.13

“Lwen se inge,” sie sin misinacri wo emet ke Puk luhn Mormon pa Prestuhn Russell M. Nelson. Ke pahngonyuck el in Mwet Sap se, el oruh luti se fin acn Accra, Ghana.14 In wi lutlut se inge pa mwet luhlahp, weacng tohkohsrah Africa se, suc el sramsram nuh se sin mwet lweng se. Tohkohsrah se el luhngse lutlut Bible ac el luhngse Leum. Tukun luti lal Prestuhn Nelson, el ohsun sin tohkohsrah sacn, suc siyuck suwohs ke kahs English, “Kuh suc kom an?” Prestuhn Nelson el ahkuhtweyac lah el sie Mwet Sap Akmuhsraiyucklac lal Jisus Kraist.15 Siyuck se tok lal tohkohsrah pa: “Meac kom kuh in lutiyuc kacl Jisus Kraist?”17

Prestuhn Nelson el sruokyac Puk luhn Mormon ac ikacslah nuh ke 3 Nephi 11. Prestuhn Nelson ac tohkohsrah sac tuh tuhkweni riti lutlut lal Mwet Lahngo nuh sin Mwet Nephi: “Liye, Nga pa Jisus Kraist, suc mwet pahluh fahkwack muh ac fah tuhkuh nuh facluh. … Nga pa kahlwem ac moul luhn facluh.”17

Prestuhn Nelson el sang nuh sel tohkohsrah sacn sie copy ke Puk luhn Mormon, ac tohkohsrah sac el topuk, “Kom kuh in use nuh sihk diamonds kuh rubies, tuhsruhk wacngihn ma sacohk nuh sihk liki mwe etuh se inge ke Leum Jisus Kraist.”19

Ma se inge tiac srihkasrak se muhkwena ke ohiyacn mwet pahluh sacohk lasr in akacsruhi Puk luhn Mormon. El sang copy puhkantwen ke Puk luhn Mormon nuh sin mwet puhs, ac fahkwelihk luhlahlfongi lal ke Jisus Kraist. Ke Prestuhn Nelson el ohsun sin mwet muhtwacta, prestuhn, tohkohsrah, mwet luhlahp luhn muhtuhnfacl, mwet kol ke u luhlahp ac kain in alu, finne ke headquarters luhn Alu kuh ke acn selos sifacna, el akacsruhi puk in ma suhmuhslah se inge. Sahp el kuh in sang mwe nahweyuck puhkantwen ma e kuh in an fin tepuh kuh lohm in mwe acsmak ke muhtwacta lal. Tuhsruhk, el sang ma sacohk emet nuh sel, yohk liki yot sacohk ac ma kahsruhp, oacna tohkohsrah el fahk.

“Ma pwacye ke Puk luhn Mormon,” Prestuhn Nelson el tuh fahk, “pa oasr kuh in ahkkweye, ahkmisye, fohlohk, pahkomuhta, ahkfokokoye, karihngihn, ac ahkenganye nguhnasr.”20 Nga tuh liye copy ke Puk luhn Mormon sruokyuck ke poun mwet suc eis sin mwet pahluh luhn God lasr. Wacngihn mwe sang yohk liki ma se inge.

Petsac
Prestuhn Nelson wi muhtwacn se emeet fin acn Gambia.

Tiac paht tohkoh el ohsun nuh sin muhtuhn kiyacn tohkohsrah luhn Gambia ke ohfuhs lal ac sang nuh sel ke puhsisacl sie Puk luhn Mormon. Na el tiacna tui insacn. El ikacslah sra puk ac riti nuh sel, in luti ac fahkwack kacl Jisus Kraist, Iwaclah Lal, ac luhngse Lal nuh sin tuhlihk nuhkwewa nuhtin God—ke acn nuh kwewa.

Mwet pahluh moul se lasr el oruh ma kunacl in nwacklah facluh ke Puk luhn Mormon.20 Tuh el tiac kuh in muhkwena nwacklah. Kuht enenuh in ukwe srihkasrak lal.

Mokwelyuck ke srihkasrak lal, nga srihke ke puhsisacl ac insacnweacng in akacsruhi ke Puk luhn Mormon.

Petsac
Elder Rasband wi prestuhn luhn acn Mozambique

Pacl fototo somlah ah oasr kunohkohn se luhk fin acn Mozambique. Mwet ke muhtuhnfacl kahto se inge kweokkihn suhkahsruhp, mas, wacngihn orekma, pahkah, ac fohs ke kafucrmacn. Nga tuh eis pacl wowo se in ohsun nuh sin prestuhn luhn muhtuhnfacl sac, Filipe Nyusi. Ke nguhsr lal, nga tuh pruhe kacl ac muhtuhnfacl lal; nga fahk nuh sel muh kuht muhsahi tempuhl se lal Jisus Kraist22 ke muhtuhnfacl se lal inge. Ke sahflahiyacn muhtwacta lasr, nga sang nuh sel Puk luhn Mormon se ke kahs Portugese, kahs lal sifacna. Ke el eis puk sacn ke kuloh, nga fahkwack ke finsrak ac olwelah nuh sin mwet lal, suc oasr ke kahs luhn Leum lin sra puk ingacn.23

Petsac
Elder Rasband wi tohkohsrah ac kasra luhn acn Lesotho

Ke sie pacl sahyac, muhtwacn kiyuck, Melanie, ac nga tuh ohsun nuh sel Tohkohsrah ac Kasra Letsie III luhn Lesotho ke lohm selos.24 Nuh sesr, ma wo emet ke muhtwacta lasr sikyak ke kuht sang nuh selos Puk luhn Mormon se ac akacsruhi luhlahlfongi lasr. Ke nga esam pacl sacn ac ma sahyac, fuhs se ke ma suhmuhslah ke lwen-sahflah tuhkuh ke nuhnak luhk: “Fohnlah luhn wosasuc uh ac fah fahkwelihk sin mwet muhnahs ac fihsrwacsr nuh fin facluh nohfohn, ac ye muhtuhn tohkohsrah ac mwet kol fuhlwact.”24

Petsac
Elder Rasband weluhl Ambassador Pandey
Petsac
Mwet kol ke alu wi El suc Muhtahl Patriarch Bartholomew

Nga akacsruhi Puk luhn Mormon nuh sin Ambassador se luhn acn India nuh United Nations ke acn se pahngpahng Geneva, Indra Mani Pandey25; wi El suc Muhtahllacna Patriarch Bartholomew26 ke Alu luhn Eastern Orthodox; ac mwet puhs sahyac. Nga tuh puhla Nguhn luhn Leum yohrohsr ke nga sifacna sang nuh selos “yot in fihl luhn alu lasr”27 ac sang loh luhk kacl Jisus Kraist, yot in sroasrihk luhn luhlahlfongi lasr.28

Tamuhlwel ac tahmtahel, kom tiac enenuh in som nuh acn Mozambique kuh India kuh ohsun nuh sin tohkohsrah ac mwet luhlahp in sang puk in mwe luti ac olwelah muhtahl se inge. Nga suli kom, lwen se inge, in sang sie Puk luhn Mormon nuh sin kawuck ac sucu lom, mwet wi kom orekma, mwet in kol lom ke sritacl, kuh mwet suc kuhka mongo. Elos enenuh kahs luhn Leum ma oasr ke puk se inge. Elos enenuh top nuh ke kihsen siyuck ke moul se inge ac moul se tok. Elos enenuh in etuh ke inkacnek in olwelah ma oasr met luhkwelos ac luhngse ma pahtpaht luhn Leum nuh selos. Ma nuhkwewa inge oasr ke Puk luhn Mormon.

Ke kom sang nuh selos Puk luhn Mormon se, kom ikacslah nuhnak ac insiaclos nuh ke kahs luhn God. Kom tiac enenuh in us puk printiyucki se wi kom. Kom kuh in akacsruhi ke mobile phone nuhtum ke acn luhn ma suhmuhslah ke Gospel Library app.29

Nuhnkuh kaclos nuh kwewa suc kuh in ahkinsewowoyeyuck ke wosasuc ke moul lalos, na suhpwaclah sie copy ke Puk luhn Mormon nuh selos ke phone intum an. Esam in suhmuhslah luhlahlfongi lom ac lah puk se inge ahkinsewowoye moul lom an fuhkah.

Kawuck sacohk luhk, ekihn Mwet Sap luhn Leum, nga suli kom in ukwe mwet pahluh sacohk lasr, Prestuhn Nelson, in nwacklah facluh ke Puk luhn Mormon. Enenuh se inge yohklac; kuht enenuh in mukwilac ingena. Nga olwelah nuh sum lah kom ac wi orekma “yohk srihpac e met fin facluh,” oracniyacn Israel30 ke kom eis kolyuck in akacsruhi nuh selos suc “tiac eis ma pwacye ke srihpacn elos tiac etuh in suk oyac.”31 Elos enenuh luhlahlfongi ac loh lom lah puk se inge ekuhllah moul lom fuhkah ac us kom fototo nuh sin God, mihslac Lal,32 ac “pweng in engan yohk” Lal.33

Nga fahkwack tuh ke plwacn muhtahl Puk luhn Mormon oreklac fin acn Macrike ke pacl meet ah in tuhkuh nuh sesr fahkwack kahs luhn God, in us mwet nuh yurin Jisus Kraist ac wosasuc fohlohkyak Lal “lwen se inge.” Ke inen Jisus Kraist, amen.

Mwe Kahsruh

  1. Liye Jacob 2:2–3; Mosiah 2:14, 30; 5:7; Alma 7:15; ac fuhs puhkantween sahyac lin Puk luhn Mormon.

  2. Mosiah 2:9.

  3. Alma 53:20.

  4. Teachings of Presidents of the Church: Joseph Smith (2007), 64. Kahs nohfohn tuhkuh sel Joseph Smith ke Nohfuhmpuh 28, 1841, ke toeni luhn Mwet Sap Singucul Luo: “Nga fahk nuh sin mwet lili lah Puk luhn Mormon pa puk se ma pwacye emet sin kuhtwena puk fin facluh, ac pa yot in fihl luhn alu lasr uh, ac sie mwet ac kuh in fototoyang nuh sin God ke el muhta na ke mwe luti luhn ma inge, liki na kuhtwena puk sahyac.” In kahlwem suwohs ke kahs “pwacye” tuhkuh ke srihpen fwackyuck ma tuhkuh ke lweng la ac mwe luti lutiyuck ke Puk luhn Mormon ma akiyac wo liki kuhtwena puk sahyac ma pwacye “fihsrwacsr ac sacohk” luhn wosasuc (liye 1 Nephi 13:40).

  5. Liye “Kraist Suc Moul: Fahkwack ke Luhlahlfongi luhn Mwet Sap,” fahkwack se luhn Prestuhnsi Se Met ac U luhn Mwet Sap Singucul Luo, Jacnweri 1, 2000: “Kuht fahkwack ke luhlahlfongi, muh Mwet sap ahkkweyeyucklac se Lal—lah Jisus pa Kraist Suc Moul, Wen Kuloh Nuhtin God ke Nguhn. El pa Tohkohsra Immanuel, suc tu mihsenge ke lwacpo lwacyot sin Pahpah Tuhmwacl. El pa kahlwem, moul, ac finsrak luhn facluh. Ohiyac Lal pa inkacnek soko ma kol nuh ke mwe engan ke moul se inge ac moul ma pahtpaht ke facl se fahsruh uh. Kuloh nuh sin God ke mwe sang yohk se ke Wen kuloh nahtuhl suc wacngihn kihsruhngyacl.” (ChurchofJesusChrist.org).

  6. Liye Isaiah 49:26; 1 Nephi 21:26; 22:12; Doctrine and Covenants 66:1.

  7. Kahs luhn God sukokyak lin ma suhmuhslah. Ke srihkasrak, ke Puk luhn Mormon, Laman ac Lemuel elos siyuck, “Meac kalmeyacn osra soko?” ma oasr ke mwemwe lal Lehi. Nephi topuk, “Pa kahs luhn God; ac elos suc porongo kahs luhn God, ac lihksreni na sruokyac, elos ac tiacna misac; ac mwe sruhf ac mwe pihsr fihrihr luhn mwet lain tiac pac kuh in kuhtanguhltahllah elos in lohsrlah, in kohlohloslac nuh ke kuhnahoslah” (1 Nephi 15:23–24).

  8. Liye “Fohlohkihnyuckyak ke Fohnlah luhn Wosasuc luhn Jisus Kraist: Sie Mwe Fahkwack in Ahkfuhlwactye Yac Ahk Lofoko nuh fin Facluh,” ma weacng kahs inge: “Kuht fahkwack tuh Alu luhn Jisus Kraist luhn Mwet Luhlahlfongi ke Lwen-sahflah, sramtweack ke Eprel 6, 1830, pa Alu luhn Kraist ke Wuhlweacng Mahtuh sifilpac fohlohkyak. Alu se inge kawucki ke moul suwohswohs ke pwelucng la an, Jisus Kraist, ac Iwaclah ma pahtpaht ac Sifilpac Moulyak Lal. Jisus Kraist El sifilpac pahngon Mwet Sap ac sang nuh selos wal luhn pristut. El suli kuht nohfohn in tuhkuh nuh Yohrohl ac Alu Lal, in eis Nguhn Muhtahl, akwuck luhn molwelah, ac in eis kaksak muhtweng. … Kuht engan in sulkackihn lah Fohlohkihnyuckyak ma tuh uliyuck ah ahkwot na nuh met ke fahfahlacna luhn fwackyuck. Facluh ac fah tiac sifilpac oacna met ah, ke God El ac fah ‘eisani ma orekla nukewa nu sie ke Christ’ (Ephesus 1:10)” (ChurchofJesusChrist.org).

  9. 2 Nephi 4:16.

  10. Liye Quentin L. Cook, “Be Not Weary in Well-DoingBrigham Young University devotional, Ohkohs. 24, 2020), speeches.byu.edu; Eliza Smith-Driggs, “This Week on Social: How to Develop a Love for the Lord, Yourself and Others,” Church NewsJulahe 17, 2020, thechurchnews.com.

  11. Rit ahktolu, rangrang: lutiyacn yot kuh muhtuhnfacl; rit ahkahkosr, sralsral: sramsram luhn Puk luhn Mormon.

  12. “Siepac Wuhlweacng ke Jisus Kraist” tuh ituckyang nuh ke sifac luhn edition nuhkwewa luhn Puk luhn Mormon. Mwet kol luhn alu uh tuh ekuhllah ma inge in lohacng yohk nuh ke srihpen puk sac suc oasr ke ikucslah: “Ac oacyacpac in ahkpwacyei nuh sin mwet Jew ac Gentile lah Jisus pa Kraist, God Ma Pahtpaht, suc sifacna ahkkahlwemyacl nuh sin muhtuhnfacl nuhkwewa.”

  13. Ekihn mwet tuhma lutlut luhn Jisus Kraist ahkkahlwemye luhngse lasr nuh sel. Mwet tuhma lutlut tuh pacptaislac; eis nuh faclos inen Jisus Kraist; elos srihke in Ukwacl ke eis ohiyac Lal oacna ahkuhtweyucki sel Mwet Sap Peter: “Insianaung in akyokye lulalfongi lowos ke orekma wo; ac akyokye orekma wo lowos ke etauk ke God, ac akyokye etauk lowos ke sifacna leum fowos, ac sang muteng in weang sifacna leum fac, na sang moul mutal nu ke muteng lowos; ac kowos in akyokye moul mutal lowos ke kowos alungsei sie sin sie; ac akyokye alungsei sie sin sie ke lungse nu sin mwet nukewa.” (2 Peter 1:5–7; liye pac Preach My Gospel: A Guide to Missionary Service [2019], 121–32).

  14. Prestuhn Russell M. Nelson, suc mwet laslas ke art pwengpweng se met liki pahng lal nuh ke U luhn Mwet Sap Singucul Luo ke yac 1984, el sramsram ke acn in lutlut ono se Accra, Ghana, ke yac 1986 ke sramsram mahtuh luhn laslas art. Lohlngohk lal tok, el ahkuhtweyac tuh el oasr we “oacna mwet kuhlwacnsap luhn Leum in kahsruh [mwet uh] in mwet wo ke mura lalos, in muhsaheack sucu fokoko, in eis engan ac kapkapwack fin acn uh.” El fohlohk nuh acn Accra, Ghana, ke Nohfuhmpuh 16, 2001, nuhke muhtwacwacackiyacn muhsah luhn Tempuhl Accra Ghana (liye “Ground Broken for First Temple in West Africa,” Church NewsNohfohmpuh. 24, 2001, thechurchnews.com).

  15. Liye General Handbook: Serving in The Church of Jesus Christ of Latter-day Saints, 5.1.1.1: “Ke lwen lasr, Leum el pahngon mwet sin Prestuhn luhn Alu uh in akmuhsraiyucklac oacna Mwet Sap ac kuhlwacnsap ke U luhn Mwet Sap Singucul Luo (liye Doctrine and Covenants 18:26–28)” (ChurchofJesusChrist.org).

  16. Liye Russell M. Nelson, “The Book of Mormon: What Would Your Life Be Like without It?,” Liahona, Nohfohmpuh. 2017, 60.

  17. 3 Nephi 11:10–11.

  18. Liye Russell M. Nelson, “The Book of Mormon: What Would Your Life Be Like without It?,” 61.

  19. Russell M. Nelson, “The Book of Mormon: What Would Your Life Be Like without It?,” 62.

  20. Liye Moses 7:62.

  21. Tempuhl Beira Mozambique ahkkahlwemyeyuck ke Eprel 4, 2021, sel Prestuhn Russell M. Nelson. Yohk liki tahfuhn mwet million muhta fin acn Beira, ma oasr sisken Meoa India.

  22. Srihkasrak luhn finsrak ac olwelah konweyuckyak ke Puk luhn Mormon wi pac 2 Nephi 31:20; Jacob 4:4–6; Alma 13:28–29; 22:16; 34:41; Ether 12:32; Moroni 7:41; 8:26.

  23. Tamuhlwel ac Tahmtahel Rasband tuh ohsun sin sucu tohkohsrah ke Fepweri 10, 2020, ke kunohkohn se nuh Africa in kihsacelah Tempuhl Durban South Africa.

  24. Liye Doctrine and Covenants 1:23.

  25. Elder Rasband tuh ohsun nuh sin Ambassador Indra Mani Pandey, Permanent Respresentative luhn India nuh sin United Nations and Other Internation Organization fin acn Geneva, ke el suhpweyucklac nuh ke Interfaith Forum se fin acn Bologna, Italy, ke Septempuh 17, 2021.

  26. Elder Rasband el ohsun nuh sel His All Holiness Ecumenical Patriarch Bartholomew ke Alu Eastern Orthodox ke el suhpweyucklac nuh ke Interfaith Forum fin acn Bologna, Italy, ke Septempuhr 13, 2021.

  27. Teachings: Joseph Smith, 64. Yot in fihl pa yot se ma fihliyucki fin sruhnguhl se, ma sruok yot sahyac ke acn la. Mwet Pahluh Joseph Smith el ahkuhtweyac Puk luhn Mormon oacna “yot in fihl luhn alu lasr uh” ke srihpac la in ahkfototoye Alu uh nuh ke mwe luti ac akwuck. Puk luhn Mormon oacna “yot in fihl” ke moul luhn mempucr uh, kahsrwelos in muhta ke inkacnek in olwelah.

  28. Liye Ephesus 2:19–20. Jisus Kraist pa yot in sroasrihk emet luhn Alu uh, suc us Inel. Oacna ke sang yot in sroasrihk nuh tempuhl pa akucl se nuh ke yot fokoko emet ke pwelucng luhn lohm sin God, Jisus Kraist pa yot in sroasrihk luhn luhlahlfongi ac molwelah lasr. El sang moul Lal tuh kuht in moul; wacngihn sahyac oacna El ke fokokoiyac, srihpac, kuh luhngse.

  29. Kom kuh in akacsruhi ke mobile phone intum an. Sie inkacnek an pa ikucslah app ke Gospel Library, som nuh ke “Ma Suhmuhslah”, ac tanyac “Akacsruhi Ingena” ke muhtwacwacackiyac. Kuh ke app se ke Puk luhn Mormon, kom kuh in tanyac “Akacsruhi”, ma ahkkahlwemye digital code se ma kawuck se kuh in scaniyac ke phone nahtuhl.

  30. Russell M. Nelson, “Hope of Israel” (worldwide youth devotional, Jun 3, 2018), HopeofIsrael.ChurchofJesusChrist.org. “Ke Jun 3, 2018, Prestuhn Russell M. Nelson ac muhtwacn kiyacl, Wendy W. Nelson, suli mwet fuhsr in ‘srolah nuh ke un mwet fuhsr mweun luhn Leum’ ac wi ‘ma upac yohk, srihpac yohk, ac orekma yohk emet fin facluh.’ Ac meac orekma yohk emet? Oracniyacn Israel” (Charlotte Larcabal, “A Call to Enlist and Gather Israel,” New Era, Mahs. 2019, 24).

  31. Liye Doctrine and Covenants 123:12

  32. Liye 2 Nephi 4:27; Mosiah 4:3; 15:18; Alma 46:12.

  33. 1 Nephi 13:37.