Ahkmongoi ac Fahkwack Luhlahlfongi Lom

Ma sikyak yohk ke moul uh tuhkuh ke pacl kuht tiac etuh kuh plwacni, finne ke pacl kuht fuhsr uh. Lwelah nuh sihk nga in akacsruhi sramsram soko ke tuhlihk lutlut se ke high school, Kevin, suleyucklac elan som liki acn sel ah ekihn mwet kol se ke lutlut ah, sruhmuhn ke kahs lal.

“Pacl in nga, mwet orekma se ke tepuh ah siyuck inek. El ngwetwacng nuh ke u in mwet se ma oasr sel ah na el ange, ‘Na kom pa tuhlihk fuhsr se Utah ah.’

“‘Kalmac sum pa nga muhkwena?’ Nga siyuck.

“‘Ahok, kom muhkwena.’ El use pwepuh in akihlen ine se luhk ac suhmuhslah ‘Utah’ ye inek. Ke nga orekmakuhnwacng ah, nga puhla muh oacna in nga sriyucklac.

“Nga utyak in wi tuhlihk limekohsr ke high school sahyac lin elevator ah suc oasr pac pwepuh ahkkahlwemye inelos. ‘Hey, kom ma Utah. Kom Mormon se?’ sie siyuck.

“Nga puhla sriyucklac liki tuhlihk lutlut ma tuhkuh ke acn luhlahp sahyac nge. ‘Ahok,’ nga tahfuh luo fahk.

“‘Komtacl pa luhlahlfongi kacl Joseph Smith ah, suc fahk muh el liye lipufacn ah. Kom tiacna luhlahlfongi ke ma se ngacn, kuh pwacye?’

“Nga tiacna etuh lah mac ngac fahk. Nohfohn tuhlihk lutlut lin elevator soko ah ngwetma liyeyuc. Nga tuhfahna in ai, ac mwet nuhkwewa nuhnkuh muh nga siena. Nga ke amacin na nga tari fahk ma inge, ‘Nga etuh lah Joseph Smith el mwet pahluh se luhn God.’

“’Kuh tuhkuh oyac ma sac?’ Nga nuhnkuh. Nga tiacna etuh lah oasr in nga. Tuhsruhk kahs ah puhla pwacye.

“‘Ahok, fwackyuck pac nuh sihk kowos mwet luhlahlfongi kikiacp,’ el fahk.

“Tukun el fahklah ah, mihsi kihtin pacl na muh ikacklah sruhnguhl ke elevator sac. Ke kuht oracni fihlis lasr ah, el tufoki fahlac isracsr.

“Na, puhsra se tuhkuh tukuk siyuck, ‘Hey, kuh pwacye oasr Pwacpuhl se sahyac nuhtin Mormon?’

“We moh. Tiac sulpac. Nga tahpuhl ac liye sie tuhlihk lutlut pac wi yuc ke elevator sac, Christopher.

“‘Pahngpahng Puk luhn Mormon,’ nga fahk, kena elos in tilac sramsram kac. Nga sruhkwack pack luhk ah ac muhtwacwacack in tufoki.

“‘Kuh pa ngacn puk se ma Joseph Smith el luhngaslah ah?’ el siyuck.

“‘Ahok, pa ngacn,’ nga fahk. Nga fahsr na, in kahingkuhnlah tonong.

“‘Ac, kom etuh ngac eis fuhkah sie?’

“Sie ma suhmuhslah nga lotwelah ke seminary ah tuhkuh nuh sihk. ‘Arulana yohk yukinyen Wosasu [Iuhn Jisus Kraist] sihk.’¹ Ke tuhkuh nuh ke nuhnak luhk ah, nga puhla suhfal nga mwekihnlac na pwacye.

“Inkaiyen wik sac ma suhmuhslah se inge tiacna som likiyuc. Nga topuk kihsensiyuck puhkantwen ke Alu uh ma nga kuh, ac nga kawuckyak sin tuhlihk puhs.

“Nga sokwack tuh nga engankihn luhlahlfongi luhk.

“Nga sang nuh sel Christopher Puk luhn Mormon se. Tok el sihm nuh sihk, fahk lah el suli misinacri nuh lohm sel ah.

“Nga lotwelah in tiac mwekihn in akacsruhi luhlahlfongi luhk.”²

Nga fwefwelac ke puhlaik lal Kevin in akacsruhi puhla kuh luhlahlfongi lal. Puhlaik orekmakihnyuck lwen nuhkwewa sin mempucr ma yohk luhlahlfongi la ke Alu uh fin facluh nohfohn. Ke nga akacsruhi nuhnak luhk uh, nga suli kom in nuhnkuh ke kihsen siyuck ahkosr inge:

1. Kuh nga etuh ac kahlwem lah mac kalmacn fahkwack luhlahlfongi?

2. Kuh nga etuh fuhkah in akacsruhi luhlahlfongi luhk?

3. Meac kuhtuh ma ac tulokihnyuc in akacsruhi luhlahlfongi luhk uh?

4. Ngac sruokyac fuhkah luhlahlfongi luhk uh?

Luhlahlfongi lom an ma na yohk se in kom, kwacna tuhkuh wi puhla wowo se ke nguhn. Puhla inge sramsram srihklac ac ahkuhtweyucki muh “puhsra srihsrihk se.”³ Pa inge luhlahlfongi kuh etuh lom ke ma pwacye utuckot oacna mwet loh se ke kohkoh luhn Nguhn Muhtahl. In eis mwe loh se inge kuh in ekuhlah ma kom fahk ac ma kom oruh. Ma yohk srihpac nuh ke luhlahlfongi lom an, ahkkweyeyucklac sin Nguhn Muhtahl, wi ma inge:

• God pa Pahpah tomom Inkuhsrao; kom tuhlihk Nahtuhl. El luhngse kom.

• Jisus Kraist el moul. El pa Wen nuhtin God moul ac Mwet Lahngo ac Mwet in Molwelah lom uh.

• Joseph Smith el mwet pahluh luhn God ac pahng in fohlohkohnwack Alu luhn Jisus Kraist.

• Alu luhn Jisus Kraist luhn Mwet Luhlahlfongi ke Lwen-sahflah pa Alu fohlohkyak luhn God fin facluh.

• Alu fohlohkyak luhn Jisus Kraist kolyuck sin mwet pahluh moul se misenge.

Kom akacsruhi luhlahlfongi lom ke kom akacsruhi ma wo kom puhla nuh sin mwet sahyac uh. In ekihn mempucr se ke Alu uh, pacl fal kuht in fahk luhlahlfongi lasr uh tuhkuh ke pacl kuht wi toeni ke Alu ah kuh ke pacl fihsrwascr, in sramsram sie sin sie nuh sin sucu, kawuck, ac mwet sahyac.

Sie ohiyac sahyac in akacsruhi fahkwack luhlahlfongi lom an pa mukwikwi suwohswohs. Fahkwack luhlahlfongi lom ke Jisus Kraist tiac ma kom fahk muhkwena—pa suc kom an.

Kais sie pacl kom fahk etuh lom kuh oruh mukwikwi lom in ukwe Jisus Kraist, kom suli mwet sahyac in “tuhkuh nuh yurin Kraist.”⁴

Mempucr ke Alu uh elos tu ekihn mwet loh luhn God ke pacl nuhkwewa, ke ma nuhkwewa, ac ke acn nuhkwewa. ⁵ Ohiyac ma kuht kuh in oruh ma se inge ke orekmakihnyacn internet ke ma lasr sifacna kuht puhla kuh akacsruhi nuhnak luhn mwet sahyac in kahsruh mwet tiac kuh in tui. Kuht fahkwack ma uh ke kuht luhngse, akacsruhi, ac suli, finne mwet uh online. Tweets lom, pweng suwohs, ac posts fah eklac nuh ke srihpac fuhlwact ac muhtahl ke kom orekma social media in ahkkahlwemye fuhkah wosasuc luhn Jisus Kraist kahsruh moul lom.

Kuhtuh ma ac tulokihnyuc in akacsruhi luhlahlfongi luhk uh sahp pa kom ac tiac etuh lah mac kom ac fahk uh. Matthew Cowley, Mwet Sap se ke pacl meet ah, akacsruhi ke ohiyac se ke el yac 17 som oruh misin lal New Zealand yac limekohsr:

“Nga fah tiac muhlkuhnlah pruhe luhn pahpah tuhmuhk ah ke lwen se ngac som ah. Nga tiac lohngyak mwe insewowo na wowo se likina pacl se inge ke moul luhk uh. Na kahs sahflah lal nuh sihk ke acn train ah, ‘Wen, kom ac som nuh ke misin se ingo; kom ac lutlut; kom ac srihke in ahkolah mwe luti lom; ac kuhtuh pacl uh ke ac pahng kom uh, kom ac nuhnkuh muh kom arulacna ahkolah, tuhsruhk ke kom ac tuyak uh, nuhnak lom an ac oalallah.’ Nga puhlakihn ma inge kuhtuh pacl ah.

“Nga fahk, ‘Meac kom e oruh fin oalallah nuhnak lom an?’

“El fahk, ‘Kom tuyak ke acn sacn ac ke insiom nohfohn, kom fahkwack etuh lom lah Joseph Smith el mwet pahluh luhn God moul, ac nuhnak ac tuhfah kahklah nuh ke ma kom nuhnkuh ac kahs nuh inwaclum … nuh insiacn mwet nuh kwewa ma lohng ah.’ Na oruh ke ac oalallah, nuhnak luhk ah ke pacl se nga oruh … misin luhk … , use pacl se in fahkwack luhlahlfongi ke ma yohk srihpac emet se sikyak fin facluh tukun kihsaclah luhn Mwet Kol se lasr ah. Srihke oruh kuhtuh pacl uh, mukul ac muhtwacn. Fin wacngihn ma sahyac kom kuh in fahk, fahkwack lah Joseph Smith el mwet pahluh luhn God, ac sramsram mahtuh nuh kwewa ke Alu uh ac tuhkuh nuh ke nuhnak lom an.”⁶

Prestuhn Dallin H. Oaks el akacsruhi, oacpacna, “Kuhtuh luhlahlfongi uh ke in tuhkuh ke niac ma us uh liki na inte ma sikuck muhtuhnte pruhe kac uh.”⁷ Nguhn el fahkwack loh kac nuh sin mwet se sramsram ah ac nuh selos suc lohng ah oacna sie.

Sie pac ma tulokihn uh pa, ke sramsram soko lal Kevin ah, sahngweng. Ke Paul el sihm nuh sel Timothy ah:

“Tuh Ngun su God El ase nu sesr uh tia mwe aktonongye kut; a ma in nwekkutla ke ngunin ku, ac lungse. …

“Nik kom mwekin in fahkak ma kom etu ke Leum lasr.”⁸

Puhla ke sahngweng uh tiac tuhkuh sin Leum tuhsruhk sin mwet lokoalok se. In oasr luhlahlfongi, oacna ke Kevin el oruh ah, ac kahsre kom in kuhtanglah nuhnak inge ac kahsre kom in akacsruhi ma oasr insiom.

Nga etuh muh luhlahlfongi uh ma na yohk srihpac se nuh sesr sifacna, kuht fin ke liyacacng ac ahkkapye, Alma el luti lah kuht enenuh in ahkmongoi luhlahlfongi lasr uh ke karihngihnyuck wowo.⁹ Ke kuht oruh ohinge, “ac fah okahlah, kapwack, ac foklac.”¹⁰ Ac fin tiac, “e maslah.”¹¹

Kais sie mempucr wolacna ke Prestuhnsi Se Met elos use nuh sesr kolyuck fuhkah in karihngihn fahkwack luhlahlfongi se.

Prestuhn Henry B. Eyring el luti nuh sesr ke luhngse lah “ahkmongoi kahs luhn God, pruhe inse puhsisacl, ac ahkostwen nuh ke masap luhn Leum enenuh sikyak kais sie pacl ac pacl nuh kwewa in oruh fahkwack luhlahlfongi lasr in kapwacack ac suwoslac.”¹²

Prestuhn Dallin H. Oaks el ahkacsmakihnye kuht in karihngihn fahkwack luhlahlfongi lasr, kuht enenuh in ipeis ke kuhfa luhn Leum kais sie wik, “kuht enenuh in ipeis ke kuhfa luhn Leum wik nuh kwewa (liye D&C 59:9) in ahkfalye olwelah tuh kuht ac eis Nguhn in wi kuht pacl nuh kwewa (liye D&C 20:77).”¹³

Ac Prestuhn Russell M. Nelson el kai kuht ke ohiyac kuhlwacng in:

“Kihte [luhlahlfongi lom] ke ma pwacye. …

“… Ahkkapye kom sifacna ke kahs luhn mwet pahluh met ac misenge. Siyuck sin Leum in kahsre kom in Lohngohl wo fuhkah. Oruh in yohk pacl lom lun tempuhl ac ke orekma luhn sucu.

“… Oruh in yohk srihpac emet fahkwack luhlahlfongi lom.”¹⁴

Tamuhlwel ac tahmtahel sacohklacna wiyuck, nga olwelah nuh suwos lah ke kowos kahlwem na pwacye lah meac kalmacn fahkwack luhlahlfongi, ac ke kom akacsruhi kac uh, kom ac kuh in kuhtanglah mwe sruhf ma kom nihkihn ac sahngweng, kahsre kom in ahkmongoi ac sruokyacna ma na yohk srihpac se nuh sum uh, luhlahlfongi lom an.

Kuht sruikihn srihkasrak na puhs yurin mwet pahluh met ah ac misenge uh suc fahkwack kahlwem luhlahlfongi lalos.

Tukun misac luhn Kraist ah, Peter el tuyak ac fahk:

“Lela kowos nukewa in etu … ke inen Jesus Christ lun Nazareth, suc kowos tuh uniya fin sakseng, ac su God El akmoulyauk liki misa, … lah mwet se tu ye motowos inge. …

“… Fin faclu nufon, wangin sie ine saya su God El sang ku nu se in molkutla.”¹⁵

Tukun luti lal Alma ke luhlahlfongi, Amulek el tahfwelah fahk arulacna fokoko: “Nga fah fahkwack nuh suwos keik sifacna lah ma inge pwacye. Liye, nga fahk nuh suwos, lah nga etuh tuh Kraist El fah tuhkuh nuh inmahsrlon tuhlihk nuhtin mwet, … ac tuh El fah iwaclah ma koluk luhn facluh; tuh Leum God El fahk kac.”¹⁶

Joseph Smith ac Sidney Rigdon, elos liye aruhruhma na wolacna se ke sifil moulyak luhn Mwet Lahngo, suc elos fahkwack kac:

Tukun fahkwack luhlahlfongi puhkantwen ma oreklac Kacl, pa inge fahkwack luhlahlfongi ma Mwet Pahluh Joseph Smith ac Sidney Rigdon oraclah Kacl: Lah El moul!

Tuh elos liyacl ke lacyot ke poun God; ac elos lohng puhsra se nuh fahk na lah El pa Wen Kuloh Sefanna nuhtin Pahpah.¹⁷

Tamuhlwel ac tahmtahel, nga suli kowos in suk ohiyac ma kowos kuh in fahkwack luhlahlfongi lowos ke kahs ac ke orekma. Kain in ohiyac se inge tuhkuh nuh sihk ke pacl fototo somlah ah, tukun ohsun se luhk nuh sin mayor se fin acn South America, ke fuckihl se lal ah wi mwet in orekma ekahsr lal. Ke kuht ahksahfye ke nuhnak lasr sifacna ah, nga nuhnkuh lah ngac ac akacsruhi luhlahlfongi luhk. Tukun na puhla sac, nga fahkwack loh luhk lah Jisus Kraist el pa Wen nuhtin God moul ac Mwet Lahngo luhn facluh. Ma nuhkwewa eklac ke pacl sac. Nguhn lin fuckihl sac tiac kuh in lahfwekihn. Oacna in muh mwet nuhkwewa puhla. Nguhn Mauhtahl fahkwack ma pwacye ke Pahpah ac Wen.¹⁸ Nga arulacna kuloh kihn lah oasr puhlaik luhk in fahkwack luhlahlfongi luhk.

Ac fin kain pacl se inge tuhkuh, sruokyac ac orekmakihn. Kom ac fah puhlah mihs sin Nguhn Muhtahl in kom ke kom ac oruh uh.

Nga sang fahkwack luhlahlfongi ac mwe loh luhk nuh suwos—God pa Pahpah tuhmasr Inkuhsrao, Jisus Kraist el moul, ac Alu luhn Jisus Kraist luhn Mwet Luhlahlfongi Lal ke Lwen-sahflah pa Alu luhn God fin facluh mihsenge suc kolyuck sel mwet pahluh sacohk lasr, Prestuhn Russell M. Nelson. Ke inen Jisus Kraist, amen.