Toeni Luhlahp
Ohiyac in Eis Fwackyuck Sifacna
Toeni Luhlahp ke Ohktohpa 2022

Ohiyac in Eis Fwackyuck Sifacna

Sel Elder Dale G. Renlund

Ke U luhn Mwet Sap Singucul Luo

Kuht enenuh in kahlwem ke masap ma Nguhn Muhtahl el orekmakihn. Ke kuht ukwe masap inge, Nguhn Muhtahl kuh in use kahlwem wolacna.

Oacna inkaiyowos, nga eis ma wo yohk sel Elder Dieterer F. Uchtdorf ke lusen yac puhkantwen inge. Pa ahkuhtweyac, kuhtuh, ma nga ac sruhmuhn uh.1 Na, in taltal nuh sel …

Mwet utuck oaksohk suhmaht elos etuh in wucn oaksohk okwacltahl ac ukwe kolyuck sin air traffic controllers ke pacl in oai ac oacyak. Oruh, mwet utuck oaksohk ukwe masap. Tiac elyah lah fuhkah suhmahtiyaclos kuh etuh lalos kac, elos enenuh in sohk ke masap inge in tuh sohkwack nuh luhng ac oruh ma usrnguck luhn oaksohk soko.

Ke ohiyac sepacna, kuht kuh in eis fwackyuck fal nuh ke masap. Tukun kuht pacptaislac, kuht eis mwe sang wolacna se, mwe sang luhn Nguhn Muhtahl.2 Ke kuht kampare in fahsr ke inkacnek in wolacna,3 pa “Nguhn Muhtahl … [ma] ac ahkkahlwemye nuh [sesr] ma nuhkwewa [kuht] enenuh in oruh.”4 Ke kuht fohswack kuh tahfuh luo, kuht kuh in siyuck sin God ke kahsruh.5 Olwelah luhn Mwet Lahngo arlac fihsrwacsr: “Siyuck, ac fah utuckot nuh sum; … nuh selos nuhkwewa suc siyuck fah eis.”6 Ke kahsruh luhn Nguhn Muhtahl, kuht kuh in ekuhllah ohiyac muhtahl lasr nuh ke moul ma pahtpaht lasr.7

Olwelah se in eis fwackyuck sifacna sin Nguhn Muhtahl arlac wolacna, oacna oaksohk soko. Ac oacna mwet utuck oaksohk, kuht enenuh in kahlwem ke masap ma Nguhn Muhtahl el oruh in use fwackyuck nuh sesr sifacna. Ac ke kuht ukwe masap inge, Nguhn Muhtahl kuh in use kahlwem, kolyuck, ac mihs. Fin tiac ukwe masap ingacn, tiac yohk srihpac suhmaht lasr, kuht kuh in kiyacpweyucklac ac puhtatlac nuh facluh.

Ma suhmuhslah luti ip yohk se met ke masap inge in eis fwackyuck sifacna.8 Riti kahs luhn Kraist, oacna ke ma suhmuhslah, ahkyohkye fwackyuck sifacna. Elder Robert D. Hales el fahk: “Ke kuht ke sramsram nuh sin God, kuht pruhe. Ac ke kuht ke El in sramsram nuh sesr, kuht riti ma suhmuhslah.”9

Ma suhmuhslah oacyacpac luti kuht ke ohiyac in eis fwackyuck sifacna.10 Ac kuht siyuck ke ma suwohs ac wo11 ac tiac ma sahyacn kena luhn God.12 Kuht tiac “siyuck stuhuhlac,” weacng kena sesuwohs in ahkfahsrye ma kuht luhngse kuh eis na pwacr lasr.13 Yohk liki nuhkewa, kuht siyuck sin Pahpah Inkuhsrao ke inen Jisus Kraist,14 luhlahlfongi muh kuht ac eis.15

Ip ahkluo ke masap inge pa kuht eis fwackyuck sifacna fal nuh sesr muhkwena ac tiac ma luhn mwet sahyac. Ke kahs sahyac, kuht oai ac oayak ke inkacnek lasr. Yohk srihpac in muhta ke inkacnek lasr lutiyucklac ke pacl emmet ke Fohlohkyak. Hiram Page, sie sin Mwet Loh Alkosr ke Puk luhn Mormon, tuh fahk muh el eis fwackyuck ke Alu uh nohfohn. Puhkantwen mempucr kiyacpweyucklac ac eis kolyuck stuhuh.

In topok, Leum El ahkkahlwemye tuh “wacngihn mwet fah eis masap ac fwackyuck ke alu se inge sahyacn mwet kuhlwacnsap luhk Joseph Smith … nwe ke pacl se nga sulaclah … sie pac in aholuhl.”16 Mwe luti, masap, ac fwackyuck luhn Alu uh pa kunohkohn luhn mwet pahluh moul, suc eis sin Leum Jisus Kraist.17 Pa ingacn inkacnek luhn mwet pahluh.

Kuhtuh yac somlah, nga eis pahng ke teluhfon ah sin mwet se suc kaclpous ke el kuhnaoslah masap se. El fahk nuh sihk muh ahkkahlwemyeyuck nuh sel lah oasr ma suhmuhslah sasuc pihkihnyucki ye lohm se tiac lohm sel ma el srihke in utyak eis. El fahk muh el fin eis ma suhmuhslah sasuc inge, elac eis mwe sang in luhngaslah, eis ma suhmuhslah sasuc, ac ekuhllah mwe luti ac kol Alu uh. Nga fahk nuh sel muh el tahfonglac, ac el siyuck tuh ngan pruhe kac. Nga fahk nuh sel lah ngwac tiac. El foloyak sihk ac tiac sulpac sramsram nuh sihk.18

Na tiac enenuh in pruhe ke siyuck lal ke sie srihpac fihsrwacsr tuh yohk srihpac se: mwet pahluh muhkwena kuh in eis fwackyuck ke Alu uh. Ac “siena liki ohiyacn God”19 in mwet sahyac in eis kain in fwackyuck, ma fal nuh ke inkacnek luhn mwet pahluh.

Fwackyuck sifacna ma nuh sin kais sie mwet. Kom kuh in eis fwackyuck, pa nuh ke, ke acn in muhta, kain in orekma fuhkah ko suk, ac suc in pahyuck nuh se.20 Mwet kol luhn alu uh luti mwe luti ac akacsruhi mwe kahsruh, tuh kunohkohn in sulaclah nuh ke ma inge oasr sum. Pa ingacn fwackyuck kom eis; pa inkacnek lom.

Ip ahktolu ke masap inge pa fwackyuck sifacna enenuh in fahsr fal nuh ke masap luhn God ac olwelah ma kuht oraclah Yohrohl. Nuhnkuh ke sie pruhe oacna kain se inge: “Pahpah Lucng, Alu ah tiac arlac pwacr. Kuh nga kuh in alu nuh Sum ke lwen Sahpuht finohl kuh ke lihkihn pot? Kuh wona nga fin tiac som wi Alu ac tiac eis kuhfa luhn Leum tuhsruhktuh in srwackna eis mwe insewowo luhn ahkfuhlwactye lwen Sahpuht?”21 In topuk kain in pruhe se inge, kuht etuh God Elac topuk ohinge: “Tuhlihk se nuhtihk, nga ahkkahlwemye tari kena luhk ke lwen Sahpuht.”

Ke kuht siyuck ke fwackyuck ke ma tuh God El ahkkahlwemye tari, kuht ikacslah nuh sesr sifacna in tahfonglac ke puhla lasr ac lohng ma kuht luhngse in lohng. Mukul se tuh sruhmuhn nuh sihk ke sie pacl ah elyah in ahkwoye mani luhn sucu lal. Oasr nuhnak lal in pihsrwaclah mani in kahsruh, el pruhe kac, ac puhla el eis fwackyuck in oruh. Nga etuh el kiyacpweyucklac ke srihpen el tuh suk fwackyuck sahyacn masap luhn God. Mwet Pahluh Joseph Smith el sensenkackihn, “Wacngihn ma kuh in ahkkolukye tuhlihk nuhtin mwet oacna kolyuck sin nguhn kikiacp, ke elos nuhnkuh muh Nguhn luhn God oasr yohrohlos.”22

Sahp kuhtuh mwet ac fahk muh Nephi el tiac ahkos masap uh ke el unilyac Laban. Tuhsruhk, pacl se inge tiac ekuhllah ohiyacn fwackyuck uh—ohiyac se pa fwackyuck sifacna uh enenuh in fal nuh ke masap luhn God. Tiac fihsrwacsr in ahkuhtweyucki wo, tuh lwelah ngan fahk kuhtuh ma ke sramsram se. Nephi el tiacna siyuck in unilyac Laban ke muhtwacwacackiyacn ma se inge. Tiac ma el luhngse oruh se. Unilyac Laban tiac ma nuh sel Nephi muhkwena tuh in kahsruh ke ma suhmuhslah nuhke muhtuhn facl fahsruh, ac mwet olwelah se. Ac Nephi el etuh pwacye lah fwackyuck—pwacyeiac ah, ke pacl se na, pa sie masap luhn God.23

Ip ahkahkosr ke masap inge pa in akihlen ma God El ahkkahlwemye nuh sum tari, ac ahkolah in sifwilpac eis fwackyuck sasuc Yohrohl. God El fin topuk kihsen siyuck se ac ohiyacn moul lom tiac eklac, na efuh kuht nuhnkuh muh top an ac eklac? Joseph Smith el sun elyah se inge ke yac 1828. Ip se met ke Puk luhn Mormon tuh luhngasyucklac tari, ke Martin Harris, sie mwet kahsruh in suhmuhslah, siyuck sel Joseph el fin kuh in us sra puk ma luhngasyucklac ac sang muhtwacn kiacl in liye. Tahfuh luo kuhtuh, Joseph el pruhe ke kolyuck. Leum El fahk nuh sel in tiac lwelah Martin elan eis sra puk inge.

Martin el siyuck sel Joseph elan sifwilpac siyuck sin God. Joseph el oruh, ac top nuh ke pa, mac kuht ac nuhnkuh, srwackna moh. Tuhsruhk Martin el sulpac ngihsracl Joseph in siyuck pacl ahktolu, na Joseph el oruh. Pacl se inge God El tiacna fahk moh. Sahyacna, ke ma inge God El fahk, “Joseph, kom etuh ma nga luhngse ke ma inge, tuh kom kuh in sulaclah sifacna.” Ke el puhla mihs liki kosrwaclah ke ma inge, Joseph el tuh lwelah nuh sel Martin in eis sra puk 116 ac ahkkahlwemye nuh sin kuhtuh sin sucu lal. Sra puk luhngasyucklac inge tuh tuhlac ac tiac sukokyak. Leum El kailyac Joseph.24

Joseph el etwaclah, oacna mwet pahluh Jacob ke Puk luhn Mormon el luti: “Nikmet suk in kai Leum, tuhsruhk in eis kaiyuck ke pahol. Tuh … El kai ke lahlmwetmwet.”25 Jacob el sensenkackihn lah ma koluk e sikyak ke kuht siyuck ke ma kuht tiac enenuh. El palye tuh mwet Jerusalem ac suk “ma elos tiac kuh in kahlwem kac,” ngwetlah “ahluhkwelah akucl,” ac tiac akihlen Mwet Lahngo luhn facluh.26 Elos tahfonglac ke srihpen elos siyuck ke ma elos tiac kuh ac tiac luhngse in kahlwem kac.

Kuht fin eis fwackyuck sifacna nuh sesr ac ohiyacn moul lasr tiac eklac, God El topuk tari kihsensiyuck lasr.27 Pa nuhke, kuhtuh pacl kuht kwacna siyuck in ahkkweye lah kuh eis nuhnak muhnahs. Fin kuht auliyak, sesesslah ke engan ac mihs in nguhn, ac eis nuhnak muhnahs liki ma koluk lasr, kuht tiacna enenuh in sulpac siyuck tuhsruhk kuht kuh in luhlahlfongi top ma God El use tari.28

Finne kuht luhlahlfongi top luhn God met, kuht enenuh in ikacslah insiacsr tuhpan mwe fahkwack sifacna e tuhkuh uh. Tukun ma nuhkwewa, kuhtuh sahflahiyacn moul uh e sun fuhfahsryucsr wacngihn saflahiyac se. Kuht in akihlen lah fwackyuck sifacna kuh in tuhkuh “ip nuh ke ip ac kais kuhtuh nuh kais kuhtuh,”29 lah kolyuck kuh in tuhkuh ke ip srihsrihk.30

Ip nuh ke masap in eis fwackyuck sifacna tuhkweni kahsruh sie sin sie. Tuhsruhk ke masap inge, Nguhn Muhtahl kuh ac fah ahkkahlwemye ma nuhkwewa kuht enenuh in oaclac kac ac kampare ke inek luhn olwelah. Na kuht kuh in ahkinsewowoyeyuck ke kuh luhn Jisus Kraist in oacna ma Pahpah Inkuhsrao El kena sesr. Nga suli kom in puhlaik in oruh ma kom enenuh in eis fwackyuck sifacna, kahlwem ke ma God El ahkkahlwemye, fal nuh ke ma suhmuhslah ac masap ma El sang sin mwet pahluh suliyucklac Lal ac nuh ke sukohsohk in sulaclah lom. Nga etuh lah Nguhn Muhtahl el kuh ac fah ahkkahlwemye ma nuhkwewa kom in oruh.31 Ke inen Jisus Kraist, amen.

Mwe Kahsruh

  1. Elder Dieter F. Uchtdorf el kwacna orekmakihn puhpuhlyuck ke aksohk in luti ma yohk srihpac ke wosasuc. Sie srikasrak kac uh pa, el kapsra ma mwet utuck aksohk oruh in ahkolah in sohk nuh ke ohiyacn luti oacna Mwet Lahngo ke “A Teacher’s Checklist” ([broadcast for teachers, June 12, 2022], broadcasts.ChurchofJesusChrist.org).

  2. Nguhn Muhtahl pa mwet ahktolu ke SifwenGod, kwacna etweyuck muh Nguhn kuh Nguhn luhn God, ac oruh ma yohk srihpac ke plwacn in molwelah. El sang loh lal sin Pahpah ac Wen, ahkkahlwemye ma pwacye, ahkmuhtahlyaclos suc auliyak ac pacptaislac, ac pa Nguhn Muhtahl luhn Olwelah (liye Guide to the Scriptures, “Holy Ghost,” scriptures.ChurchofJesusChrist.org).

  3. Liye 2 Nephi 31:19–21; Mosiah 4:8. Ac wacngihn inkacnek sahyac ma kuht “kuh in eis molwelah ke tohkohsrahi luhn God.” In nuhnkuh ke ma sahyac e fah tiac oraclah inkacnek sahyac.

  4. 2 Nephi 32:5; liye pac Doctrine and Covenants 84:43–44.

  5. Liye 2 Nephi 32:4; Russell M. Nelson, “Fwackyuck nuh ke Alu, Fwackyuck nuhke Moul Lasr,” Liahona, Mei 2018, 93–96.

  6. Matthew 7:7–8.

  7. Liye “Sucu: Sie Mwe Fahkwack nuh fin Facluh”; “Young Women Theme”; General Handbook: Serving in The Church of Jesus Christ of Latter-day Saints, 27.0; 27.2, ChurchofJesusChrist.org.

  8. Liye 2 Nephi 32:3.

  9. Robert D. Hales, “Holy Scriptures: The Power of God unto Our Salvation,” Liahona, Nohfohmpuh 2006, 26–27.

  10. Ma suhmuhslah luti lah puhsren Nguhn Muhtahl mihslac, oacna mahmah se—tiac wohwohn kuh okahrkahr; ac fihsrwacsr, mihs; kuh pac in arlac fakfuck ac upac foliyac; nuhnak ac insiac kuh in puhla; use mihs, engan, ac finsrak—tiac sahngweng,elyah,ac fosrngah—ac suli kuht in oruh wo— tiac koluk, ac ahkmuhtahlye ac emem—tiac ahkfohs. Liye Sie Tokosra 19:11–12; Omni 1:25; Alma 32:28; Helaman 5:30–33; 3 Nephi 11:3; Moroni 7:16–17; Doctrine and Covenants 6:22–24; 8:2–3; 9:8–9; 11:12–14; 85:6; Boyd K. Packer, “The Candle of the Lord,” Ensign, Jacnweri 1983, 51–56; Russell M. Nelson, “Porongel,” Liahona, Mei 2020, 88–92; Russell M. Nelson, “Embrace the Future with Faith,” Liahona, Nohfohmpuh. 2020, 73–76; Russell M. Nelson, “Fwackyuck nuh ke Alu, Fwackyuck nuh ke Moul Lasr,” 93–96.

  11. Liye 3 Nephi 18:20; Moroni 7:26; Doctrine and Covenants 88:64–65.

  12. Liye Helaman 10:5; Doctrine and Covenants 46:30.

  13. James 4:3; liye James 4:3, New International Version; 2 Nephi 4:35; Doctrine and Covenants 8:10; 46:7; 88:64–65.

  14. Liye Doctrine and Covenants 88:64–65; Guide to the Scriptures, “Prayer,” scriptures.ChurchofJesusChrist.org.

  15. Liye 3 Nephi 18:20; Moroni 7:26.

  16. Doctrine and Covenants 28:2, 7.

  17. Liye Doctrine and Covenants 21:4–5.

  18. Wo ohiyac, oreklac ahkoeyacl in eis kahsruh ac onweyac ma el arulacna na enenuh.

  19. Teachings of Presidents of the Church: Joseph Smith (2007), 197.

  20. Liye Thomas S. Monson, “Whom Shall I Marry?,” New Era, Ohktohpa. 2004, 4.

  21. Liye Doctrine and Covenants 59:9–16.

  22. Joseph Smith, ke Times and Seasons, Eprel. 1, 1842, 744, josephsmithpapers.org.

  23. Leum El kwacna ekuhllah, sang kuhtuh, kuh oruh ma siena nuh ke masap ahkkahlwemyeyuck Lal, tuh ma inge tuhkuh sin fwackyuck luhn mwet pahluh ac tiac ke fwackyuck sifacna. Fwackyuck luhn mwet pahluh tuhkuh yurin mwet pahluh solac sin God fal nuh ke lahlmwetmwet ac kahlwem luhn God. Ma srihyucklac inge nwacnwack pacna fwackyuck luhn Leum nuh sel Moses ac Joshua in uniyac mwet Canaan finne masap Lal pa “Kom in tiac ahkmas” (Exodus 20:13). Leum, yrurin mwet pahluh Lal, kuh ac fah ekuhllah masap Lal nuh ke srihpac Lal. Kuht tiac sukohsohk, sahyacna, nuh ke fwackyuck sifacna in ekuhllah kuh sislah masap lah God el ahkkahlwemye nuh sin Alu Lal yurin mwet pahluh.

    Liye 1 Nephi 4:12–18; ke sramsram na fohn sacn, liye Joseph Spencer, 1st Nephi: A Brief Theological Introduction (2020), 66–80.

  24. Ke sramsram nohfohn ke sra puk 116, liye Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 44–53; liye pac Doctrine and Covenants 3:5–15; 10:1–5.

  25. Jacob 4:10.

  26. Liye Jacob 4:14–16.

  27. Joseph Smith el luti, “We never enquire at the hand of God for special revelation only in the case of their being no previous revelation to suit the case” (in History, 1838–1856 [Manuscript History of the Church], volume A-1, 286–87, josephsmithpapers.org).

  28. Liye Mosiah 4:3 Ke kuht puhla na suhfal ac auli tukun auliyak suwohs ac pwacye, ma ke srihpen srihklac luhlahlfongi ke Jisus Kraist ac ke kuh Lal in onwekuhtlac ac nuhnak muhnahs nuh sesr. Kuhtuh pacl kuht luhlahlfongi muh nuhnak muhnahs ma nuh sin mwet sahyac ac tiac orekmakihnyuck nuh sesr. Tuhkuh ke srihpen srihklac luhlahlfongi ke ma Mwet Lahngo kuh in oraclah ke srihpen Iwaclah ne tok Lal.

  29. Liye Isaiah 28:10; 2 Nephi 28:30; David A. Bednar, “Line upon Line, Precept upon Precept,” New Era, Septempuh. 2010, 3–7.

  30. Tuhsruhk God El fin tiac usot fwackyuck, sikalweni in siyuck. Oacna luti lal Elder Richard G. Scott, “Fahsr nuh met ke luhlahlfongi. … Ke kom moulkihn ma suwohs ac fahsr ke luhlahlfongi, God El ac tiac lwelah kom in fahsr nuh met fin stuhuh sulaclah lom” (“Using the Supernal Gift of Prayer,” Liahona, Mei 2007, 10).

  31. Liye 2 Nephi 32:5.