Fahsr tukun Jisus Kraist ke Falken Nien Luhlahlfongi

Kuloh, u in on an, ke onkackihn “Faith in Every Footstep.” Puhsra ac kahs ke on soko inge ma sihmlac in 1996 sel Tamuhlwel Newell Dayley¹ nuh ke ahkoeyacn ahkfuhlwact in yac ahk 150 ke ai luhn mwet fuhfahsryucsr lasr meet ah nuh Infahlfahl Salt Lake in 1847 ah.

On soko inge finne sihmlac nuh ke ahkoeyacn ahkfuhlwact sac, pweng kac uh ma nuh fin facluh nohfohn.

Nga kwacna luhngse chorus kac ah:

Tamuhlwel ac tahmtahel, nga fahkwack na pwacye lah ke kuht fahsr tukun Jisus Kraist ke falken niac nuhkwewa, oasr finsrak. Oasr finsrak ke Leum Jisus Kraist. Oasr finsrak ke ma nuhkwewa ke moul se inge. Oasr finsrak in kuhtanglah tahfonglac lasr, suhpwacr ac mwe muhnahs lasr, ac ma upac ac elyah lasr. Oasr finsrak in auliyak ac eis nuhnak muhnahs ac in nuhnak muhnahs nuh sin mwet sahyac. Nga fahkwack na pwacye lah oasr finsrak ac mihs in Kraist. El kuh in us kuht misenge ke pacl upac uh. El oruh nuh sin mwet fuhfahsryucsr meet ah, ac El ac fah oruh ingena nuh sin kais sie sesr.

Yac se inge mahkiyac yac ahk 175 ke ai luhn mwet fuhfahsryucsr meet ah nuh ke Infahlfahl Salt Lake, suc oruh nga sifil nuhnkuh ke mwet luhk somlah ah, suc kuhtuh selos fahsr fin acn Nauvoo ne ke Infahlfahl Salt Lake. Oasr ninac pahpah tuhmwacn tuhmwacn ninac pahpah kiyuck tuhmuhk ma wi fahsr ke acn mahmah tuhpahsrpahsr ke pacl fuhsr lalos. Henry Ballard el yac 20;³ Margaret McNeil el 13;⁴ ac Joseph F. Smith, suc tohkoh ekihn Prestuhn ahk ohnkohsr luhn Alu uh, el yac 9 ke el ai Infahlfahl Salt Lake.⁵

Elos puhlakihn kain in ma nuhkwewa ke fuhfahsryucsr lalos, pa nuh ke mihsrihsr, mas, ac wacngihn mongo ac suhnuhn nuknuk. Sie srihkasrak, ke Henry Ballard el utyak nuh ke Salt Lake Valley, el ahkfuhlwactye in liye “Acn Olwelah” tuhsruhktuh moul ke ohiyacn sahngweng mweyen el sruhnga mwet se in liyacl ke nuknuk mahtuh ac koluk. El wihklac tok sahk soko lwen nohfohn tukun fongeni. Na el som nuh ke lohm se ac nguhsr ke nuknuk el in muh kuh in kalweni fuhfahsryucsr lal in konwacack pahpah ac ninac kiyacl. El kuloh nuh sin God el ohsun nuh ke lohm uh ke ohiyac sef.⁶

Mwet mahtuh luhk ukwe Jisus Kraist ke falken nien luhlahlfongi nuh ke kais sie mwet srihfe lalos. Nga kuloh nuh selos ke elos tiacna fuhlweack. Falken inen luhlahlfongi lalos ahkinsewowoyeyuc ac fihl puhkantwen, oacna ke falken nien luhlahlfongi lom misenge uh ac fah ahkinsewowoye fihl nuhtum.

Kahs se inge pioneer el kwewana noun se ac verb se. Ac fin noun se na kalmac pa mwet se suc inmahsrlon mwet meet in oruh fuhfahsryucsr kuh sokwack acn sasuc se. Ac fin verb se, kalmac pa kuh in ikucslah kuh ahkoelah inkacnek nuh sin mwet sahyac in ukwe.⁷

Ke nga nuhnkuh ke mwet fuhfahsryucsr loeloes ma ahkoelah inkacnek nuh sin mwet sahyac, nga petsacellah Mwet Pahluh Joseph Smith. Joseph el mwet fuhfahsryucsr se ke srihpen falken nien luhlahlfongi lal pwacnuhlah nuh ke innimac in sahk se suc el sikuck muhtuhnte in pruhe ac ikacslah inkacnek se nuh sesr in eis fohnlahiyacn wosasuc luhn Jisus Kraist. Luhlahlfongi lal Joseph Smith in “siyuck sin God”⁸ke litutacng se ke 1820 ikacslah inkacnek se nuh ke Fohlohkohnwack fohnlahiyacn wosasuc luhn Jisus Kraist ma nwacnwack mwet pahluh ac mwet sap ma pahng in sifilpac oruh kuhlwacnsap fin facluh.⁹ Nga etuh lah Joseph Smith el mwet pahluh se luhn God. Nga etuh lah falken niacl nwacnwaclah ke luhlahlfongi pwacnwacng pwacnuhlah in sikuck muhtuhnte ye muhtuhn God Pahpah ac Wen Kuloh Nahtuhl, Jisus Kraist.

Falken nien luhlahlfongi lal Joseph Smith sang nuh sel elan kuh in mwet in orekma se luhn Leum in use Puk luhn Mormon, suc sie pac wuhlweacng ke Jisus Kraist ac ke iwaclah kuhlwacng Lal.

Nuh ke luhlahlfongi lal Joseph Smith ac kampare lal ke pacl upac ac fohs, el kuh in mwe orekmakihnyuck ke paho luhn God in sifil muhsaheack Alu luhn Jisus Kraist nuh fin facluh.

Ke toeni sahflah se tuhfahna tari ah, nga sramsram ke kuhlwacnsap luhk ekihn misinacri se ahkinsewowoyeyuc fuhkah. Ahkinsewowoyeyuck nga ke nga luti ke plwacn wowo se lal Pahpah Inkuhsrao nuh ke moul ma pahtpaht, Aruhruhma se met lal Joseph Smith, ac ke luhngaslah lal ke Puk luhn Mormon. Mwe lutlut ac mwe luti fohlohkihnyuckyak inge kol falken niyuck ke luhlahlfongi in luti nuh selos suc ahkolah in lohng pweng ke Fohlohkyak luhn wosasuc.

Misinacri lasr misenge inge elos mwet fuhfahsryucsr ke pacl misenge uh ke srihpen elos akacsruhi ke pweng wowo se inge nuh sin mwet nuh kwewa facluh, in ikacslah inkacnek nuh sin tuhlihk nuhtin Pahpah Inkuhsrao elos in kuh in Etwacl ac Wen Nahtuhl, Jisus Kraist. In eis wosasuc luhn Jisus Kraist ikacslah inkacnek se nuh sin mwet nuh kwewa in ahkoeloslac nuh ke ac in eis akwuck ac mwe insewowo ke Alu ac tempuhl uh.

Ke toeni sahflah sac, Prestuhn Russell M. Nelson el ahkkweye lah “Leum El siyuck nohfohn mukul fuhsr ma nwacsnwacs in ahkolah nuh ke misin” ac lah “misin uh oacyacpac fokoko tuhsruhk luhngse lowos sifacna in oruh kunohkohn se inge” nuh sin “muhtwacn fuhsr ma kuh in wi an.”¹⁰

Pain kom mukul fuhsr ac muhtwacn fuhsr, falken nien luhlahlfongi lom an ac kahsre kom in ukwe nguhsr luhn Leum in kuhlwacnsap ke misin—in mwet fuhfahsryucsr ke pacl misenge uh—in ikacslah inkacnek luhn God nuh sin tuhlihk nahtuhl in sokwack ac muhta na ke inkacnek in wuhlwelah soko ma ac kohlohloslac in Weluhl muhta.

Prestuhn Nelson el mwet fuhfahsryucsr se ke Alu uh. Puhs acn el som nuh we ekihn Mwet Sap se in ikacslah acn inge ac luti ke wosasuc. Tiac paht tukun el mwet pahluh ac Prestuhn luhn Alu uh, el ngihsre kuht in ahkyohkye kuhiyacn nguhn [lasr] uh kuht in kuh in eis fwackyuck.¹¹ El tahfwelah in luti kuh lah kuht ac ahkfokokoye fuhkah luhlahlfongi lasr uh. Ke toeni se nuh sin mwet fuhsr, el fahk;

“Nga ngihsre sum in sifacna us luhlahlfongi lom an. Orekma kac. Sruokyac na. Karuhnguhnwacng. Liyacacng in muh kapwack. …

“[Na] tuhpan ma usrnguck ma se sikyak ke moul lom”¹²

El luti kuh lah kuht ac oruh fuhkah in yohk nguhn in kuht. El fahk lah, “ke lwen ma ac tuhkuh uh, ac fah tiacna kuh in pain moul ke nguhn fin wacngihn pwenyuck, kolyuck, ahkwoye, ac pihrihkyuck pacl nuhkwewa luhn Nguhn Muhtahl.”¹³

Nga fahkwack na pwacye lah Prestuhn Russell M. Nelson el mwet pahluh se luhn God fin facluh mihsenge.

Mwet Lahngo lasr, Jisus Kraist, el pa mwet in fuhfahsryucsr se lasr emet ma ahkoelah inkacnek uh. Pwacyena, El painkacnek”¹⁴nuh ke plwacn in molwelah in kuh in ahkfahsryeyucklac tuh kuht in kuh in auliyak, ac, ke luhlahlfongi lasr Sel, fohlohk nuh yurin Pahpah Inkuhsrao.

Jisus El fahk, “Nga pa inkanek, pwaye, ac moul: wangin mwet som nuh yurin Papa fin tia ke nga.”¹⁵ El olwelah muh Elac tiac fihlihkuhti muhkahimtacl; Elac fohlohk nuh yohrohsr ke kuht sun ma upac.¹⁶ El suli kuht in “tuhkuh nuh [Yohrohl] ke inse pwacye, ac [El] ac fah unwe [kuhtlac].”¹⁷

Nga fahkwack na pwacye lah Jisus Kraist el pa Mwet Lahngo ac Mwet in Molwelah lasr, Mwet Iwe lasr nuh sin Pahpah. Pahpah Tuhmasr Inkuhsrao el ikacslah inkacnek se nuh sesr in fohlohk nuh Yohrohl ke kuht ukwe Wen Kuloh Nahtuhl, Jisus Kraist, ke falken niyacsr nuh kwewa.

Mwet mahtuh luhk somlah ah wi mwet fuhfahsryucsr meet ah elos sun elyah na upac ke elos orekmakihn wackohn, mwe pahtpaht, ac fahsr lalos nuh Infahlfahl Salt Lake. Kuht ac sun pac ma upac inge ke fuhfahsryucsr lasr sifacna ke moul se. Kuht tiac pahtok mwe pahtpaht kuh kahsruhsr us wackohn soko ma afyucfi ke finohl tohktohk ac lin snow, kuht srihke oacpacna elos in kuhtanglah mwe sruhf ac ma upac misenge uh. Oasr ma upac kuht ac fahsr kac, oasr finohl srihsrihk—ac kuhtuh pacl uh finohl luhlahp—in fan kac. Ma upac inge finne siena liki ma mwet fuhfahsryucsr meet ah puhlah, tiac eklac upaciyac uh nuh sesr kwewa.

Yohk srihpac in ukwe mwet pahluh ac pihkihnyac in fokoko niyacsr ke inkacnek in wuhlwelah luhn luhlahlfongi, oacna mwet fuhfahsryucsr lasr meet ah.

Lwelah kuht in ukwe Jisus Kraist ke falken niyacsr nuh kwewa. Kuht enenuh in kuhlwacnsuhpuh Leum ac sie sin sie. Kuht enenuh in ahkfokokoye nguhnasr sifacna ke kuht ahkos ac ahkfuhlwactye wuhlwelah lasr. Kuht tiac enenuh in tohllah yohk srihpaciyacn ahkostwen nuh ke masap. Setuhn el srihke in oruh kuht in alsracngesryak ke ma kuht olwelah ac luhngse lasr nuh sin God ac nuh sin Leum Jisus Kraist. Nuhnak muhnahs esam lah fin oasr mwet nuhkanlah inkacnek lalos, kuht tiac kuh in tuhlac sin Mwet Lahngo lasr. Ke mwe insewowo ke auliyak, kuht kuh in fohlohk nuh Yohrohl. El ac kahsre kuht in lutlut, kapwack, ac eklac ke kuht srihke in muhta na ke inkacnek in wuhlwelah.

Lwelah kuht in fahsr na ke falken nien Jisus Kraist ac, ke luhlahlfongi ke fahsr lasr nuh kwewa, nuhnkuh Kacl, pihkihnyac in fokoko niyacsr nuh ke inkacnek in wuhlwelah.