Tohuyak nuh fin Sahksihn sac
In ekihn mwet luhlahlfongi luhn Jisus Kraist sie mwet el enenuh in us mwe toasr —la sifacna kuh luhn sie na mwet—ac som nuh yen ma kihsackuhnlah enenuh ac kweok uh tiac kuh in kahingkihnyucklac.
Yac ekahsr somlah ah, ke nga tuh wi lutlut nuhke sramsram mahtuh ke alu luhn acn Macrike, oasr tuhlihk lutlut se siyuhk sihk, “Efuh Mwet Luhlahlfonhgi ke Lwen-sahflah tiac orekmakihn sahksin in mwe akucl ke luhlalfongi oacna ke Kristiacn sahyac oruh uh?”
Ke sripen kain kihsensiyuck ke sahksin uh wacna siyuck ke luhlahlfongi lasr ke Kraist, nga sihlahklahk na fahk nuh sel lah Alu luhn Jisus Kraist luhn Mwet Luhlahlfongi ke Lwen-sahflah nuhnkuh ke kihsackuhnlah luhn Jisus Kraist in pa yohk sripac emeet,pa mwe lutlut yohk, ac pa ma se ma fahkwack yohk ke luhngse wolacna ke placn yohk luhn God nuhke molwelah luhn tuhlihk Nahtuhl.1 Nga ahkuhtweyac lah ohiyac se inge enenweyuck ac mwe sang se nuh sin mwet uh muhtwacwacack kacl Adam ac Eve nuhke sahflahiyacn facluh.2 Nga fahk ma mwet pahluh Joseph Smith, el tuh fahk,“Ma nuhkwewa … ma lutiyuck ke alu lasr uh ma tuhkuh” ke Iwaclah lal Jisus Kraist.3
Tohkoh nga riti nuh sel ma Nephi el tuh suhmuhslah ke yac 600 met liki isuslac lal Jisus: “Ac … lipufacn sac fahk nuh sihk … , Liye! Ac nga ngwetlah ac liyacack Wen nuhtin God, … [Suc] srihpsrihpyak fin sahksin soko ac acnwucki ke ma koluk luhn facluh.”4
Ke “luhngse, akacsruhi, ac suli” luhk yohkwelihk nuh pwacye, nga som soko lac na ke rit uh! Kraist el fahk nuh sin mwet Nephites ke facl sasuc, “Pahpah tuhmuhk El suhpweyuhme tuh Nga in srihpsrihpyak fin sahksin soko; … tuh Nga in kuh in kohlma mwet nuhkwewa nuh Yuruk, …ac ke sripac se inge nga srihpsrihpyak.”5
Nga ahkolah in fahk ma mwet sap Paul el tuh fahk ah ac nga liye lah muhtuhn kawuhk se luhk inge tillac pwacr in lohacng ke ma nga sruhmuhn uh. El liye ao nahtuhl ah ac esamwack lah enenuh elan som nuh yen se, oacna sie acn—na el kahinglac som nuhke ohsun se el kihnacack inge. Ac ohinge sramsram lasr uh tui inse.
Olutu se inge,yac 50 kuhtuh tohkoh,nga kena ahksahfyelah ahkuhtweyac se luhk inge—finne kais sie suwos nohfohn muhtwacwacack in liye ao nuhtuwos an. Ke nga srihke in ahkuhtweyac lah efuh kuht tiac orekmakihn akucl in sahksin soko, nga kena in oruh in arulacna kahlwem ahkfuhlwact yohk ac luhngse lasr nuh sin mwet luhlahlfongi suc orekmakihn uh.
Sie sripac kuht tiac orekmakihn yohk sahksin soko in mwe akucl in luhlahlfongi lasr tuhkuh ke mwet lasr ke Pwacpuhl uh. Ke srihpen srihpsrihpyak fin sahksin el sie atac ahkmas emeet luhn Mwet Roman in orekmakihn sang uniyac mwet, puhkantwen mwet fahsr tohkohl Jisus sulaclah in tiac ahkkohnye ohiyac in ahkkweok se inge. Kalmacn misac lal Kraist el yohk sripac nuhke luhlahlfongi laltahl uh, tuhsruhk ke yac tolfoko kuhtuhlac elos suk in ekuhllah kalmacn alu lalos uh nuhke ma sahyac.6
Ke pacl se ma sun yac ahngfoko nuhke lamfoko,sahksin soko ituckyang in pa akucl nuhke alu Kristin nuhkwewa, tuhsruhk kuht tiac “oacna alu Kristin nuhkwewa.” Kuht tiac Catholic kuh Protestant, tuhsruhk kuht, alu fohlohkyak se, fohlohkyak luhn Alu ke Wuhlweacng sasuc. Pwacnwacng, muhtwacwacack lasr ac kuh luhn alu lasr uh ma na e met liki we luhn u in mwet kahsruh, rapkuh, ac akucl.7 Ke ohiyac se inge, wacngihn luhn akucl se ma pahtlac in orekmakihnyuck pa sie pac mwe ahkpwacye ma Alu luhn Jisus Kraist luhn Mwet Luhlahlfongi ke Lwen-sahflah el ma fohlohkihnyuhkme ke muhtwacwacackihyacn alu Kristin na pwacye.
Sie pac srihpac pwacnwacng kuht tiac orekmakihn sahksin soko uh pa ahkuhtweyac lasr ke ma usrnguck se suc Kraist el ahkfahsryelah ah—suc pa sifilpac moulyak Lal weacng pacna kweok ac misac ke kihsackuhnlah Lal. Ke kuht liye inmahsrlon ma se inge, nga ke fahk ke sroal luo8 ma an srihpsrihp tukun toeni muhtahl luhn Pretuhnsi Se Met ac Mwet Sap Singucul Luo lun Tempuhl Salt Lake City ke Tuhstuh nuhkwewa. Sroal inge ma an in ahkacsmakihnye kuht ke misac lal Jisus in elah ma koluk lasr ac ke ma El kuhtanglah nuh sesr suc Kuhlwacansuhpacl.
Kuht orekmakihn petsac se kacl Kraist ke pacl se el sifilpac moulyak otyak liki kuhlyuck ac kihnet ke srihpsrihpyak se Lal fin sahksin soko ah srackna kahlwem in ahkkahlwemye ke Kuhtanglah Lal.9
Ke sahflah, kuht kuh in esam ma Prestuhn Gorden B. Hinckley el luti, “Moul luhn mwet lasr enenuh [in] … mwe akucl luhn [luhlahlfongi] lasr.”10 Ma se inge—yohk ma se sahflah—oruh nga in ahkihlen ma yohk srihpac e met ke ma suhmuhslah fahk ke sahkseng soko ah. Wacngihn ahkkahlwemyeyac ke mwe ahtaht kuh mwe nahwiyuhk wi sain uh. Tuhsruhk ma enenuh uh pa puhlaik lasr in oruh ma Jisus el sapkihn nuh sin kais sie Mwet Tuhma Lutlut Lal. “Kutena mwet [kuh muhtwacn] fin lungse wiyu, el enenu in lafwekunul sifacna, srukak sakseng lal ac fahsr tukuk.”11
Ma se inge sruhmuhn ke sahksin ma kuht us uh ac tiac sahksin ma kuht orekmakihn uh. In ekihn mwet luhlahlfongi luhn Jisus Kraist sie mwet el enenuh in us mwe toasr —la sifacna kuh luhn sie na mwet—ac som nuh yen ma kihsackuhnlah enenuh ac kweok uh tiac kuh in kahingkihnyucklac. Sie mwet Kristini tiac kuh in ukwe Mwet Kol lal ke pacl el insese muhkwena. Muoh. Kuht Ukwacl nuhke acn nuhkwewa, finne nuhke acn ma tuhng ac elyah sesseslah we enenuh kuht in weluhl, suc kuhtuh pacl uh kuht kuh in muhkwena.
Nga etuh mwet uh,lun ac lihkihn Alu uh, suc fahsr tohkohl Kraist uh oruh ke luhlahlfongi. Oasr tuhlihk nga etuh muh arulacna upac suhkahpahs lalos, ac nga etuh ninac ac pahpah tuhmwaclos ma karuhnguhnuhlos. Nga liye elos nohfohn orekma ne ke na elos kuf na pwacye, suk kuh, ac pacl in engan ma tiac tuhkuh ke inkacnek sahyac. Puhkantwen mwet fuhsr tiac pahyuck ma kena ac fal in sokwack sie kawuck wowo ah, in wi moul in pahyuck, ac oasr tuhlihk nahtuhlos. Wacngihn luhngse kuh in wo liki ohinge, tuhsruhk yac nuhke yac ma wo inge tiac tuhkuh sonuhlos. Nga etuh mwet ma lain mas insifac, suc siyuck ke kahsruh ke elos pruhe ac kampare ac srihke nuhke moul in akwuck se inge. Nga etuh suc muhta in kwacoh tuhsruhk, elos tiac fuhlweack, elos siyuck muhkwena in wo nuh sin mwet elos luhngse ac mwet sahyac ma enenuh kahsruh. Puhkantwen mwet nga etuh lain in suk lah suc elos uh, elos mwet fuhkah se. Nga tuhng kaclos, ac nga weluhlos tuhng, ke srihpen nga etuh yohk srihpaciyacn ma e sikyak ke sulaclah laltahl uh.
Ma upac inge kuhtuh ma upac kuht sun ke moul se inge, in ahkacsmakihnye lah oasr molo nuhke mwet suc fahsr tohkohl ke inse pwacye. Nuh sel Araunah ah, ma tuh oruh in sang kaho ac etong nuhke mwe kisac lal tuh in tiac moul, Tohkohsrah David el fahk, “Moh, tuh enenuh nga in moli nuh sum ke sie luhpah ah: … [tuh nga] e fah [tiacna] sang kihsac … luhk nuh sin Leum God luhk ke ma nga tiac sislah sacn kac.12 Pwacnwacng,kuht nohfohn, fahk pac ohinge.
Ke kuht us ma toasr lasr ac fahsr Tohkohl uh, e arulacna pahkomuhta fin toasriyacn ma upac lasr inge tiacna oruh kuht in kuh in lohacng nuhke ma toasr luhn mwet sahyac. Sie ma na usrnguck in nuhnkuh ke Acnwucki sac lah poun Mwet Lahngo ikackwelihk na ac patpuctuh, ahkkahlwemye lah mukul, muhtwacn ac tuhlihk nuhkewa ke sucu se tiac tulokihnyuck in fahsr nuh Yohrohl muhkena tuhsruhk suliyuck nuh ke nien Molwelah, ac monglac ne tok.13
Ke Sifil Moulyak tukun Srihpsrihpyak fin sahksihn soko ah, pwacnwacng kain in mwe insewowo nuhkwewa e kahklac nuh fin mwet ma luhngse, oacna ke mwet pahluh Jacob ke Puk luhn Mormon tuh fahk, in “luhlahlfongi ke Kraist, ac akihlen misac Lal, ac kweok fin sahkseng Lal.” Kuhtuh pacl uh mwe insewowo inge tuhkuh ke pacl sa ac kuhtuh pacl pahtlac in tuhkuh, tuhsruhktuh ma wo se nuh sesr uh pa14 olwelah se sin Leum Sifacna muh ma inge e tuhkuh. Kuht in muh eis mwe insewowo yohk—lwelah kuht in tiac nuhkanlah, tahfuh luoyak kuh kahing, in tiac ngwetngwet koluk ke kuht oruh orekma se, in tiac tui ke pacl se ma upac lasr uh e kuh in toasrlaclac ac ke pacl se inkacnek uh lohsrlah, ke inen Jisus Kraist, amen. Ke kuh lowos, oaru lowos, luhngse lowos, nga sang tarilacna loal lowos. Lwen se inge nga sange mwe loh oacna mwet sap nuh Sel suc “srihpsrihpyak”15 ac mwe insewowo ma pahtpaht ma El sang nuh selos suc “srihpsrihpyak” Yohrohl, finne Leum Jisus Kraist, amen.