Nuhnkuh Yohk ke Tempuhl
Nga olwelah muh pacl yohkwelihk lun tempuhl fah ahkinsewowoye moul lom liki kuhtwena ma sahyac.
Tamuhlwel ac tahmtahel sacohk, ke toeni limekohsr wolacna inge ke toeni luhlahp, kuht sulpac puhlakihn ikacklah luhn inkuhsrao! Nga pruhe tuh kowos sihmihslah tari ma moklweyuck lowos ac kowos in ukwe. Pahpah Tuhmasr Inkuhsrao ac Wen Kuloh Nahtuhl, Jisus Kraist, tu akholah in kahsrwe kowos. Nga kwacfe kowos in ahkyohkye kuhiowos in suk kahsruh Lalos.
Ke pacl tuhfanna tari, Tahmtahel Nelson ac Nga eis pacl wowo in liye met Videos ke Puk luhn Mormon sasuc ip ahkahkosr.1 Kuht moklweyuck kac! Nga kuh in ahkkahlwemye nuh suwos kuhtuh ma srihsrihk kac pacl ma Mwet Lahngo el sikyang nuh sin mwet Nephi.
Ma yohk srihpac se Mwet Lahngo El sulaclah in sikyang nuh sin mwet ke tempuhl. Lohm Sel pa inge. Nweklah ke kuh Lal. Lwelah kuh in tiac molkuhnlah ma Leum El oruh kacsr ingena. El oraclah tempuhl Lal in fototoi nuh sesr. El ahkmuhi muhsah luhn tempuhl. El ahkyohkye kuh lasr in oracni mwet Israel. El oacyacpac oruh in fihsrwacsr nuh sesr kais sie in ahknwacsnwacsyeyuck ke nguhn. Nga olwelah muh pacl yohkwelihk lun tempuhl fah ahkinsewowoye moul lom liki kuhtwena ma sahyac.
Oasr tempuhl 168 orekma ac tempuhl 53 sasuc muhsahiyuckyak ac ma 54 pacna apkuhran in muhsahiyuck!2 Nga engan in fahkwack plwacn lasr in muhsaheack tempuhl sasuc ke kais sie acn inge: Busan, Korea; Naga, Philippines; Santiago, Philippines; Eket, Nigeria; Chiclayo, Peru; Buenos Aires City Center, Argentina; Londrina, Brazil; Ribeirão Prêto, Brazil; Huehuetenango, Guatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; ac Tacoma, Washington.
Kuht oacyacpac plwacni muhsaheack tempuhl ke siti luhlahp ma pacl in kahsruhsr nuh we arlac loes. Ohinge, nga engan in ahkkahlwemye acn ahkosr pacna fototo nuh México City tempuhl uh fah muhsahiyuck ke Cuernavaca, Pachuca, Toluca, ac Tula.
Tamuhlwel ac tahmtahel sacohk wiyuck, kowos in nuhnkuh ke tempuhl ke ohiyac sasuc. Nga ahkinsewowoye kom in fototoi nuh sin God ac Jisus Kraist lwen nuh kwewa. Nga luhngse kom. Lwelah tuh God Elan wi kowos ne ke na kuht sifilpac ohsun, nga pruhe ke ine muhtahl luhn Jisus Kraist, amen.