ख्रीष्टका शान्तिपूर्ण अनुयायीहरू बन्नुहोस्

हामी यस्तो समयमा जिइरहेका छौँ जब “ख्रीष्टका शान्तिप्रिय अनुयायीहरूले”^१ अनौठा चुनौतीहरू अनुभव गर्नुहुन्छ । येशू ख्रीष्टमा विश्वास गर्ने, विनम्र भई आराधना गर्ने र प्रमाणित गर्नेहरूले सदैव परीक्षाहरू, महासङ्कष्ट र कठिनाइहरूको सामना गर्नुभएको छ ।^२ मेरी श्रीमती मेरी र म यस विषयमा अलग छैनौँ । पछिल्ला केही वर्षहरूमा हामीले हाम्रा नजिकका माध्यमिक विद्यालयका धेरै मित्रहरू र सुसमाचार प्रचारक मित्रहरू, उहाँहरू मध्येका केही अमूल्य पत्नीहरू र पूर्व कामका सहयोगीहरूको मृत्यु भएको वा अध्यक्ष रसल एम्. नेल्सनले भन्नुभएको जस्तै, पर्दाको अर्को तर्फ गई प्रगति भएको देखेका छौँ । हामीले आस्था र विश्वासमा हुर्केका केहीलाई करारको मार्गबाट टाढा भएको देख्यौँ ।

दुःखको कुरा, हामीले २३ वर्षका एक नाति गुमायौँ जसको एक दुःखद मोटरगाडी दुर्घटनामा मृत्यु भयो । केही प्रिय मित्रहरू, परिवारका सदस्यहरू र सहकर्मीहरूले पनि महत्त्वपूर्ण स्वास्थ्य चुनौतीहरू सहनु भएको छ ।

जहिले पनि परीक्षाहरू आउँदा, हामी शोक गर्छौं र एकअर्काको बोझ बोक्ने प्रयास गर्छौं ।^३ हामी पूरा नहुने चीजहरू र नगाइने गीतहरूको विलाप गर्छौं ।^४ यो मरणशील यात्रामा असल मानिसहरूलाई नराम्रा चीजहरू हुन्छन् । मावी, हवाई, दक्षिणी चिले र पूर्वी क्यानडामा विनाशकारी आगोहरू भयानक घटनाहरूका उदाहरण हुन् जुन असल मानिसहरूले कहिलेकाहीँ सामना गर्छन् ।

हामी बहुमूल्य मोतिमा पढ्छौँ कि परमप्रभुले अब्राहमलाई आत्माहरूको अनन्त प्रकृतिका बारेमा प्रकट गर्नुभयो । अब्राहामले हाम्रो पूर्व-नश्वर जीवन, पूर्व नियुक्ति, सृष्टि, उद्धारकर्ताको छनोट र यो मरणशील जीवन, जुन मानिसको दोस्रो स्थिति हो भनेर सिके ।^५ उद्धारकर्ताले घोषणा गर्नुभयो:

उहाँहरूले एउटा पृथ्वीको निर्माण गर्नुहुने छ जसमा तिनीहरू बस्न सक्ने छन्;

“अनि तिनीहरूले परमप्रभु तिनीहरूका परमेश्वरले आज्ञा गर्नुभएका सबै कुराहरू तिनीहरूले गर्छन् कि गर्दैनन् भनी तिनीहरूले यसो गरेर प्रमाणित गर्ने छन्।”^६

अब यहाँ हामी सबै परमेश्वरको उत्कर्षको महान् योजनाको अंशका रूपमा महिमाको अधिराज्यतर्फको हाम्रो प्रगतिको यात्राको दोस्रो स्थितिमा छौँ । हामीलाई छनोटको स्वतन्त्रको आशीष् छ र मरणशीलताको परीक्षाहरू पार गर्नु पर्छ । यो परमेश्वरलाई भेट्नका लागि हाम्रा लागि निर्धारित गरिएको समय हो । ^७ हामी येशू ख्रीष्ट र यो योजनामा उहाँको भूमिकाका सम्बन्धमा बुझ्न पाउँदा धन्य छौँ । हामीले उहाँको पुनर्स्थापित चर्च—पछिल्ला दिनका सन्तहरूको येशू ख्रीष्टको चर्चको सदस्य बन्ने सुअवसर प्राप्त गरेका छौँ । ख्रीष्टका शान्तिप्रिय अनुयायीहरूका रूपमा, हामी उहाँका आज्ञाहरूअनुरुप जिउने प्रयास गर्छौं । उहाँका अनुयायीहरूका लागि यो कहिल्यै सजिलो भएको छैन । न त मुक्तिदाताका लागि आफ्नो मरणशील उद्देश्यलाई आस्थापूर्वक पूरा गर्न सजिलो थियो ।

धर्मशास्त्रहरू स्पष्ट छन्: धेरै “खाओ, पिओ र रमाओ, भोलि हामी मर्ने छौँ” भन्ने दृष्टिकोणका शिकार हुने छन् ।^८ अन्य अविश्वासीहरू अलग्गिएका समूहहरूतर्फ हट्छन् जो “अर्को नयाँ आविष्कार” ^९ र मानिसहरूको दर्शनको वकालत गर्ने समान विचारधाराका सहभागीहरू हुन् ।^१० सत्य कहाँ पत्ता लगाउने भनेर उनीहरूलाई जानकारी छैन ।^११

ख्रीष्टका शान्तिप्रिय अनुयायीहरूले यी कुनै पनि तरिकाहरूको अनुशरण गर्दैनन् । हामी आफू बस्ने समुदायका मैत्रीपूर्ण, सक्रिय सदस्यहरू हौँ । हामी परमेश्वरका सबै सन्ततिहरूलाई प्रेम गर्छौं, ख्रीष्टका शिक्षाहरू बाँढ्छौँ र पालना गर्न आमन्त्रण गर्छौं ।^१२ हामी हाम्रा प्रिय अगमवक्ता, अध्यक्ष नेल्सनको सल्लाह पालना गर्छौं; हामी अहिले र सदैव शान्ति स्थापना गर्नेको भूमिका रोज्छौँ ।^१३ यो प्रेरित दृष्टिकोण दुबै धर्मशास्त्र र अगमवक्ताले गर्ने निर्देशन अनुरूप निरन्तर रहन्छ ।

सन् १८२९ मा पुनर्स्थापित् चर्च अझै सङ्गठित भएको थिएन, न त मोर्मोनको पुस्तक नै प्रकाशित भएको थियो । सङ्घर्षरत मानिसहरूको एउटा सानो समूहले, परमेश्वरको आत्माद्वारा प्रेरित भएर अगमवक्ता जोसेफ स्मिथलाई अनुशरण गरे । कठिन समयका लागि परमप्रभुले जोसेफलाई सल्लाह दिनुभयो: “नडराऊ, सानो बगाल; राम्रो गर; पृथ्वी र नरक तिमीहरूका विरुद्धमा एकजुट हुन देऊ, किनकि यदि तिमीहरू मेरो चट्टानमा बनेका छौ भने तिनीहरू विजयी हुन सक्दैनन् ।”^१४ उहाँले तिनीहरूलाई पनि सल्लाह दिनुभयो:

“हरेक विचारमा मतर्फ हेर; शङ्का नगर, नडराऊ

“आस्थावान् बन, मेरा आज्ञाहरू पालना गर र तिमीहरूले स्वर्गको राज्य उत्तराधिकारका रुपमा प्राप्त गर्ने छौ ।”^१५

स्पष्ट छ, हामीहरूले विपत्तिको सामना गर्दा हाम्रो स्वर्गको भाग्यमा परिवर्तन हुँदैन । हिब्रूहरूमा, हामीलाई सल्लाह दिइएको छ “अनुग्रहको सिंहासनमा साहसी भई आउनुहोस्, ताकि हामीले कृपा प्राप्त गर्न र आवश्यकताको समयमा सहयोग गर्नका लागि अनुग्रह प्राप्त गर्न सक्छौँ ।”^१६ येशू ख्रीष्ट “अनन्त मुक्तिका लेखक” हुनुहुन्छ ।^१७

मोर्मोनका छोरा मोरोनीले प्रशंसा गर्दै उद्धृत गरेका, “ख्रीष्टका शान्तिप्रिय अनुयायीहरू … मानिसका छोराछोरीहरूसँगको तिमीहरूको शान्तप्रिय हिँडाइका कारण ।” भन्ने शब्दहरू मलाई मनपर्छ ^१८

ख्रीष्टका शान्तिप्रिय अनुयायीहरू, बन्न प्रयास गर्ने चर्चमा हामीहरूका लागि, हाम्रा परमप्रभु र मुक्तिदाता, येशू ख्रीष्टमा ध्यान केन्द्रित गर्दा उज्जवल दिनले हामीलाई प्रतिक्षा गरिरहेको हुन्छ । परीक्षणहरू मरणशीलताका एक अंश हुन् र संसारभरि सबैको जीवनमा आउँछ । यसले देश र व्यक्तिहरू बीचका प्रमुख द्वन्द्वहरू समावेश गर्छ ।

चर्चका अगुवाहरूलाई बारम्बार सोधिन्छ, “एक न्यायी परमेश्वरले विशेष गरी असल मानिसहरूलाई खराब चीजहरू हुन किन अनुमति दिनुहुन्छ?” र “धर्मी र परमप्रभुको सेवामा समर्पित भएकाहरू किन त्यस्ता विपत्तिहरूबाट मुक्त छैनन्?”

हामीलाई सबै उत्तरहरूको जानकारी छैन; यद्यपि, हामीलाई महत्त्वपूर्ण सिद्धान्तहरू थाहा छ जसले हामीलाई परीक्षाहरू, महासङ्कष्टहरू र विपत्तिहरूलाई आस्था र विश्वासका साथ सामना गर्न अनुमति दिन्छन् जुन उज्ज्वल भविष्यमा हामी प्रत्येकका लागि प्रतिक्षारत छन् । अगमवक्ता जोसेफ स्मिथ लिबर्टी जेलमा कैदी हुनुहुँदा उहाँलाई परमप्रभुको वचन भन्दा महासङ्कष्ट पार गर्ने सन्दर्भमा धर्मशास्त्रमा कुनैपनि उत्तम उदाहरण छैन ।

परमप्रभुले आंशिक रूपमा घोषणा गर्नुभयो:

“यदि नरकले तिम्रा विरुद्ध मुख फराकिलो खोल्छ भने, तिमीले बुझ्नु, मेरा छोरा, कि यी सबै विषयहरूले तिमीलाई अनुभव दिने छन् र तिम्रा लाभका लागि हुने छन् ।

“मानिसका पुत्रले ती सबै भन्दा तल अवतरण गरिसक्नु भएको छ । के तिमी उहाँ भन्दा अझ महान् छौ र?

“… नडराऊ मानिसले के गर्न सक्छ, किनकि परमेश्वर सदा र सदासर्वदा तिमीसँग हुनुहुने छ ।^१९

यो स्पष्ट छ, हाम्रो साथमा स्वर्गका पिता हुनुहुन्छ जसले हामीलाई व्यक्तिगत रूपमा चिन्नुहुन्छ र प्रेम गर्नुहुन्छ र हाम्रो पीडालाई पूर्ण रूपमा बुझ्नुहुन्छ । उहाँका पुत्र, येशू ख्रीष्ट, हाम्रा मुक्तिदाता र उद्धारकर्ता हुनुहुन्छ ।

अध्यक्ष रसल एम्. नेल्सन र अध्यक्ष एम्. रसेल बलार्ड दुबैले मेरो सुसमाचार सिकाउनुहोस्को नयाँ दोस्रो संस्करणको यसको महत्त्वलाई जोड दिनुभयो ।.^२० म उनीहरुको उत्साहलाई बाँढ्छु । यो नयाँ संस्करणले पवित्र धर्मशास्त्रलाई प्रवर्द्धन गर्दै, शक्तिशाली रूपमा घोषणा गर्छ:

“उहाँको प्रायश्चितको बलिदानमा, येशू ख्रीष्टले हाम्रा पीडाहरू, कष्टहरू र दुर्बलताहरू आफूमा लिनुभयो । यस कारणले, उहाँले ‘मांशशरीरअनुसार बुझ्न सक्नुहुने छ कि उनीहरूका कमजोरीअनुसार उहाँका जनको कसरी सहायता गर्ने’ (अल्मा ७:१२; पद ११ पनि हेर्नुहोस्) । उहाँले आमन्त्रण गर्नुहुन्छ, मकहाँ आओ र जब हामी सो गर्छौँ उहाँले हामीलाई विश्राम, आशा, सामर्थ्य, दृष्टिकोण र चङ्गाइ दिनुहुन्छ । (मत्ती ११:२८; पद २९-३० पनि हेर्नुहोस्) ।

“जब हामी येशू ख्रीष्ट र उहाँको प्रायश्चितमा निर्भर हुन्छौँ, उहाँले हामीलाई हाम्रा परीक्षाहरू, रोगहरू र पीडाहरू सहन सहयोग गर्न सक्नुहुन्छ । हामी प्रसन्नता, शान्ति र सान्त्वनाले भरीपूर्ण हुन सक्छौँ । “जीवनका सम्बन्धमा ती सबै जुन अनुचित छन्, तिनीहरू येशू ख्रीष्टको प्रायश्चित्तद्वारा उचित बनाउन सकिन्छ ।”^२१

हामी प्रसन्नताका साथ ख्रीष्टको शान्तिप्रिय अनुयायी बन्न सक्छौँ ।

हाम्रा पिताको आफ्ना सन्ततिहरूका लागि खुशीको योजनामा यस जीवनपूर्वको जीवन र मरणशील जीवनलाई मात्र समावेश गर्दैन तर अनन्त जीवनका लागि सम्भाव्यता पनि समावेश गर्छ, जसमा हामीले गुमाएकाहरूसँग महान् र गौरवपूर्ण पुनर्मिलन पनि समावेश छ । सबै गल्तीहरूलाई सच्याइने छन् र हामी पूर्ण स्पष्टता र दोषरहित दृष्टिकोण र समझका साथ देख्ने छौँ ।

चर्चका अगुवाहरूले यस दृष्टिकोणलाई तीनजनाको अभिनय नाटकका बीचमा जाने व्यक्तिसँग तुलना गरेका छन् ।^२२ पिताको योजनाको ज्ञान नभएकाहरूले प्रथम खण्डको नाटक वा यस जीवनपूर्वको जीवनमा के भयो र त्यहाँ स्थापित् उद्देश्यहरूका बारेमा बुझ्दैनन्; न त तिनीहरूले तेस्रो भागको नाटकमा आउने स्पष्टीकरण र सङकल्पलाई नै बुझ्छन्, जुन पिताको योजनाको महिमित परिपूर्ति हो ।

धेरैले कदर गर्दैनन् कि उहाँको प्रिय र विस्तृत योजना अन्तर्गत जो लाभ विहीन देखिन्छन्, तिनीहरू स्वयम् को कुनैपनि गल्ती बिना, अन्ततः प्रभावित हुँदैनन् ।^२३

धर्मशास्त्रहरू स्पष्ट छन्: ख्रीष्टका शान्तिप्रिय अनुयायीहरू आशीषित हुने छन् जो धर्मी छन्, मुक्तिदातालाई अनुशरण गर्छन् र उहाँका आज्ञाहरू पालना गर्छन् । धर्मीहरूका लागि सबैभन्दा महत्त्वपूर्ण धर्मशास्त्रहरू मध्येको एक, जीवनमा तिनीहरूको अवस्थालाई ध्यान नदिई, राजा बेन्यामिनले आफ्ना जनहरूलाई गरेको सम्बोधनको अंश हो । उहाँ प्रतिज्ञा गर्नुहुन्छ कि आस्थापूर्वक आज्ञाहरू पालना गर्नेहरू यस जीवनमा सबै विषयहरूमा आशीषित हुन्छन् र “स्वर्गमा ग्रहण गरिन्छ … [र] कहिल्यै अन्त्य नहुने आनन्दको अवस्थामा परमेश्वरसँग बस्छन् ।” ^२४

हामी मध्ये अधिकांशले हाम्रो जीवनमा केही विनाशकारी भौतिक र आध्यात्मिक आँधीबेहरीहरू अनुभव गरेका छौँ । उहाँको पुनर्स्थापित चर्चका प्रमुख स्वर्गमा एक प्रिय पिता र उहाँका पुत्र, येशू ख्रीष्टले खतराहरूका सम्बन्धमा हामीलाई सचेत गराउन र हामीलाई तयार पार्न र सुरक्षाका लागि निर्देशन दिन हामीलाई धर्मशास्त्रहरू र अगमवक्ताहरू प्रदान गर्नुभएको छ । केही निर्देशनहरूका लागि तत्कालै कार्य गर्नुपर्ने हुन्छ र केहीले भविष्यमा धेरै वर्षसम्मका लागि सुरक्षा प्रदान गर्छन् । सिद्धान्त र करारका लागि परमप्रभुको प्रस्तावना, खण्ड १, ले हामीलाई “अगमवक्ताहरूका वचनहरूमा ध्यान दिन” सल्लाह दिन्छ ।^२५

खण्ड १ ले पनि हामीलाई सचेत गराउँछ, “तिमीहरू आउने बिषयहरूका लागि तयार रहो, तयार रहो ।”^२६ परमप्रभुले आफ्ना जनहरूलाई आउने चुनौतीहरूका लागि तयार रहन सुवसर दिनुहुन्छ ।

परमप्रभुले अध्यक्ष ब्रिघम यङ्गलाई जनवरी १४, १८४७ मा विन्टर क्वार्टर्समा एक शक्तिशाली प्रकाश दिनुभयो ।^२७ यो प्रकाश परमप्रभुले भविष्यमा आउने विषयहरूका लागि मानिसहरूलाई तयार गर्दै गर्नुभएको एक उत्कृष्ट उदाहरण हो । आस्थावान् सन्तहरूले सल्ट लेक उपत्यकाको पहाडी शरणस्थलतर्फको आफ्नो यात्रा सुरू गरेका थिए । उनीहरूले सफलतापूर्वक नाभू मन्दिर निर्माण गरेका थिए र रक्षा गर्ने पवित्र विधिहरू प्राप्त गरेका थिए । उनीहरूलाई मिजोरीबाट बाहिर निकालिएको थियो र उनीहरूका अत्याचारीहरूले तिनीहरूलाई भयानक जाडो मौसममा नाभूबाट बाहिर निकाला गरेका थिए । ब्रिघमलाई दिइएको प्रकाशले प्रस्थानका लागि कसरी तयारी गर्ने भन्ने सम्बन्धमा व्यावहारिक सल्लाह दियो । परमेश्वरले गरिबहरू, विधवाहरू, टुहुराहरू र मोर्मोन बटालियनमा सेवा गर्नेहरूका परिवारहरूको हेरचाह गर्नमा विशेष जोड दिनुभयो जब सन्तहरूका मुख्य समूह तिनीहरूका खतराजनक यात्रामा अघि बढेका थिए ।

धार्मिक रूपमा जिउनका लागि दिइएका अन्य सल्लाहका अतिरिक्त, परमप्रभुले आज पनि लागू हुने अन्य दुई आधारभूत सत्यहरूलाई जोड दिनुभयो ।

पहिलो, उहाँले तिनीहरूलाई “गायन सहित सङ्गीत, नृत्य, र प्रशंसा र धन्यवादका प्रार्थनाद्वारा परमप्रभुको प्रशंसा गर्न” प्रोत्साहन गर्नुभयो ।^२८

दोस्रो, परमप्रभुले सल्लाह दिनुभयो यदि तिनीहरू “दुःखी छन् भने, परमप्रभु आफ्ना परमेश्वरलाई बिन्ती सहित पुकार, ताकि तिमीहरूका आत्माहरू प्रसन्न हुन सक्छन् ।”^२९

यी दुई सल्लाहहरू हाम्रो समयका लागि उत्कृष्ट सल्लाह हुन् । प्रशंसा, सङ्गीत र धन्यवादले भरिपूर्ण जीवनलाई अद्वितीय आशीर्वाद दिइन्छ । प्रसन्न हुनु र प्रार्थनाका माध्यमबाट स्वर्गको सहयोगमा निर्भर रहनु ख्रीष्टको शान्तिप्रिय अनुयायी बन्नका लागि एक शक्तिशाली तरिका हो । सदैव खुशी रहनका लागि प्रयास गर्नाले आत्मामा पतन हुनबाट जोगिन सहयोग मिल्छ ।

बोधात्मक भजन का अन्तिम पङ्क्तिले सुन्दर ढङ्गले मौलिक जवाफ दिन्छ:“स्वर्गले चङ्गाइ दिन नसक्ने कुनै दु:ख पृथ्वीमा छैन ।”^३०

परमप्रभु येशू ख्रीष्टको एक प्रेरितका रूपमा, म प्रमाणित गर्छु कि “ख्रीष्टका शान्तिप्रिय अनुयायीहरू” ले यस जीवनमा व्यक्तिगत शान्ति र गौरवमय स्वर्गीय पुनर्मिलन प्राप्त गर्ने छन् । म मुक्तिदाताको देवत्व र उहाँको प्रायश्चितको वास्तविकताको सुनिश्चित गवाही व्यक्त गर्छु । उहाँ हाम्रा मुक्तिदाता र उद्धारकर्ता हुनुहुन्छ । येशू ख्रीष्टको नाममा, आमीन ।