Tindog! Gitawag Ka Niya

Kaniadto akong gipangutana ang akong asawa, “Makasulti ka ba nako ngano, sa akong nahinumdoman, wala gayod kitay bisan unsa nga dagkong problema sa atong kinabuhi?”

Mitan-aw siya nako, ug miingon, “Segurado. Sultihan ko ikaw ngano nga wala gayod kitay bisan unsang dagkong problema; tungod kay ikaw malimtanon kaayo!”

Ang iyang dali ug inutok nga tubag nakapaamgo nako sa makausa pa nga ang pagsunod sa ebanghelyo ni Jesukristo dili makatangtang sa kasakit ug mga pagsulay, nga gikinahanglan aron kita molambo.

Ang ebanghelyo dili usa ka paagi aron malikayan ang mga hagit ug mga problema apan usa ka solusyon sa pagdugang sa atong pagtuo ug makat-on kon unsaon sa pag-atubang niini.

Nasabtan nako kini nga kamatuoran pipila ka bulan ang milabay sa dihang ako naglakaw usa ka adlaw, ug sa kalit lang mihanap, mingitngit, ug mibawod-bawod ang akong panan-aw. Nahadlok ko. Dayon, ang mga doktor misulti nako: “Kon dili nimo sugdan dayon ang pagpatambal, mahimong mawala ang imong panan-aw paglabay sa pipila ka semana lang.” Mas nahadlok hinuon ko.

Ug dayon miingon sila, “Ikaw magkinahanglan og intravitreal nga mga indyeksiyon—mga indyeksiyon diha gayod sa mata—dakong buka ang mata—matag upat ka semana alang sa nahibilin sa imong kinabuhi.”

Kadto usa ka dili komportable nga pahigmata nga nagkinahanglan og dinalian nga pagtagad.

Dayon miabot ang pagpamalandong pinaagi sa usa ka pangutana. Nangutana ko sa akong kaugalingon: “OK! Ang akong pisikal nga panan-aw dili maayo, apan unsa kaha ang akong espirituwal nga panan-aw? Nagkinahanglan ba ako og pagtambal niini? Ug unsay buot ipasabot sa pagbaton og tin-aw nga espirituwal nga panan-aw?”

Namalandong ko sa istorya sa usa ka tawo nga buta, nga ginganlan og Bartimeo, gihulagway diha sa Ebanghelyo ni Marcos. Ang kasulatan nag-ingon, “Sa pagkabati niya nga mao diay kadto si Jesus nga taga-Nazaret, misinggit siya, Jesus! Kaliwat ni David, kaluy-i intawon ako.”¹

Sa teknikal nga paagi, sa mga mata sa kadaghan, si Jesus anak lang ni Jose, nganong gitawag man Siya ni Bartimeo nga “Anak ni David”? Tungod kay siya nakaila nga si Jesus mao gayod ang Mesiyas, kinsa gipanagna nga matawo isip usa ka kaliwat ni David.²

Makapaikag nga kining buta nga tawo, nga walay pisikal nga panan-aw, nakaila ni Jesus. Nakita niya sa espirituwal unsay dili niya makita sa pisikal, samtang ang uban pisikal nga nakakita ni Jesus apan hingpit nga buta sa espirituwal nga paagi.

Gikan niini nga istorya makakat-on kita og dugang mahitungod sa klaro nga espirituwal nga panan-aw.

Atong mabasa, “Daghan ang mibadlong ug mipahilom kaniya, apan misamot hinuon siya pagsinggit, Kaliwat ni David, kaluy-i intawon ako.”³

Ang tanan nga anaa sa iyang palibot misulti kaniya nga maghilom, apan mas misingit pa siya tungod kay nakaila siya kinsa gayod si Jesus. Gibaliwala niya kadtong mga tingog ug misinggit pa hinuon og kusog.

Milihok siya imbis nga pagaaghaton. Bisan pa sa iyang limitado nga mga sirkumstansiya, gigamit niya ang iyang hugot nga pagtuo nga molapas sa iyang mga limitasyon.

Mao nga, ang unang baroganan nga atong makat-onan mao nga magbaton kita og klaro nga espirituwal nga panan-aw kon kita motutok ni Jesukristo ug magpabilin nga matinud-anon sa atong nahibaloan nga tinuod.

Mga kaigsoonan, aron magpabilin nga kompleto ang atong espirituwal nga panan-aw, kinahanglan nga mohukom kita nga dili maminaw sa mga tingog sa kalibotan sa atong palibot. Niining makalibog ug nalibog nga kalibotan, kita kinahanglang magpabilin nga matinud-anon sa atong nahibaloan, matinud-anon sa atong mga pakigsaad, matinud-anon sa pagtuman sa mga sugo ug ipahayag pag-usab ang atong mga gituohan, nga mas lig-on, sama sa gibuhat niini nga tawo. Kinahanglan kitang mosinggit og mas kusog pa sa atong pagpamatuod sa Ginoo ngadto sa kalibotan. Kining tawhana nakaila ni Jesus, nagpabilin nga matinud-anon sa iyang gituohan, ug wala magpabalda sa mga tingog sa iyang palibot.

Adunay daghang mga tingog karon nga naningkamot sa pagpahinay sa atong mga tingog isip mga disipulo ni Jesukristo. Ang mga tingog sa kalibotan naningkamot sa pagpahilom kanato, apan mao gayod kana nganong ipahayag nato og mas kusog pa ang atong pagpamatuod bahin sa Manluluwas. Sa tanang tingog sa kalibotan, ang Ginoo naglaom kanako ug kaninyo sa pagpahayag sa atong mga pagpamatuod, sa pagpataas sa atong tingog ug mahimong Iyang tingog. Kon dili kita mohimo niini, kinsa ang mopamatuod ni Jesukristo? Kinsa ang mosulti sa Iyang ngalan ug mopahayag sa Iyang balaan nga misyon?

Kita adunay espirituwal nga sugo nga naggikan sa atong kahibalo bahin ni Jesukristo.

Apan unsa ang gibuhat ni Bartimeo human niana?

Sa sugo sa Ginoo sa pagtindog, gihimo niya pinaagi sa hugot nga pagtuo.

Ang mga kasulatan nag-ingon, “Ug giwakli niya ang iyang kupo, milukso siya ug miduol kang Jesus.”⁴

Kining mapainubsanon ug matinud-anon nga tawo nakasabot nga siya makatindog ngadto sa mas maayo nga kinabuhi sa sugo ni Jesus. Siya nasayod nga siya mas maayo kay sa iyang mga sirkumstansiya, ug ang labing unang butang nga iyang gibuhat sa dihang nakadungog siya nga gitawag siya ni Jesus mao ang pagsalibay sa iyang panglimos nga kupo.

Usab siya milihok imbes nga pagaaghaton.

Siya tingali naghunahuna, “wala na ko magkinahanglan niini, karon nga si Jesus anaa na sa akong kinabuhi. Kini usa ka bag-ong adlaw. Humana ako niining makaluluoy nga kinabuhi. Uban ni Jesus makasugod ko og bag-ong kinabuhi sa kalipay ug kamaya diha Kaniya, uban Kaniya, ug pinaagi Kaniya. Ug dili nako igsapayan unsay hunahuna sa kalibotan kanako. Si Jesus nagtawag kanako, ug Siya motabang nako nga magpuyo og bag-ong kinabuhi.”

Pagkatalagsaon nga kausaban!

Sa iyang pagsalibay sa panglimos nga kupo, giwala niya ang tanang rason.

Ug kini mao ang ikaduhang baroganan: makapadayon kita og klaro nga espirituwal nga panan-aw kon biyaan nato ang kinaiyanhon nga tawo, maghinulsol, ug magsugod og bag-o nga kinabuhi diha ni Kristo.

Ang paagi sa pagbuhat niini mao ang paghimo ug pagtuman sa mga pakigsaad sa pagtindog ngadto sa mas maayo nga kinabuhi pinaagi ni Jesukristo.

Samtang kita magpadayon nga mangita og mga rason aron kaloy-an ang atong kaugalingon, kaloy-an ang atong mga sirkumstansiya ug mga problema, ug sa tanang dili maayong mga butang nga nahitabo sa atong kinabuhi, ug bisan sa tanang tawo nga daotan nga sa atong hunahuna maoy naghimo nato nga magul-anon, nagsul-ob gihapon kita sa panglimos nga kupo. Tinuod nga, usahay, ang mga tawo, sa (tinuyo man o dili), mopasakit kanato. Apan kita kinahanglan nga mohukom sa paglihok inubanan sa hugot nga pagtuo diha ni Kristo pinaagi sa pagtangtang sa mental ug emosyonal nga kupo nga tingale atoa gihapong gisul-ob aron itago ang mga rason o sala ug isalibay kini, nga nakahibalo nga Siya makaayo ug moayo kanato.

Wala gayoy maayo nga rason sa pag-ingon nga, “Ingon man gayod ako niini tungod sa kawalay paglaom ug dili maayo nga mga sirkumstansiya. Ug dili ako makausab, ug ako hatagan ra og kaangayan.”

Kon kita maghunahuna nianang paagiha, kita mihukom nga kita angay pa nga pagaaghaton.

Nagsul-ob gihapon kita sa panglimos nga kupo.

Ang paglihok inubanan sa pagtuo nagpasabot nga mosalig sa atong Manluluwas, magatuo nga pinaagi sa Iyang Pag-ula, kita maka tindog ibabaw sa tanan sa Iyang pagmando.

Ang ikatulo nga baroganan anaa sa kataposang upat ka pulong: “[siya] miduol kang Jesus.”

Unsaon man niya sa pagduol kang Jesus nga buta man siya? Ang bugtong paagi mao ang paglakaw padulong ni Jesus pinaagi sa pagpaminaw sa Iyang tingog.

Ug kini mao ang ikatulo nga baroganan: makaangkon kita og klaro nga espirituwal nga panan-aw kon kita maminaw sa tingog sa Ginoo ug motugot Kaniya sa paggiya kanato.

Sama niini nga tawo nga mipataas sa iyang tingog labaw sa mga tingog nga naglibot kaniya, nakapaminaw siya sa tingog sa Ginoo sa taliwala sa tanang uban pa nga tingog.

Mao gihapon kini nga hugot nga pagtuo nga nakapahimo ni Pedro sa paglakaw ibabaw sa tubig dihang padayon niyang gitumong ang iyang espirituwal nga pokus ngadto sa Ginoo ug wala mabalda sa mga hangin sa iyang palibot.

Dayon ang istorya bahin niining tawo nga buta natapos sa mga pulong “dihadiha nakakita ang buta ug mikuyog siya kang Jesus.”⁵

Usa sa labing importante nga mga leksiyon niini nga istorya mao nga kini nga tawo nagpakita og tinuod nga hugot nga pagtuo ni Jesukristo ug nakadawat og milagro tungod kay nangayo siya inubanan sa tinuod nga katuyoan, ang tinuod nga katuyoan sa pagsunod Kaniya.

Ug kini mao ang labing maayong rason alang sa mga panalangin nga atong madawat sa atong kinabuhi, nga mao ang pagsunod ni Jesukristo. Mahitungod kini sa pag-ila Kaniya, paghimo ug pagtuman sa mga pakigsaad uban sa Dios tungod Kaniya, ang pag-usab gayod sa atong kinaiya pinaagi Kaniya, ug paglahutay hangtod sa kataposan pinaagi sa pagsunod Kaniya.

Alang nako, ang pag-angkon og klaro nga espirituwal nga panan-aw, tanan mahitungod sa pagtutok kang Jesukristo.

Mao nga ang akong espirituwal nga panan-aw klaro ba, sama sa akong pagpa-indyeksiyo sa akong mata? Nan, kinsa man ko nga mosulti? Apan mapasalamaton ko sa unsay akong nakita.

Klaro nakong nakita ang impluwensiya sa Ginoo niining sagrado nga buhat ug sa akong kinabuhi.

Nakita nako ang hugot nga pagtuo sa kadaghanan bisan asa ako moadto nga nakapalig-on sa akong kaugalingong hugot nga pagtuo.

Ako nakakita og mga anghel sa akong palibot.

Ako nakakita og hugot nga pagtuo sa kadaghanan nga wala makakita sa Ginoo sa pisikal nga paagi apan nakaila Kaniya sa espirituwal nga paagi, tungod kay sila nakaila gayod sa hingpit Kaniya.

Ako mopamatuod nga kini nga ebanghelyo mao ang tubag alang sa tanan nga butang, tungod kay si Jesukristo mao ang tubag alang sa tanan. Ako mapasalamaton unsay akong makita samtang ako mosunod sa akong Manluluwas.

Mosaad ko nga kon kita maminaw sa tingog sa Ginoo ug motugot Kaniya sa paggiya kanato diha sa dalan sa pakigsaad sa Manluluwas, kita mapanalanginan og klaro nga pana-awon, espirituwal nga pagsabot, ug kalinaw sa kasingkasing ug hunahuna sa atong tibuok kinabuhi.

Hinaot nga atong isinggit ang atong pagpamatuod Kaniya nga mas kusog kay sa mga tingog nga naglibot kanato sa usa ka kalibotan nga kinahanglan nga makadungog og dugang pa mahitungod ni Jesukristo ug dili gamay lang. Hinaot nga atong huboon ang panglimos nga kupo nga tingali gisul-ob gihapon nato ug makatindog ibabaw sa kalibotan ngadto sa usa ka mas maayo nga kinabuhi ug pinaagi ni Kristo. Hinaot nga atong hunongon ang tanang pagpangrason nga dili mosunod ni Jesukristo ug mangita sa tanang maayong mga hinungdan sa pagsunod Kaniya samtang maminaw kita sa Iyang tingog. Kini ang akong pag-ampo sa ngalan ni Jesukristo, amen.