Kaalam Kini sa Ginoo Nga Kita Kinahanglan nga Makabaton sa Basahon ni Mormon

Minahal nga kaigsoonan, mapasalamaton kaayo kami sa inyong mga paningkamot sa pagbasa sa mga kasulatan uban sa Dali, Sunod Kanako. Salamat sa tanan nga inyong gibuhat. Ang inyong inadlaw nga koneksiyon sa Dios ug sa Iyang pulong adunay mahinungdanong mga sangpotanan. “Kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko.”¹

Ang pagbasa sa mga pagtulon-an sa Manluluwas diha sa mga kasulatan makatabang nato nga mausab ang atong mga panimalay ngadto sa mga santuwaryo sa hugot nga pagtuo ug mga sentro sa pagkat-on sa ebanghelyo.² Nagdapit kini sa Espiritu nganha sa inyong mga panimalay. Ang Espiritu Santo mopuno sa atong mga kalag og kamaya³ ug mokabig nato ngadto sa tibuok kinabuhi nga mga disipulo ni Jesukristo.

Niining milabay nga pipila ka tuig, samtang nagbasa sa mga basahon sa balaan nga kasulatan, atong naobserbahan ang kahalapad sa mga pagtulon-an sa Dios ngadto Iyang mga anak diha sa tanang mahinungdanong mga dispensasyon sa ebanghelyo.⁴

Sa matag dispensasyon, nakita nato ang pamilyar nga sundanan. Ang Dios mipahiuli o mipadayag sa ebanghelyo ni Jesukristo pinaagi sa Iyang mga propeta. Ang mga tawo misunod sa mga propeta ug napanalanginan gayod. Hinuon, paglabay sa panahon, ang ubang tawo mihunong sa pagpaminaw sa mga pulong sa mga propeta ug mipalayo sa Ginoo ug sa Iyang ebanghelyo. Mao kini ang atong gitawag nga apostasiya. Ang ebanghelyo unang gipadayag ngadto kang Adan, apan pipila sa mga anak ni Adan ug ni Eva mipalayo sa Ginoo pinaagi sa apostasiya.⁵ Atong makita ang usa ka sundanan sa pagpahiuli ug sa apostasiya nga nagbalik-balik sa mga dispensasyon ni Enoch, ni Noe, ni Abraham, ni Moises, ug sa uban pa.

Karon, nagpuyo kita sa dispensasyon sa kahingpitan sa mga panahon.⁶ Kini lamang ang dispensasyon nga dili matapos sa apostasiya.⁷ Kini mao ang dispensasyon nga mopasiugda sa Ikaduhang Pag-anhi sa Manluluwas nga si Jesukristo ug sa Iyang milenyal nga paghari.

Mao nga, unsa ang nakalahi niini nga dispensasyon? Unsa ang gisangkap sa Ginoo nato karon, labi na sa atong panahon, nga makatabang nato nga mapaduol ngadto sa Manluluwas ug dili gayod mobiya Kaniya?

Ang usa ka tubag nga misantop sa akong hunahuna mao ang mga kasulatan—ug ilabi na ang Basahon ni Mormon: Lain nga Tugon ni Jesukristo.

Bisan kon ang Dios misaad nga wala na gayoy laing kinatibuk-an nga apostasiya, kinahanglan nga maghunahuna ug mag-amping kita nga malikayan ang personal nga apostasiya—maghinumdom nga, sama sa gitudlo ni Presidente Russell M. Nelson, “Matag usa kanato responsable alang sa atong indibidwal nga espirituwal nga paglambo.”⁸ Ang pagtuon sa Basahon ni Mormon, sama sa atong gihimo karong tuiga, sa kanunay makapaduol nato ngadto sa Manluluwas—ug makatabang nato nga magpabiling duol Kaniya.

Gitawag nato kini og “pagtuon,” ug maayo kana tungod kay nagpakita kini og paningkamot. Apan dili kita magkinahanglan kanunay nga magkat-on og pipila ka bag-ong kamatuoran. Usahay ang pagbasa sa Basahon ni Mormon mao ang pagbati lang nga nakakonektar sa Dios karong adlawa—mag-amuma sa kalag, magpalig-on una sa dili pa mogawas aron moatubang sa kalibotan, o mangita og pagkaayo human sa lisod nga adlaw sa kalibotan.

Magtuon kita sa mga kasulatan aron ang Espiritu Santo, ang halangdon nga magtutudlo, makapalawom sa atong pagkakabig ngadto sa Langitnong Amahan ug ni Jesukristo ug makatabang nato nga mas mahisama Kanila.⁹

Naghunahuna niini, atong ikonsiderar, “Unsa ang gitudlo sa Espiritu Santo nato karong semanaha atol sa atong pagtuon sa Basahon ni Mormon?” ug “Sa unsang paagi nga kini makapaduol nato ngadto sa Manluluwas?”

Mao kini ang maayo nga mga pangutana alang sa atong pagtuon sa kasulatan diha sa panimalay. Kini nindot usab kaayo nga mga pangutana aron sa pagsugod sa klase sa Dominggo diha sa simbahan. Atong mapalambo ang atong pagtudlo diha sa simbahan ma-Dominggo pinaagi sa pagpalambo sa atong pagkat-on diha sa panimalay atol sa semana. Sa ingon, sa atong mga klase sa Dominggo, “siya nga nagsangyaw ug siya nga nakadawat, nakasabot sa usag usa, ug ang duha makadawat og kaayohan ug maglipay nga maghiusa.”¹⁰

Ania ang pipila ka bersikulo nga gidasig sa Espiritu ngari sa akong hunahuna gikan sa pagtuon sa Basahon ni Mormon karong semanaha:

• Si Nephi mipahimangno ni Jacob nga “tipigan kini nga mga palid ug ihatag kini … gikan sa usa ka henerasyon ngadto sa mosunod nga mga henerasyon. Ug kon adunay mga pagsangyaw nga sagrado, o pagpadayag …, o pagpanagna,” si Jacob kinahanglang “[mo]kulit … niana dinhi niini nga mga palid … tungod ug alang sa [ilang] katawhan.”¹¹

• Si Jacob sa kaulahian mipamatuod, “Nangita kami sa [mga kasulatan], … ug kay aduna kami sa tanan niini nga mga pagpamatuod naangkon namo ang usa ka paglaom, ug ang among pagtuo dili na matarog.”¹²

Karon, kini nga mga bersikulo nakapahinumdom nako sa unsay gisulti ni Nephi kaniadto mahitungod sa mga palid nga tumbaga:

“Among nakuha ang mga talaan … ug misiksik niini ug nakita nga kini … bililhon kaayo ngari kanamo, nga niana among mapatunhay ang mga sugo sa Ginoo alang sa among mga anak.

“Mao nga, kaalam kadto sa Ginoo nga kinahanglan among madala kini, samtang magpanaw kami sa kamingawan padulong sa yutang saad.”¹³

Karon, kon kaalam kadto alang kang Lehi ug sa iyang pamilya nga makabaton sa mga kasulatan, ingon lang kini ka maalamon alang kanato. Ang pagkabililhon ug ang espirituhanong gahom sa mga kasulatan nagpadayon sa pagdan-ag sa atong mga kinabuhi karon.

Walay katawhan sukad sa kasaysayan nga adunay akses sa Basahon ni Mormon ug ubang mga kasulatan nga atong natagamtaman karon.¹⁴ Oo, si Lehi ug ang iyang pamilya napanalanginan nga madala ang mga palid nga tumbaga, apan sila walay kopya alang sa matag tolda! Ang labing importante nga kopya sa Basahon ni Mormon mao ang atong personal nga kopya. Ang kopya nga atong basahon.

Diha sa panan-awon ni Lehi sa kahoy sa kinabuhi, si Lehi mitudlo nato sa kaimportante sa personal nga kasinatian uban sa gugma sa Dios. Human sa iyang pagkaon sa bunga, nakita ni Lehi ang iyang asawa, si Sariah, ug ang iyang mga anak nga lalaki nga si Nephi ug si Sam nga anaa sa dili kaayo layo.

“Sila nagbarog nga ingon og wala masayod asa sila paingon.

“… Gikamay nako sila,” miingon si Lehi, “ug usab mitawag kanila pinaagi sa kusog nga tingog nga sila moduol kanako, ug mokaon sa bunga, nga madanihon nga labaw pa sa uban nga bunga.

“Ug … miduol sila kanako ug mikaon usab sa bunga.”¹⁵

Ganahan ko sa ehemplo ni Lehi sa maalamon nga pagkaginikanan. Si Sariah, si Nephi, ug si Sam nagpuyo og maayo, matarong nga mga kinabuhi. Apan ang Ginoo adunay usa ka butang nga mas maayo, usa ka butang nga mas tam-is alang nila. Sila wala masayod kon asa kini pangitaa, apan si Lehi nasayod. Mao nga siya mitawag kanila, “pinaagi sa kusog nga tingog,” nga moduol ngadto sa kahoy sa kinabuhi ug mokaon sa bunga sa ilang kaugalingon mismo. Ang iyang mando klaro. Dili gayod masaypan sa pagsabot.

Produkto ko sa susama nga maalamon nga pagkaginikanan.¹⁶ Sa bata pa ko, tingali mga 11 o 12 anyos, ang akong inahan nangutana nako, “Mark, nasayod ka ba sa imong kaugalingon mismo, pinaagi sa Espiritu Santo, nga ang ebanghelyo tinuod?”

Nasurprisa ko sa iyang pangutana. Kanunay kong naningkamot nga mahimong “buotan nga bata,” ug sa akong hunahuna igo na kana. Apan ang akong inahan, sama ni Lehi, nasayod nga aduna pay butang nga gikinahanglan. Gikinahanglan nako nga molihok ug masayod sa akong kaugalingon mismo.

Mitubag ko nga wala pa ko makasulay niana nga kasinatian. Ug murag wala ra siya masurprisa sa akong tubag.

Dayon misulti siya og usa ka butang nga wala gyod nako makalimti. Nahinumdoman nako ang iyang mga pulong hangtod karong adlawa: “Ang Langitnong Amahan gusto nga ikaw masayod sa imong kaugalingon mismo. Apan kinahanglan ka nga mopakita og paningkamot. Kinahanglan ka nga magbasa sa Basahon ni Mormon ug mag-ampo aron masayod pinaagi sa Espiritu Santo. Ang Langitnong Amahan motubag sa imong mga pag-ampo.”

Wala pa gyod nako mabasa ang Basahon ni Mormon kaniadto. Wala ko maghunahuna nga igo na ang akong pangidaron aron buhaton kana. Apan ang akong inahan mas nahibalo.

Ang iyang pangutana nakapukaw sa akong tinguha nga masayod sa akong kaugalingon mismo.

Mao nga, matag gabii, sa kwarto nga katulganan kauban ang akong duha ka igsoong lalaki, akong gipasiga ang suga ibabaw sa akong higdaanan ug nagbasa og usa ka kapitulo sa Basahon ni Mormon. Dayon, gipalong ang suga, mikanaog ko sa higdaanan nga miluhod ug nag-ampo. Mas sinsero ko nga nag-ampo ug adunay mas dakong tinguha kaysa akong gihimo kaniadto. Mihangyo ko sa Langitnong Amahan nga unta pahibaloon ko bahin sa kamatuoran sa Basahon ni Mormon.

Sukad sa akong pagsugod og basa sa Basahon ni Mormon, gibati nako nga ang Langitnong Amahan nahibalo sa akong mga paningkamot. Ug mibati ko nga ako importante ngadto Kaniya. Samtang nagbasa ug nag-ampo ko, ang komportable, malinawon nga mga pagbati miabot kanako. Kapitulo human sa usa ka kapitulo, ang kahayag sa hugot nga pagtuo nag-anam og kahayag sulod sa akong kalag. Wala madugay, akong naamgohan nga kini nga mga pagbati mao ang pamatuod gikan sa Espiritu Santo.¹⁷ Akong nasayran sa akong kaugalingon mismo nga ang Basahon ni Mormon tinuod ug si Jesukristo mao ang Manluluwas sa kalibotan. Mapasalamaton kaayo ko sa dinasig nga pagdapit sa akong inahan.

Kini nga kasinatian sa pagbasa sa Basahon ni Mormon sa bata pa ko misugod og sundanan sa pagtuon sa kasulatan nga nagpadayon sa pagpanalangin nako hangtod karon. Nagbasa gihapon ko sa Basahon ni Mormon ug nagluhod sa pag-ampo. Ug ang Espiritu Santo balik-balik nga nagpamatuod sa kamatuoran niini.

Sakto ang gisulti ni Nephi. Kaalam kini sa Ginoo nga kinahanglan natong dad-on ang mga kasulatan sa tibuok natong kinabuhi. Ang Basahon ni Mormon mao ang “sukaranan” nga nakapahimong lahi niini nga dispensasyon kaysa sa tanang miaging mga dispensasyon. Kon kita magtuon sa Basahon ni Mormon ug mosunod sa buhi nga propeta, walay personal nga apostasiya sa atong mga kinabuhi.¹⁸

Ang pagdapit nga moduol ngadto sa kahoy sa kinabuhi pinaagi sa paghupot og maayo sa pulong sa Dios dili lang usa ka pagdapit gikan ni Lehi ngadto sa iyang pamilya, ug dili lang kini usa ka pagdapit gikan sa akong inahan alang nako nga magbasa ug mag-ampo mahitungod sa Basahon ni Mormon. Kini usa ka pagdapit usab gikan sa atong propeta, si Presidente Russell M. Nelson, ngari sa matag usa nato.

“Mosaad ko,” siya miingon, “nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ko ninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi.”¹⁹

Kini ang akong pag-ampo nga ang pagbasa sa Basahon ni Mormon karong tuiga mahimong kalipay ug panalangin sa matag usa nato ug makapaduol gayod nato ngadto sa Manluluwas.

Ang Langitnong Amahan buhi. Si Jesukristo mao ang atong Manluluwas ug Manunubos. Ang Basahon ni Mormon naglangkob sa Iyang mga pulong ug nagpadangat sa Iyang gugma. Si Presidente Russell M. Nelson mao ang buhi nga propeta sa Ginoo karon dinhi sa yuta. Ako nasayod nga kini nga mga butang tinuod tungod sa mapamatuoron nga pagsaksi sa Espiritu Santo, kana nga pagsaksi una nakong nadawat samtang nagbasa ko sa Basahon ni Mormon sa bata pa ko. Sa ngalan ni Jesukristo, amen.